1 Na kusuwwyɛ no ronnko hɔ mma nyia ɔwɔ ahoguan mu no. Mber a odzi kan no, oemmbu Zebulun asaase, na Naphtali asaase bi, na ekyirii wɔdze ɔhaw dzendzen ba hɔn do wɔ, Po Memen kwan do, Jordan egya, amanaman Galilee mu.

2 Ɔman a wɔnantseew sum mu no woehu kan kɛse; hɔn a wɔtsenaa owu sunsum asaase do no, kan ahyerɛn hɔn do.

3 Ɔwo ama ɔman no adɔr, ɔwo ama hɔn enyigye adɔɔ sõ—hɔn enyigye w’enyim dɛ otwaber mu enyigye, dɛ mbrɛ adasa dzi ehurusi ber a wɔrekyɛ asadze.

4 Na n’adzesoa kɔndua no na n’abatsir poma no, na ne hyɛdofo abaa no, ebubu mu dɛ Media da no.

5 Na ɔkofo n’akodze a ɔwɔ gyigyeegye no mu nyina, na ntar a wɔdze efuntamfuntam bɔgya mu, ɔbɛyɛ adze a wɔhyew, ɔnye ogya nyena.

6 Na wɔawo ɔba ama hɛn, na wɔama hɛn ɔbabanyin, na ahendzi no bɛda ne batsir do; na wɔbɛfrɛ ne dzin, Nwanwanyi, Ɔpamfo, Onyame Katakyi, Egya a ɔwɔ hɔ Daapem, Asomdwee Hen.

7 Na n’ahendzi na n’asomdwee ne trɛ no nnyi ewiei, wɔ David ahengua do na n’ahendzi do, dɛ obetsim no, na ɔdze atsɛmbu na tsenenee awowaw no ofitsi ndɛ, dze kesi afebɔɔ mpo. Dɔm Ewuradze no mbɔdzembɔ bɛyɛ yi.

8 Ewuradze dze asɛm bi kraa Jacob, na oebodwir Israel do.

9 Na ɔman no nyinara bohu, Ephraim na Samariafo a wɔkã wɔ nkontompɔ na hɔn akokodur mu dɛ,

10 Ntaayaa egu famu, na yɛdze abo a wɔasen besi; woetwitwa sycamore-ndua, na yɛdze cedar bɛhyɛ ananmu.

11 Dɛm ntsi Ewuradze bɛma Rezin etsiafo do ahyɛ no do, na oekenyan n’atamfo abɔ mu.

12 Syriafo dzi enyim na Philistiafo dzi ekyir; na wɔdze anomu petoo amen Israel. Iyi nyina mu no n’ebufuw nndanee, mbom ɔda ho ara atsen ne nsa mu.

13 Naaso ɔman no nnsanee mmbaa nyia ɔbɔɔ hɔn no nkyɛn, eso wɔnnhwehwɛɛ dɔm Ewuradze n’ekyir kwan.

14 Dɛm ntsi Ewuradze botwa Israel tsir nye dua, abaw nye mbɛw akyen da kor.

15 Ɔtsetsenyi ɔnye onyimnyamfo, ɔno nye tsir no, na nkɔnhyɛnyi atorkyerɛnyi no, ɔno nye dua no.

16 Na hɔn a wɔkyerɛ ɔman yi kwan no dze hɔn fom; na hɔn a wɔkyerɛ hɔn kwan, wɔasɛɛ hɔn.

17 Dɛm ntsi Ewuradze rinnya hɔn mberantsɛ ho enyigye, eso orunnhu hɔn ngyanka nye hɔn ekunafo mbɔbɔr; na obiara ayɛ onyisomkyerɛnyi na omumuyɛnyi, na ano biara kã nkwaseasɛm. Iyi nyina mu no n’ebufuw nndanee, mbom ɔda ho ara atsen ne nsa mu.

18 Na emumuyɛ hyew dɛ ogya; ɔmen nkɔkrɔw ɔnye nsoɛ, ampaara ɔsɔ wɔ kwaa mu adɔtɔ mu, na opun wusiw kumbɔɔ fow kɔ sor.

19 Na ɔnam dɔm Ewuradze n’ebufuw do na asaase no ahyew tumm na ɔman no so ayɛ dɛ ogya nyena; obiara nnkam no nua do.

20 Na obi bohwim enyimfa edzi naaso ɔkɔm adze no; na obedzidzi wɔ bankum na wɔremmee wɔbɔwe hɔnara hɔn nsa ho nam—

21 Manasseh, Ephraim; na Ephraim, Manasseh; na hɔn beenu asoɛr etsia Judah. Iyi nyina mu no n’ebufuw nndanee, mbom ɔda ho ara atsen ne nsa mu.