1 Mmotoyil gaed ngam rungʼaged e nʼen ni baʼaray, O pi gidiiʼ ku Jacob, ni yaed e yibe piningraed ni gidiiʼ ku Israel, ni yaed e ra baed u fithikʼ e raen nu Judah, ara fithikʼ e raen ko tawfe, ni kar thʼaebed i micheg u fithingan Somoel, ma kar weliyed morngaʼagen fare Got ku Israel, machane gathi nga fithikʼ e felʼ ara fithikʼ e tin nib matʼaw.

2 Yug aram rogon machane, ma yaed be yoeg ni yaed e gidiiʼ ko re nam nem nib thothup, machane darur tagaʼ gaed ngakʼ fare Got ku Israel, niʼir fare Somoel ko Yoʼor; arragon, fare Somoel ko Yoʼor fithingan.

3 Muguy, kug weliy morngaʼagen e pinnʼen ni sommʼon, ni rabaed u lʼugnag nga butʼ, mug dag ngoraed. Rug dag ngoraed nib tomgin.

4 Ma gurinʼ ni bachan e gumnang ni gur e gab gelyuwan, ma balellʼugnam e woed e wasey, nge wuthungim ni woed e brass.

5 Ma kuʼug weliy ngom aram ko sommʼon; u mʼon ni nge yibi buch mug dagraed ngom; mug dag ni bachan e richey mag yoeg ni—Liyos ni got rog e ke rinʼ, nge liyos ni kan ker yaʼan ni got rog, nge liyos ni kan falʼeg yaʼan ko wasey ni kan ranraen nag ni got rog e kar motochiyel niged ni nge buch.

6 Gur e kam guy ma kam rungʼag gubin e pinnʼey; ere dab mu weliy ngan nang? Ma kug dag ngom boech banʼen nib beʼech ko ngiyalʼ ney, ni mus ko pinʼen nib mamiith, ma gur e damur nang.

7 Kan sunmiyraed e chiney, ma gathi aram ko sommʼon, ma aram u mʼon ko fare rran u napʼan ni dawor mu rungʼag ma kan weliy morngaʼagraed ngom, ya nge yog ni ngam gaʼar—Gu manangraed.

8 Arragon, nge gur e dawor mu rungʼag; arragon, gur e dawor mu nang; arragon, aram ko ngiyalʼ innʼem ni dawor ni bing telim; ya gu manang ni raʼum gagyeg u fithikʼ e sasaliyeb, ma gab tadenen u napʼan nim chuw u mayal.

9 Machane, riffan nga fithingag ma bay gunʼ yaran e damomuw rog, ya bachan e gu baʼadag ma bay gu palog nigeg rom, ni nge siy ni nggu chuwegem.

10 Ya, musap, kug machalbog nigem, kug melʼegem u fithikʼ e gafgow.

11 Niffan ngog, arragon, ya fan ngog ere nggu rinʼ e rennʼey, ya dab gu pag fithingag nge alit, ma dab gu piiʼ falʼngig ngakʼ beeʼ.

12 Mmotoyil ngog, O Jacob, nge Israel ni kug pining, ya gag ir, gag fachaʼ ni sommʼon, nge ku gag fachaʼ ni tomur.

13 Paʼag e ki ufung e dayif ko fare fayleng, nge baʼani matʼaw i paʼag e sunmiy e tharmiy ngay. Gura piningraed miyaed sakʼiy ngalang nga taʼabang.

14 Gimed gubin ni ngam mukun gaed nga taʼabang, ngam motoyil gaed; miniiʼ u fithikʼraed e ke weliy e pinnʼey ngoraed? Fare Somoel e tʼufeg faʼanem; arragon, bayi muguʼuliy e thin rokʼ ni weliy ngoraed; ma bayi rinʼ ni boed rogon ni baʼadag ngakʼ yu Babylon, ma bayi gechig nag fapi Chaldeans.

15 Ma, ki gaʼar Somoel; gag fare Somoel, arragon, ni kug weliy; arragon, ni kug pining ni nge weliy, kug fek iyib, ma bayi falʼeg woʼen ni nge monʼog.

16 Moy ngam chuchugur ngog; Dawor gu non nib mamith; aram ko sommʼon, ni aram ko ngiyalʼ nni weliy e kugog; nge fare Somoel ni Got, nge Kan ni Thothup rokʼ, e kar lʼugew gag.

17 Me gaʼar fare Somoel, ni Tabiyul romed, ni Fachaʼ nib Thothup ku Israel; kug llʼoeg fachaʼ, fare Somoel ni Got romed niʼir e be fil ngomed rogon me felʼ rogmed, niʼir e be powiʼiymed ko gin ni ngam sor gaed ngay, e ire ke rinʼ.

18 O yi gomanga kuʼum fol gaed ko pi motochiyel rog—ma ke yog ni paer e gapas romed ni boed ba lulʼ, nge wok romed nib felʼ e boed e pi nʼew nu maday.

19 Ma waʼamngimed e manga boech ma kar boeded oren e yanʼ; nge pi waʼamngin i yinmed e kar boeded oren e wayang; ma fithingan e manga boech ma dab ni chuweg ara ni gatheay nge chuw u pʼoewcheg.

20 Maroed ngam chuw gaed u Babylon, miil gaed rokʼ e pi Chaldeans, ni gimed be tang, mu weliyed, moeged e rennʼey, moeged ko piʼin ni bay u tomuren e fayleng; ni gimed be gaʼar: Fare Somoel e ke bayuliy e tapigpig rokʼ ni Jacob.

21 Ma de yib e balel ngoraed; i powiʼiyraed u dakean e pi falang; me guy rogon nge yib e raen ko war nga butʼ ni fan ngoraed; me bilig e war nge sikʼ e raen riy nga butʼ.

22 Ma yug aram rogon ni rinʼ e pinnʼey, nge ku boech nib yoʼor, ma dariy e gapas, ni yoeg fare Somoel, ni fan ngakʼ e piʼin nib tadenen.