1 Nokwar, nokwar, mese dɛ mepɛ dɛ hom yɛ ayɛ ma ehiafo; na mbom hom nhwɛ yie ma hom annyɛ hom tsenenee wɔ nyimpa enyim dɛ wonhu; ɔyɛ dɛm a hom nnyi akatua wɔ hom Egya a ɔwɔ sor no nkyɛn.

2 Dɛm ntsi, sɛ ereyɛ ayɛ yɛdze a, mma nnhɛn totorobɛnto wɔ w’enyim, dɛ mbrɛ enyisomakyerɛfo no yɛ wɔ nhyiamudan mu nye abrɔn mu, ma woenya nyimpa hɔ enyimnyam. Nokwar mese hom dɛ, woenya hɔn akatua dada.

3 Mbom sɛ ereyɛ ayɛ yɛdze a, mma wo nsa bankum nnhu dza wo nsa nyimfa reyɛ;

4 Ama w’ayɛ aka nsumaamu, na w’Egya a ohu nsumaamu no, obotua wo kaw wɔ gua do.

5 Na sɛ hom rosɔr a, mma hom nnyɛ dɛ enyisomakyerɛfo no; osiandɛ wɔpɛ dɛ wogyina nhyiamudan mu nye abɔntsen ntoaado sɔr, ma nyimpa eehu. Nokwar mese hom dɛ, woenya hɔn akatua dada.

6 Mbom ɔwo dze, sɛ erosɔr a, hɛn wo pia mu, na atow w’abow mu no, sɔr ma w’Egya a ɔwɔ nsumaamu no, na w’Egya a ohu nsumaamu no, obotua wo kaw wɔ guado.

7 Mbom hom rosɔr a, mma hom nnyɛ kasansanmu gyan dɛ amanamamfo no, osiandɛ wɔdwen dɛ wobetsie hɔn wɔ hɔn kasa dodow ntsi.

8 Dɛm ntsi mma hom nye hɔn nnsɛ, na hom Egya nyim ndzɛmba a ohia hom ansaana hom ribisa no.

9 Dɛm ntsi hom nsɔr kwan iyi do: Hɛn Egya a ewɔ sor, wo dzin ho ntsew.

10 Wɔnyɛ wo pɛ wɔ asaase do dɛ mbrɛ wɔyɛ no wɔ sor,

11 Na fa hɛn akaw kyɛ hɛn, dɛ mbrɛ hɛn so yɛdze akyɛ hɛn akafo.

12 Na mma mmfa hɛn nnkɔ nsɔhwɛ mu, na mbom yi hɛn fi ɔbɔn no mu.

13 Na ɔwo na ahendzi, nye tum, nye enyimnyam, yɛ wodze afebɔɔ. Amen.

14 Na sɛ hom dze nyimpa hɔn mfom kyɛ hɔn a, hom sor Egya so dze bɛkyɛ hom.

15 Mbom sɛ hom ammfa nyimpa hɔn mfom annkyɛ hɔn a, hom Egya so remmfa hom mfom nnkyɛ hom.

16 Na eso sɛ hom refa akɔnkye a, mma hom nnyɛ dɛ enyisomakyerɛfo no, mmunamuna hom enyim, na wɔsɛɛ hɔn enyim ma nyimpa eehu dɛ wɔrefa akɔnkye. Nokwar mese hom dɛ, woenya hɔn akatua.

17 Mbom ɔwodze sɛ erefa akɔnkye a, sera wo tsirmu na hohor w’enyim;

18 Amma eennyi woho annkyerɛ nyimpa dɛ erefa akɔnkye, na mbom wɔ w’Egya a ɔwɔ nsumaamu no enyim, na w’Egya a ohu nsumaamu no, obotua wo kaw wɔ gua do.

19 Mma hom mmpɛ akoradze nngu asaase do, mbrɛ awembowa nye nkandar sɛɛ no, na ewifo bubu mu kowia;

20 Mbom hom mpɛ akoradze ngu sor, bea a mboaba nye nkandar nnsɛɛ no, na ewifo mmbubu mu nnkowia.

21 Na mbrɛ w’akoradze wɔ no, hɔ na w’akoma so wɔ.

22 Nyimpadua ne kandzea nye enyiwa; dɛm ntsi sɛ w’enyiwa yɛ kor a, wo nyimpadua nyina bɛyɛ kann.

23 Mbom sɛ w’enyiwa muo a, wo nyimpadua nyina bɛyɛ kusuww. Dɛm ntsi sɛ kan a ɔwɔ wo mu no yɛ sum a, sum no ne kɛse tse dɛn?

24 Obiara nntum nnsom wuranom beenu; na obekyir baako na ɔadɔ baako, anaadɛ obosuo baako mu na oebu baako enyimtsia. Hom runntum nnsom Nyankopɔn nye Mammon.

25 Na afei ɔbaa dɛ ber a Jesus kãa dɛm nsɛm yi wiei no, ɔhwɛɛ duebien no a ɔasan mu eyi hɔn no, na ɔsee hɔn dɛ: Hom nkaa nsɛm a makã yi. Na hwɛ, hom nye hɔn a masan mu eyi dɛ hom nkɔsom nkorɔfo yi. Dɛm ntsi mese hom dɛ mma hom nndwendwen hom nkwa ho, dɛ ebɛnadze na hom bedzi anaa ebɛnadze na hom bɔnom, anaaso hom nyimpadua ho, dɛ ebɛnadze na hom bɛhyɛ. Ana nkwa nnkyɛn edziban, na nyimpadua so nnkyɛn atar?

26 Hom nhwɛ wimu nnoma dɛ wonndua, na wommbu, eso wɔmmboaboa ano nnhyɛ san do; naaso hom sor Egya nyɛn hɔn. Ana hom nnsom bo pii nkyɛn hɔn?

27 Na hom mu woana na ɔdwendwen a, obotum dze basafa kor ato ne tsentsen do?

28 Na ɔyɛ dɛn na hom dwendwen wɔ ntar ho? Hom nhwɛ nsũa kwã mu nsukookoo mbrɛ wonyin; wɔnnyɛ edwuma, eso wɔnntow asaaba;

29 Naaso mese hom dɛ Solomon n’enyimnyam nyina mu mpo ɔannhyehyɛ noho dɛ yinom mu kor.

30 Na sɛ Nyankopɔn ma kwã mu efuw a ɔwɔ ha ndɛ na ɔkyena wɔdze gu fononoo mu efuradze dɛm a, dɛmara so na ɔbɛma hom efuradze, sɛ hom gyedzi nnsuar a.

31 Dɛm ntsi mma hom nndwendwen dɛ, Ebɛnadze na yebedzi? anaa, Ebɛnadze na yɛbɔnom? anaa, Ebɛnadze na yebofura?

32 Na hom sor Egya nyim dɛ yinom nyina hia hom.

33 Mbom hom ndzi kan nhwehwɛ Nyankopɔn n’ahenman nye ne tsenenee, na wɔdze yinom nyina bɛkã hom ho.

34 Dɛm ntsi mma hom nndwendwen adze kyee ho, na adze kyee no bɔdwendwen nankasa ne ndzɛmba ho. Da kor no mu bɔn dɔɔ sõ ma no.