1 Asi pay dagiti mangipaulog kadagiti saan a nalinteg a paulog, ken mangisurat iti makairurumen nga impatawda;

2 Ti agkedked a mangipaay kadagiti agkasapulan iti nalinteg a pannakaukom, ken mangikkat ti kalintegan kadagiti napanglaw a tattaok, ken tapno agbalin dagiti balo a samsamda, ken tapno matakawanda dagiti awanan iti ama!

3 Ket anianto ti aramidenyo iti aldaw nga isasarungkar, ken iti pannakadadael nga aggapunto iti adayo? asinonto ti dawatanyo iti tulong? ken sadinonto ti pangibatianyo ti dayagyo?

4 No awanak agruknoydanto kadagiti balud, ken matnagdanto kadagiti napapatay. Ta gapu iti daytoy saan nga agsardeng ti pungtotna, ngem siuunnat pay laeng ti imana.

5 O Asirio, ti pang-or ti pungtotko, ken ti sarukod iti imada ti bukodda a rurod.

6 Ibaonkonto a maibusor iti managinsisingpet a nasion, ket bilinekto a bumusor kadagiti tattao a kagurak tapno alaenna ti samsam, ken tinukmaan, ken payatpayaten na ida a kas la iti pitak kadagiti kalsada.

7 Nupay kasta saanna a panggepen a kasta, wenno panunoten ti pusona a kasta; ngem adda iti pusona ti panangdadael ken mangisina kadagiti sumagmamano a nasion.

8 Ta kunana: Saan aya nga ar-ari amin dagiti prisipek?

9 Saan kadi a Carkemis ni Calne? Saan kadi nga Arpad ni Hamath? Saan kadi a Damasco ti Samaria?

10 Kas iti panangbangon ti imak kadagiti pagarian dagiti didiosen, ket rinimbawanda dagiti kinitikitan a didiosen iti Jerusalem ken iti Samaria;

11 Saanko aya aramiden ti kas inaramidko iti Samaria ken kadagiti didiosenna, iti Jerusalem ken kadagiti didiosenna?

12 Gapuna mapasamakto nga inton matungpal ti Apo ti amin nga aramidna iti Bantay Zion ken iti Jerusalem, dusaekto ti bunga ti nasukir a puso ti ari ti Asiria, ken ti dayag ti napangato a panagkitana.

13 Ta kinunana: Babaen iti pigsa ti imak ken iti kinasiribko inaramidko dagitoy a banag; ta naannadak; ket inikkatko dagiti beddeng dagiti tattao, ken tinakawko dagiti gamengda, ken kas maysa a maingel a tao mayulogko dagiti agtaeng;

14 Ket ti imak nasapulanna a kas la umok dagiti kinabaknang dagiti tattao; ken kas iti panagurnong kadagiti itlog a nabaybay-an; ket awan a pulos ti nanggunay iti payyakna, wenno nagnganga, wenno nagsirip.

15 Makapagpannakkel aya ti wasay iti nangiwasay kenkuana? Maipateg kadi ti ragadi ti bagina iti nangigudagod kenkuana? A kas la maysa a pang-or bumusor kadagidiay mangitayag kenkuana, wenno kas la ti maysa a sarukod nga ingatona ti bukkodna a kas la saan a kayo!

16 Ngarud ti Apo, ti Apo dagiti Pangen, ibaonnanto kadagiti nalulukmegna, nakukuttongna; ket iti baba ti dayagna dumarangto ti maysa a panagpuor a kas iti panangpuor iti apuy.

17 Ket ti silaw ti Israel maipaayto a kas maysa nga apuy, ken ti Nasantuanna maipaay a maysa a darang, ket uramennanto ket alun-onennanto dagiti sisiitna ken kalkalunayna;

18 Ket ibusennanto ti dayag ti bakirna, ken ti nabunga nga awayna, kararua ken bagi nga agpadpada; ket kaslanto iti maysa a mangiggem iti wagayway no matalimudaw.

19 Ket ti matda kadagiti kaykayo iti bakirna bassitto, ta iti kasta mabalin a maisurat ti maysa nga ubing ida.

20 Ket mapasamakto iti dayta nga aldaw, a dagiti natda iti Israel, ket kas kadagiti naglibas iti balay ni Jacob, saanton nga agnaed kenkuana dagiti nangpasakit kadakuada, ngem makipagtaengdanto iti Apo, ti Nasantuan ti Israel, iti kinapudno.

21 Ti natda agsublinto, wen, kas kadagiti natda ni Jacob, iti naindaklan a Dios.

22 Ta nupay kas iti darat ti baybay dagiti tattaom, Israel, agsublinto latta dagiti nabati kadakuada; ti naipaulog a pannakadadael ket aglippiasto iti kinalinteg.

23 Ta ti Apo ti Pangen ti mangaramidto iti pannakadadael, a maipaulogto iti intero a daga.

24 Ngarud, kasta ti kuna ti Apo a Dios dagiti Pangen: O tattaok nga agnaed iti Sion, saankayo nga agbuteng iti Asirio; saplitennakayo iti pang-or, ken ilayatnanto ti sarukod a maibusor kenka, a kas iti kababalin iti Egipto.

25 Ta iti apagbiit a kanito, ket agsardengto ti panaggura, ken ti pungtotko iti pannakadadaelda.

26 Ket tignayento ti Apo dagiti Pangen ti maysa a pannusa kenkuana a maibatay iti pannakapapatay ni Midian iti bato ti Oreb; ket kas ti pang-orna agsaadto iti baybay kastanto met nga itayagnanto a kas iti kababalin iti Egipto.

27 Ket mapasamakto iti dayta nga aldaw a maikkatto ti dagensenna iti abagam, ken ti sangolna iti tengngedmo, ket madadaelto ti sangol gapu iti panangpulot.

28 Umay isuna iti Aiyat, limmasat iti Migron; ken indissaagna dagiti kargana iti Mikmas.

29 Linasatda ti bessang; umainda iti Geba; agbuteng ti Ramat; aglibas ti Gibeah ni Saul.

30 Agpukkawka, O babai nga anak ni Gallim; pakaigapuan a mangngeg idiay Laisa, O nairurumen nga Anatot.

31 Napatalaw ti Madmenah; naguummong dagiti agindeg iti Gebim tapno aglibas.

32 Ngem agbatinto pay iti Nob iti dayta nga aldaw; iwagisna ti imana iti bantay ti babai nga anak ti Sion, ti turod ti Jerusalem.

33 Kitaem, pukanento ti Apo, ti Apo dagiti Pangen ti dakkel a sanga nga aramatenna ti nakabutbuteng; ket maputedto dagiti natayag ti sasaadenna; ken maipapabanto dagiti napalangguad.

34 Ket pukanennanto ti kasamekan dagiti bakir nga aramatenna ti landok, ken marsuodto ti Lebanon babaen iti maysa a maingel.