1 Ma ra yibi buch, ni faʼanra motoyil fapi Gentiles ngakʼ fare Saaf ku Got u lan e re rran nem u napʼan ni bayi dag ir ngoraed u fithikʼ e thin, nge gelingin, ngo fithikʼ e ngongol, ma bay ni chuweg e pinʼen ni be magawon nagraed—

2 Ma dabra ʼelʼel niged gumʼirchaʼraed ngakʼ fare Saaf ku Got, ma yaedra un ko mathaʼeg ngakʼ pifak e chitamam; arragon, yaedra un ko mathaʼeg ngakʼ e pi gidiiʼ ku Israel; ma yaedra mang ba ulung i gidiiʼ nib tawaʼath u dakean farengi nam nni michmicheg ni dariy nʼumngin i napʼan; ma dab kun kalbus nagraed; ma fapi gidiiʼ ku Israel e dab ki balyangaenʼraed.

3 Ma fare loew nib toʼaer, ni ke fuʼog fare galasia ni thʼabi kireb, niʼir e sunmiy fachaʼ i moʼoniyanʼ nge pi bitir rokʼ, ni nge yog ni wawliy e yaʼel ko gidiiʼ iyaen nga infierno—arragon, nge fare loew nib toʼaer ni kan ker ni nge mul e gidiiʼ nga langgin e bayi suguy e piʼin ni kar kired, ni ngar mulgaed nga langgin, ni yoeg fare Saaf ku Got; ma gathi nge mul e yaʼel nga langgin, ya kemus ni ngan yinʼey riy nga infierno ni dariy nʼumngin i napʼan.

4 Ya musap, ireray rogon e kalbus rokʼ fare moʼoniyanʼ, nge rogon e justice rokʼ Got, nga dakean gubin e piʼin ni yaedra muruwliy e tagan nge tin thʼabi kireb u pʼoewchen.

5 Me yibi buch ni non fare angel ngog, Nephi, ni gaʼar: Gur e kam guy ni faʼanra kalngaenʼ fapi Gentiles ma ra felʼ waʼathraed; ma ku gur e gamnang morngaʼagen e pi mʼag rokʼ Somoel ngakʼ fapi gidiiʼ ku Israel; ma ku gur e kam rungʼag ni piʼin dabra kalgaed ngaenʼraed e yaedra yimʼ.

6 Ere, ra gafgow e pi Gentiles ni faʼan yaedra ʼelʼel nag gumʼirchaʼraed ngakʼ fare Saaf ku Got.

7 Ya bay yibi taw nga napʼan, ni gaʼar fare Saaf ku Got, bay gu muruwliy ba muruwel ni rib gaaʼ mab maʼangʼang u fithikʼ e pi gidiiʼ; ba muruwel ni dariy nʼumngin i napʼan, ni demitrug ko baʼan ngan i paʼay e bay riy—ni nge micheg ngoraed e gapas nge yafos ni gubinfen, fa ngan kalbus nagraed ni fan ko pi gumʼirchaʼ roraed nib ʼelʼel, nge maʼew u laniyaenʼraed nge yaeni madaʼ ko ngiyalʼ ni kan kalbus nagraed, nge mogothgoth ko tinu fayleng nge tin ko yaʼel banʼen ni ra aw ngoraed, u rogon e kalbus ku moʼoniyanʼ, niʼir faram e kug weliy morngaʼagen.

8 Me yibi buch u napʼan ni ke yoeg fare angel e pi thin ney, me gaʼar ngog: Kag manang fapi mʼag rokʼ fachaʼ ni Chitamangiy ngakʼ fapi gidiiʼ ku Israel? Mug gaʼar ngakʼ, Arragon.

9 Me yibi buch ni gaʼar ngog: Musap, ngam guy fare galasia nib gaaʼ ma thʼabi kireb, niʼir e chitiningin e pi kireb, ni moʼoniyanʼ e ire gaaʼ riy.

10 Me gaʼar ngog: Musap karimus ni lʼagruw e galasia ni bay; reb e galasia rokʼ fare Saaf ku Got, ma reb e fare galasia rokʼ fare moʼoniyanʼ; ere, chaʼ ni dar ʼun ko galasia rokʼ fare Saaf ku Got e be ʼun ko re galasia nem nib gaaʼ, niʼir fare chitiningin e pi kireb; ma ir fare gathar ko fayleng ni poloʼ.

11 Me yibi buch nug sap mug guy fare gathar ko fayleng ni poloʼ, ni ke paer nga dakean e day nib gaaʼ; ma ke suwey e fayleng ni poloʼ, u fithikʼ gubin e pi nam, pi mfen, pi thin, nge pi gidiiʼ.

12 Me yibi buch nug gguy fare galasia rokʼ fare Saaf ku Got, nib lichlich e gidiiʼ riy, ni bachan fapi denen nge kireb ko fare gathar ni ke paer nga dakean yungi day nib gaaʼ; machane, mug guy ni fare galasia rokʼ fare Saaf, ni yaed chongin Got, ni kur suguyed dakean e fayleng; ma gin ni kar suweyed u fayleng e ba achichig, ni bachan e denen ko fare gathar ni kug guy.

13 Me yibi buch nug guy ni fare chitiningin e pi kireb e kunuy nga taʼabang yu ulung i gidiiʼ ni yoʼor u dakean e fayleng ni poloʼ, u fithikʼ e pi nam ko fapi Gentiles, ni ngar cham gaed fare Saaf ku Got.

14 Me yibi buch ni Gag, Nephi, e gguy fare gelingin fare Saaf ku Got, ni yibi aw nga dakean chongin e galasia rokʼ fare Saaf, ngo dakean fapi gidiiʼ rokʼ Somoel ni falʼeg ba mʼag nga thilraed, ni piʼin ni kar garar gaed u fayleng; ni kar longbiyed yaed ko felʼ u gelingin Got u fithikʼ e rir.

15 Me yibi buch nug guy e damomuw rokʼ Got ni ke aw nga dakean fare galasia nib gaaʼ nib thʼabi kireb, ni aramfan ni yib e mael nge thiin e mael ni ke garar u fithikʼ gubin e pi nam, nge pi gidiiʼ u fayleng.

16 Ma arame napʼan ni tabab ni ke yib e mael nge thiin e mael ni ke garar u fithikʼ e pi nam ni yaed mmang ko fare chitiningin e pi kireb, me non fare angel ngog ni gaʼar: Musap, fare damomuw rokʼ Got e ke aw nga dakean fachaʼ ni chitiningin e pi gathar; ere musap, gur e kam guy gubin e pinnʼey—

17 Ma napʼan nra taw ko re rran nem ni ke puʼoeg Got e damomuw rokʼ nga dakean fare chitiningin e pi gathar, niʼir fare galasia nib gaaʼ ma thʼabi kireb u fayleng ni poloʼ, ni Moʼoniyanʼ e gaaʼ riy, ma, napʼan e re rran nem, ma fare muruwel rokʼ fachaʼ ni Chitamangiy e bayi tabab, ni nge yarmiy rogon me yog ni muguʼul e pi mʼag rokʼ, ni baʼaram ni tay ngakʼ pi gidiiʼen ni gidiiʼ ku Israel.

18 Me yibi buch ni non fare angel ngog ni gaʼar: Musap!

19 Mug sap mug guy beeʼ nib moʼon, ni ke chuw nga mad ni reb u lang nga butʼ nib wechwech.

20 Me gaʼar fare angel ngog: Muguy ireram reb fare ragag nge lʼagruw i apostle rokʼ fare Saaf.

21 Amusap, bayi guy me yoloey e tin kabay ko pinnʼey; arragon, nge ku boech banʼen nib yoʼor ni ke thimur.

22 Ma bay ki yoloey morngaʼagen tomuren e fayleng.

23 Ere, pinʼen nra yoloey e ba matʼaw mab riyulʼ; ere musap, bay ni yoloey nga langgin fare ke babyor ni kam guy faram ni yib u lʼugun fare Jew; ma ngiyalʼ innʼem ni yib u lʼugun fare Jew, ara, ngiyalʼ inʼen ni bay yib fare ke babyor u lʼugun fare Jew, ma pinʼen nni yoloey ngay e ba tamilang mab machalbog, ma thʼabi gaʼfan mab moem ni nge nang gubin e gidiiʼ fan.

24 Ere muguy, pinʼen ni ra yoloey fare apostle rokʼ fare Saaf e ireram nib yoʼor ni kam guy; ere musap, tin ni ke magaey e bay muguy.

25 Machane pinʼen ni bay kum guy nga tomuren e ngiyalʼ ney e dab kum yoloey; ya fare Somoel ni Got e ke yibliy fare apostle rokʼ fare Saaf ku Got ni nge mang ire yoloey.

26 Nge ku boech i yaed ni ur moyed, e ki dag urngin banʼen ngoraed, ma kur yoloeyed; ma kan chaʼariy ni bay yib nib machalbog, u rogon e tin riyulʼ ni bay rokʼ fare Saaf, ko ngiyalʼ nib mʼagaenʼ Somoel ngay, ngakʼ fapi gidiiʼ ku Israel.

27 Me Gag, Nephi, e gu rungʼag mug yoloey chipin, ni fithingan fare apostle rokʼ fare Saaf e John, ni aram rogon e thin ni yoeg fare angel.

28 Ma musap, Gag, Nephi, e dab ni pag ni nggu yoloey e tin kubay ko fapinʼen ni kug guy ma kug rungʼag; ere pinʼen ni kug yoloey e ba gaman u wunʼug; ma tin ni kug yoloey e lichene pinʼen ni kug guy.

29 Ma Gag e gube micheg babyoren ni kug guy e pinʼen ni guy e chitamag, ma fare angel rokʼ Somoel e ayuwegeg riy nggu nang.

30 Ere chiney e nggu tileg i weliy morngaʼagen e tin ni kug guy ko ngiyalʼ ni fekeg fare Kan ni Thothup; ma faʼanra gubin e pinʼen ni kug guy e dab ni yoloey, ma pinʼen ni kug yoloey e rib riyulʼ. Ma aray rogon. Amen.