1 Iwe non ewe fansoun non ekkewe ranin Ahaz ewe noun Jotham, ewe noun Uzziah, kingen Judah, pwe Rezin, kingen Syria, me Pekah ewe noun Remaliah, kingen Israel, a feita ngeni Jerusalem pwe epwe maun ngeni, nge ese tongeni okkufu.

2 Iwe a fateno ngeni imwen David, a apasa: Syria a chungeni Ephraim. Iwe netipan a mwokut, me netipen noun kewe aramas, usun ekkewe iran nein petewen ra mwokut ren ewe asepwan.

3 Mwirin ewe Samon a apasa ngeni Isaiah: Feino iei pwe kopwe churi Ahaz, en me Shearjashub noum we anuon, non nesopun aanen ewe asan warawar non ewe aanenapen ewe masies an ewe chon for mangaku;

4 Iwe apasa ngeni i: Kopwe tumunuoch, me kopwe fanafaneno; kosap nuokus, kosap pwan noninen pun ekkewe ruofoch ukun amuch mi otuot, pun ewe song mi pochokun an Rezin ngeni Syria, me an noun Remaliah.

5 Pokiten Syria, Ephraim, me ewe noun Remaliah, ra fen akkota aurour mi ngaw ngonuk, ra apasa:

6 Sipwene feita ungeni Judah me eriaffou, me sipwe atai pwe sipwe tonong, me awiisa emon king nukanapan, ewer, ewe noun Tabeal.

7 Iei anon ewe Samon Kot: Esap uta, esap pwan fisino.

8 Pun ewe mokurenapen teninimwen Syria ina Damascus, me ewe mokurenapen teninimwen Damascus, Rezin; iwe me mwen wone me nimu ier Ephraim epwe morono pwe esap chiwen ew mwicheichen aramas.

9 Iwe ewe mokurenapen teninimwen Ephraim ina Samaria, me ewe mokurenapen Samaria ina noun Remaliah we anuon. Ika ousap nuku iwe ennet ousap tumun.

10 Soposopono, ewe Samon a pwan kapas ngeni Ahaz, a apasa:

11 Kopwe tingorei ewe Samon om Kot ew esisin; kopwe tingorei ew esisinen seni anonnonun fonufan, ika seni asan non nang.

12 Nge Ahaz a apasa: Usap tingor, usap pwan sotuni ewe Samon.

13 Iwe a apasa: Kopwe rongorong iei, O imwen David; a ew mettoch mi kukkun ren om kopwe apekusu aramas, nge oupwe pwan apekusu ai Kot?

14 Iei minne, ewe Samon pwisin epwe ngonuk ew esisin—Nengeni, emon fopun nimenimoch epwe pwopwo, me epwe nounatiw emon at, me epwe eita ngeni Immanuel.

15 Pwetö me punech i epwe mwongo, pwe i epwe sinei an esap etiwa ewe mi ngaw me epwe finata ewe mi och.

16 Pun me mwen ewe monukon epwe sinei an esap etiwa ewe mi ngaw me finata ewe mi och, ewe fonu ka oput epwe monnukuno seni ir me ruomon noun kewe king.

17 Ewe Samon epwe forata wom, me won noum kewe aramas, me won imwen semom we, ekkewe ran rese mwo feito seni ewe ran nupwen Ephraim a suno seni Judah, ewe kingen Assyria.

18 Iwe ewe fansoun epwe feito pwe non ewe ran pwe nupwen Samon epwe eisis pwe epwe kokkori ewe noong a nom non ewe towawenon kinikinin Egypt, me kokkori ewe sisata ewe a nom non ewe fonuen Assyria.

19 Iwe repwe feito, me ir meinisin repwe nom non ekkewe nemonun chuk mi ponnuno, me non ekkewe pwangen ekkewe fau, me won ira fonufon meinisin, me won petewen meinisin.

20 Non ewe pwan chok ran ewe Samon epwe raisew ren efoch raiso mi kamo, me ren ir ekkewe pekinon ewe chonupupu, me ren ewe kingen Assyria, ewe mokur, me ewe unounen ekkewe peche; iwe epwe pwan raisew ewe enis.

21 Iwe ewe fansoun epwe feito pwe non ena ran, emon mwan epwe tumunu emon appanen kou me ruomon siip;

22 Iwe ewe fansoun epwe feito pwe, pokiten mi wor chommongun minik i epwe mwongo pwetö; pun meinisin ekkewe ra nometiw non ewe fonu repwe mwongo pwetö me punech.

23 Iwe ewe fansoun epwe feito pwe non ena ran, ew me ew neni epwe fis, ikewe mi wor ew ngerou ira kreip ren ew ngerou foun silver, epwe winiti petewen mi fonufon me ira fonufon.

24 Mwan repwe feito ngeni ena neni fiti foun nikappich me nikappich, pokiten unusen ewe fonu epwe winiti petewen fonufon me ira fonufon.

25 Iwe ekkewe chukuchukuta meinisin repwe tuuta ren ewe mechan tuu puun, esap feito ikewe ewe nuokusun petewen fonufon me ira fonufon; nge epwe winiti nenien titinon oksen, me puratiwen appanen siip me sike.