1 Nge chiney e yibi buch u tomuren ni gag, Nephi, e kug biʼeg e pinnʼey ni kan ker nga dakean e plates ni brass, ma walageg e rabow ngog ngar gaʼar gow ngog: mang e be yipʼ fan e pinnʼey ni kam biʼeg? Musap, pinnʼey e thingar ni nangfan u rogon e pinʼen nib lʼeag rogon ko yaʼel, niʼir e pinʼen ni bay yibi buch u rogon fare yaʼel ma gathi fare dowef?

2 Nge gag, Nephi, e gguʼar ngorow: Musap gow pinnʼey e ni dag ngakʼ fare profet u dakean fare Kan ni Thothup; ya dakean fare Kan ni Thothup e yima dag gubin banʼen riy ko pi profet, ni ireram e pinʼen ni bayi buch rokʼ e pi bitir ni fak e gidiiʼ u rarogon fare dowef.

3 Ere, fapinʼen ni kug biʼeg e bogi banʼen nib lʼeag rogon ko paer u fayleng nge pinʼen nib lʼeag rogon ko yaʼel; ya be yibi mʼug ni fapi gidiiʼ ku Israel, e kari chuchugur ara dab ki nʼuw napʼan, ma kar garar gaed u dakean e fayleng ni poloʼ, nga ku dakean gubin e pi nam.

4 Ma muguyew, boʼor e piʼin ni kar paged tilin fapichaʼ ni yaed bay u Jerusalem. Arragon, oren i yaed ko fapi ganong e kar malog gaed; ma kar garar gaed u gubin yang u dakean e pi donguch nu maday; ma dariy bagdaed ni manang ko uw e gin ni yaed bay riy, kemus ni gadaed manang ni kan wawliyraed nga orel.

5 Ere napʼan u tomuren ni kar malog gaed, ma pinnʼey e ni prophesy nag ni morngaʼagraed, nge ku morngaʼagen gubin e piʼin ni bay rabaed nga tomuren e biney ni bay ra garar gaed maki balyangaenʼraed, ni bachan Fachaʼ nib Thothup ku Israel; ya yaedra ʼelʼel nag e gumʼirchaʼ roraed ngakʼ; ere, bay ni garareg raed u fithikʼ gubin e pi nam me fananikayraed gubin e gidiiʼ.

6 Machane, tomuren ni chathowoliyraed fapi Gentiles, ma fare Somoel e chibiy paʼ ngalang nga dakean fapi Gentiles me dugliyraed nga ba dodow, ma pi bitir roraed e fek e pi Gentiles nga lan ngorngor raed nge pi ppin ni fakraed e fek e pi Gentiles nga dakean poeraed, musap pinnʼey ni kan weliy morngaʼagen e balʼeg rogon ko paer u fayleng; ya aray rogon fapi mʼag rokʼ fare Somoel ngakʼ e pi chitamangdaed; ni be yipʼ fan ngodaed u lan e pi rran ni bay yib, nge ku arragon ngakʼ e pi walagdaed ni rabaed rokʼ fapi gidiiʼ ku Israel.

7 Ma be yipʼ fan ko fare ngiyalʼ innʼem u tomuren ni gubin fapi gidiiʼ ku Israel e kar garar gaed ma ke maʼathuk laniyaenʼraed, ni fare Somoel ni Got e bayi kunuy ba ulung i gidiiʼ nib gaaʼ u fithikʼ fapi Gentiles, arragon, ni kuʼar rogon nga dakean e giney e nam; ma yaed e yaedra garareg pifak daed.

8 Ma tomuren ni kan garareg pifak daed ma fare Somoel ni Got e bayi rinʼ ba muruwel nib maʼangʼang u fithik fapi Gentiles, ni rib gaʼfan ngakʼ pifak daed; ere, yaed e ku taʼab rograed ngakʼ pifak daed ni chathowoliyraed fapi Gentiles min fekraed nga lan ngorngor raed ngo dakean poeraed.

9 Ma kub gaʼfan ngakʼ fapi Gentiles; nge gathi kemus ni yigoʼ fapi Gentiles ya kub un gubin fapi gidiiʼ ku Israel ngay, ni yibe nang riy fapi mʼag rokʼ fachaʼ ni Chitamangiy nu tharmiy ngakʼ Abraham, ni be gaʼar: U dakean pifakam ma gubin e pi mfen nu fayleng e bay ni tawaʼath nagraed riy.

10 Ma gu baʼadag, gimed pi walageg, e thingar mu nanged ni gubin e pi mfen nu fayleng e dabiyog ni nge felʼ waʼathraed nge madaʼ ko ngiyalʼ ni ke dag falʼngin i paʼ u mite pi mfen.

11 Ere, fare Somoel ni Got e bayi guy rogon ni nge dag falʼngin i paʼ u mit gubin e pi nam; aram rogon riy ni yib nag e mʼag rokʼ nge gospel rokʼ ngakʼ e piʼin ni yaed fapi gidiiʼ ku Israel.

12 Ere, bayi chuwegraed bayay u kalbus, mar mukun gaed nga taʼabang ko fa pi yungi nam ni taferaed; ma bay ni fekraed nga tamilang ngar chuw gaed u fithikʼ e lumor; ma bay ra nanged ni fare Somoel e ire Tathapeg roraed nge Tabiyul roraed, niʼir Faʼanem ni gubin ma rayog rokʼ ku Israel.

13 Nge rachaʼ ko fare galasia nib gaaʼ ma thʼabi kireb, niʼir fare gathar ko fayleng ni poloʼ, e bayi sul nga dakean loelugraed; ya bay ra chel gaed ngar mael gaed u fithikʼraed, nge fapi sayden u paʼaraed e bay ra chel gaed ngar liiʼed yaed ngay, ma bay ra aliliy niged e cham ngar liiʼed yaed.

14 Nge gubin e pi nam ni bay ra mael gaed ngomed, O gidiiʼ ku Israel, e bay ra chel gaed ngar togopluw gaed ngoraed, ma bay ra mul gaed nga langgin e loew ni yaed e rifuʼogged ni nge mul e gidiiʼ rokʼ Somoel ngay. Nge gubin e piʼin ni yaedra cham nib togopluw ngakʼ Zion e yira gatheayraed, nge re gathar nem, niʼir e ke thilyeg rogon e yalen nib matʼaw rokʼ fare Somoel, arragon, ni fare galasia nib gaaʼ ma thʼabi kireb, e bayi puth nge aw nga fithikʼ e ab ma rib almarin e puth ni ratay.

15 Ya musap gaed, i gaʼar fare profet, fare ngiyalʼ innʼem e be yib ni rib papay ni Moʼoniyanʼ e bayi mʼay gelingin ni nga dab kiyog ni gagyeg nag gumʼirchaʼen e pi bitir ni fak e gidiiʼ; ya fare rran e ke chugur iyib ni nge gubin e piʼin nib ʼufʼuf nge piʼin ni yaed ba tadenen e bay ra pired ni gowa pan nib mororoy; ma fare rran e bayi taw ngay ni thingar ra yikʼ gaed.

16 Ya fare ngiyalʼ innʼem e ke chuchugur ni nge taw ngay ni poloʼ e damomuw rokʼ Got e bay ni puʼoeg nga dakean gubin e pi bitir ni fak e gidiiʼ; ya dabi pag ni pi tadenen e ngar gafgow niged e piʼin nib matʼaw.

17 Ere, ire ra ayuweg e piʼin nib mangil u gelingin, ni mus ni faʼanra thingari yib e damomuw rokʼ, ma piʼin nib mangil e ra ayuwegraed, nge yaeni madaʼ ko ngiyalʼ ni kan gechig nag e pi toʼogor roraed ko nifiy. Ere, piʼin nib matʼaw e detʼuf ni ngar rus gaed; ya aray rogon ni yoeg fare profet ni gaʼar, ya yaedra thap, ma ku aram rogon ni faʼanra nge buch ko nifiy.

18 Musap gow, walageg, gube yoeg ngomew, ni pinnʼey thingari yib ni dabki nʼuw napʼan, arragon, ni mus ko rachaʼ, nge nifiy, nge buchuwoʼ i ath ni thingari yib ni dabi siy; ma thingari yib nga dakean e re fayleng ney; ma nge yib ngakʼ e gidiiʼ u rogon e dowef ni faʼan yaedra ʼelʼel nag e gumʼirchaʼ roraed ngakʼ Fachaʼ nib Thothup ku Israel.

19 Ya musap gow, piʼin nib matʼaw e dabra mʼaed; ya fare ngiyalʼ innʼem e ri bayi taw ngay ni gubin e piʼin ni yaed be cham nib togopluw ngakʼ Zion e bay ni chuwegraed.

20 Ma fare Somoel e ri bayi falʼeg woʼen e gidiiʼ rokʼ, ya nge yaeni muguʼul fapi thin rokʼ Moses, ni yoeg ni gaʼar: Ba profet e bayi chuguliy Somoel ni Got romed ni fan ngomed, ni taʼab rogon ngog; ni ire ngam motoyil gaed ngakʼ u fithikʼ gubin e pinʼen nra yoeg ngomed. Ma bay yibi buch ni gubin e piʼin ni dabra motoyil gaed ko re profet nem e bay ni chuwegraed u fithikʼ fapi gidiiʼ.

21 Ere chiney e gag, Nephi, e gube yoeg ngomew ni re profet ney niʼir e ke weliy Moses morngaʼagen e ireray Fachaʼ nib Thothup ku Israel; ere, ire bayi gagyeg nag e pufthin nib matʼaw.

22 Ma piʼin nib matʼaw e detʼuf ni ngar rus gaed, ya yaed e piʼin ni dab ni gechig nagraed. Ma fare gilʼelungun ku Moʼoniyanʼ, ni bay ni toey u fithikʼ fapi bitir ko gidiiʼ, ni fare gilʼelungun ni kan yarmiy u fithikʼraed ni yaed bay u langgin fare dowef—

23 Ya fare ngiyalʼ innʼem e bay yib ni rib papay ni gubin e pi galasia ni kan toey nib fan ko nge yog bogi banʼen ngay, nge gubin e tin ni kan toey ni nge gaaʼ lungraed ko dowef, nge tin ni kan toey ni ngar gilbugwan gaed u mit e gidiiʼ u fayleng, nge tin nibe gay e pi ʼarʼar ko dowef nge pinʼen nu fayleng, mang kur rinʼed gubin mit e denen; arragon, ni ngan ngochngocheg i yoeg, ni gubin e piʼin yaed mmuʼun ko fare gilʼelungun ku moʼoniyanʼ e ireram e pichaʼ nib tʼuf ni ngar rus gaed, mar rur gaed, mar daʼadaʼ gaed; ireram e pichaʼ ni yaed e thingar ni fekraed nga butʼ nga fithikʼ e ab; ireram e pichaʼ ni yaed e thingar moʼoruf gaed ni boed e matbul; ma pinnʼey e aray rogon ni boed fapi thin ni yoeg fare profet.

24 Ma fare ngiyalʼ innʼem e be yib nrib papay ni piʼin nib matʼaw e bay ni wawliyraed ni boed pifak e garbaw nu lan e sum, nge Fachaʼ nib Thothup ku Israel e ire thingari suwey me gaaʼ lungun, mab yargael, mab gel, nge falʼngin ni rib gaaʼ.

25 Ma ra kunuy e pi bitir rokʼ u lan fa aningeg rabaʼ i fayleng; ma manang urngin e saaf rokʼ; ma yaed manang niʼir; ma bay yaeni paer ni taʼab ulung e saaf nge taʼareb e tachugol saaf; ma bay i duruwʼiy e saaf rokʼ, ma bay ra pirʼeged niʼir e ma chathowoliyraed.

26 Ma bachan fini matʼaw e gidiiʼ rokʼ, ere dakuriy gelingin Moʼoniyanʼ; ma, dabiyog ni nge chuweg ir u kalbus ni boʼor e duw; ya dakuriy gelingin ni nge gagyeg nag gumʼirchaʼen e gidiiʼ, ya yaed be paer u fithikʼ e tin nib matʼaw, ma Fachaʼ nib Thothup ku Israel e bay ni ke suwey e lung.

27 Ere chiney e musap gow, gag, Nephi, e gube yoeg ngomew ni gubin e pinnʼey e thingari yib nib lʼeag rogon ko dowef.

28 Machane, musap gow, gubin e pi nam, nge mfen, nge thin, nge gidiiʼ ma bay ra pired u fithikʼ e pagaenʼ ngakʼ Fachaʼ nib Thothup ku Israel ni faʼan yaed ra kalngaenʼ.

29 Ere chiney e, gag, Nephi, e nggu tal u roey; ya dab ki bung rogog ning kuggu weliy boech ko ngiyalʼ ney ni morngaʼagen e pinnʼey.

30 Ere, gal walageg, gubaʼadag ni ngam lemnigew ni fapinʼen ni kan yoloey nga dakean e plates ni brass e ba riyulʼ; ma be micheg ni nge ra beeʼ ma thingari fol ko fapi motochiyel rokʼ Got.

31 Ere, dab mu lemnigew ni gag nge chitamag e kemus ni yigoʼ gomow e kug michegew e pinnʼey, ma ku kug dagew. Ere, faʼan gimew ra fol ko fapi motochiyel, mag me tay riy ni aram rogon nge yaeni madaʼ ko tomur, ma gimew ra thap ko bin tomur e rran. Ma aray rogon. Amen.