1 Iwe iei ngang, Nifai, ua osopwano ai osini ngenikemi, ami pwi achengicheng. Iwe use tongeni mak nge ekkoch chok mettoch, minne ngang mi sinei pwe repwe ennetin fis; use pwan tongeni mak nge ekkoch chok ekkewe kapas an pwi we Jacob.

2 Ina minne, ekkewe mettoch minne ua fen makkei a naf ngeniei, tiwenon chok fitefou kapas minne upwe apasa usun ekkewe nongonong mi ennet an Kraist; ina minne, upwe apasa ngenikemi non fatafatoch, anongonong won fatafatochun ai osini.

3 Pun ngunui a pwapwa non fatafatoch; pun non ei napanap ewe Samon Kot epwe angang me nein ekkewe noun aramas. Pun ewe Samon Kot a awora saram ngeni ewe wewe; pun i a kapas ngeni aramas anongonong won ar kapas, ngeni ar wewe.

4 Ina minne, ua mochen pwe oupwe chechemeni pwe ua fen kapas ngenikemi usun ewe soufos minne ewe Samon a pwar ngeniei, ewe epwe papataisei ewe Namen Kot, ewe epwe angeiano tipisin fonufan.

5 Iwe iei, ika ewe Namen Kot, i mi pin, epwe namot an epwe papatais ren konik, pwe epwe apwonueta wenechar meinisin, O ika epwe ina, epwe ifa aukukun auchean kich, sise pin, pwe sipwe papatais, ewer, pwan mwo ren konik!

6 Iwe iei, upwe eisinikemi, pwi achengicheng, ifa usun ewe Namen Kot a apwonueta wenechar meinisin ren an papatais ren konik?

7 Ouse sinei pwe i mi pin? Nge inamo i mi pin, i a pwar ngeni ekkewe noun aramas pwe, ren ewe aion i a pwisin atipetekisonei me mwen ewe Sam, me pwarata ngeni ewe Sam pwe i epwe aneasochis ngeni i ne apwonueta an kewe annuk.

8 Ina minne, mwirin an we papatais ren konik ewe Ngun mi Fel a feitiw won i non napanapen emon muro.

9 A pwan, pwar ngeni ekkewe noun aramas aukukkunun ewe aan, me chokisikisin ewe tit, me ikewe repwe tonong me ia, i a forata ewe nenien appiru me mwer.

10 Iwe a apasa ngeni ekkewe noun aramas: Oupwe tapweto mwiri. Ina minne, ami pwi achengicheng, sia tongeni tapweno mwirin Jises tiwenon chok ika sia mochen aneasochisi ekkewe annuk an ewe Sam?

11 Iwe ewe Sam a apasa: Oupwe aier, oupwe aier, me papatais non iten Nei mi Achengicheng.

12 Iwe pwan, ewe mongungun ewe Nau a feito ngeniei, a apasa: I ewe a papatais non itei, ngeni i ewe Sam epwe ngeni ewe Ngun mi Fel, usun chok ngang; ina minne, tapweto mwiri, me fori ekkewe mettoch meinisin minne oua fen kuna ua fori.

13 Ina minne, pwi achengicheng, ua sinei pwe ika oupwe tapweno mwirin ewe Nau, ren unusen netip, esap wor fofforun nikatupotup me mwaken me mwen Kot, nge epwe ren ennetin mochen, aier seni ami kewe tipis, pwarata ngeni ewe Sam pwe oua mochen mwarei womi iten Kraist, ren papatais—ewer, ren ami tapweno mwirin ami Samon me ami Chon Amanau ren ami feitiw non ewe konik, anongonong won an kapas, nengeni, mwirin oupwe angei ewe Ngun mi Fel; ewer, mwirin epwe feito ewe papataisen ekkei me ewe Ngun mi Fel; iwe mwirin oua tongeni kapas ren ewe kapasen chon nang, me puchor kapasen mwareiti ngeni ewe Emon mi Fel re Israel.

14 Nge, nengeni, pwi achengicheng, iei usun a feito ewe mongungun ewe Nau ngeniei, a apasa: Mwirin oua aier seni ami kewe tipis, me pwarata ngeni ewe Sam pwe oua mochen aneasochisi ai kewe annuk, ren ami papatais ren konik, me oua fen angei ewe papatais ren ekkei me ren ewe Ngun mi Fel, me oua tongeni kapas ren ew minafon kapas, ewer, pwan mwo ewe kapasen chon nang, iwe mwirin ei ika oupwe amam ngang, mi fen ita murino ngenikemi pwe ousap sineiei.

15 Iwe ua rongorong ew mongungu seni ewe Sam, a apasa: Ewer, ekkewe kapas an nei Achengicheng mi ennet me nukuchar. I ewe a nikitu ngeni nesoponon, ewe emon epwe pwan manau.

16 Iwe iei, pwi achengicheng, ua sinei seni ei pwe tiwenon chok ika emon aramas epwe nikitu tori nesoponon, ne tapweno mwirin ewe nenien appiru an Noun ewe Kot mi manau, i esap tongeni manau.

17 Ina minne, fori ekkewe mettoch minne ua fen erenikemi ua fen kuna pwe ami we Samon me ami Chon Angasano epwe fori; pun, pun iei popun a fen pwar ngeniei, pwe oupwe tongeni sinei ewe asamen ewe tit minne oupwe tonong non. Pun asamen ewe tit minne oupwe tonong non iei aier me papatais ren konik; iwe mwirin epwe feito ew omusomusen ami kewe tipis seni ekkei me seni ewe Ngun mi Fel.

18 Iwe mwirin oua nom won ewe aan mi aukukkun me chokisikis minne a wenengeni manau esemuch; ewer, oua fen tonong non me ren ewe asamen ewe tit; oua fen fori anongonong won ekkewe annuk an ewe Sam me ewe Nau; me oua fen angei ewe Ngun mi Fel, minne a pwarata usun ewe Sam me ewe Nau, ren apwonuetan ewe pwon minne i a fen fori, pwe ika oua tonong non me ren ewe aan oupwe angei.

19 Iwe iei, pwi achengicheng, mwirin ami oua fen tonong non ewe aan mi aukukkun me chokisikis, upwe eis ika meinisin a wesino? Nengeni, upwe apasa ngenikemi, Apw; pun ouse mwo feito ikei tiwenon chok ika epwe me ren ewe kapasen Kraist fiti pochokunen nuku non i, unusen anukunuk won ekkewe nimenimochun fofforun i ewe mi manaman ne amanaua kich.

20 Ina minne, oupwe nikitu fiti tipepos non Kraist, epwe wor ami unusochun saramen apinukunuk, me ew tongen Kot me aramas meinisin. Ina minne, ika oupwe feino mwemi, kametip won ewe kapasen Kraist, me nikitu tori nesoponon, nengeni, iei anon ewe Sam: Oupwe weri ewe manau esemuch.

21 Iwe iei, nengeni, ami pwi achengicheng, iei ewe aan; iwe ese pwan wor ew aan ika it a kawor me fan nang ren minne aramas repwe tongeni manau non ewe muun Kot. Iwe iei, nengeni, iei ewe nongonong mi ennet an Kraist, me ewe chok ew nongonong mi ennet an ewe Sam, me an ewe Nau, me an ewe Ngun mi Fel, minne a ew chok Kot, ese wor nesoponon. Amen.