1 Me yibi buch ni fare angel e gaʼar ngog: Musap, ngam guy pifakam, nge ku pifak pi walagem. Mug sap mug guy farengi nam nni michmicheg; ma kug guy yu ulung i gidiiʼ, arragon, nriyulʼ ni boed oren e yanʼ u maday.

2 Me yibi buch nug gguy yu ulung i gidiiʼ ni kar kunuyed yaed nga taʼabang ni ngan mael, ni ngar cham gaed nga taʼabang; ma kug guy e pi mael, nge morngaʼagen e mael, nge yamʼ nib almarin ni tay e gidiiʼ rog ko sayden.

3 Me yibi buch ni gag e gguy nib yoʼor e mfen ni yaen, nga tomuren e pi mael nge cham u lan farengi nam; mug guy e binaw nib yoʼor, arragon, ni dag thiʼeg urngin.

4 Me yibi buch ni gag e gguy ba chuwoʼ i lumor u dakean farengi nam nni michmicheg; ma kug guy e uluch, mug rungʼag lingan e dirraʼ, nge durruʼ, nge gubin mit e gaaʼ lingan; mug guy e butʼ nge war, nibe pilpil; mug guy e burey nibe muchubuʼ nga butʼ ni pʼachichig yang; mug guy pi yungi tagpas nu fayleng, nibe chabol nga ʼaer; mug guy nib yoʼor e pi binaw ni ke ligil nga ʼaer; mug guy nib yoʼor e gidiiʼ ni kar yikʼ gaed ko nifiy; ma kug guy nib yoʼor e gidiiʼ ni ke doelʼ ke aw nga butʼ, ni bachan gelingin e durruʼ riy.

5 Me yibi buch u tomuren ni kug guy e pinnʼey, mug guy ba chuwoʼ i lumor, ni ke chuw u dakean e fayleng; ma arame, mug guy yu ulung i gidiiʼ nib yoʼor ni dar mʼaed u napʼan fare gichig ni ubchiyaʼ rokʼ Somoel.

6 Mug guy e tharmiy ni ke mab, ma fare Saaf ku Got e yib u tharmiy nga butʼ; me yib nga butʼ nge yibi mʼug ngoraed.

7 Ma kug guy mug yoloey chipin ni fare Kan ni Thothup e yib nga dakean ragag nge lʼagruw niiʼ; me yibliyraed Got, min melʼegraed.

8 Ma fare angel e non ngog, ni gaʼar: Musap, fare ragag nge lʼagruw i gachalpen fare Saaf, e kan melʼegraed ni ngar pigpig gaed ngakʼ pifakam.

9 Me gaʼar ngog: Kag manang fare ragag nge lʼagruw i apostle rokʼ fare Saaf? Muguy, ireray e pichaʼ ni yaedra pufthin nag fare ragag nge lʼagruw i ganong ku Israel; ere, fare ragag nge lʼagruw i tamchib rokʼ pifakam e ku ireram e pichaʼ ni yaedra pufthin nagraed; ya gur beeʼ ni mub ko gidiiʼ ku Israel.

10 Ma re ragag nge lʼagruw i tapigpig ney ni kam guy e ireray e pichaʼ ni yaedra pufthin nag pifakam. Ma, amusap, ri yaed ba matʼaw ni manemus; ya bachan e mich roraed ngakʼ fare Saaf ku Got min wechwech nag e mad roraed nga rachaʼen.

11 Me gaʼar fare angel ngog: Musap! Mug sap, mug guy dalip e mfen ni ke yaen u fithikʼ e tin nib matʼaw; ma mad roraed e ba wechwech ni boed rogon fare Saaf ku Got. Me gaʼar fare angel ngog: Tiney e kar wechwech gaed nga rachaʼen fare Saaf, ni bachan e mich roraed ngakʼ.

12 Me gag, Nephi, e kug guy nib yoʼor gidiiʼen e bin aningeg e mfen ni ka ranoed u fithikʼ e felʼ.

13 Me yibi buch nug guy fapi ulung nu fayleng ni kar mukun gaed nga taʼabang.

14 Me gaʼar fare angel ngog: Muguy pifakam, nge pifak piwalagem.

15 Me yibi buch nug sap mug guy e gidiiʼ rokʼ pifakag ni kar mukun gaed nga taʼabang ni yu ulung nib togopluw ngakʼ pifak piwalageg; ma kar mukun gaed nga taʼabang ni ngan mael.

16 Me non fare angel ngog ni gaʼar: Musap ireyer fare alublub i raen nib kireb ni guy fachaʼ ni chitamam; arragon, niʼir fare lulʼ ni ke weliy morngaʼagen; ma toʼaer ni bay riy e ireram toʼaerngin e infierno.

17 Ma fare chuwoʼ i lumor e ir fapi lumel ku moʼoniyanʼ, ni be maʼew nag oewchey, ma be ʼelʼel nag gumʼirchaʼen e pibitir ko gidiiʼ, ma be wawliyraed ko kanawoʼ nib gaaʼ radan, ni ngar mʼaed mar malog gaed.

18 Ma fare naʼun rib gaaʼ nib gaaʼ, ni faʼani guy e chitamam, e ire fare tafnaey ni kireb nge fare ʼufʼuf ko pibitir ni fak e gidiiʼ. Nge ba loew ni rib gaaʼ mab toʼaer ni be kiiʼegraed u butʼ; arragon, nge fare thin ko justice rokʼ fare Got ni Manemus, nge fare Messiah niʼir fare Saaf ku Got, niʼir faram e ke micheg fare Kan ni Thothup, aram ko tabolngin e fayleng nge yibi madaʼ ko ngiyalʼ ney, nge ngiyalʼ ney iyaen nga mʼon ni dariy nʼumngin i napʼan.

19 Ma napʼan ni be yoeg fare angel e pi thin ney, mug sap mug guy pifak piwalageg ni yaed be cham pifakag, ni boed ni yoeg fare angel; ma bachan e ʼufʼuf rokʼ pifakag, nge pi lumel rokʼ moʼoniyanʼ, mug guy pifak piwalageg ni kar gelgaed ngakʼ gidiiʼen pifakag.

20 Me yibi buch nug sap, mug guy gidiiʼen pifak piwalageg ni kar gelgaed ngakʼ pifakag; ma ranoed ni yu ulung iyaen u dakean farengi nam.

21 Mug guyraed ni kar mukun gaed nga taʼabang ni yu ulung; mug guy e mael nge morngaʼagen e mael u fithikʼraed; mu fithikʼ e pi mael nge morngaʼagen e pi mael e gguy riy nib yoʼor e mfen ni ke yaen.

22 Me gaʼar fare angel ngog: Muguy, ireray e piʼin ni ra mul e mich roraed.

23 Me yibi buch nug guy, u tomuren ni ke mul e mich roraed me talimor doewraed, mar manged gidiiʼ ni thʼabi kireb, ni yaed ba sug ko gameed nge urngin mit e kireb.