1 Mesej blong ded blong Babilon, we Aesea boe blong Amoj i bin luk.

2 Yufala i leftemap wan flag long bigfala hae hil, singaot laod long olgeta, sekem han, blong oli save go long ol get blong ol man we oli laef moa gud bitim ol puaman.

3 Mi bin givim oda long ol tabu wan blong mi, mi tu mi bin singaotem ol strong man blong mi, from kros blong mi i no stap long olgeta we oli glad we mi mi hae.

4 Noes blong ol grup blong ol pipol long ol bigfala hil i olsem blong wan bigfala pipol, wan noes we i laod blong ol kingdom blong ol kantri we oli kam tugeta, Lod blong Ol Pipol i karem i kam tugeta ol soldia blong faet.

5 Oli kam long wan kantri we i longwe tumas, long en blong heven, yes, Lod, mo ol tul blong faet blong stret kros blong hem, blong prapa spolem gud ful graon.

6 Yufala i singaot laod, from dei blong Lod i kam kolosap; bae i kam olsem wan fasin blong smasem gud samting long Hem we i gat bigfala paoa.

7 From hemia, bae evri han i taet; hat blong evri man bae i olsem aes we i ron;

8 Mo olgeta bae i fraet; ol soa blong bodi we i strong mo ol harem nogud bae i holemtaet olgeta; olgeta bae oli sapraes long wanwan long olgeta; ol fes blong olgeta bae i olsem ol flem blong faea.

9 Luk, dei blong Lod i stap kam, i rabis bigwan tugeta wetem bigfala nogud kros mo strongfala kros, blong mekem graon i emti; mo bae hem i prapa spolem gud ol man we oli sin, oli aot long hem.

10 From ol sta blong heven mo ol grup blong sta blong hem bae oli no givimaot laet; san bae i kam tudak taem we hem i girap, mo mun bae i no mekem laet blong hem i laet.

11 Mo bae mi panisim wol from nogud fasin, mo ol man nogud from ol rabis fasin blong olgeta; bae mi mekem se ol hae tingting blong ol flas man oli stop, mo bae mi pulum daon tingting we i hae blong ol rabis man.

12 Bae mi mekem wan man i moa gudgudfala bitim gudfala gol; wan man tu bitim wan pis gol blong Ofiri.

13 From hemia, bae mi seksekem ol heven, mo wol bae i kamaot long ples blong hem, tru long bigfala nogud kros blong Lod blong Ol Pipol, mo long dei blong strongfala kros blong hem.

14 Mo bae i olsem wan dia we oli stap ronem, mo olsem wan sipsip we i no gat eni man we i stap lukaotem hem; mo bae evri man i gobak long ol pipol blong hem, mo evriwan i ronwe i gobak long graon blong hem.

15 Evriwan we i gat hae tingting, bae oli stikim olgeta i gotru; yes, mo evriwan we i joenem olgeta we oli nogud bae oli foldaon tru long naef blong faet.

16 Ol pikinini blong olgeta tu bae oli katem olgeta long pisis long fored blong ae blong olgeta; bae oli smasem gud haos blong olgeta mo bae oli repem ol waef blong olgeta.

17 Luk, bae mi tanem tingting blong olgeta blong Media i go agensem olgeta, we bae oli no tingbaot silva mo gol, mo tu, bae oli no glad long hem.

18 Ol bonara blong olgeta tu bae oli kilim ol yang man i go long pisis; mo olgeta bae oli no gat sore long ol pikinini insaed long bel; ol ae blong olgeta bae i no sevem ol pikinini.

19 Mo Babilon, glori blong ol kingdom, flas blong ol Kaldis we i bigwan tumas, bae i olsem taem we God i bin smasem gud Sodom mo Gomora.

20 Bae i no gat man i stap long hem bakegen, mo tu, bae hem i no gat man long wan jeneresen i go long narafala jeneresen: mo tu, bae ol man blong Arab oli no stanemap tenet blong olgeta long ples ia; mo tu, bae ol man blong lukaot long sipsip oli no mekem ol sipsip blong olgeta oli spel long ples ia.

21 Be ol wael animol blong draeples bae oli stap long ples ia; mo ol haos blong olgeta bae oli fulap long ol animol we oli no glad; mo ol hoknaet bae oli stap long ples ia, mo ol man nanigot bae oli danis long ples ia.

22 Mo ol wael animol blong ol aelan bae oli singaot long ol emti haos blong olgeta, mo ol dragon oli singaot insaed long ol naes haos blong king; mo taem blong hem kolosap i kam, mo dei blong hem bae oli no seftem. From bae mi smasem gud hem kwiktaem; yes, from bae mi gat sore long ol pipol blong mi, be ol man nogud bae oli mas ded.