1 Mo long ples ia, bae wan niufala kru i kamaot long stamba blong Jese, mo wan branj bae i gro aot long ol rus blong hem.

2 Mo Spirit blong Lod bae i stap long hem, spirit blong waes tingting mo haremsave, spirit blong kaonsel mo paoa, spirit blong save mo blong gat respek blong Lod;

3 Mo bae i mekem hem blong andastanem samting kwik from respek we hem i gat long Lod; mo bae hem i no jaj folem lukluk blong ol ae blong hem, mo tu, bae i no toktok strong folem wanem we hem i harem long sora blong hem.

4 Be wetem stret mo gud fasin bae hem i jajem ol puaman, mo tok strong blong i gat jastis long ol man we oli no stap flas long wol ia; mo bae hem i kilim wol wetem stik blong maot blong hem, mo wetem win blong skin blong maot blong hem bae hem i kilimded ol nogud man.

5 Mo stret mo gud fasin bae i stap olsem strap blong wes blong hem, mo fasin blong stap fetful bae i strap blong bel blong hem.

6 Wael dog tu bae i stap wetem smol sipsip, mo lepad bae i ledaon wetem wan yang nanigot, mo yang buluk mo yang laeon mo buluk we i fatfat oli stap tugeta; mo wan smol pikinini bae i lidim olgeta.

7 Mo kao mo bea bae i kakae; ol yangwan blong olgeta bae oli ledaon tugeta; mo laeon bae i kakae gras olsem buluk.

8 Mo pikinini we i stap titi yet bae i pleiplei long hol blong wan smol posen snek mo bigfala pikinini bae i putum han blong hem long hol blong wan posen snek.

9 Bae oli no mekem olgeta oli harem i soa o prapa spolem gud olgeta bakegen long evri tabu bigfala hil blong mi, from wol ia bae i fulap wetem save blong Lod, semmak olsem ol wota oli kavremap solwota.

10 Mo long dei ia bae i gat wan rus blong Jese we bae i stanap olsem wan flag blong ol pipol; flag ia, bae Ol Jentael oli lukaotem; mo ples blong spel blong hem bae i naes tumas.

11 Mo bae i kam blong hapen se long dei ia we Lod bae i putum han blong hem bakegen blong nambatu taem, blong tekembak smol haf nomo blong ol pipol blong hem we bae i stap, long Asiria, mo long Ijip, mo long Patros, mo long Kus, mo long Elam, mo long Jina, mo long Hamat, mo long ol aelan blong solwota.

12 Mo bae hem i leftemap wan flag blong ol kantri, mo bae i karem i kam tugeta olgeta we oli bin sakemaot long Isrel, mo karem oli kam tugeta ol man Juda we oli bin go olbaot long ol fo pat blong wol.

13 Jalus blong Efrem tu bae i aot, mo ol enemi blong Juda, Lod bae i katemaot olgeta; Efrem bae i no jalus long Juda, mo Juda bae i no givim hadtaem long Efrem.

14 Be bae oli flae long ol solda blong ol man blong Filistia i go long Wes; bae oli stilim olgeta blong Is tugeta; bae oli putum han blong olgeta long Edom mo Moab; mo ol pikinini blong Amon bae oli obei olgeta.

15 Mo Lod bae i prapa spolem gud tang blong solwota blong Ijip; mo wetem strong win blong hem bae hem i sekem han blong hem ova long reva, mo bae i kilim hem i go long seven smol reva, mo mekem ol man i go ova wetem drae leg.

16 Mo bae i gat wan bigfala rod blong smol haf nomo blong ol pipol blong hem we bae oli stap biaen, long Asiria, olsem we i bin stap long Isrel long dei we hem i bin kamaot long graon blong Ijip.