1 A’ut k’ehomaq reetal, te’wanq naab’al—sa’ li kutan a’an naq tin’ok chixb’aanunkil jun li sachb’a-ch’oolejil k’anjel sa’ xyanqeb’, re taajultiko’q we lin sumwank kink’uub’ choq’ reheb’ li ralal xk’ajoleb’ li winq, re tink’e wi’chik li wuq’ xkab’ sut re xk’amb’al chaq wi’chik lin tenamit, li wankeb’ sa’ lix junkab’al laj Israel;

2 Ut jo’kan ajwi’, re taajultiko’q we li k’a’ru kinyeechi’i aawe laa’at, at Nefi, ut re ajwi’ laa yuwa’, naq te’jultiko’q we lee riyajil, ut re naq li raatin lee riyajil taa’elq chaq sa’ xtz’uumal we ut taaxik rik’ineb’ lee riyajil; ut li waatin taajub’aq toj sa’ xmaril li ruchich’och’, choq’ eetalil chiru lin tenamit, li wankeb’ sa’ lix junkab’al laj Israel;

3 Ut rik’in naq taajub’aq chaq li waatin—naab’al reheb’ laj Gentil te’xye: Jun li Santil Hu! Jun li Santil Hu! Ak wan qik’in jun li Santil Hu, ut ink’a’ naru nawan junaq chik li Santil Hu.

4 A’b’anan jo’ka’in naxye li Qaawa’ Dios: Jipeb’ xxik a’an, taawanq jun li Santil Hu rik’ineb’, ut taachalq chaq rik’ineb’ laj Judio, lin najter tenamit re li sumwank. Ut k’a’ru neke’xb’antioxi wi’ chiruheb’ laj Judio xb’aan li Santil Hu xe’xk’ul rik’ineb’? Relik chi yaal, k’a’ pe ru neke’xk’oxla laj Gentil? Ma najultiko’ tab’i’ reheb’ lix tawajikeb’, ut lix k’anjeleb’, ut lix rahileb’ laj Judio, ut chanru naq yalb’ileb’ chaq xq’e chiwu sa’ xk’amb’al li kolb’a-ib’ rik’ineb’ laj Gentil?

5 Aay, ex aj Gentil, ma xe’jultiko’ eere laj Judio, lin najter tenamit re li sumwank? Ink’a’ ut; xemajewaheb’ b’an, ut xik’ xerileb’, ut ink’a’ xesik’ xk’amb’aleb’ chaq wi’chik. A’ut k’ehomaq reetal, tinsutq’isi chixjunil li k’a’aq re ru a’in sa’ xb’een tz’aqal lee jolom; xb’aan naq laa’in, li Qaawa’, moko sachenaq ta sa’ inch’ool lin tenamit.

6 Jip aaxik, laa’at li tatyehok re: Jun li Santil Hu, ak wan qik’in jun li Santil Hu, ut maajun chik Santil Hu na’aje’ chiqu. Ma xek’ul ta raj b’i’ jun li Santil Hu wi ta moko xb’aaneb’ ta laj Judio?

7 Ma ink’a’ nekenaw naq moko jun ajwi’ ta chi tenamit wan? Ma ink’a’ nekenaw naq laa’in, li Qaawa’ lee Dios, xinyo’ob’tesi chixjunileb’ li winq, ut naq neke’jultiko’ we li wankeb’ sa’eb’ li ch’och’ sa’ xyi li palaw; ut naq nintaqlan sa’ li choxa taqe’q ut sa’ li ch’och’ taq’a; ut nink’e chi k’utmank li waatin chiruheb’ li ralal xk’ajoleb’ li winq, relik chi yaal, sa’ xb’eeneb’ chixjunil li tenamit re li ruchich’och’?

8 K’a’ut naq nekexwech’in rik’in naq teek’ul chik xkomon li waatin? Ma ink’a’ nekenaw naq li yaal te’xch’olob’ li wiib’ chi tenamit wan chixk’utb’al xyaalal eere naq laa’in li Dios, naq najultiko’ we li jun tenamit jo’ chanru ajwi’ li jun chik? Jo’kan ut, juntaq’eet li aatin ninye re li jun tenamit rik’in li re li jun chik. Ut naq te’junajo’q li wiib’ chi tenamit, taajunajo’q ajwi’ li yaal xe’xch’olob’ li wiib’ chi tenamit.

9 Ut ninb’aanu a’in re tink’ut xyaalal chiruheb’ naab’al naq laa’in juntaq’eetin ewer, anajwan, ut chi junelik; ut naq nokoxinye li waatin jo’ chanru li nasaho’ wi’ inch’ool. Ut rik’in naq xinye jun li aatin, moko na’aje’ ta naq teek’oxla naq ink’a’ naru ninye junaq chik; xb’aan naq maji’ naraqe’ lin k’anjel, ut ink’a’ ajwi’ taaraqe’q toj sa’ roso’jik li winq, chi moko chirix a’an chi junelik q’e kutan.

10 Jo’kan ut, rik’in naq wan eerik’in jun li Santil Hu, meek’oxla naq chixjunil li waatin wan chi sa’; chi moko chek’oxla naq maak’a’ chik li xink’e chi tz’iib’aak.

11 Xb’aan naq nintaqlaheb’ chixjunil li winq, sa’ releb’aal li saq’e ut sa’ li rokeb’aal, ut sa’ lix nim ut sa’ lix tz’e, ut sa’eb’ li ch’och’ sa’ xyi li palaw, naq te’xtz’iib’a li aatin li ninye reheb’; xb’aan naq rik’in li wan sa’eb’ li hu te’tz’iib’amanq laa’in tinraq aatin chirix li ruchich’och’, li junjunq chi winq jo’ chanru lix k’anjeleb’, jo’ chanru li k’a’ru tz’iib’anb’il.

12 Xb’aan naq k’ehomaq reetal, tinwaatinaheb’ laj Judio ut eb’ a’an te’xtz’iib’a; ut tinwaatinaheb’ ajwi’ laj Nefita ut eb’ a’an te’xtz’iib’a; ut te’waatina ajwi’ lix komoneb’ lix teepal lix junkab’al laj Israel, li keb’ink’am chi najt, ut eb’ a’an te’xtz’iib’a; ut te’waatina ajwi’ chixjunileb’ li tenamit sa’ li ruchich’och’, ut eb’ a’an te’xtz’iib’a.

13 Ut taak’ulmanq naq eb’ laj Judio te’xk’ul li raatineb’ laj Nefita, ut eb’ laj Nefita te’xk’ul li raatineb’ laj Judio, ut eb’ laj Nefita ut eb’ laj Judio te’xk’ul li raatineb’ lix teepal laj Israel li sachenaqeb’; ut eb’ lix teepal laj Israel li sachenaqeb’ te’xk’ul li raatineb’ laj Nefita ut eb’ laj Judio.

14 Ut taak’ulmanq naq eb’ lin tenamit, li wankeb’ sa’ lix junkab’al laj Israel, te’ch’utub’aaq wi’chik sa’ li ch’och’ wan wi’ li reechanihomeb’; ut jo’kan ajwi’ li waatin taach’utub’aaq sa’ junajil. Ut laa’in tink’ut chiruheb’ li neke’pleetink re li waatin ut re lin tenamit li wankeb’ sa’ lix junkab’al laj Israel, naq laa’in li Dios, ut naq kin’ok sa’ sumwank rik’in laj Abraham naq eb’ li riyajil te’jultiko’q we chi junelik.