1 Ut chi yaal ninye eere, nink’e eere jun eetalil, re taaruuq teenaw lix q’ehil naq ok re chi k’ulmank li k’a’aq re ru a’in—naq laa’in teb’inch’utub’ chaq sa’ xnajtil xjek’inkileb’, lin tenamit, ex xjunkab’al laj Israel, ut tinxaqab’ wi’chik lin Sion sa’ xyanqeb’;

2 Ut k’ehomaq reetal, a’in li k’a’ru tink’e eere choq’ eetalil—xb’aan naq chi yaal ninye eere naq jo’q’e li k’a’aq re ru a’in li ninch’olob’ cheru, ut li toj tinch’olob’ cheru moqon injunes, ut rik’in lix wankil li Santil Musiq’ej li taak’ehe’q eere xb’aan li Yuwa’b’ej, naq taak’ehe’q a’in chi nawmanq chiruheb’ laj Gentil re taaruuq te’xnaw chirix li tenamit a’in, a’aneb’ jun rela’ lix junkab’al laj Jakob, ut chirix lin tenamit a’in li jek’inb’ilaq xb’aaneb’;

3 Chi yaal, chi yaal, ninye eere, naq li k’a’aq re ru a’in taak’ehe’q chi nawmanq chiruheb’ xb’aan li Yuwa’b’ej, ut taachalq xb’aan li Yuwa’b’ej rik’ineb’ chaq a’an, toj eere laa’ex;

4 Xb’aan naq a’an xchaab’ilal xna’leb’ li Yuwa’b’ej naq eb’ a’an te’xaqab’aaq sa’ li ch’och’ a’in, ut te’k’ojob’aaq jo’ ach’ab’anb’il tenamit xb’aan xwankilal li Yuwa’b’ej, re naq li k’a’aq re ru a’in taachalq rik’ineb’ chaq a’an, toj rik’in jun rela’ lee riyajil, re naq taaruuq taatz’aqloq ru lix sumwank li Yuwa’b’ej li ki’ok wi’ sa’ sumwank rik’in lix tenamit, ex xjunkab’al laj Israel;

5 Jo’kan ut, naq li k’anjel a’in ut li k’anjel li toj taak’anjelamanq sa’ eeyanq moqon, taachalq rik’ineb’ chaq laj Gentil, toj rik’ineb’ lee riyajil li te’lajq chi maak’a’aqeb’ xpaab’aal xb’aan li maa’usilal;

6 Xb’aan naq chi jo’kan na’ajman ru choq’ re li Yuwa’b’ej naq taachalq chaq rik’ineb’ laj Gentil, re naq a’an tixk’ut chaq lix wankil chiruheb’ laj Gentil, choq’ re li ajom a’in, naq eb’ laj Gentil, wi ink’a’ neke’xkawob’resi li raameb’, naq taaruuq te’xjal xk’a’uxl ut te’chalq wik’in ut te’kub’eeq xha’ sa’ lin k’ab’a’ ut te’xnaw li jar raqal re lin tzol’leb’ li tz’aqal yaal, re naq te’k’ehe’q sa’ ajl sa’ xyanq intenamit, ex xjunkab’al laj Israel;

7 Ut naq taak’ulmanq li k’a’aq re ru a’in naq eb’ lee riyajil te’ok chixnawb’al li k’a’aq re ru a’in—taawanq choq’ eetalil chiruheb’, re taaruuq te’xnaw naq ak xtikla lix k’anjel li Yuwa’b’ej re xtz’aqob’resinkil ru li sumwank li kixk’uub’ choq’ reheb’ li ani wankeb’ sa’ lix junkab’al laj Israel.

8 Ut naq taachalq li kutan a’an, taak’ulmanq naq eb’ li rey te’xtz’ap xtz’uumaleb’ re; xb’aan naq li k’a’ru moko yeeb’il ta reheb’ te’ril; ut li k’a’ru moko rab’ihomeb’ ta te’xk’oxla.

9 Xb’aan naq sa’ li kutan a’an, choq’ we laa’in li Yuwa’b’ej tixk’anjela jun k’anjel, a’anaq jun xnimal ru ut sachb’a-ch’oolejil k’anjel sa’ xyanqeb’; ut te’wanq sa’ xyanqeb’ li ani ink’a’ te’paab’anq re, us ta jun li winq taach’olob’anq re chiruheb’.

10 A’b’an k’ehomaq reetal, lix yu’am lin moos taawanq sa’ wuq’; jo’kan naq ink’a’ te’xrahob’tesi, us ta taapo’e’q li rilob’aal sa’ xk’ab’a’eb’ a’an. A’b’anan laa’in tink’irtesi, xb’aan naq tink’ut chiruheb’ naq nim wi’chik xchaab’ilal inna’leb’ chiru lix seeb’al xb’alaq’ laj tza.

11 Jo’kan naq taak’ulmanq naq yalaq ani ink’a’ taapaab’anq re li waatin laa’in, li Jesukristo, li tixk’e li Yuwa’b’ej chixk’ut a’an chiruheb’ laj Gentil, ut tixk’e xwankil a’an re tixk’e chi k’ute’k chiruheb’ laj Gentil (taab’aanumanq jo’ chanru ajwi’ li kixye laj Moises) eb’ a’an te’isiiq chaq sa’ xyanqeb’ lin tenamit li okenaqeb’ sa’ li sumwank.

12 Ut eb’ lin tenamit li wankeb’ choq’ jun rela’ laj Jakob te’wanq sa’ xyanqeb’ laj Gentil, relik chi yaal, sa’ xyiheb’ chanchan jo’ jun kaqkojl sa’ xyanqeb’ lix xulel k’iche’, jo’ jun saaj kaqkojl sa’ xyanqeb’ li teep chi karneer—a’an, wi nanume’ sa’ xyi nayeq’ok ut napejink, ut maajun naru chi kolok.

13 Taqsinb’ilaq li ruq’eb’ sa’ xb’eeneb’ laj xik’ ilonel reheb’, ut chixjunileb’ li xik’ neke’ilok reheb’ te’isiiq chaq.

14 Relik chi yaal, rahilal chiwanq sa’ xb’eeneb’ laj Gentil wi ink’a’ neke’xjal xk’a’uxl, xb’aan naq taak’ulmanq sa’ li kutan a’an, chan li Yuwa’b’ej, naq tinwisiheb’ chaq laa kawaay sa’ aayanq, ut tinsacheb’ laa kareet;

15 Ut tinwisiheb’ chaq li jar tenamit re laa ch’och’, ut tinjuk’eb’ chaq chixjunil laa kawil na’aj;

16 Ut tinwisi chaq li tuulak sa’ laa ch’och’, ut maak’a’aqeb’ chik aj q’e aawik’in;

17 Laa yiib’anb’il jalam-uuch tinwisi ajwi’ chaq, ut laa xaqxookil jalam-uuch chaq sa’ aayanq, ut ink’a’ chik taaloq’oni lix yiib’ahom aawuq’;

18 Ut tinmich’eb’ chaq xtoonaleb’ li loq’oninb’il che’ sa’ aayanq; chi jo’kan tinsacheb’ laa tenamit.

19 Ut taak’ulmanq naq chixjunil li tik’ti’ik, ut li b’alaq’ik, ut li kaqalink, ut li wech’ij-ib’, ut li tijok chi tojb’il, ut li yumb’eetak ko’b’eetak, taak’ehe’q chaq xraqik.

20 Xb’aan naq taak’ulmanq, chan li Yuwa’b’ej, naq sa’ li kutan a’an yalaq ani ink’a’ te’xjal xk’a’uxl ut te’chalq rik’in li Walal raaro inb’aan, eb’ a’an te’wisi chaq sa’ xyanq intenamit, ex xjunkab’al laj Israel.

21 Ut laa’in tink’anjela li eeqajunk ut xnimal li josq’il sa’ xb’eeneb’, jo’ chanru sa’ xb’eeneb’ li maak’a’eb’ xnawom chirix li Dios, xkomon li ink’a’ rab’ihomeb’ chaq.

22 A’b’an wi te’xjal xk’a’uxl ut te’ab’inq chiru li waatin, ut ink’a’ te’xkawob’resi li raameb’, laa’in tinxaqab’ lin iglees sa’ xyanqeb’, ut te’ok sa’ li sumwank ut te’k’ehe’q sa’ ajl sa’ xyanq a’in li rela’ laj Jakob, li kink’e wi’ li ch’och’ a’in choq’ reechanihomeb’;

23 Ut eb’ a’an te’xtenq’a lin tenamit, li rela’ laj Jakob, ut jo’kan ajwi’ jo’ k’ihal xkomoneb’ lix junkab’al laj Israel li te’chalq, re te’ruuq chixkab’lankil jun tenamit, a’anaq li Ak’ Jerusalen taayeemanq re.

24 Toja’ ut naq te’xtenq’a lin tenamit re te’ruuq chi ch’utub’aak, li wankeb’ chaq chi jek’inb’il chiru chixjunil lix b’een li ch’och’, toj sa’ li Ak’ Jerusalen.

25 Toja’ ut naq lix wankilal li choxa taakub’eeq sa’ xyanqeb’, ut laa’in ajwi’ tinwanq sa’ xyi.

26 Toja’ ut naq lix k’anjel li Yuwa’b’ej taatiklaaq sa’ li kutan a’an; naq taajultikamanq ajwi’ li evangelio a’in sa’ xyanq li rela’ li tenamit a’in. Chi yaal ninye eere, sa’ li kutan a’an lix k’anjel li Yuwa’b’ej taatiklaaq sa’ xyanqeb’ chixjunil li jek’inb’ileb’ re lin tenamit; relik chi yaal, li jar teepal li sachenaqeb’, li kixk’ameb’ chaq xb’e li Yuwa’b’ej chi elk Jerusalen.

27 Relik chi yaal, taatiklaaq li k’anjel sa’ xyanqeb’ chixjunil li jek’inb’ileb’ re lin tenamit, rik’in li Yuwa’b’ej, re xkawresinkil li b’e te’ruuq wi’ chi chalk wik’in, re te’ruuq chi patz’ok chiru li Yuwa’b’ej sa’ lin k’ab’a’.

28 Relik chi yaal, toja’ ut naq taatiklaaq li k’anjel, rik’in li Yuwa’b’ej, sa’ xyanqeb’ chixjunil li jar tenamit, re xkawresinkil li b’e te’ruuq wi’ chi ch’utub’aak lix tenamit sa’ xch’och’il li reechanihomeb’.

29 Ut te’elq chaq sa’ chixjunileb’ li tenamit; ut ink’a’ te’elq chaq sa’ aanil, chi moko te’xik aj eelel, xb’aan naq laa’in tinxik chiruheb’, chan li Yuwa’b’ej, ut laa’inaq aj k’aak’alenel chirixeb’.