ບົດທີ 27
ຄວາມມືດ ແລະ ການປະຖິ້ມຄວາມເຊື່ອຈະປົກຄຸມແຜ່ນດິນໂລກໃນຍຸກສຸດທ້າຍ—ພຣະຄຳພີມໍມອນຈະອອກມາ—ພະຍານສາມຄົນຈະເປັນພະຍານເຖິງພຣະຄຳພີນີ້—ຜູ້ທີ່ມີການສຶກສາຈະເວົ້າວ່າລາວບໍ່ສາມາດອ່ານພຣະຄຳພີ ຊຶ່ງຜະນຶກໄວ້ນີ້—ພຣະຜູ້ເປັນເຈົ້າຈະທຳງານແປກປະຫລາດ ແລະ ອັດສະຈັນ—ປຽບທຽບກັບເອຊາຢາ 29. ປະມານ 559–545 ປີ ກ່ອນ ຄ.ສ.
1 ແຕ່ຈົ່ງເບິ່ງ, ໃນ ຍຸກສຸດທ້າຍ ຫລື ໃນຍຸກຂອງຄົນຕ່າງຊາດ—ແທ້ຈິງແລ້ວ, ຈົ່ງເບິ່ງ ປະຊາຊາດທັງໝົດຂອງຄົນຕ່າງຊາດ ແລະ ຊາວຢິວ, ທຸກຄົນທີ່ຈະມາຫາແຜ່ນດິນນີ້ ແລະ ຄົນທີ່ຈະຢູ່ໃນແຜ່ນດິນອື່ນ, ແທ້ຈິງແລ້ວ, ແມ່ນໃນທົ່ວແຜ່ນດິນຂອງແຜ່ນດິນໂລກ, ຈົ່ງເບິ່ງ, ພວກເຂົາຈະເມົາດ້ວຍຄວາມຊົ່ວຮ້າຍ ແລະ ຄວາມໜ້າກຽດຊັງນາໆປະການ—
2 ແລະ ເມື່ອມື້ນັ້ນມາເຖິງ ຈອມໂຍທາຈະສະເດັດມາຢ້ຽມຢາມພວກເຂົາດ້ວຍສຽງຟ້າຮ້ອງ ແລະ ແຜ່ນດິນໄຫວ, ແລະ ດ້ວຍສຽງກຶກກ້ອງຢ່າງໃຫຍ່ຫລວງ, ດ້ວຍລົມພະຍຸ, ແລະ ດ້ວຍພະຍຸຝົນຟ້າຄະນອງ, ແລະ ແປວໄຟທີ່ຈະເຜົາຜານ.
3 ແລະ ປະຊາຊາດທັງໝົດທີ່ ຕໍ່ສູ້ກັບຊີໂອນ ແລະ ເຮັດໃຫ້ມັນເດືອດຮ້ອນຈະເປັນຄືກັນກັບຄວາມຝັນຂອງພາບນິມິດໃນຕອນກາງຄືນ; ແທ້ຈິງແລ້ວ, ມັນຈະບັງເກີດຂຶ້ນກັບພວກເຂົາ ຈະເປັນດັ່ງຄົນຫິວໂຫຍທີ່ຝັນໄປ, ແຕ່ຈົ່ງເບິ່ງ ເຂົາໄດ້ກິນແຕ່ເມື່ອເຂົາຕື່ນຂຶ້ນແລ້ວ ຈິດວິນຍານຂອງເຂົາຈະວ່າງເປົ່າ ຫລື ຄືກັນກັບຄົນຫິວນ້ຳທີ່ຝັນໄປ, ແລະ ຈົ່ງເບິ່ງ ເຂົາໄດ້ດື່ມແຕ່ເມື່ອເຂົາຕື່ນຂຶ້ນແລ້ວ, ເຂົາຈະເຫັນວ່າເຂົາອ່ອນເພຍ ແລະ ຈິດວິນຍານຂອງເຂົາມີຄວາມຫິວໂຫຍ; ແທ້ຈິງແລ້ວ, ແມ່ນຝູງຊົນຂອງປະຊາຊາດທັງໝົດທີ່ຕໍ່ສູ້ກັບພູຊີໂອນຈະເປັນເຊັ່ນນັ້ນ.
4 ເພາະຈົ່ງເບິ່ງ, ເຈົ້າທັງຫລາຍທີ່ສ້າງຄວາມຊົ່ວຮ້າຍ, ຈົ່ງຫ້າມຕົນເອງ ແລະ ປະຫລາດໃຈເພາະເຈົ້າຈະຮ້ອງອອກມາ ແລະ ຮ້ອງໄຫ້; ແທ້ຈິງແລ້ວ, ເຈົ້າຈະເມົາແຕ່ບໍ່ແມ່ນດ້ວຍເຫລົ້າອະງຸ່ນ, ເຈົ້າຈະໂຊເຊແຕ່ບໍ່ແມ່ນດ້ວຍເຄື່ອງທີ່ມຶນເມົາ.
5 ເພາະຈົ່ງເບິ່ງ, ພຣະຜູ້ເປັນເຈົ້າຈະຖອກວິນຍານແຫ່ງການນອນຫລັບໃຫ້ເຈົ້າ. ເພາະຈົ່ງເບິ່ງ, ເຈົ້າຫລັບຕາ ແລະ ເຈົ້າປະຕິເສດສາດສະດາ, ແລະ ພຣະອົງໄດ້ປິດບັງຜູ້ປົກຄອງຂອງເຈົ້າ ແລະ ຜູ້ພະຍາກອນໄວ້ ເພາະຄວາມຊົ່ວຮ້າຍຂອງເຈົ້າ.
6 ແລະ ເຫດການຈະບັງເກີດຂຶ້ນຄື ອົງພຣະຜູ້ເປັນເຈົ້າຈະນຳເອົາຂໍ້ຄວາມຂອງ ໜັງສືເຫລັ້ມໜຶ່ງມາຫາ ເຈົ້າ ແລະ ມັນຈະເປັນຂໍ້ຄວາມຂອງຄົນຊຶ່ງລ່ວງລັບໄປແລ້ວ.
7 ແລະ ຈົ່ງເບິ່ງ ໜັງສືນັ້ນຈະຖືກ ຜະນຶກໄວ້ ແລະ ໜັງສືຈະເປັນ ການເປີດເຜີຍຈາກພຣະເຈົ້າ, ນັບຕັ້ງແຕ່ການເລີ່ມຕົ້ນຂອງໂລກເຖິງ ການສິ້ນສຸດຂອງມັນ.
8 ດັ່ງນັ້ນ, ຍ້ອນສິ່ງຊຶ່ງຖືກ ຜະນຶກໄວ້ແລ້ວ ຈຶ່ງ ຈະບໍ່ມອບສິ່ງຊຶ່ງຖືກຜະນຶກໄວ້ໃຫ້ ໃນວັນແຫ່ງຄວາມຊົ່ວຮ້າຍ ແລະ ຄວາມໜ້າກຽດຊັງຂອງຜູ້ຄົນ. ດັ່ງນັ້ນ ໜັງສືຈະໄດ້ຖືກຮັກສາໄວ້ຈາກພວກເຂົາ.
9 ແຕ່ຈະມອບໜັງສືໃຫ້ ຊາຍຜູ້ໜຶ່ງ ແລະ ເຂົາຈະມອບຂໍ້ຄວາມໃນໜັງສື ຊຶ່ງເປັນຂໍ້ຄວາມຂອງຄົນທີ່ລ່ວງລັບໄປແລ້ວສູ່ພື້ນດິນ, ແລະ ລາວຈະມອບຂໍ້ຄວາມນີ້ໃຫ້ ອີກຜູ້ໜຶ່ງ;
10 ແຕ່ຂໍ້ຄວາມທີ່ຖືກຜະນຶກໄວ້ລາວຈະບໍ່ມອບໃຫ້ ແລະ ລາວຈະບໍ່ມອບໜັງສືໃຫ້ ເພາະໜັງສືຈະຖືກຜະນຶກໄວ້ໂດຍອຳນາດຂອງພຣະເຈົ້າ, ແລະ ການເປີດເຜີຍ ຊຶ່ງຖືກຜະນຶກໄວ້ຈະໄດ້ຖືກຮັກສາໄວ້ໃນໜັງສືຈົນເຖິງເວລາອັນເໝາະສົມຂອງພຣະຜູ້ເປັນເຈົ້າ, ທີ່ມັນຈະອອກມາ; ເພາະຈົ່ງເບິ່ງ, ມັນຈະເປີດເຜີຍເລື່ອງທັງໝົດ ນັບຕັ້ງແຕ່ການວາງຮາກຖານຂອງໂລກຈົນເຖິງການສິ້ນສຸດຂອງມັນ.
11 ແລະ ວັນນັ້ນຈະມາເຖິງ ເມື່ອຈະອ່ານຂໍ້ຄວາມໃນໜັງສື ຊຶ່ງຖືກຜະນຶກໄວ້ເທິງຫລັງຄາເຮືອນ ແລະ ຈະອ່ານມັນໂດຍອຳນາດຂອງພຣະຄຣິດ; ແລະ ທຸກເລື່ອງຈະຖືກ ເປີດເຜີຍຕໍ່ລູກຫລານມະນຸດ ແລະ ຊຶ່ງເຄີຍເປັນຢູ່ມາແລ້ວໃນບັນດາລູກຫລານມະນຸດ, ແລະ ເຄີຍເປັນຢູ່ຈົນເຖິງທີ່ສຸດຂອງແຜ່ນດິນໂລກ.
12 ດັ່ງນັ້ນ, ໃນມື້ນັ້ນ ເມື່ອຈະມອບໜັງສືໃຫ້ຊາຍຜູ້ນັ້ນທີ່ຂ້າພະເຈົ້າເວົ້າເຖິງ, ໜັງສືຈະຖືກເຊື່ອງໄວ້ໃຫ້ພົ້ນຈາກສາຍຕາຂອງໂລກ, ເພື່ອຈະບໍ່ໃຫ້ມີສາຍຕາຂອງຜູ້ໃດເຫັນ ນອກຈາກ ພະຍານ ສາມຄົນຈະເຫັນ ໂດຍອຳນາດຂອງພຣະເຈົ້າ ນອກເໜືອຈາກຄົນທີ່ຈະໄດ້ຮັບມອບໜັງສື; ແລະ ພວກເຂົາຈະໃຫ້ຖ້ອຍຄຳເຖິງຄວາມຈິງຂອງໜັງສື ແລະ ສິ່ງທີ່ຢູ່ໃນນັ້ນ.
13 ແລະ ບໍ່ມີຜູ້ອື່ນທີ່ຈະເຫັນມັນນອກຈາກບໍ່ເທົ່າໃດຄົນຕາມພຣະປະສົງຂອງພຣະເຈົ້າ, ເພື່ອສະແດງປະຈັກພະຍານເຖິງພຣະຄຳຂອງພຣະອົງຕໍ່ລູກຫລານມະນຸດ ເພາະອົງພຣະຜູ້ເປັນເຈົ້າໄດ້ກ່າວວ່າ ຂໍ້ຄວາມຂອງຄົນຊື່ສັດຈະເວົ້າຄືກັບວ່າອອກມາ ຈາກຄົນຕາຍ.
14 ດັ່ງນັ້ນ, ອົງພຣະຜູ້ເປັນເຈົ້າຈະເລີ່ມນຳເອົາຂໍ້ຄວາມໃນໜັງສືອອກມາ; ແລະ ດ້ວຍປາກຂອງພະຍານຫລາຍປາກເທົ່າທີ່ພຣະອົງເຫັນວ່າດີ ພຣະອົງຈະສະຖາປະນາພຣະຄຳຂອງພຣະອົງໄວ້; ແລະ ວິບັດແກ່ຄົນທີ່ ປະຕິເສດພຣະຄຳຂອງພຣະເຈົ້າ!
15 ແຕ່ຈົ່ງເບິ່ງ, ເຫດການຈະບັງເກີດຂຶ້ນຄື ອົງພຣະຜູ້ເປັນເຈົ້າຈະກ່າວກັບຜູ້ທີ່ພຣະອົງຈະມອບໜັງສືໃຫ້ວ່າ: ຈົ່ງນຳເອົາຂໍ້ຄວາມນີ້ຊຶ່ງບໍ່ໄດ້ຖືກຜະນຶກໄວ້ ແລະ ມອບໃຫ້ຄົນອີກຄົນໜຶ່ງ, ເພື່ອເຂົາຈະໄດ້ສະແດງໃຫ້ຄົນທີ່ມີການສຶກສາເບິ່ງ ໂດຍກ່າວວ່າ: ຂໍໃຫ້ທ່ານ ອ່ານເລື່ອງນີ້ເບິ່ງດູ ແລະ ຄົນທີ່ມີການສຶກສາຈະບອກວ່າ: ຈົ່ງນຳເອົາໜັງສືມາ ແລ້ວເຮົາຈະອ່ານມັນ.
16 ແລະ ບັດນີ້, ເພາະວ່າການຍ້ອງຍໍສັນລະເສີນຂອງໂລກ ແລະ ເພື່ອຫາ ຜົນປະໂຫຍດ ເຂົາຈະກ່າວເຊັ່ນນີ້ ແລະ ບໍ່ແມ່ນເພື່ອລັດສະໝີພາບຂອງພຣະເຈົ້າ.
17 ແລະ ຊາຍຜູ້ນັ້ນຈະກ່າວອີກວ່າ: ຂ້າພະເຈົ້າຈະນຳເອົາໜັງສືມາບໍ່ໄດ້ເພາະມັນຖືກຜະນຶກໄວ້ແລ້ວ.
18 ເມື່ອນັ້ນຄົນມີການສຶກສາຈະເວົ້າວ່າ: ຂ້າພະເຈົ້າອ່ານມັນບໍ່ໄດ້.
19 ດັ່ງນັ້ນ ເຫດການຈະບັງເກີດຂຶ້ນຄື, ອົງພຣະຜູ້ເປັນເຈົ້າຈະມອບໜັງສື ແລະ ຂໍ້ຄວາມທີ່ມີຢູ່ໃນນັ້ນ ໃຫ້ຄົນທີ່ບໍ່ມີການສຶກສາອີກ; ແລະ ຊາຍຄົນທີ່ບໍ່ມີການສຶກສາຈະເວົ້າວ່າ: ຂ້າພະເຈົ້າບໍ່ມີການສຶກສາ.
20 ເມື່ອນັ້ນອົງພຣະຜູ້ເປັນເຈົ້າຈະກ່າວກັບລາວວ່າ: ຄົນມີການສຶກສາຈະອ່ານມັນບໍ່ໄດ້ ເພາະວ່າເຂົາປະຕິເສດມັນ, ແລະ ເຮົາສາມາດທຳງານຂອງເຮົາໄດ້; ດັ່ງນັ້ນ ເຈົ້າຈົ່ງອ່ານຂໍ້ຄວາມທີ່ເຮົາຈະໃຫ້ແກ່ເຈົ້າ.
21 ຢ່າໄດ້ແຕະຕ້ອງເລື່ອງທີ່ຜະນຶກໄວ້ ເພາະເຮົາຈະນຳເອົາມັນອອກມາໃນເວລາອັນເໝາະສົມຂອງເຮົາເອງ; ເພາະເຮົາຈະສະແດງໃຫ້ລູກຫລານມະນຸດເຫັນວ່າ ເຮົາສາມາດທຳງານຂອງເຮົາເອງໄດ້.
22 ດັ່ງນັ້ນ, ເມື່ອເຈົ້າອ່ານຂໍ້ຄວາມຂອງເຮົາທີ່ສັ່ງເຈົ້າໄວ້ ແລະ ໄດ້ຮັບ ພະຍານ ຊຶ່ງເຮົາສັນຍາຈະໃຫ້ແກ່ເຈົ້າ, ເມື່ອນັ້ນເຈົ້າຈົ່ງຜະນຶກໜັງສືໄວ້ອີກ, ແລະ ເຊື່ອງມັນໄວ້ກັບເຮົາ ເພື່ອຈະໄດ້ຮັກສາຂໍ້ຄວາມ ຊຶ່ງເຈົ້າຍັງບໍ່ທັນໄດ້ອ່ານຈົນວ່າຕາມປັນຍາຂອງເຮົາເອງຈະເຫັນສົມຄວນທີ່ຈະເປີດເຜີຍທຸກຢ່າງແກ່ລູກຫລານມະນຸດ.
23 ເພາະຈົ່ງເບິ່ງ, ເຮົາຄືພຣະເຈົ້າ; ແລະ ເຮົາຄືພຣະເຈົ້າແຫ່ງ ສິ່ງມະຫັດສະຈັນ; ແລະ ເຮົາຈະສະແດງແກ່ໂລກວ່າ ເຮົາ ເໝືອນກັບເຊັ່ນມື້ວານນີ້, ມື້ນີ້, ແລະ ຕະຫລອດການ ນອກຈາກຈະ ເປັນຕາມສັດທາຂອງລູກຫລານມະນຸດ.
24 ແລະ ເຫດການຈະບັງເກີດຂຶ້ນຄື ພຣະຜູ້ເປັນເຈົ້າຈະກ່າວກັບລາວ ຊຶ່ງຈະອ່ານຂໍ້ຄວາມທີ່ຈະມອບໃຫ້ລາວວ່າ:
25 ຕາບເທົ່າທີ່ຜູ້ຄົນພວກນີ້ເຂົ້າມາໃກ້ເຮົາດ້ວຍປາກຂອງພວກເຂົາ, ແລະ ໃຫ້ກຽດເຮົາດ້ວຍຮິມສົບຂອງພວກເຂົາ, ແຕ່ໃຈຂອງພວກເຂົາຫ່າງໄກຈາກເຮົາ, ແລະ ຄວາມຢ້ານກົວຂອງພວກເຂົາທີ່ມີຕໍ່ເຮົາຖືກສິດສອນໂດຍ ກົດເກນຂອງມະນຸດ—
26 ສະນັ້ນ, ເຮົາຈະເລີ່ມເຮັດ ສິ່ງອັດສະຈັນກັບຜູ້ຄົນພວກນີ້ອີກ, ແທ້ຈິງແລ້ວ, ງານແປກປະຫລາດ ແລະ ອັດສະຈັນ, ປັນຍາຂອງຄົນທີ່ມີປັນຍາຂອງເຂົາຈະພິນາດໄປ, ແລະ ຄວາມເຂົ້າໃຈຂອງຄົນທີ່ເຂົ້າໃຈຈະຖືກປິດບັງໄວ້.
27 ແລະ ວິບັດແກ່ຜູ້ທີ່ພະຍາຍາມຢ່າງໜັກ ເພື່ອເຊື່ອງແຜນຂອງເຂົາໃຫ້ພົ້ນຈາກພຣະຜູ້ເປັນເຈົ້າ! ແລະ ວຽກງານຂອງເຂົາຢູ່ໃນຄວາມມືດ; ແລະ ເຂົາເວົ້າວ່າ: ຜູ້ໃດຈະເຫັນເຮົາ ແລະ ຜູ້ໃດຈະຮູ້ຈັກເຮົາ? ແລະ ເຂົາເວົ້າອີກວ່າ: ການປີ້ນເລື່ອງຂອງເຈົ້າຈະຖືກຖືວ່າ ເປັນດິນດາກ ຂອງຊ່າງປັ້ນໝໍ້ຢ່າງແນ່ນອນ. ແຕ່ຈົ່ງເບິ່ງ, ຈອມໂຍທາໄດ້ກ່າວວ່າ, ເຮົາຈະສະແດງແກ່ພວກເຂົາວ່າ ເຮົາຮູ້ຈັກການກະທຳຂອງພວກເຂົາທັງໝົດ ເພາະສິ່ງຂອງຈະກ່າວເຖິງຄົນທີ່ເຮັດມັນຂຶ້ນບໍວ່າ ເຂົາບໍ່ໄດ້ເຮັດມັນຂຶ້ນມາ? ຫລື ສິ່ງທີ່ໃສ່ຂອບໄວ້ຈະກ່າວເຖິງຜູ້ທີ່ໃສ່ຂອບມັນບໍວ່າ ມັນບໍ່ມີຄວາມເຂົ້າໃຈຫຍັງໝົດ?
28 ແຕ່ຈົ່ງເບິ່ງ, ຈອມໂຍທາໄດ້ກ່າວວ່າ: ເຮົາຈະສະແດງໃຫ້ລູກຫລານມະນຸດເຫັນວ່າ ຍັງອີກບໍ່ດົນ ເລບານອນຈະຖືກປ່ຽນເປັນທົ່ງອັນອຸດົມສົມບູນ; ເພາະທົ່ງອັນອຸດົມສົມບູນຈະເປັນປ່າໄມ້.
29 ແລະ ໃນມື້ນັ້ນຄົນຫູໜວກຈະໄດ້ຍິນຂໍ້ຄວາມຈາກໜັງສື ແລະ ຄົນຕາບອດຈະຫລຽວເຫັນຈາກການປິດບັງ ແລະ ຈາກຄວາມມືດ.
30 ແລະ ຄົນອ່ອນໂຍນຈະເພີ່ມຂຶ້ນ ແລະ ຄວາມສຸກຂອງພວກເຂົາຈະຢູ່ໃນພຣະຜູ້ເປັນເຈົ້າ, ແລະ ຄົນທຸກຍາກໃນບັນດາມະນຸດຈະປິຕິຍິນດີໃນພຣະຜູ້ບໍລິສຸດຂອງອິດສະຣາເອນ.
31 ເພາະແນ່ນອນຄື ຕາບໃດທີ່ພຣະຜູ້ເປັນເຈົ້າຊົງພຣະຊົນຢູ່ ຄົນທີ່ໜ້າຢ້ານກົວຈະສູນຫາຍໄປ ແລະ ຄົນມັກເຍາະເຍີ້ຍຈະໝົດໄປ, ແລະ ຄົນທັງປວງທີ່ຫາໂອກາດກະທຳຄວາມຊົ່ວຮ້າຍຈະຖືກຕັດອອກ;
32 ຜູ້ທີ່ໃສ່ຄວາມຄົນອື່ນດ້ວຍຖ້ອຍຄຳຂອງຕົນ, ແລະ ວາງບ້ວງໃນ ປະຕູເມືອງໄວ້ດັກຜູ້ກ່າວຕຳນິ ແລະ ຫັນເອົາສິ່ງທີ່ທ່ຽງທຳໄປເປັນສິ່ງທີ່ບໍ່ມີຄຸນຄ່າ.
33 ສະນັ້ນ, ພຣະຜູ້ເປັນເຈົ້າຜູ້ໄຖ່ອັບຣາຮາມໄດ້ກ່າວກ່ຽວກັບເຊື້ອສາຍຂອງຢາໂຄບດັ່ງນີ້: ບັດນີ້, ຢາໂຄບຈະບໍ່ຕ້ອງອັບອາຍອີກ, ເພາະໜ້າຂອງພວກເຂົາຈະບໍ່ຊີດລົງ.
34 ເພາະເມື່ອພວກເຂົາ ເຫັນລູກຫລານຂອງພວກເຂົາເປັນຜົນງານຈາກມືຂອງເຮົາໃນທ່າມກາງພວກເຂົາແລ້ວ, ພວກເຂົາຈະເຮັດໃຫ້ພຣະນາມຂອງເຮົາສັກສິດ ແລະ ເຮັດໃຫ້ພຣະຜູ້ບໍລິສຸດຂອງຢາໂຄບສັກສິດ, ແລະ ຈະຢຳເກງພຣະເຈົ້າຂອງອິດສະຣາເອນ.
35 ພວກທີ່ ເຮັດຜິດທາງວິນຍານຈະມາເຖິງຄວາມເຂົ້າໃຈ ແລະ ບັນດາຜູ້ທີ່ຈົ່ມພຶມພຳຈະໄດ້ ຮຽນຮູ້ຄຳສອນ.