Faken Lʼagruw e Babyor ku Nephi

1 Ere chiney e yibi buch u tomuren ni gag, Nephi, e kug muʼ i fil ngakʼ pi walageg, ma chitamangmaed, i Lehi, e ki weliy ngoraed boech banʼen nib yoʼor, me weliy ngoraed, rogon fini felʼ e pinʼen ni ke rinʼ Somoel ni fan ngoraed u napʼan ni fekraed nga wuruʼ fare nam nu Jerusalem.

2 Me weliy ngoraed morngaʼagen e pi togopluw ni ur tayed u maday, nge murnguy rokʼ Got ngoraed me ayuwegraed ni dar mʼaed, ni dar ligil gaed nga aer u maday.

3 Ma ki weliy ngoraed morngaʼagen fare nam nni michmicheg, ni ke yog ngoraed—rib gel e wurengaenʼ rokʼ Somoel ere arfan ni yoeg ngomaed ni nggu miil gaed nga wuruʼ fare binaw nu Jerusalem.

4 Ya musap gaed, i gaʼar: Kug guy ba changar u malikʼaey, niʼir e kug nang riy ni kan gatheay yu Jerusalem; ma faʼan manga da magaey gaed u Jerusalem ma ku damʼaed.

5 Machane, gaʼar, yug aram rogon e pi gafgow nug tayed, ma ke yog ngomaed ba nam nni michmicheg, ba nam nib melʼeg u fithikʼ gubin e pi nam; ba nam ni falʼeg fare Somoel ni Got ba mʼag riy nga thilmow ni ra mang ba nam ni nge tafnaʼ pifakag. Arragon, fare Somoel e falʼeg ba mʼag u thilmow nre nam ney, nge pifakag ni gubinfen, nge gubin e piʼin ni bayi powiʼiyraed Somoel nga wuruʼ boech e nam.

6 Ere, gag, Lehi, e gube prophesy u rogon e pi muruwel ko fare Kan ni Thothup ni bay rog, ni dariy beeʼ ni ra yib nga lan e re nam ney ma kemus ni Somoel e nge fekraed iyib.

7 Ere, re nam ney e kan bangbeng nag ngakʼ e piʼin ni ra fekraed iyib ngay. Ma faʼanra yaeni chey ni ngar pigpig gaed ngakʼ u rogon e pi motochiyel ni ke piiʼ, ma ra yaeni aw nib nam nib puf rogon e paer riy ngoraed; ma arame, dariy liyiben min fekraed nga kalbus; ma faʼanra nge buch, ma bachan e denen; ya faʼanra nge garar e denen ma nge buch waʼathan fare nam ni fan ngoraed, machane piʼin nib matʼaw e ra felʼ waʼathraed riy ni gubinfen.

8 Ere musap gaed, ba gonop ni re nam ney e ngan tay ni dab kaʼanang boech e nam morngaʼagen; ya musap gaed, ra yoʼor e pi nam ni ngar suguyed dakean fare nam, ni nge dakuriy e gin ni ngan paer riy.

9 Ere, gag, Lehi, e kan michmich ngog, ni boed nʼumngin i napʼan e piʼin ni bayi fekraed fare Somoel ni Got nga wuruʼ fare nam nu Jerusalem ma yaed be fol ko pi motochiyel rokʼ, ma yaedra monʼog u dakean e re nam ney; ma bay ni tayraed ni dabi nang gubin e pi nam morngaʼagraed, ni nge yog ni ngar tafnayed e re nam ney ni yigoʼ yaed ngay. Ma faʼanra yaeni chey ni ngar fol gaed ko pi motochiyel rokʼ ma yira tawaʼath nagraed u dakean e re nam ney, ma dariy beeʼ ni nge gafgow nagraed, ara nge fek roraed e binaw ni taferaed; ma rayog ni ngar pired nib paganʼuy ni gubinfen.

10 Machane musap gaed, napʼan ni ra yib fare ngiyalʼ innʼem ni kar malog gaed ko mich, u tomuren ni ke thap ngoraed e pi tawaʼath u paʼ Somoel—make tamilang laniyaenʼraed u morngaʼagen rogon ni sum e fayleng, nge gubin e gidiiʼ, ma kar nanged e pi muruwel nib felʼ mab poloʼ falʼngin rokʼ Somoel aram u napʼan nni sunmiy e fayleng; ma kan piiʼ ngoraed e gelingin ni ngar rinʼed gubin banʼen u dakean e mich; ma kan piiʼ ngoraed gubin e pi motochiyel aram ko tabolngin, ma kan fekraed u dakean e tʼufeg rokʼ ni dariy nʼumngin i napʼan iyib nga lan e re nam ney nib thil nib felʼ nni michmicheg—musap gaed, gube yoeg, ni faʼanra yib fare rran ni ngar feked yathin Fachaʼ nib Thothup ku Israel, ni fare Messiah nib riyulʼ, niʼir e Tabiyul roraed nge Got roraed, e musap gaed, fapi pufthin rokʼ nib matʼaw e ra aw nga dakeanraed.

11 Arragon, bay ki fek boech e nam iyib ngoraed, ma ra piiʼ ngoraed e gelingin, ma ra chuweg roraed e pi binaw ni taferaed, ma ra guy rogon ni ngar garar gaed min liiʼraed.

12 Arragon, ni boed rebo mfen nibe af nga reb ma bay un puʼoeg e rachaʼ, nge gechig ni ubchiyaʼ ni bayi aw nga fithikʼraed; ere, gal fakag, gubaʼadag ni ngam tayew u wunʼmew; arragon, gubaʼadag ni ngam motoyil gow ma ngam fol gow ko thin rog.

13 O rug be athapeg ni gomanga mu odgow; mu odgow, dab ki mol armew, arragon, ni ngam chuw gow ko mol nu infierno, ma ngam rurugew nge mul e pi chen ni kan mʼagmew ngay, ni ireram e pi chen ni yibe mʼag ko gidiiʼ, ni ngan fekraed ni kalbus iyaen nga butʼ ko fare loew ni manechubog ko amith nge gafgow.

14 Mu odgow! ngam chuw gow u fithikʼ e fiyath, ma gimew motoyil ko thin rokʼ ba labthir nibe daʼadaʼ ni pilibthir ni ke chugur ni ngam moleged nga langgin fare loew nib garbeb mab awe choeʼ riy, ni ireram e gin ni dabiyog ni sul e chaʼ ni milekag riy; dabki yoʼor e rran ma kug waen nga fithikʼ e butʼ.

15 Machane musap gow, fare Somoel e ke bayuliy e yaʼel rog ni poloʼ ke chuw u infierno; kug guy e rir rokʼ, ma ke longbiyeg nga lan ngorngoren ko tʼufeg rokʼ ni manechubog.

16 Ma gube athapeg ni ngam tayew u wunʼmew ni ngam fol gow ko pi yalen nge motochiyel rokʼ Somoel; musap gow, biney e ke paer ni magafaenʼ rog aram ko sommʼon iyib.

17 Gumʼirchaʼeg e ke muchuch nga butʼ ko kirbaenʼ u bayay ngo bayay, ya gube rus, ni bachan fare ʼelʼel u gumʼirchaʼmew e ra yib nag fare damomuw ni poloʼ rokʼ Somoel ni Got romew nga dakeanmew, min chuwegmew min gatheaymew ni gubinfen;

18 Ara, ba wol ni kireb e nge yib nga dakeanmew u lan bukun e mfen; ma ngam mʼow ko sayden, nge uyngol, min fananikaymew, min powiʼiymew iyaen u rogon fiti laniyaenʼ nge rogon e kalbus ko fare moʼoniyanʼ.

19 O gal fakag, gomanga yug dabi aw e pinnʼey nga dakeanmew, ngam mangew gidiiʼ nib melʼeg mab tʼuf rokʼ Somoel. Machane musap gow, nge rogon ni baʼadag e ra yaeni aw; ya pi kanawoʼ rokʼ e ba matʼaw ni gubinfen.

20 Ma ke yoeg ni gaʼar: Nʼumngin i napʼan ni bay um fol gaed ko pi motochiyel rog ma bay mu monʼog gaed u lan fare nam; ma nʼumngin i napʼan ni dab mu fol gaed ko pi motochiyel rog ma yira chuwegmed rog.

21 Ere chiney e gomanga yug gu falfalaenʼ ngomew, nge gumʼirchaʼ rog ni gomanga chuw ko biney e fayleng u fithikʼ e falfalaenʼ ni bachmew, ni gomanga yigi siy guwaen nga loew u fithikʼ e gafgowaenʼ nge kirbaenʼ, ere mu chuw gow u fithikʼ e fiyath, gimew e gal fakag, mu lemgow i pumoʼon, ni nge taʼareb e tafnaey romew nge gumʼirchaʼ romew, ma ngam taʼabang gow u fithikʼ gubin banʼen, me siy marow iyaen nga kalbus;

22 Ni nge siy ni gechig nagmew nga ba gechig nib ubchiyaʼ; ma nga dab kum miliyew e damomuw rokʼ Got nga dakeanmew, ngam gafgow gow riy, arragon, ni fare gafgow ni manechubog ko yaʼel nge dagur.

23 Mu odgow, gal fakag; ngam chuw gow nga madan e tin nib matʼaw. Mu rurugew nge mul fayulʼ i chen ni kan mʼagmew ngay, ma ngam bow nga tamilang ngam chuw gow u fithikʼ e lumor, ma ngam chuw gow u fithikʼ e fiyath.

24 Dab kum togopluw gow ngakʼ walagmew, niʼir e ba maʼangʼang e changar rokʼ, ma ire ke fol ko pi motochiyel aram iyib ko ngiyalʼ ni kad chuw gaed u Jerusalem; ma ire ke paer nib talin e muruwel u lan paʼ Got, u napʼan ni ke fek daed iyib nga lan fare nam nni michmicheg; ya faʼan manga demoy, ma kari math e fan rodaed ni bilig u lan wuruʼ e binaw; yug aram rogon machane, kaʼam gayew rogon ni ngam fekew e pogofan rokʼ; arragon, ma kari gafgow ni kirbaenʼ ni bachmew.

25 Ere rug be rus ma gube tʼon ni bachmew, ya richey mu kum gafgow nigew bayay; ya musap gow, kam tʼirew e thin nga dakean ni be gay e gelingin nge matʼawon nga dakeanmew; machane gumnang ni da igay gelingin nge matʼawon nga dakeanmew, ya ki igay e rir rokʼ Got, nge rogon e paer romew ni manechubog.

26 Ma kam nonnon gow ni bachan e kiiʼ inon ngomew nib tamilang. Kamoegew ni ke non nib gel e thin rokʼ ngomew; kamoegew ni ke damomuw ngomew; machane musap gow, thin ni ke yoeg nib gel e ireram fare gelingin e thin rokʼ Got, ni bay rokʼ; ma re nʼen ni kamoegew ni damomuw e ireram e tin riyulʼ, nrogon ni bay rokʼ Got, ma dakiyog ni nge tel, me gagyel nag e pi denen romew.

27 Ma thingari tʼuf ni fare gelingin Got e dabisiy ni bay rokʼ, ni nge chiyliy ngomew ni thingar mu fol gow. Ere musap gow, gathi ir, ya fare Kan ni Thothup rokʼ Somoel ni bay rokʼ, e ire ke bing lʼugun ni nge non ma deyog ni nge tileg ir riy.

28 Ere chiney, gimed e pi pumoʼon ni fakag, ni gur Laman, nge Lemuel, nge Sam, nge pi pumoʼon ni fakag ni fak Ishmael, e musap gaed, faʼan gimed ra fol ko thin rokʼ Nephi ma dab malog gaed. Ma faʼan gimed ra fol rokʼ ma nggu tay e tawaʼath romed, arragon, ni bin mʼon e tawaʼath rog.

29 Machane faʼanra dab mu fol gaed rokʼ ma gura fek nggu chuweg e bin mʼon e tawaʼath rog, arragon, niʼir e tawaʼath rog, me mang ire paer rokʼ.

30 Ma chiney, gur Zoram, e nggu non ngom: Musap, gur fare tapigpig rokʼ Laban; machane, kan fekem nga wuruʼ fare nam nu Jerusalem, ma gumnang ni gur e riyulʼ ni fager rokʼ fakag, i Nephi, ni gubinfen.

31 Ma, bachan e gur e gab yulʼyulʼ ere arame pi fakam e yira tawaʼath nagraed nge pifak u taʼabang, ni ngar pired nib felʼ rograed nib nʼuw napʼan u dakean e re nam ney; ma dariy banʼen, ma kemus ni yigoʼ denen u fithikʼraed, e ra gafgow nagraed ara gatheay rogon e monʼog roraed u dakean e re nam ney ni gubinfen.

32 Ere, faʼan gara fol ko pi motochiyel rokʼ Somoel, make bangbeng nag Somoel e re nam ney ni fan ko maʼayuw ngakʼ pifakam nge pifak fakag.