1 Iwe non ewe fansoun pwe nupwen an Jises awesano ekkei kapas a nenefetanei mesan won ewe mwicheich, me apasa ngeni ir: Nengeni, oua fen rongorong ekkewe mettoch minne ua fen afanafana me mwen ai feita ngeni Semei we; iei minne, ion epwe chechemeni ekkei kapas seniei me fori ir, i upwe seikata non ewe ranin soponon.

2 Iwe non ewe fansoun pwe nupwen an Jises apasa ekkei kapas a weweiti pwe mi wor ekkoch me neir ekkewe ra ingeno, me ekieki ika met i epwe fori usun ewe annukun Moses; pun rese weweiti ewe kapas minne mettochun nom ra wesino, me mettoch meinisin ra winiti sofo.

3 Iwe a apasa ngeni ir: Ousap ingeno ren ai apasa ngenikemi pwe mettochun nom ra wesino, me mettoch meinisin ra winiti sofo.

4 Nengeni, ua apasa ngenikemi pwe ewe annuk a pwonueta ewe a kawor ngeni Moses.

5 Nengeni, ngang ewe a awora ewe annuk, me ngang i ewe a pwon mi pin ngeni nei kewe aramasen Israel; iei minne, ewe annuk non ngang a pwonueta, pun ua fen feito pwe upwe apwonueta ewe annuk, iei minne a wor soponon.

6 Nengeni, use angawano ekkewe soufos, pun meinisin ekkewe rese pwonueta non ngang, ennet ua apasa ngenikemi, repwe pwonueta meinisin.

7 Iwe pokiten ua apasa ngenikemi pwe mettochun nom ra wesino, use angawano met minne a fen affateno usun mettoch minne repwe feito.

8 Pun nengeni, ewe pwon mi pin minne ua fen fori ngeni nei kewe aramas ese unusen pwonueta; nge ewe annuk minne a kawor ngeni Moses a wor soponon non ngang.

9 Nengeni, ngang ewe annuk, me ewe saram. Nengeniei, me nikitu ngeni soponon, iwe oupwe manau; pun i ewe a nikitu ngeni soponon upwe ngeni i manau esemuch.

10 Nengeni, ua fen ngenikemi ekkewe annuk; iei minne aneasochisi ai kewe annuk. Iwe iei ewe annuk me ekkewe soufos, pun ra fen pwarata usui.

11 Iwe iei non ewe fansoun pwe nupwen an Jises wes ne apasa ekkei kapas, a apasa ngeni ekkewe engon me ruomon ekkewe a fen finireta:

12 Ami nei chon kuno; iwe ami ew saram ngeni ekkei aramas, ir ekkewe nussunon ewe imwen Joseph.

13 Iwe nengeni, iei ewe fonuen ami kewe neuo; iwe ewe Sam a fen ngenikemi.

14 Iwe esap mwo fan ew ewe Sam a ngeniei annuk pwe upwe ureni ngeni pwiumi kewe non Jerusalem.

15 Esap pwan mwo fan ew ewe Sam a ngeniei annuk pwe upwe apasa ngeni ir usun ekkewe ekkoch einangen ewe imwen Israel, ekkewe ewe Sam a fen emmwenireno seni ewe fonu.

16 Iei chok ukukun ewe Sam a annuku ngeniei, pwe upwe apasa ngeni ir:

17 Pun ekkoch nei siip ir resap seni ei mwicheich; ir pwan upwe emmwenir, pwe repwe rongorong neuwei; iwe epwe wor ew mwicheich, me emon chon masen siip.

18 Iwe iei, pokiten nukumach me nukunukumang rese weweiti ai we kapas; iei minne ua annuk pwe usap chiwen apasa pwan och me ren ewe Sam usun ei mettoch ngeni ir.

19 Nge, ennet, ua apasa ngenikemi pwe ewe Sam a fen annuku ngeniei, pwe upwe apasa ngenikemi, pwe oua keimuseni me neir pokiten ar angangangaw; iei minne pokiten ar angangangaw ina popun rese sinei usumi.

20 Iwe nengeni, ua apasa ngenikemi sefan pwe ekkewe ekkoch einang ewe Sam a fen eimusenir; iwe ina pokiten ar angangangaw rese sinei usur.

21 Iwe ennet ua apasa ngenikemi, pwe ami ir ekkewe ua fen kapas usun: Ekkoch nei siip ir resap seni ei mwicheich; ir pwan upwe emmwenir, iwe repwe rongorong neuwei; iwe epwe wor ew chok mwicheich, me emon chon masen siip.

22 Iwe rese weweitiei, pun ra ekieki pwe ita ekkewe chon Gentile; pun rese weweiti pwe ekkewe chon Gentile repwe siwin me ren ar afanafan.

23 Iwe rese weweitiei pwe ua apasa pwe repwe rongorong ai kapas; me rese weweitiei pwe ekkewe chon Gentile esap wor ew fansoun repwe rongorong neuwei—pwe usap pwarano inisi ngeni ir tiwenon chok epwe seni ewe Ngun mi Fel.

24 Nge nengeni, ami me ru mwicheich oua fen rongorong neuwei, me kunaei; iwe ami nei siip, me oua anneanong nein ekkewe Semei we a fen ngeniei.