1 Aneasochis ngeniei, ami ekkewe oua tapweno mwirin wenechar. Nengeni ewe fau seni minne oua onusu seni, me ngeni ngaten ewe pwang seni minne neni oua sinnata.

2 Ekieki usun Abraham, sememi we, me usun Sarah, i ewe a oupakemitiw; pun ua kokkori i chok, me efeiochu i.

3 Pun ewe Samon epwe ekinamwei Zion, i epwe ekinamwei meinisin nenian kewe mi pon; iwe i epwe fori an fonu pon epwe usun Eden, me an we fonu pwas usun ewe ataken ewe Samon. Pwapwa me meseik repwe pwá me non, kapasen kinisou me ewe mongungun ngingin kon.

4 Ausening ngeniei, nei aramas; me ausening ngeniei, O ai muu; pun ew annuk epwe tou seniei, iwe upwe fori ai kapung epwe nonnom pun epwe ew saram fan iten ekkewe aramas.

5 Ai wenechar a arapeto; ai amanau a feino, me pei epwe apungu ekkewe aramas. Ekkewe fonuen neset repwe witiei, me won pei repwe apinukunuku.

6 Neneta mesom ngeni ekkewe nang, me neneta won ewe fonufan a nom fan; pun ekkewe nang repwe moreno usun otuot, iwe ewe fonufan epwe mesino usun echo mangaku; iwe ir ekkewe ra nonnom won repwe mano non ena napanap. Nge ai amanau epwe feinfeino chok, me ai wenechar esap wesino.

7 Ausening ngeniei, ami ekkewe oua sinei wenechar, ekkewe aramas minne non netiper ua fen makkei ai annuk, ousap nuokusiti etipisin aramas, ika ousap pwan nuokusiti ar kewe turunufas.

8 Pun ewe manchonap epwe anireno usun echo mangaku, me ewe nikanipun epwe enir usun unen siip. Nge ai wenechar epwe feinfeino chok, me ai amanau epwe nonnom seni ew tappin aramas ngeni ew tappin aramas.

9 Neno, neno! Ufoufuta pochokun, O poun ewe Samon; neno usun non ekkewe ranin nom. Esap en ewe a poku Rahab, me ekinasa ewe dragon?

10 Esap en ewe a fen appwasano ewe sat, ewe konikin matau mi fokkun anonnon; ewe a fori anonnonun ewe sat pwe ew aan fan itan ewe mi ngaseno epwe feino ngeni ewe epek?

11 Iei minne, ekkewe mi ngaseno me ren ewe Samon epwe niwinto, me feito fiti kön ngeni Zion; me pwapwa esemuch me fel epwe nonnom won mokurer; iwe repwe angei meseik me pwapwa; netipengaw me netipeta repwe wesino.

12 Ngang i; ewer, ngang i ewe a ekinamweikemi. Nengeni, en ion, ina kopwe nuokusiti aramas, ekkewe repwe mano, me ekkewe noun aramas, ekkewe repwe foruno usun chok fetin?

13 Me monnukano ewe Samon om chon for, ewe a emeiano ekkewe nang, me forata ekkewe nongonongen ewe fonufan, me a nuokus fansoun meinisin iteiten ran, pokiten ewe ningeringerin ewe chon eriaffou, usun ita a monneta epwe atano? Iwe ifan ningeringerin ewe chon eriaffou?

14 Ewe chon fotek a mwitirino, pwe epwe pichino, iwe pwe i esap mano non ewe pwang, ika pwan anan we pinewa esap chiwen wor.

15 Nge ngang ewe Samon om Kot, an kewe nó ra weruwer; ewe Samonun Mwicheichen Aramas ina itei.

16 Iwe ua fen wanong ai kewe kapas non awemi, me ponukemino non chimwonun pei, pwe upwe tongeni fotuki ekkewe nang me forata ekkewe nongonongen ewe fonufan, me apasa ngeni Zion: Nengeni, ami nei aramas.

17 Neno, neno, uta, O Jerusalem, ewe a fen unumi me ren poun ewe Samon ewe kapen an ningeringer—ka fen unumi ekkewe moromoren apin ewe kapen taroporop a wungunguu—

18 Iwe ese wor epwe emmweni me nein meinisin ekkewe anuon i a fen wato; esap pwan wor epwe angei i me ren poun, me nein meinisin ekkewe anuon i a amarireta.

19 Ekkei ruemon anuon ra feito ngonuk, ekkewe repwe niamam fan itom—om tatakis me tano, me ewe nengita me ewe ketinas—iwe me ren ion upwe ekinamweuk?

20 Noum kewe anuon ra peno, tiwenon chok ekkei ruemon; ra kon nepopun meinisin ekkewe aan; usun emon niemwanin kou mwacho non ew cheew, ra uren ewe ningeringerin ewe Samon, ewe kapung an om Kot.

21 Iei minne rongorong ei iei, en mi riaffou, me sakaweno, iwe esap ren wain:

22 Iei anon ewe Samon, ewe Samon me om Kot a tingor pochokun fan iten pungun noun aramas; nengeni, ua fen wau seni poum ewe kapen chechech, ekkewe moromoren apin ewe kapen ai ningeringer; kosap chiwen unumi sefani.

23 Nge upwe wanong non poun ekkewe ra eriaffouk; ekkewe ra apasa ngeni ngunum: Chappetiw, pwe am aupwe feino ewe epek—iwe ka akonatiw inisum usun ewe puun me usun ewe aan ngeni ir ekkewe ra feino ewe epek.

24 Neno, neno, ufoufuta om pochokun, O Zion; ufoufuta ufom mangaku mi ning, O Jerusalem, ewe teninimw mi fel; pun seni ei fansoun esap chiwen wor epwe feito ngonuk ewe ese sirkumsais me ewe mi nimengaw.

25 Uchikano inisum seni ewe toputop; uta, mwotiw, O Jerusalem; epichakeno seni ekkewe fofon uwom, O chon fotek fopunun Zion.