1 Mo nao i bin hapen se, taem we Jisas i endem ol toktok ia, hem i sakem ol ae blong hem raonabaot long grup blong pipol ia, mo i talem long olgeta: “Luk, yufala i bin harem ol samting we mi tijim, bifo mi go antap long Papa blong mi; from hemia, eni man we i tingbaot ol toktok ia blong mi mo mekem olgeta, hem bae mi leftemap hem long las dei.”

2 Mo i bin hapen se taem we Jisas i talem ol toktok ia, hem i luk se i gat samfala long olgeta we oli sapraes tumas, mo oli tingbaot wanem hem i wantem talem long saed blong loa blong Moses; from oli no bin andastanem toktok ia, se evri olfala samting oli bin pas oli go lus, mo se evri samting i kam niu.

3 Mo hem i bin talem long olgeta: “No sapraes we mi bin talem long yufala se ol olfala samting oli bin pas oli go lus, mo se evri samting i kam niu.

4 Luk, mi talem long yufala se, loa i stap hapen, we mi bin givim long Moses.

5 Luk, mi mi hem we i bin givim loa ia, mo mi mi hem we i bin mekem kavenan wetem pipol blong mi Isrel; from hemia, loa ia, tru long mi, i hapen, from mi bin kam blong mekem loa ia i kamtru; from hemia, hem i gat wan en.

6 Luk, mi no prapa spolem gud wanem we ol profet oli raetem, from plante samting ia we oli no bin hapen tru long mi, i tru mi talem long yufala, bae evriwan i hapen.

7 Mo from mi bin talem long yufala se ol olfala samting i bin pas i go, mi no prapa spolem ol samting we oli bin talem long saed blong ol samting we bae i kam.

8 From luk, kavenan we mi bin mekem wetem ol pipol blong mi i no hapen evriwan; be loa we mi bin givim long Moses i gat wan en tru long mi.

9 Luk, mi mi loa, mo laet. Lukluk long mi, mo stap strong kasem en, mo bae yufala i laef, from long hem we i stap strong kasem en, bae mi givim laef we i no save finis.

10 Luk, mi bin givim long yufala ol komanmen; from hemia, obei ol komanmen blong mi. Mo hemia i loa mo ol profet, from i tru we oli bin testifae long saed blong mi.”

11 Mo nao i bin hapen se taem we Jisas i talem ol toktok ia, hem i talem long olgeta twelef we hem i bin jusum:

12 “Yufala i ol disaepol blong mi; mo yufala i wan laet long pipol ia, we i wan smol haf blong laen blong Josef.

13 Mo luk, hemia i graon we i blong yufala we i kam long ol papa, mo Papa i bin givim graon ia long yufala.

14 Mo i no gat eni taem, we Papa i bin givim oda long mi se mi mas talem samting ia long ol brata blong yufala long Jerusalem.

15 Mo tu, i no gat eni taem, we Papa i bin givim oda long mi se, mi mas talem long olgeta long saed blong ol narafala laen blong haos blong Isrel we Papa i bin lidim olgeta oli aot long graon.

16 Hemia Papa i bin givim oda long mi, se mi mas talem long olgeta:

17 ‘Se ol narafala sipsip, mi mi gat, we oli no blong yad ia; olgeta tu mi mas karem olgeta oli kam, mo bae oli harem voes blong mi; mo bae i gat wan yad, mo wan man blong lukaot long sipsip.’

18 Mo nao, from ol stronghed fasin mo fasin blong olgeta blong no bilif, oli no bin andastanem toktok blong mi; from hemia, Papa i bin givim oda long mi se mi no mas talem wan samting moa long saed blong samting ia long olgeta.

19 Be, i tru, mi talem long yufala, se Papa i bin givim oda long mi, mo mi talem samting ia long yufala, we yufala i bin seraot aot long olgeta from nogud fasin blong olgeta; nao, hem i from nogud fasin blong olgeta we i mekem se oli no save long saed blong yufala.

20 Mo i tru, mi talem long yufala bakegen se ol narafala laen Papa i bin seraotem aot long olgeta; mo hemia i from nogud fasin blong olgeta mekem se oli no save long saed blong olgeta.

21 Mo i tru mi talem long yufala, se yufala i olgeta we mi bin talem: ‘Ol narafala sipsip we mi mi gat we oli no blong yad ia; olgeta tu, mi mas karem olgeta oli kam, mo bae oli harem voes blong mi; mo bae i gat wan yad, mo wan man blong lukaot long sipsip.’

22 Mo oli no bin andastanem mi, from oli ting se olgeta ia, oli Ol Jentael; from oli no andastanem se Ol Jentael bae oli jenisim laef tru long ol prijing blong olgeta.

23 Mo oli no bin andastanem mi, taem mi talem se bae oli harem voes blong mi; mo oli no andastanem mi se, Ol Jentael, i no gat eni taem we bae oli harem voes blong mi—we bae mi no soemaot miwan long olgeta be tru long Tabu Spirit nomo.

24 Be luk, yufala i bin tugeta, harem voes blong mi, mo bin luk mi; mo yufala i ol sipsip blong mi, mo mi kaontem yufala wetem olgeta we Papa i bin givim long mi.