1 Mo i bin hapen se taem we Jisas i talemaot ol toktok ia long Nifae, mo long olgeta we hem i bin singaotem olgeta, (nao namba blong olgeta we hem i singaotem, mo oli kasem paoa mo atoriti blong mekem baptaes, i twelef) mo luk, hem i stretem han blong hem i go long grup blong pipol ia, mo i talem long olgeta, se: “Bae yufala i kasem blesing sapos yufala i mekem folem ol toktok blong olgeta twelef ia we mi bin jusum aot long yufala blong givhan long yufala, mo blong kam ol wokman blong yufala; mo mi bin givim long olgeta paoa blong oli save baptaesem yufala wetem wota; mo afta we yufala i kasem baptaes wetem wota, luk, bae mi baptaesem yufala wetem faea mo wetem Tabu Spirit; from hemia, bae yufala i kasem blesing sapos yufala i biliv long mi mo kasem baptaes, afta we yufala i bin luk mi mo save se mi, mi stap.”

2 Mo bakegen, bae olgeta we oli biliv long ol toktok blong yufala, bae oli kasem moa blesing, from we bae yufala i testifae se yufala i bin luk mi, mo we yufala i save se mi, mi stap. Yes, olgeta we bae oli biliv long ol toktok blong yufala, mo oli putum tingting blong olgeta i kam daon we i daon olgeta mo kasem baptaes bae oli kasem blesing, from bae mi visitim olgeta wetem faea mo wetem Tabu Spirit, mo bae mi fogivim ol sin blong olgeta.

3 Yes, olgeta we oli putum spirit blong olgeta i stap daon we oli kam long mi, bae oli kasem blesing, from kingdom blong heven i blong olgeta.

4 Mo bakegen, olgeta evriwan we oli krae sore bae oli kasem blesing from Lod bae i leftemap tingting blong olgeta.

5 Mo olgeta we oli no stap flas bae oli kasem blesing, from bae oli kasem wol ia.

6 Mo olgeta evriwan we oli hanggri mo tosta from stret mo gud fasin, bae oli kasem blesing from we bae oli fulap long Tabu Spirit.

7 Mo olgeta we oli gat sore long man, bae oli kasem blesing from bae oli kasem sore.

8 Mo olgeta evriwan we hat blong olgeta i klin evriwan bae oli kasem blesing, from bae oli luk God.

9 Mo olgeta evriwan we oli mekem pis, bae oli kasem blesing, from bae oli singaotem olgeta. ol pikinini blong God.

10 Mo olgeta evriwan we oli kasem hadtaem from nem blong mi, bae oli kasem blesing, from kingdom blong heven i blong olgeta.

11 Mo yufala i kasem blesing long taem we bae ol man oli talem ol rabis samting long yufala mo givim hadtaem, mo bae oli talem evri kaen nogud samting agensem yufala we i no tru, from nem blong mi;

12 From bae yufala i gat bigfala hapi mo stap glad tumas, from presen blong yufala long heven bae i bigwan; from long sem fasin ia oli bin givim hadtaem long ol profet we oli bin stap bifo long yufala.

13 I tru, i tru, mi talem long yufala, mi givim long yufala blong kam sol blong wol; be sapos sol ia bae i lusum tes blong hem, ?olsem wanem nao bae wol i gat sol? Sol ia bae i blong nating stat long taem ia, be blong sakem hem aot mo blong ol leg blong ol man oli purumbut long hem.

14 I tru, i tru, mi talem long yufala, mi givim long yufala blong stap olsem laet blong ol pipol ia. Wan bigtaon we i stap long wan hil i no save haed.

15 Luk, ?ol man oli stap laetem wan kandel mo putum andanit long wan basket? No, be oli putum antap long stik blong holem kandel, mo i givim laet long evriwan we i stap insaed long haos;

16 From hemia, letem laet blong yufala i saen olsem ia long fored blong ol pipol ia, blong oli save luk ol gudfala wok blong yufala mo leftemap nem blong Papa blong yufala we i stap long heven.

17 No ting se mi kam blong prapa spolem gud loa o ol profet. Mi no kam blong prapa spolem gud samting be blong mekem oli kam tru;

18 From i tru mi talem long yufala, i no gat wan smol samting o wan smol pat blong leta we i bin kamaot long loa, be tru long mi loa i bin hapen fulwan.

19 Mo luk, mi bin givim yufala loa mo ol komanmen blong Papa blong mi, se yufala i mas biliv long mi, mo se yufala i mas sakem ol sin blong yufala, mo kam long mi wetem wan hat we i fulap wetem sore mo wan spirit we i wantem blong sakem sin. Luk, yufala i gat ol komanmen long fored blong yufala mo loa i hapen.

20 From hemia, kam long mi mo bae mi sevem yufala; from i tru mi talem long yufala, se sapos yufala i no obei ol komanmen blong mi, we mi bin givim long yufala long taem ia, bae i no gat eni wei blong yufala i save go insaed long kingdom blong heven.

21 Yufala i bin harem we ol olfala blong bifo oli talem, mo tu, oli bin raetem ol samting ia long fored blong yufala, se yufala i no mas kilim man i ded, mo eniwan we bae i kilim man i ded, bae hem i stap long denja blong fesem jajmen blong God;

22 Be mi talem long yufala, se eni man we i kros long brata blong hem, bae hem i stap long denja blong jajmen blong hem. Mo eni man we bae i talem long brata blong hem, Raka, bae hem i stap long denja blong kaonsel; mo eni man we bae i talem, Yu krangke, bae i stap long denja blong faea blong hel.

23 From hemia, sapos bae yu kam long mi, o bae yu wantem blong kam long mi, mo tingbaot se brata blong yu i bin gat samting agensem yu—

24 Go long brata blong yu, mo, fastaem, yu mas mekem pis wetem brata blong yu, mo afta, yu kam long mi wetem ful tingting blong hat, mo bae mi akseptem yu.

25 Agri wetem enemi blong yu kwiktaem, taem we yu stap long rod wetem hem, from nogud se long eni taem bae hem i tekem yu, mo i sakem yu i go insaed long kalabus.

26 I tru, i tru, mi talem long yu, bae i no gat eni wei we bae yu kamaot long ples ia be kasem taem nomo we yu pem ful sinaen. Mo taem we yu stap long kalabus, ?yu save pem wan sinaen? I tru, i tru, mi talem long yu, No.

27 Luk, ol olfala blong bifo oli bin raetem samting ia, se yu no mas mekem adaltri;

28 Be mi talem long yu, se eni man we i stap lukluk wan woman, nao hem i wantem tumas blong slip wetem hem, hem i mekem adaltri finis long hat blong hem.

29 Luk, mi givim long yu wan komanmen, se yu no mas letem eni long ol samting ia i go insaed long hat blong yu;

30 From i moa gud se yu tanem baksaed blong yu long ol samting ia, mo taem yu tanem baksaed blong yu long ol samting ia bae yu tekem kros blong yu, mo i moa gud bitim we bae Lod i sakem yu i go insaed long hel.

31 Oli bin raetem, se eni man we i sakemaot waef blong hem, bae hem i mas givim wan leta blong divos long waef blong hem.

32 I tru, i tru, mi talem long yufala, se eni man we i sakemaot waef blong hem, be i no from fasin blong slip wetem man, i mekem hem blong mekem adaltri; mo eni man we bae i maredem woman ia we i divos, hem i mekem adaltri.

33 Mo bakegen oli bin raetem samting ia, yu no mas mekem giaman promes, be yu mas mekem long Lod, folem ol strong promes blong yu.

34 Be i tru, i tru, mi talem long yu, no singaotem nem blong eni samting blong mekem promes; o nem blong heven, from hem i jea blong God;

35 O nem blong wol, from hem i ples blong hem i putum leg blong hem long hem;

36 Mo tu, yu no mas promes blong mekem samting long nem blong hed blong yu, from we yu no save mekem wan hea i kam blak o waet;

37 Be letem toktok blong yu i stap olsem, Yes, yes; No, no; from eni samting we i kam we i moa long hemia i nogud.

38 Mo luk, oli bin raetem samting ia, wan ae blong wan ae, mo wan tut blong wan tut;

39 Be mi talem long yufala, se bae yufala i no mas faetbak agensem nogud fasin, be eni man we i slapem fes blong yu long raet saed, tanem narasaed tu i go long hem;

40 Mo sapos eni man bae i tekem yu i go long kot mo i tekemaot klos blong yu, letem longfala klos blong yu long hem tu;

41 Mo eni man we bae i fosem yu blong wokbaot wan mael, go wetem hem tu taem.

42 Givim long hem we i askem long yu, mo yu no mas tanem yu long hem we bae i wantem yu blong letem wan samting long hem.

43 Mo luk oli bin raetem samting ia tu se, yu mas lavem neba blong yu mo no laekem enemi blong yu.

44 Be luk mi talem long yu, lavem ol enemi blong yu, blesem olgeta we oli stap talem rabis toktok agensem yu, mekem gudfala fasin long olgeta we oli no laekem yu, mo prea from olgeta we oli stap mekem nogud long yu mo oli givim hadtaem long yu.

45 Blong mekem se yu save stap olsem ol pikinini blong Papa blong yu we i stap long heven; from hem i mekem san blong hem i kam antap long olgeta we oli nogud mo long olgeta we oli gud.

46 From hemia, ol samting ia blong ol taem blong bifo, we i bin stap andanit long loa, tru long mi oli hapen evriwan.

47 Ol olfala samting oli stop nao, mo evri samting i kam niu.

48 From hemia, mi wantem se yufala i kam stret gud evriwan semmak olsem mi, o Papa blong yufala we i stap long heven we i stret gud evriwan.