1 Im kiiō ālikin men kein ke eaar m̧ōj an Jisōs kar kōjjem̧ļo̧k ennaan kein Eaar reito-reitak ioon jarlepju eo, im ba n̄an er: Lo, kom̧ ar ron̄ men ko Iaar katakin kom̧ m̧okta jān Aō kar wanlōn̄ļo̧k n̄an Jema; kōn menin, jabdewōt eo ej keememej ennaan kein Aō im kōm̧m̧ani, e Inaaj kōjerkak e ilo raan eo āliktata.

2 Im ālikin men kein ke eaar m̧ōj an Jisōs ba naan kein Eaar kile bwe eaar wōr jet ilubwiljier raar bwilōn̄, im koļmānļo̧kijeņ ta Eaar kōņaan ren kōm̧m̧an kōn kien Moses; bwe raar jab meļeļe ennaan eo bwe men ko rem̧or raar mootļo̧k, im bwe aolep men otemjeļo̧k raar erom kāāl.

3 Im Eaar ba n̄an er: Kom̧in jab bwilōn̄ bwe Ij ba n̄an kom̧ bwe men ko rem̧or remootļo̧k, im bwe men otemjeļo̧k raar erom kāāl.

4 Lo, Ij ba n̄an kom̧ bwe kien eo ej kūrm̧ool eo kar leļo̧k n̄an Moses.

5 Lo, N̄a eo eaar leļo̧k kien eo, im N̄a eo eaar kōm̧m̧an bujen ippān armej ro doō Israel; kōn menin, kien eo ilo N̄a ej kūrm̧ool, bwe Iaar itok n̄an kakūrm̧ool kien eo; kōn menin ewōr jem̧ļo̧kin.

6 Lo, I jab ko̧kkure rikanaan ro, bwe jon̄an wōt eo raar jab kūrm̧ool ilo N̄a, em̧ool Ij ba n̄an kom̧, naaj aolep kūrm̧ool.

7 Im kōnke Iaar ba n̄an kom̧ bwe men ko rem̧or raar mootļo̧k, Ij jab ko̧kkure men eo kar ba kōn men ko rej itok.

8 Bwe lo, bujen eo Iaar kōm̧m̧an ippān armej ro Aō ej jab aolep kūrm̧ool; a kien eo kar leļo̧k n̄an Moses eaar wōr jem̧ļo̧k in ilo N̄a.

9 Lo, N̄a kien eo, im meram eo. Kom̧in reitok n̄an Eō, im niknik n̄an jem̧ļo̧kin, im kom̧ naaj mour; bwe n̄an eo ej niknik n̄an jem̧ļo̧kin Inaaj leļo̧k mour indeeo.

10 Lo, Iaar lewōj n̄an kom̧ kien ko; kōn menin kōjparok kien ko Aō. Im en̄in ej kien eo im rikanaan ro, bwe em̧ool rej kam̧ool kōn Eō.

11 Im kiiō ālikin men kein ke Jisōs eaar m̧ōj An kōnono naan kein Eaar ba n̄an ro jon̄oulruo eaar kāālet:

12 Kom̧ij ro rikaļoora; im kom̧ij meram eo n̄an armej rein, ro rej m̧ōttan eo in m̧weo im̧ōn Josep.

13 Im lo, en̄in ej āneo ami jolōt; im Jemān eaar lewōj e n̄an kom̧.

14 Im jab ilo jabdewōt iien Jema eaar letok n̄an Eō kien bwe In ba kake e n̄an ro jeiūm̧i im jātimi ilo Jerusalem.

15 Im jab ilo jabdewōt iien Jema eaar letok n̄an Eō kien bwe In maron̄ ba n̄an er kōn bwij ko jet in m̧weo im̧ōn Israel, ro Jema eaar tōlļo̧k er jān āneo.

16 En̄in jon̄an eo Jema eaar jiron̄ Eō, bwe in ba n̄an er:

17 Bwe sip ko jet Aō rejjab jān wōrwōr in; er barāinwōt Ij aikuj bōktok, im renaaj ron̄ Ainikiō; im renaaj juon wōt bwij, im juon wōt seperd.

18 Im kiiō, kōnke kijn̄en̄e kōnwa im jab tōmak raar jab meļeļe Aō innaan; kōn menin kar jiron̄ Eō bwe in jab ba eļapļo̧k jān Jema kōn menin n̄an er.

19 A, em̧ool, Ij ba n̄an kom̧ bwe Jema eaar jiron̄ Eō, im Ij jiron̄ e kom̧, bwe kom̧ ar jepel jān ilubwiljier kōnke aer nana; kōn menin ej kōnke aer nana rejjab jeļā kōn kom̧.

20 Im em̧ool, Ij ba n̄an kom̧ bar juon alen bwe bwij ko jet Jema eaar kōjepel jān er; im ej kōn aer nana rejjab jeļā kōn er.

21 Im em̧ool Ij ba n̄an kom̧, bwe kom̧ ej er ro Iaar ba: Bwe sip ko jet Aō rejjab jān wōrwōr in; er barāinwōt Ij aikuj bōktok, im renaaj ron̄ Ainikiō; im renaaj juon wōt bwij, im juon wōt seperd.

22 Im raar jab meļeļe N̄a, bwe raar ļōmņak eaar kōn ro riAelōn̄ ko; bwe raar jab meļeļe bwe ro riAelōn̄ ko; bwe raar jab meļeļe bwe ro riAelōn̄ ko ren oktak kōn aer kwaļo̧k naan.

23 Im raar jab meļeļe ke Iaar ba renaaj ron̄ Ainikiō; im raar jab meļeļe N̄a bwe ro riAelōn̄ ko ren ban ilo jabdewōt iien ron̄ Ainikiō—bwe In jab kwaļo̧k Eō make n̄an er ijello̧kun wōt n̄e eaar kōn Jetōb Kwōjarjar.

24 A lo, kom̧ ar jim̧or ron̄ Ainikiō, im kar lo Eō; im kom̧ij ro Aō sip, im kom̧ij bōnbōn ilubwiljin ro Jema eaar letok n̄an Eō.