1 Me yibi buch ni ra liyoer gow ngakʼ Somoel, ma arame ra ʼunew ngog; ma gamaed thʼaeb e rean ngug ngongoliyed ni rib felʼ i ngongoliy. Ma fare Somoel e dag ngog bayay ngo bayay rogon ni nggu falʼeg renggin fare barkow.

2 Chiney e gag, Nephi, e dag ngongoliy e pi rean nem u rogon e llowaenʼ ko gidiiʼ, nge ku aram rogon fare barkow ni dag toey u rogon e llowaenʼ ko gidiiʼ; machane gu toey nrogon ni ke dag Somoel ngog; ere, gathi wod rogon ni manang e gidiiʼ.

3 Me gag, Nephi, e guwaen nga bugul e burey nib yoʼor yay ma ʼug meybil ku Somoel nib yoʼor yay; ere medag Somoel ngog boʼor banʼen.

4 Me yibi buch u tomuren ni kug muʼ i toey fare barkow, nrogon ni yoeg Somoel, me guy walageg ni rib mangil, nge muruwel riy ni rib felʼ usun; ere, mar sobutʼ nigew yow bayay u pʼoewchen fare Somoel.

5 Me yibi buch ni yib laman Somoel ngakʼ e chitamag, ni nggu sakʼiy gaed nggu waroed nga langgin fare barkow.

6 Me yibi buch ni rebo rran riy u tomuren ni kug muguʼuliyed gubin banʼen, nib boʼor e waʼamngin nge ufin nug feked u wuruʼ e binaw, nge gan e ngul nib yoʼor, nge ggan ni boed rogon ni motochiyel nag Somoel ngomaed, ma gamaed yaen nga langgin fare barkow, ni kug feked gubin e chugum romaed nge pi awoch ni bay romaed, nge pinʼen nug feked nge un ngomaed iyib, ni gubin e gidiiʼ nra beeʼ ma rogon nib mʼag ko duw rokʼ; ere gu waroed ni gamaed gubin nga langgin fare barkow, nge pi leʼengimaed nge bitir romaed.

7 Ere chiney, e chitamag e ke fakay lʼagruw e pagael u lan wuruʼ e binaw; bin ilal e kanoeg Jacob ngakʼ ma bin bitir e Joseph.

8 Me yibi buch nug waroed nga langgin fare barkow, ni kug feked e ggan romaed nge tin kan tay chilen ngomaed, ma gamaed tareg iyaen u maday ni be fekmaed e nifeng iyaen ko fare nam nni michmicheg.

9 Ma tomuren ni ke fekmaed e nifeng iyaen nib yoʼor e rran, ma arame pi walageg nge pi pumoʼon ni fak Ishmael nge ku pi leʼengiraed e ra tabab niged roraed e gamʼing ko falfalaenʼ, ni arame ra tabab gaed ko churuʼ, nge tang, nge thin ni tagan, arragon, ma arame ra paged talin ko mang e re gelingin ni ke fekraed iyib ngaram; arragon, kar ʼuf gaed ngalang nga fithikʼ e tagan.

10 Nge gag, Nephi, e arame yib e murus ngog nib gel ya bayi puwaenʼ Somoel ngomaed, me liiʼmaed ni bachan e denen romaed, ni bay gu ligil gaed nga aer nib toʼaer; ere, gag, Nephi, e gu tabab ko numon ngoraed nib tamilang; machane arame ra damomuw gaed ngog miyaed gaʼar: Dabda paged walagdaed nib bitir nge suweydaed.

11 Me yibi buch ni Laman nge Lemuel e ra koelew gag ngar mʼagew gag nga yuyilʼi gaf, mar pired ngog ngar gafgow niged gag; yug aram rogon, machane digeyrow Somoel ngar rinʼew ni aram rogon ni fan e nge yog ni dag gelingin, me yog ni nge muguʼul rogon e thin ni yog ni morngaʼagen e piʼin tadenen.

12 Me yibi buch u tomuren ni kar mʼagew gag ni dab kiyog nug mithmith, ma fare compass, ni piiʼ Somoel, e tal ni daki muruwel.

13 Ere, dakur nanged ko gin ni ngar tareg niged fare barkow iyaen ngay, ma arame yibi toeng bangi yokoʼ nib gaaʼ, arragon, bangi lang nib gaaʼ ma rib almarin, ma gamaed maenʼ nggu suloed nga tomur ni be fekmaed e day nge nifeng u langgin dalip e rran; ma arame tabab e murus ngorow ni rib gel ni yow be rus ni richey mar lumoch gow u lukungun e day; yug aram rogon machane, dar pithigew e gafrog.

14 Me yaeni bin ni aningeg e rran, ni kug maenʼ gaed nga tomur, ma farengi lang e kari gele almarin riy.

15 Me yibi buch u napʼan ni ke chugur ni nggu ligil gaed nga aer u lukungun e day. U tomuren ni kug maenʼ gaed u langgin aningeg e rran, me fini guy walageg rogon e gechig rokʼ Got ni ke yib ngorow, ni thingar ramʼow ma kemus ni faʼan yow ra kalngaenʼ ko pi denen rorow; ere, ra bow ngog, ngar pithigew e mʼag ni bay u paʼag, ma ruw rabaʼ i paʼag ni ke thow nib gaaʼ; nge kuʼar rogon nga tunguniʼeg ni ke thow, ma rib gele amith ni be tay.

16 Yug aram rogon, ma gu paganʼug ngakʼ Got, ma gube oge magaer ngakʼ e re rran nem ni poloʼ; ma dag nonnon nib togopluw ngakʼ Somoel ni bachan e pi denen rog.

17 Chiney e chitamag, i Lehi, e boʼor banʼen ni ke yog ngorow, nge ku aram rogon ngakʼ fapi pagael ni fak Ishmael; machane, musap, yow be makʼar murus ko thin ngakʼ e chaʼ ni nge non ni paʼag; nge gallabthir rog e kar piʼilal gow, ere gafgow laniyaenʼrow ko kirbaenʼ ni bachan e pi bitir rorow, mar awgow nga butʼ, arragon, nga dakean e bet rorow ni yima tililiy nagrow riy.

18 Bachan e kirbaenʼ nge gafgow rorow, nge pi denen rokʼ walageg, me gele ubchiyaʼ rorow ni chugur ni ngar mʼow ni ngar madaʼ gaed e Got rorow; arragon, ma pi mat u loelugrow e be yaen ni ngan moleg nga fithikʼ e ab; arragon, ni kari chuchugur ni ngar mʼow u fithikʼ e kirbaenʼ maninʼ row nga maday.

19 Ma ku Jacob nge Joseph, ni yow bbitir, nib tʼuf ni ngan chathowoliyrow, e ri kirbaenʼrow ni bachan e pi gafgow ni ke tay e chitiningrow; nge kuʼar rogon ngakʼ leʼengig nge luʼ rokʼ nge pi meybil rokʼ, nge kuʼar rogon nge bitir rog, e de munguy nag gumʼirchaʼen walageg ni ngar pithigew e gaf rog.

20 Ma dariy banʼen ni ra yog ni nge yib nag e murus ngorow, ma kemus ni gelingin Got, e rayog ni nge munguy nag e gumʼirchaʼ rorow; ere, napʼan ni kar guyew ni arame bay ra ligil gow nga fithikʼ e day me fin ra kalngaenʼ gow ko tin ni kar rinʼew, mafin arame ri pithigew e gaf rog.

21 Me yibi buch u tomuren ni kar pithigew e gafrog, mug fek fare compass, me muruwel nrogon nug baʼadag. Me yibi buch nug meybil ngakʼ Somoel; ma tomuren ni kug muʼ ko meybil me gapas e nifeng, me gapas farengi yokoʼ, me mochoʼ.

22 Me yibi buch ni gag, Nephi, e gu yapʼ nag fare barkow, me yog nug tareg gaed bayay iyaen ko farengi nam nni michmicheg.

23 Me yibi buch u tomuren ni kug milekag gaed nib yoʼor e rran ma gamaed taw ko farengi nam nni michmicheg; mug waroed iyaen u dakean e binaw, ma gamaed toey e pi tent romaed; ma gamaed tunguy fithingan ni nam nni michmicheg.

24 Me yibi buch ni gu tabab gaed i ngongoliy e mileayʼ, ma gamaed tabab i yung e awoch; arragon, gu yunged gubin e awoch romaed nga fithikʼ e butʼ, niʼir e gu feked ko farengi nam nu Jerusalem. Me yibi buch ni tugul ni rib dammol; ere, ni tawaʼath nagmaed ni rib yoʼor.

25 Me yibi buch nug baed gu pirʼeged u dakean farengi nam nni michmicheg, u napʼan ni gamaed be milekag u lan wuruʼ e binaw, e gamanman nib yoʼor ni bay u lan e loway ni gubin mit, ni garbaw nge ox, nge donkey nge os, nge kaming nge kaming ni malboch, nge gubin mit e gamanman ni malboch, ni fan ko gidiiʼ. Ma gamaed pirʼeg e ore, ni gol, nge silber, nge copper.