ບົດທີ 18
ພຣະຄຣິດຈະເປັນເໝືອນຫີນທີ່ຕຳຕີນ ແລະ ເປັນເໝືອນແຮ້ວທີ່ຫ້າງໄວ້—ຈົ່ງສະແຫວງຫາພຣະຜູ້ເປັນເຈົ້າບໍ່ແມ່ນໝໍດູທີ່ເວົ້າພ່ຳ—ຈົ່ງກັບມາຫາກົດ ແລະ ປະຈັກພະຍານເພື່ອເປັນການຊີ້ນຳ—ປຽບທຽບກັບເອຊາຢາ 8. ປະມານ 559–545 ປີ ກ່ອນ ຄ.ສ.
1 ຍິ່ງໄປກວ່ານັ້ນ, ພຣະຄຳຂອງພຣະຜູ້ເປັນເຈົ້າໄດ້ກ່າວກັບຂ້າພະເຈົ້າວ່າ: ເຈົ້າຈົ່ງເອົາແຜ່ນໜັງກໍ້ໃຫຍ່ມາ, ແລະ ຂຽນດ້ວຍປາກກາຂອງມະນຸດໃສ່ໃນນັ້ນວ່າ, ມາເຮີຊາລານຫັດສະບັດ.
2 ແລະ ຂ້າພະເຈົ້າໄດ້ນຳເອົາ ພະຍານທີ່ຊື່ສັດມາເຮັດບັນທຶກກັບຂ້າພະເຈົ້າຄື, ອູລິອາ ຜູ້ເປັນປະໂລຫິດ, ແລະ ເຊກາຣີຢາ, ລູກຊາຍຂອງເຢເບເຣກີຢາ.
3 ແລະ ຂ້າພະເຈົ້າໄດ້ສົມສູ່ຢູ່ຮ່ວມກັບ ເມຍຂອງຂ້າພະເຈົ້າ; ແລະ ນາງໄດ້ຕັ້ງທ້ອງ; ແລະ ໄດ້ຄອດລູກມາເປັນຊາຍ. ພຣະຜູ້ເປັນເຈົ້າບອກຂ້າພະເຈົ້າວ່າ: ຈົ່ງເອີ້ນຊື່ຂອງລາວວ່າ ມາເຮີຊາລານຫັດສະບັດ.
4 ຈົ່ງເບິ່ງ, ກ່ອນ ເດັກນ້ອຍຜູ້ນີ້ໃຫຍ່ຂຶ້ນມາພໍຮູ້ຈັກເອີ້ນບິດາມານດາໄດ້, ຊັບສົມບັດທັງໝົດໃນເມືອງດາມັສກັດ ແລະ ຂອງທີ່ ຍາດຊີງມາໄດ້ຈາກຊາມາເຣຍຈະຖືກກະສັດອັດຊີເຣຍຍຶດເອົາໄປໝົດ.
5 ພຣະຜູ້ເປັນເຈົ້າໄດ້ກ່າວກັບຂ້າພະເຈົ້າອີກວ່າ:
6 ຍ້ອນວ່າຜູ້ຄົນພວກນີ້ໄດ້ປະຕິເສດສາຍນ້ຳ ຊີໂລອາທີ່ງຽບສະຫງັດ, ແລະ ສັ່ນເຊັນຕໍ່ໜ້າກະສັດ ເຣສິນ ແລະ ລູກຊາຍຂອງເຣມາລີຢາ;
7 ແລ້ວສະນັ້ນ, ຈົ່ງເບິ່ງ, ພຣະຜູ້ເປັນເຈົ້າຈະນຳເອົານ້ຳຈາກແມ່ນ້ຳທີ່ໄຫລແຮງ, ແລະ ຫລາຍສາຍ ມາຫາພວກເຂົາຈົນກະທັ້ງກະສັດຂອງອັດຊີເຣຍ ແລະ ລັດສະໝີພາບທັງໝົດຂອງເພິ່ນ; ແລະ ເພິ່ນຈະຂ້າມຫ້ວຍ ແລະ ຝັ່ງທັງໝົດຂອງເພິ່ນ.
8 ແລະ ເພິ່ນຈະໄຫລຜ່ານຢູດາໄປ; ເພິ່ນຈະໄຫລ ແລະ ຖ້ວມຈົນເຖິງພຽງຄໍ; ແລະ ການກາງປີກຂອງເພິ່ນຈະເຕັມຄວາມກວ້າງຂອງແຜ່ນດິນຂອງພຣະອົງ, ໂອ້ ເອມານູເອນ.
9 ຈົ່ງພາກັນຢ້ານກົວເຖີດ, ໂອ້ ຊົນຊາດທັງຫລາຍເອີຍ, ເຈົ້າຈະຖືກຫັກເປັນຊິ້ນສ່ວນ; ແລະ ບັນດາປະເທດໄກທັງໝົດຈົ່ງຟັງເດີ້; ແລະ ຕຽມຕົວໄວ້ເຖີດ ແລະ ເຈົ້າຈະຖືກຫັກເປັນຊິ້ນສ່ວນ; ຈົ່ງຕຽມຕົວໄວ້ເຖີດ, ແລະ ເຈົ້າຈະຖືກຫັກເປັນຊິ້ນສ່ວນ.
10 ຈົ່ງວາງແຜນກັນ ແຕ່ມັນຈະບໍ່ສຳເລັດ, ເວົ້າແຕ່ຈະບໍ່ມີປະໂຫຍດ; ເພາະພຣະເຈົ້າຢູ່ກັບພວກເຮົາແລ້ວ.
11 ເພາະພຣະຜູ້ເປັນເຈົ້າໄດ້ເຕືອນຂ້າພະເຈົ້າດ້ວຍລິດທານຸພາບອັນຍິ່ງໃຫຍ່ຂອງພຣະອົງ, ແລະ ແນະນຳຂ້າພະເຈົ້າວ່າ ບໍ່ຄວນເດີນໃນເສັ້ນທາງທີ່ຜູ້ຄົນພວກນີ້ເຮັດ, ໂດຍກ່າວວ່າ:
12 ເຈົ້າຢ່າເວົ້າວ່າ, ພັນທະມິດ, ແກ່ທຸກຄົນທີ່ຜູ້ຄົນພວກນີ້ຈະເວົ້າວ່າ, ພັນທະມິດ; ທັງຢ່າຢ້ານກົວຄວາມຢ້ານກົວຂອງພວກເຂົາ, ຫລື ຢ່າຕົກໃຈເລີຍ.
13 ຖວາຍຄວາມສັກສິດແດ່ອົງຈອມໂຍທາເຖີດ, ແລະ ໃຫ້ພຣະອົງເປັນທີ່ຢ້ານກົວຂອງເຈົ້າ, ແລະ ໃຫ້ພຣະອົງເປັນທີ່ໜ້າເກງຂາມຂອງເຈົ້າ.
14 ແລະ ພຣະອົງເປັນ ສະຖານທີ່ສັກສິດ; ແຕ່ເປັນເໝືອນ ກ້ອນຫີນທີ່ເຮັດໃຫ້ສະດຸດລົ້ມ, ແລະ ເປັນສີລາທີ່ເຮັດໃຫ້ເຄືອງແຄ້ນໃຈຕໍ່ເຊື້ອສາຍອິດສະຣາເອນສອງເຜົ່າ, ເປັນກັບດັກ ແລະ ບ້ວງແຮ້ວຕໍ່ຜູ້ອາໄສຂອງເຢຣູຊາເລັມ.
15 ແລະ ຄົນເປັນຈຳນວນຫລວງຫລາຍໃນບັນດາພວກເຂົາຈະ ເຕະສະດຸດ ແລະ ລົ້ມລົງ, ແລະ ຖືກບ້ວງແຮ້ວ ແລະ ລົ້ມລົງເປັນບາດແຜ ແລະ ຖືກພາຕົວໄປ.
16 ຈົ່ງຜູກມັດປະຈັກພະຍານໄວ້, ຈົ່ງຜະນຶກ ກົດໄວ້ໃນບັນດາສານຸສິດຂອງເຮົາ.
17 ແລະ ຂ້າພະເຈົ້າຈະລໍຖ້າພຣະຜູ້ເປັນເຈົ້າທີ່ ເຊື່ອງພຣະພັກຈາກເຊື້ອສາຍຂອງຢາໂຄບ, ແລະ ຂ້າພະເຈົ້າຈະຊອກຫາພຣະອົງ.
18 ຈົ່ງເບິ່ງ, ຂ້າພະເຈົ້າ ແລະ ລູກຫລານທີ່ພຣະຜູ້ເປັນເຈົ້າປະທານໃຫ້ຂ້າພະເຈົ້າເພື່ອເປັນ ເຄື່ອງໝາຍ ແລະ ເພື່ອເປັນການແປກປະຫລາດໃນອິດສະຣາເອນ ອັນມາຈາກຈອມໂຍທາ, ຜູ້ປະທັບຢູ່ເທິງພູຊີໂອນ.
19 ແລະ ເມື່ອພວກເຂົາຈະບອກກັບພວກທ່ານວ່າ: ຈົ່ງຊອກຫາ ຄົນທີ່ລ້ຽງວິນຍານ, ແລະ ໝໍດູທີ່ເວົ້າພ່ຳ ແລະ ຈົ່ມພຶມພຳຢູ່ໃນລຳຄໍ—ເປັນການສົມຄວນແລ້ວບໍທີ່ຜູ້ຄົນບໍ່ຊອກຫາພຣະເຈົ້າຂອງພວກເຂົາ ເພື່ອຜູ້ທີ່ມີຊີວິດຈະໄດ້ຍິນ ຈາກຜູ້ຕາຍ?
20 ຊອກຫາກົດ ແລະ ປະຈັກພະຍານ; ແລະ ຖ້າຫາກ ພວກເຂົາບໍ່ເວົ້າຕາມພຣະຄຳນີ້, ກໍຍ້ອນວ່າມັນບໍ່ມີຄວາມສະຫວ່າງຢູ່ໃນຕົວຂອງພວກເຂົາ.
21 ແລະ ພວກເຂົາຈະຊັດເຊພະເນຈອນໄປດ້ວຍຄວາມໝົດຫວັງ ແລະ ອຶດຢາກ; ແລະ ເຫດການຈະບັງເກີດຂຶ້ນຄື ເມື່ອພວກເຂົາຫິວຢາກກິນ, ພວກເຂົາຈະຄຽດແຄ້ນ ແລະ ສາບແຊ່ງກະສັດກັບພຣະເຈົ້າຂອງພວກເຂົາ ແລະ ແຫງນໜ້າຂຶ້ນຟ້າ.
22 ແລະ ພວກເຂົາຈະຫລຽວເບິ່ງໂລກ ແລະ ເຫັນຄວາມຫຍຸ້ງຍາກ, ແລະ ຄວາມມືດ, ຄວາມໝົ່ນໝອງອັນເກີດຈາກຄວາມເຈັບປວດ, ແລະ ຈະຖືກຂັບໄລ່ເຂົ້າໄປໃນຄວາມມືດ.