1 Na afei hom nhwɛ, mo nuanom adɔfo, mebɛkasa akyerɛ hom; osiandɛ emi Nephi meremma kwan ma hom nnsusu dɛ hom yɛ atseneneefo sen Amanamamfo no. Na hwɛ, gyedɛ hom dzi Nyankopɔn ne mbrasɛm no do ɔno hom nyina bɛhera; na osian nsɛm a wɔakã no ntsi onnhia dɛ hom susu dɛ wɔbɛsɛɛ Amanamamfo no korakora.

2 Na hwɛ, mekã kyerɛ hom dɛ Amanamamfo dodow biara a wobonu hɔnho no bɛyɛ Ewuradze n’ahyɛmu mba, na Jewfo dodow biara a wonnkonu hɔnho no wobeyi hɔn tokyen; na Ewuradze nye obiara rinndzi ahyɛmu gyedɛ hɔn a wonu hɔnho na wɔgye ne Ba no a ɔyɛ Israel Krɔnkrɔnnyi no dzi.

3 Na afei, merebɛhyɛ nkɔm wɔ biribi a ɔfa Jewfo na Amanamamfo ho. Na nwoma a makã ho asɛm no nya ba na wɔkyerɛw ma Amanamamfo no, na wɔasɔw ano bio dze ama Ewuradze, dodowara bɛgye nsɛm a wɔakyerɛw no edzi; na wɔdze bɔkɔ akɛma hɛn asefo nkaa no.

4 Na afei hɛn asefo nkaa no bɛtse hɛn ho nsɛm, mbrɛ ɔyɛe ma yefi Jerusalem bae, na dɛ wɔyɛ Jewfo asefo.

5 Na Jesus Christ ne nsɛmpa no wɔbɛda no edzi wɔ hɔn mu; dɛm ntsi, wɔbɛsan anan mu dze hɔn egyanom hɔn nyimdzee ama hɔn, nye Jesus Christ so ho nyimdzee a nna ɔwɔ hɔn egyanom mu no ho.

6 Na afei wobedzi dɛw; na wobohu dɛ ɔyɛ nhyira a ofi Nyankopɔn nsamu dze ma hɔn; na hɔn enyido abon tumm no bɛhyɛ ase apa efi hɔn enyiwa do; na ebusuasantsen pii biara runntwa mu nnkɔ wɔ hɔn mu, gyedɛ wɔabɛyɛ nkorɔfo a hɔnho tsew na hɔnho yɛ enyika.

7 Na ɔbɛba dɛ Jewfo a wɔabɔ hɔn apetse no so bɛhyɛ ase enya gyedzi wɔ Christ mu; na wɔbɛhyɛ ase aboa hɔn ano wɔ asaase no enyi; na dodowara a wɔbɛgye Christ edzi no hɔnara so na wɔbɛba abɛyɛ nkorɔfo a hɔn ho yɛ enyika.

8 Na ɔbɛba dɛ Ewuradze Nyankopɔn bɛhyɛ no ndwuma ase wɔ aman, ebusuafo, kasa horow, na nyimpa nyinara mu, dze nkenyan abrɛ no nkorɔfo a wɔwɔ asaase do.

9 Na Ewuradze Nyankopɔn bobu ehiafo atsɛntsenenee, ɔnam pɛrpɛr do akã enyim ama hɔn a wɔdwe wɔ asaase no do. Na ɔdze n’ano poma no botwa asaase akyen; na ɔdze ahom a ofi n’anofamfa asɛɛ ndzebɔnyɛfo.

10 Na mber no reba ntsɛntsɛm a Ewuradze Nyankopɔn dze mpaapaamu kɛse bɔto nkorɔfo ntamu, na ɔbɛsɛɛ ndzebɔnyɛfo; na ɔbɛgye no nkorɔfo, nyew, sɛ ɔba no dɛ ɔwɔ dɛ ɔdze ogya sɛɛ ndzebɔnyɛfo mpo a.

11 Na ndzeyɛtsenenee bɛyɛ n’asen abɔdo, na nokwardzi ayɛ n’abɔyamu.

12 Na afei pataku nye eguambaa bɛtsena; na sebɔ nye akɔkowaba abɔmu ada fakor, na nantwiba, na awendadzeba, nye dza ɔadɔ seradze bɔbɔmu kor anantsew; na abofraba edzi hɔn enyim.

13 Na nantwi nye sisi bɔbɔmu edzidzi; hɔn mba nkakraba bɔbɔmu ada fakor; na awendadze bɔwe efuw dɛ nantwi.

14 Na enumfoanoba bɔgor ehurutsia tu ano, na abofraba a woetwa no enumfo dze ne nsa bɔto ɔkyerben tu mu.

15 Worimmpira eso wɔrennsɛɛ hɔn wɔ me bepɔw krɔnkrɔn nyinara do; osiandɛ Ewuradze ho nyimdzee bɛhyɛ asaase do mã dɛ mbrɛ nsu kata po do.

16 Dɛm ntsi, wɔbɛda ndzɛmba a ɔwɔ aman nyinara mu no edzi; nyew, wɔbɛda ndzɛmba nyinara edzi akyerɛ adasamba.

17 Biribiara nnyi hɔ a ɔyɛ esumadze a wɔnnkɛda no edzi; sum mu ndwuma biara nnyi hɔ a wɔnnkɛda no edzi wɔ kan mu; na biribiara nnyi hɔ a wɔasɔw ano wɔ asaase yi do a wɔnnkɛtsew ano.

18 Dɛm ntsi, ndzɛmba biara a wɔada no edzi akyerɛ adasamba no wɔbɛda no edzi wɔ dɛm da no so mu; na Satan rinnya tum wɔ adasamba hɔn akoma do bio ekodu mber pii. Na afei, mo nuanom adɔfo, ɔwɔ dɛ medze me nsɛm ba ewiei.