1 Ewe porousen riaffou an Babylon, minne Isaiah ewe noun Amoz a kuna.

2 Ekieta ew finaik won unungen ewe chuk mi tekia, anoumwongu ewe mongungu ngeni ir, uchuki ewe pau, pwe repwe feino non ekkewe tittin ekkewe aramas tekia.

3 Ua fen annuku nei kewe mi enimenimochuno, ua pwan kori nei kewe mi napanap, pun ai song ese nom won ir ekkewe ra pwapwa non ai tekia.

4 Ewe akurangen ewe mwicheich won ekkewe chuk a usun chok ew mwichen aramas mi napanap, ew neuwomwongun akurangen ekkewe muun fonu ra ioifengen, ewe Samonun Mwicheichen Aramas a ionifengeni ekkewe mwicheichen ewe maun.

5 Ra feito seni ew fonu towaw, seni nesopun nang, ewer, ewe Samon, me ekkewe pisekin maunen an song mi pungoch, an epwe atano unusen ewe fonu.

6 Ngungures ami, pun ewe ranin ewe Samon a arapeto; epwe feito usun ew kiteter seni ewe emon mi Tekia.

7 Iei minne pau meinisin repwe apwangapwang, netipen aramas meinisin repwe peno;

8 Iwe repwe nuokus; metek mi ken me netipengaw repwe angeireno; repwe mairu emon ren emon; meser epwene usun saramen ekkei.

9 Nengeni, ewe ranin ewe Samon a feito, emmetek ren ningeringer me pwan ren song pochokun, pwe epwe fori ewe fonu epwe ponnuno; iwe i epwe nieno ekkewe chon tipis ikewe seni ewe neni.

10 Pun ekkewe fuuen nang me ekkewe mwichen fuu ikewe resap awora saramer; ewe akkar epwe rochono non an feino, iwe ewe maram esap fori saraman an epwe saram.

11 Iwe upwe ngeni niwinin ewe fonufan pokiten mi ngaw, me ekkewe aramas mi ngaw pokiten ar angangangaw; upwe fori tipewatten ewe mi namanam tekia epwe kouno, iwe upwe aukatiw sikesiken ewe mi aniweniw.

12 Upwe fori pwe emon aramas epwe kon auchea nap seni gold mi nimoch; pwan mwo emon aramas epwe auchea nap seni ewe gold mi for seni Ofer.

13 Iei minne, upwe uchuki ekkewe nang, iwe ewe fonufan epwe mwokutuu seni nenian, non ningeringerin ewe Samonun Mwicheichen Aramas, me non ewe ranin an song mi pochokun.

14 Iwe epwe usun ewe chia ir mi chei, me usun emon siip ese wor emon epwe ioni; iwe repwe pwisin niwin ngeni nour aramas, me asueno meinisin ngeni pwisin fonuer.

15 Meinisin ekkewe mi namanam tekia repwe pwos; ewer, iwe meinisin ekkewe ra chungeni ekkewe aramas mi ngaw repwe turutiw me ren ewe ketinas.

16 Nour kewe repwe pwan tatakisitiw ngeni kukkunun kinikin me mwen meser; imwer kewe repwe niapeni ir me punuwer kewe repwe ochomanau.

17 Nengeni, upwe amwasangata ekkewe Mits repwe ungeni ir, ewe esap aucheani silver me gold, resap pwan pwapwa non ir.

18 Nour kewe nikappich repwe pwan atatakisi ekkewe anuon ngeni kukkunun kinikin; iwe esap wor ar kirekiroch won uwan ewe neenuk; meser esap amanaua ekkewe semirit.

19 Iwe Babylon, ewe ningen ekkewe muu, ewe ningochun an ekkewe chon Kalti echipwer, epwe usun nupwen Kot a akkufatiw Sodom me Gomorrah.

20 Esap tongeni epwe masow, esap pwan wor epwe nonnom non seni fansoun tori fansoun: ekkewe chon Arabia resap pwan aueta imwer kewe imw mangaku ikewe; ekkewe chon masen siip resap pwan fori ar nenien siip ikewe.

21 Nge ekkewe man mwachon ewe fonu pon repwe nonnom ikewe; iwe imwer kewe repwe ureno ren man mi nikinikingaw; me ekkewe koki repwe nonnom ikewe, me ekkewe niemwanin sike repwe pworuk ikewe.

22 Iwe ekkewe man mwachon ekkewe fonuen neset repwe puchor non imwer kewe mi ponnuno, me ekkewe dragon non imwer kewe mi ning watte; iwe an fansoun a arap epwe feito, me ranin esap mangeno. Pun upwe mwitir ataieno; ewer, pun upwe umoumoch ngeni nei kewe aramas, nge ekkewe aramas mi ngaw repwe mano non pekin ngun.