1 Xb’aan naq li Qaawa’ taaruxtaana ru laj Jakob, ut toj tixsik’ ru laj Israel, ut tixk’ojob’eb’ sa’ tz’aqal lix ch’och’eb’, ut te’junajiiq laj jalanil tenamit rik’ineb’, ut te’jiloq rik’in lix junkab’al laj Jakob.

2 Ut eb’ li tenamit te’xk’ameb’ chaq ut te’xk’eheb’ sa’ lix na’ajeb’; relik chi yaal, chalen chaq xnajtil lix maril li ruchich’och’; ut te’sutq’iiq sa’eb’ lix ch’och’ li yeechi’inb’il. Ut lix junkab’al laj Israel te’reechaniheb’, ut lix ch’och’ li Qaawa’ taawanq choq’ reheb’ li moos ut li moos ixq; ut te’xk’am chi preexil li ani chi aj-u ke’wan chaq chi preexil; ut te’taqlanq sa’ xb’eeneb’ li ke’rahob’tesink chaq reheb’.

3 Ut taak’ulmanq sa’ li kutan a’an naq li Qaawa’ tatxk’e chi hilank, chiru xrahil aach’ool, ut chiru laa xiw, ut chiru chixjunil li kawil moosil kimine’ wi’ aawu chi k’anjelak.

4 Ut taak’ulmanq sa’ li kutan a’an, naq taawaklesi li ch’olob’ank aatin a’in chirix li rey aj Babilonia, ut taaye: Chan ru naq x’oso’ laj rahob’tesinel, naq x’oso’ li tenamit oor okenaq chaq!

5 Li Qaawa’ xtoq lix che’eb’ laj maak, lix xuq’eb’ laj taqlanel.

6 Li kisak’ok chaq reheb’ li tenamit sa’ xpo’jik xch’ool, chi ink’a’ kikanab’an chaq sak’ok, li kitaqlan chaq sa’ xb’eeneb’ li tenamit rik’in josq’il, rahob’tesinb’il chik, ut maa’ani naxram ru xrahob’tesinkil.

7 Chixjunil li ruchich’och’ wan chik chi hilank, ut ch’anch’o; neke’xjap re chi b’ichank.

8 Relik chi yaal, eb’ lix toonal li chaj neke’saho’ sa’ xch’ool chawix, ut jo’kaneb’ ajwi’ lix toonal li yaw aran Libano, neke’xye: Chalen chaq naq xatrume’ maajun chik aj t’anonel nachal sa’ qab’een.

9 Li xb’alb’a na’eek’an chaq taq’a choq’ aawe re aak’ulb’al sa’ aachalik; narajsiheb’ ru li kamenaq choq’ aawe, chixjunileb’ li xb’eenileb’ re li ruchich’och’; xwaklesiheb’ chaq sa’ xk’ojarib’aaleb’ chixjunil lix reyeb’ li tenamit.

10 Chixjunileb’ te’aatinaq, ut te’xye aawe: Ma laa’at ajwi’ xatq’uno’ jo’ laa’o? Ma xat-ok jo’ chanchano laa’o?

11 Lix chaq’al ru laa wankilal kub’enaq chik sa’ li muqleb’aal; ink’a’ chik na’ab’iman xyaab’ laa wajb’; helho li motzo’ aawub’el, ut neke’tub’la li motzo’ sa’ aab’een.

12 Chan ru naq t’anenaqat chaq sa’ choxa, at Lucifer, alalb’ejat re li saqew! Rumb’ilat chaq chi ch’och’, li katq’unob’resink reheb’ li ninqi tenamit!

13 Xb’aan naq laa’at xaye sa’ laa ch’ool: Laa’in tintaqe’q sa’ choxa, tintaqsi ink’ojleb’aal sa’ xb’eeneb’ chaq lix chahim li Dios; tink’ojlaaq ajwi’ sa’ xb’een lix tzuul re li ch’utam, sa’eb’ li na’ajej sa’ xnim li saq’e;

14 Tintaqe’q sa’ xb’een lix taqenaqileb’ li choql; tinwanq chanchan li Q’axal Taqenaq Xwankil.

15 A’b’an laa’at tatkub’siiq sa’ xb’alb’a, sa’eb’ lix uulil li chamal jul.

16 Eb’ li te’iloq aawe tate’xka’ya, ut tate’xk’oxla, ut te’xye: Ma a’in li winq li kixk’e chi hiikank li ch’och’, ut kixchiq’eb’ li awa’b’ejihom?

17 Ut kixkanab’ li ruchich’och’ chanchan yamyookil na’ajej, ut kixsacheb’ li tenamit wankeb’ chi sa’, ut ink’a’ kixte li ochoch wankeb’ wi’ lix preex?

18 Chixjunileb’ lix reyeb’ li tenamit, relik chi yaal, chixjunileb’, yokyookeb’ chaq sa’ xninqaleb’ xloq’al, li junjunq reheb’ sa’ tz’aqal li rochoch.

19 Laa’at b’an tz’eqb’ilat chaq sa’ laa muqleb’aal chanchan jun tz’eqb’eetal ruq’ che’, ut li rela’eb’ li kamsinb’ileb’, li q’axb’ileb’ ru rik’in li yok’leb’ ch’iich’, li neke’kub’e sa’ xpekal li chamal jul, chanchan xtib’el jun li kamenaq li yeq’b’il rub’el oqej.

20 Moko taak’ul ta rochb’eeneb’ li muqlaak, xb’aan naq laa’at xasach laa ch’och’ ut xakamsiheb’ laa tenamit; maajo’q’e te’wanq chi na’no ru li riyajileb’ laj b’aanuhom maa’usilal.

21 Kawresihomaq li kamsink choq’ reheb’ li ralal xk’ajol xb’aaneb’ lix maa’usilal lix yuwa’eb’, re naq ink’a’ te’wakliiq, chi moko te’reechani li ch’och’, chi moko te’xnujob’resi rik’in tenamit lix b’een li ruchich’och’.

22 Xb’aan naq laa’in tinwakliiq chixpleetinkileb’, chan li Qaawa’ reheb’ li Teepal, ut tinch’ot chaq sa’ Babilonia li k’ab’a’ej, ut li rela’, ut li alalb’ej, ut li ikaq’b’ej, chan li Qaawa’.

23 Tinkanab’ ajwi’ choq’ reechanihom li malach, ut choq’ saab’ ha’; ut tinmesu rik’in li mesleb’ re li sachok, chan li Qaawa’ reheb’ li Teepal.

24 Li Qaawa’ reheb’ li Teepal kixxaqab’ aatin, ut kixye: Relik chi yaal naq jo’ chanru kink’oxla, jo’kan ajwi’ taak’ulmanq; ut jo’ chanru kink’uub’ inna’leb’, jo’kan taaxaqab’amanq—

25 Naq tink’am chaq laj Asirio sa’ lin ch’och’, ut sa’ xb’eeneb’ lin tzuul tinyeq’i rub’el woq; toja’ naq li riiqleb’ taa’isiiq chaq chixb’eeneb’, ut li riiq taa’isiiq chaq sa’ xb’eeneb’ xtel.

26 A’in li na’leb’ na’leb’anb’il sa’ xb’een chixjunil li ruchich’och’, ut a’in li uq’ej li ye’b’il sa’ xb’eeneb’ chixjunil li tenamit.

27 Xb’aan naq li Qaawa’ reheb’ li Teepal kixk’oxla li na’leb’, ut ani taasachoq xwankil? Ut li ruq’ wan chi ye’b’il, ut ani taaramoq ru?

28 Sa’ li chihab’ naq kikam li rey aj Ajas kik’eeman li rahilal a’in.

29 Misaho’ aach’ool, chixjunilat Filistea, rik’in naq q’etb’il lix che’ li kisak’ok aawe; xb’aan naq sa’ xxe’ li k’anti’, taa’elq chaq jun li k’amb’olay, ut rik’in a’an taa’uuchinq jun li xik’anel k’anti’ wan xxamlel.

30 Ut li xb’een yo’lajenaq chiru li neb’a’ taatzekanq, ut li ani maak’a’ wan re, taayoklaaq sa’ tuqtuukilal, ut laa’in tinkamsi laa xe’ rik’in we’ej, ut a’an tixkamsi laa wela’.

31 Chat-ayaynaq, at okeb’aal, chatyaab’aq, at tenamit, laa’at oso’jenaqat, chixjunilat Filistea; xb’aan naq sa’ xnim li saq’e taachalq chaq jun li choql sib’, ut maajun taakanaaq xjunes sa’ li hoonal eetalinb’il choq’ re.

32 K’a’ru ut te’chaq’oq wi’ laj k’amol esil reheb’ li ninqi tenamit? Naq li Qaawa’ xk’ojob’ Sion, ut naq eb’ li neb’a’ re lix tenamit te’xkanab’ rib’ chiru.