1 Pea ʻi he ʻaho ko iá te ke pehē: ʻE ʻEiki, te u fakafetaʻi kiate koe; neongo naʻá ke houhau kiate au kā kuo lolou atu ʻa ho houhaú, pea kuo fakafiemālieʻi au.

2 Vakai, ko e ʻOtuá ʻa hoku fakamoʻuí; te u falala, kae ʻikai manavahē; he ko e ʻEiki ko Sihová ʻa hoku mālohí ia mo ʻeku hivá; kuó ne hoko foki ko hoku fakamoʻuí.

3 Ko ia, te mou ʻutu fiefia ʻa e vai mei he ngaahi vai ʻo e fakamoʻuí.

4 Pea ʻi he ʻaho ko iá te mou pehē: Fakafetaʻi ki he ʻEikí, ui ki hono huafá, tala ʻa ʻene ngaahi ngāué ʻi he lotolotonga ʻo e kakaí, pea fakahā ʻa e lāngilangi ʻo hono huafá.

5 Hiva ki he ʻEikí; he kuó ne fai ha ngaahi meʻa lelei lahi; he kuo ʻiloʻi ia ʻi he māmaní kotoa.

6 Kalanga pea mavava, ʻa kimoutolu ʻa e kakai ʻoku nofo ʻi Saioné; he ʻoku māfimafi ʻa e Tokotaha Māʻoniʻoni ʻo ʻIsileli ʻa ia ʻoku ʻi homou lotolotongá.