1 Me yibi buch u tomuren ni kug baed iyib nga wuruʼ e binaw ngakʼ e Chitamangmaed, mari falfalaenʼ, nge ku arragon e chitinag, i Sariah, ni riki falfalaenʼ, ya ki i kirbaenʼ ni bachmaed.

2 Ya i lemnag ni kug mʼaed u wuruʼ e binaw; ma ki i nonnon nib togopluw ngakʼ e chitamag, ni i yoeg ngakʼ niʼir beeʼ nib moʼon nib tapilpiliyeg e changar rokʼ; ni gaʼar: Muguy, kam wawliy daed iyib kaed chuw gaed ko binaw ni tafadaed, ma pifakag e dakur moyed, me ere ngad mʼaed u wuruʼ e binaw.

3 Ma tomuren ni aray rogon e biney e numon ni tay e chitinag ni non nib togopluw ngakʼ e chitamag.

4 Me yibi buch ni non e chitamag ngakʼ, ni gaʼar: Gumanang ni gag beeʼ nib moʼon nib tapilpiliyeg e changar rog; ya faʼanra dag guy e tirokʼ Got ko changar rog nni piliyeg, ma dabiyog ni nggu nang falʼngin Got, ma kug paer u Jerusalem, nggu un ngakʼ e pi gidiiʼ rog nggu mʼaed.

5 Machane musap, bay ba nam ni kan michmicheg ngog, ni ireray e pinʼen ni gube falfalaenʼ ngay; arragon, ma kug manang ni ra ayuweg Somoel pifakag ngar chuw gaed u paʼ Laban, me fekraed iyib ngodow bayay nga wuruʼ e binaw.

6 Me tomuren ni aray rogon ni non e chitamag, i Lehi, nibe falʼeg laniyaenʼ e chitinag, i Sariah, u morngaʼagmaed, ko ngiyalʼ ni gamaed be milekag u wuruʼ e binaw iyaen ko nam nu Jerusalem, ni nggu feked fapi chipin e Jews.

7 Ma napʼan ni kug suloed ko tent rokʼ e chitamag, ma kari gel e falfalaenʼ rorow, ma arame fini felʼ laniyaenʼ e chitinag.

8 Me non, ni gaʼar: Chiney e ka fini riyulʼ u wunʼug ni Somoel e motochiyel nag ngakʼ e pumoʼon rog ni nge chuw nge yaen nga wuruʼ e binaw; arragon, ma ka fini riyulʼ u wunʼug ni i ayuweg Somoel pifakag, me chuwegraed u paʼ Laban, me piiʼ gelingraed ni nge yog ni ngar muguʼuliyed e pinʼen ni ke motochiyel nag Somoel ngoraed. Ere aray rogon ni i weliy.

9 Me yibi buch ni kar falfalaenʼ gaed ni rib gel, mar urufiyed e gamanman ngar piiʼed ni maligach ngakʼ Somoel; mi yaed pining e magaer ngakʼ fare Got ku Israel.

10 Me tomuren ni kar pininged e magaer ngakʼ fare Got ku Israel, ma chitamag, i Lehi, e fek fapi chep ni kan ker nga dakean e plate ni brass, me biʼeg ni tabab ko sommʼon.

11 Me guy ni bay fare lal ke babyor rokʼ Moses riy, ni bay riy babyoren rogon nni sunmiy e fayleng, nge ku morngaʼagen Adam nge Eva, ni yow e gal ni sommʼon e gallabthir rodaed.

12 Nge kub kean ni chipin e Jews ni aram ko tabolngin, iyib nge madaʼ ko ngiyalʼ ni ke suwey Zedekiah e lung, niʼir e ke mang pilung nu Judah;

13 Nge pi prophecies ni i yoeg e pi profet nib thothup, ni ka aram iyib nge madaʼ ko ngiyalʼ ni suwey Zedekiah e lung, nge ku boech e prophecies ni i yoeg Jeremiah.

14 Me yibi buch ni chitamag, i Lehi, e ki pirʼeg u dakean fayungi plate ni brass, ba chipin e thaʼ ko pi chitamangin ni kakrom; ere nang niʼir e yib ko ganong rokʼ Yosef; aram, fare Yosef ni fak Jacob, niʼir faram e ni piiʼ ni chuwaeyʼ nga Egypt, ma ku ir faram e ayuweg Somoel, ni nge yog niki ayuweg e chitamangin, ni Jacob, nge chon e tabinaew rokʼ ni nga dabra mʼaed ko uyngol.

15 Ma fare Got niʼir e yororiyraed, e ki ayuwegraed ngar chuw gaed u kalbus ngu lan e binaw nu Egypt.

16 Nge ku aram rogon e chitamag, i Lehi, e ki pirʼeg chipin e thaʼ ko gidiiʼ rokʼ e pi chitamangin ni kakrom. Nge Laban ni ku ir reb e ganong rokʼ Yosef, ere arfan niʼir nge chitamangin e ur chaʼariyew e pi chep nem.

17 Ere chiney e napʼan ni guy e chitamag gubin e pinnʼey, me thamiy fare Kan ni Thothup, me tabab ko prophesy ni morngaʼagen pifak nge pitoengin—

18 Ni pi plate ni brass ney e thingari yaen ngakʼ gubin pi gidiiʼen e nam, pi tabinaew, pi thin, nge gidiiʼen e pi bitir rokʼ.

19 Ere, me yoeg ni pi plate ni brass ney e thingari dabi kireb; ma ku aram rogon nge pi thin ni bay riy ni dabi mʼay fan bingyalʼ. Me prophesied nag bogi banʼen nib yoʼor ni morngaʼagen e pi bitir rokʼ.

20 Me yibi buch ni ke yibi madaʼ ko ngiyalʼ ney me gag nge chitamag e ʼug ayliyew e pi motochiyel niki i chiyliy Somoel ngomow.

21 Ma kug fekew fapi chep ni motochiyel nag Somoel ngomow, kug biʼegew ma gamow pirʼeg ni rib mangil; arragon, mar kub gaʼfan ngomow, ni gamow baʼadag ni nggu chaʼariyew e pi motochiyel rokʼ Somoel ni fan ngakʼ e pi bitir romow.

22 Ere, ba gonop rokʼ Somoel ni thingar gu fekew nge un ngomow, u napʼan ni gamow be milekag u wuruʼ e binaw iyaen ko nam nni michmicheg.