1 Mo nao luk, ol brata blong mi we mi lavem tumas, bae mi toktok long yufala, from mi, Nifae, bae mi no letem se yufala i ting se yufala i moa stret mo gud bitim Ol Jentael long taem we bae i kam. From luk, sapos yufala i no obei long ol komanmen blong God, bambae yufala evriwan bae i ded tu; mo from ol toktok we oli bin talemaot yufala i no nid blong ting se God bae i prapa spolem gud Ol Jentael.

2 From luk, mi talem long yufala se olgeta long Ol Jentael we bae oli sakem sin, oli ol kavenan pipol blong Lod; mo olgeta long Ol Jiu we bae oli no sakem sin bae Lod i sakemaot olgeta; from Lod i no mekem kavenan wetem eni man, be nomo wetem olgeta we oli sakem sin mo biliv long Pikinini blong hem, we i Tabu Wan blong Isrel.

3 Mo nao, bae mi profesae plante moa long saed blong Ol Jiu mo Ol Jentael. From afta buk ia we mi bin tokbaot bae i kamaot, we oli raetem i go long Ol Jentael, mo silim bakegen long Lod, bae i gat plante we bae oli bilivim ol toktok we oli bin raetem; mo bae oli karem olgeta i go long ol smol haf blong ol pikinini blong yumi.

4 Mo afta nao bae ol smol haf blong ol pikinini blong yumi oli save long saed blong yumi, olsem wanem we yumi bin kamaot long Jerusalem, mo we oli ol laen blong Ol Jiu.

5 Mo gospel blong Jisas Kraes bae oli talemaot long medel blong olgeta; taswe, bae oli kambak long save blong ol papa blong olgeta bakegen, mo tu, long save blong Jisas Kraes, we i bin stap long medel blong ol papa blong olgeta.

6 Mo afta bae oli glad; from bae oli save se hemia i wan blesing, long olgeta, we i kam long han blong God; mo ol skel blong tudak bae oli stat blong foldaon aot long ol ae blong olgeta; mo plante jeneresen bae i no pas i gowe wetem olgeta, be nomo sapos oli wan klin mo wan gudfala pipol.

7 Mo bae i kam blong hapen se Ol Jiu we oli bin seraot olbaot tu bae oli stat blong biliv long Kraes; mo bae oli stat blong kambak tugeta long fes blong graon; mo olgeta we bae i biliv long Kraes bae oli kam wan gudfala pipol tu.

8 Mo bae i kam blong hapen se Lod God bae i statem wok blong hem long medel blong evri kantri, famli, lanwis, mo pipol, blong mekem se hem i karembak ol pipol blong hem long wol.

9 Mo wetem stret mo gud fasin bae Lod God i jajem ol pua, mo tok strong blong i gat jastis long ol man we oli no stap flas long wol ia. Mo bae hem i kilim wol wetem stik blong maot blong hem; mo wetem win blong skin blong maot blong hem bae hem i kilimded ol nogud man.

10 From taem i stap kam kwik we Lod God bae i mekem se wan bigfala seraot i hapen long medel blong ol pipol, mo ol man nogud bae hem i kilimded olgeta; mo bae hem i sevem ol pipol blong hem, yes, mo tu, iven sapos hem i mas kilimded ol man nogud wetem faea.

11 Mo stret mo gud fasin bae i stap olsem strap blong wes blong hem, mo fasin blong stap fetful bae i strap blong bel blong bodi blong hem.

12 Mo afta, bae wael dog i stap tugeta wetem smol sipsip; mo lepad bae i ledaon wetem yang nanigot, mo yang buluk, mo yang laeon, mo buluk we i fatfat, oli stap tugeta; mo wan smol pikinini bae i lidim olgeta.

13 Mo kao mo bea bae tufala i kakae; ol yangwan blong olgeta bae oli ledaon tugeta; mo laeon bae i kakae gras olsem buluk.

14 Mo pikinini we i stap titi yet bae i pleiplei long hol blong wan smol posen snek mo bigfala pikinini bae i putum han blong hem long hol blong wan posen snek.

15 Bae oli no kasem kil o bae oli no ded long ful tabu hil blong mi; from wol bae i fulap wetem save blong Lod olsem we ol wota i kavremap solwota.

16 Taswe, evri samting blong evri kantri bae oli soemaot; yes, evri samting bae Lod i soemaot long ol pikinini blong ol man.

17 I no gat eni samting we i sikret we bae Lod i no soemaot; i no gat wan wok blong tudak we bae oli no soemaot i kam long laet; mo i no gat eni samting we oli joenem long wol we bae oli karemaot.

18 Taswe, evri samting we oli bin talemaot long ol pikinini blong ol man bae long dei ia oli soemaot olgeta; mo Setan bae i nomo gat paoa ova long hat blong ol pikinini blong ol man, blong wan longfala taem. Mo nao, ol brata blong mi we mi lavem tumas, mi stop long ol toktok blong mi.