1 Ut chi yaal, chi yaal, ninye eere naq wankeb’ chik jalan inkarneer, li moko reheb’ ta li ch’och’ a’in, chi moko re li ch’och’ Jerusalen, chi moko jar raqal chik chi ch’och’ sa’ xsutam li wanjenaqin wi’ chi k’anjelak.

2 Xb’aan naq eb’ li nin’aatinak wi’ a’aneb’ li toj maji’ neke’ab’ink re lix yaab’ inkux; chi moko kink’utb’esi wib’ jun sutaq chiruheb’.

3 A’b’an xink’ul jun xtaqlahom li Yuwa’b’ej naq tinxik rik’ineb’, ut naq te’rab’i xyaab’ inkux, ut te’k’ehe’q sa’ ajl sa’ xyanqeb’ inkarneer, re naq jun korral naq taawanq ut junaq aj ilol karneer; jo’kan naq ninxik chixk’utb’al wib’ chiruheb’.

4 Ut nekexintaqla naq teetz’iib’a li yehom a’in chirix naq ak xikenaqin, re naq wi taa’uxq naq eb’ lin tenamit li wankeb’ Jerusalen, eb’ li ke’ilok we ut ke’wan wik’in sa’ ink’anjel, ink’a’ te’patz’oq re li Yuwa’b’ej sa’ lin k’ab’a’ re te’ruuq chixk’ulb’al xnawomeb’ cherix rik’in li Santil Musiq’ej, ut jo’kan ajwi’ chirix li jun ch’ool chik li teep li moko nawb’ileb’ ta xb’aaneb’, naq li yehom a’in teetz’iib’a, taak’uulamanq ut taak’utb’esimanq chiruheb’ laj Gentil, re naq rik’in lix tz’aqlojikeb’ ru laj Gentil, li rela’ li riyajileb’ a’an, li jek’inb’ilaqeb’ chaq chiru lix b’een li ch’och’ xb’aan xmaak’a’il lix paab’aaleb’, te’ruuq chi oksiik, malaj ut taaruuq te’k’ame’q chixnawb’al chiwix laa’in, laj Tojol rixeb’.

5 Toja’ ut naq teb’inch’utub’ chaq sa’ xkaajachalil li ruchich’och’; toja’ ut naq tintz’aqob’resi ru li sumwank li kixk’uub’ li Yuwa’b’ej choq’ re chixjunileb’ li wankeb’ sa’ lix junkab’al laj Israel.

6 Ut osob’tesinb’ileb’ laj Gentil, xb’aan xpaab’aaleb’ chiwix, rik’in ut sa’ xk’ab’a’ li Santil Musiq’ej, li naxch’olob’ xyaalal chiruheb’ chiwix laa’in ut chirix li Yuwa’b’ej.

7 K’ehomaq reetal, xb’aan lix paab’aaleb’ chiwix, chan li Yuwa’b’ej, ut xb’aan xmaak’a’il eepaab’aal laa’ex, ex xjunkab’al laj Israel, sa’ roso’jik li kutan taachalq li yaal rik’ineb’ laj Gentil, re naq lix tz’aqalil li k’a’aq re ru a’in taak’ehe’q chi nawmank chiruheb’.

8 A’b’anan rahilal, chan li Yuwa’b’ej, sa’ xb’eeneb’ laj Gentil li ink’a’ neke’paab’an—xb’aan naq us ta ak ke’chal chiru lix b’een li ch’och’ a’in, ut ke’xjek’iheb’ lin tenamit li wankeb’ sa’ lix junkab’al laj Israel; ut eb’ lin tenamit li wankeb’ sa’ lix junkab’al laj Israel ke’isiik chaq sa’ xyanqeb’, ut ke’yeq’iik rub’el oqej xb’aaneb’;

9 Ut xb’aan li ruxtaan li Yuwa’b’ej choq’ reheb’ laj Gentil, ut jo’kan ajwi’ lix raqb’a-aatin li Yuwa’b’ej sa’ xb’een lin tenamit li wankeb’ sa’ lix junkab’al laj Israel, chi yaal, chi yaal, ninye eere, naq chirix chixjunil a’in, ut akaq xink’e chi sak’e’k lin tenamit li wankeb’ sa’ lix junkab’al laj Israel, ut chi tawasiik, ut chi kamsiik, ut chi isiik chaq sa’ xyanqeb’, ut chi xik’ ile’k xb’aaneb’, ut chi wank choq’ hasb’ ut jo’maajo’il aatin sa’ xyanqeb’—

10 Ut jo’ka’in kixtaqla li Yuwa’b’ej naq tinye eere: Sa’ li kutan naq eb’ laj Gentil te’maakob’q chiru lin evangelio, ut te’xtz’eqtaana lix tz’aqalil lin evangelio, ut te’taqsiiq sa’ xq’etq’etileb’ xch’ool sa’ xb’een chixjunileb’ li tenamit, ut sa’ xb’eeneb’ chixjunil li wankeb’ anchal sa’ ruchich’och’, ut te’nujaq rik’in li k’iila paay chi tik’ti’ik, ut b’alaq’, ut jo’maajo’il b’aanuhom, ut li k’iila paay chi ka’pak’alil, ut kamsink, ut tijok chi tojb’il, ut yumb’eetak ko’b’eetak, ut chi muqmuukil tz’eqb’eetalil; ut wi te’xb’aanu chixjunil li k’a’aq re ru a’in, ut te’xtz’eqtaana lix tz’aqalil lin evangelio, k’ehomaq reetal, chan li Yuwa’b’ej, laa’in tink’am chaq lix tz’aqalil lin evangelio sa’ xyanqeb’.

11 Toja’ ut naq taajultiko’q we lin sumwank li kink’uub’ choq’ re lin tenamit, ex xjunkab’al laj Israel, ut tink’am lin evangelio rik’ineb’ a’an.

12 Toja’ ut naq tink’ut cheru, ex xjunkab’al laj Israel, naq eb’ laj Gentil moko te’wanq ta xwankil sa’ eeb’een; taajultiko’q b’an we lin sumwank choq’ eere, ex xjunkab’al laj Israel, ut texk’ame’q chixnawb’al lix tz’aqalil lin evangelio.

13 A’b’anan wi eb’ laj Gentil te’xjal xk’a’uxl ut te’sutq’iiq wik’in, chan li Yuwa’b’ej, k’ehomaq reetal, te’k’ehe’q sa’ ajl sa’ xyanq lin tenamit, ex xjunkab’al laj Israel.

14 Ut ink’a’ tinkanab’ lin tenamit, li wankeb’ sa’ lix junkab’al laj Israel, chi nume’k sa’ xyanqeb’ ut chixyeq’inkileb’, chan li Yuwa’b’ej.

15 Wi b’an ink’a’ te’sutq’iiq wik’in, ut ink’a’ te’ab’inq chiru xyaab’ inkux, laa’in tinkanab’eb’, relik chi yaal, tinkanab’eb’ lin tenamit, ex xjunkab’al laj Israel, naq te’nume’q sa’ xyanqeb’, ut te’xyeq’iheb’, ut eb’ a’an te’wanq chanchan li atz’am li xsach xsahil, li maak’a’ chik na’ok wi’, ka’aj chik re tz’eqe’k, ut yeq’e’k rub’el roqeb’ intenamit, ex xjunkab’al laj Israel.

16 Chi yaal, chi yaal, ninye eere, jo’ka’in kinixtaqla li Yuwa’b’ej—naq tink’e re li tenamit a’in li ch’och’ a’in choq’ reechanihomeb’.

17 Toja’ ut naq taatz’aqloq ru li raatin li profeet aj Isaias, li naxye:

18 Eb’ laa k’aak’alenel tenamit te’xtaqsi lix yaab’ kuxej; chi junajinb’il xyaab’eb’ xkux te’b’ichanq, xb’aan naq te’ril rik’in ruheb’ naq li Qaawa’ tixk’am chaq wi’chik Sion.

19 Chinumtaq xsahil eech’ool, chexb’ichanq sa’ komonil ex sachenaqil na’ajej re Jerusalen; xb’aan naq li Qaawa’ kixk’ojob’ xch’ool lix tenamit, a’an kixtoj rix Jerusalen.

20 Li Qaawa’ xt’usub’ lix santil tel sa’ rilob’aaleb’ chixjunil li tenamit; ut chixjunileb’ lix maril li ruchich’och’ te’ril lix kolb’a-ib’ li Dios.