1 Ao e a koro bukina bwa e tuangiia bwa a na koroi taeka ake e anga te Tama nakon Maraki, are e na tuangiia. Ao e a koro bukina bwa i mwin are a tia ni koreaki ao e kabwaranakoi. Ao aikai taeka ake e bon tuangiia, ni kangai: E taku te Tama nakon Maraki—Nooria, N na kanakoa au tia ua rongorongo, ao e na katauraoa te kawai imwaiu, ao e na waekoa n roko te Uea are kam ukoukoria nakon ana tembora, ae te tia uota rongorongon te berita ae tabu, are kam kukurei irouna; nooria, e na roko, e taku aia Uea Taanga ni Buaka.

2 Ma antai ae kona n tiku n te bong are e na roko iai, ao antai ae e na teirake ngkana e kaoti? Bwa e na riki n aron ana ai te tia kaitiaki, ao ana toobu te tia kaitiaki kunnikai.

3 Ao e na tekateka n aron te tia kaitiaki ao te tia kaitiaka te tirewa; ao e na kaitiakia natin Rewi mwaane, ma ni kanakoaki buakakaia n aron te koora ma te tirewa, bwa aonga n uotarake nakon te Uea aia karea i nanon te raoiroi.

4 Ao ngkanne e na tamaroa aia karea Iuta ma Ierutarem nakon te Uea, n aron boong ake ngkoa, ao ririki ake ngkoa.

5 Ao N na kaaniko n te motikitaeka; ao N na riki bwa te tia kakoaua ae waekoa ni kaitaraia taan tabunea, ao ni kaitaraia taan wenenibure, ao ni kaitaraia taan kabuakaka, ao ni kaitaraia taan ribuaka nakoia aia taan mwakuri, ake a mate buuia ma ake akea tamaia, ao a katannakoa te iruwa, ao aki maakai, e taku aia Uea Taanga ni Buaka.

6 Bwa bon ngai te Uea, I aki bibitaki, ngaia are ngkami natin Iakobwa mwaane kam a bon aki mate n te ai.

7 Kam a tia ni kitan au otenanti man aki kaawakin man aia bong ami bakatibu. Okirai ao N na okiringkami, e taku aia Uea Taanga ni Buaka. Ma kam kangai: N ningai ae ti na okiriko iai?

8 E na rawebwaia te Atua te aomata? Ma kam a tia n rawebwaiai. Ma kam kangai: Ti rawebwaiko ni baikara? Ni kabwianibwai nako ma karea.

9 A na reke kaimi n te rekenikai bwa kam a tia n rawebwaiai, ae te botanaomata aio ni kabane.

10 Kam na urakin kabwianibwai nako nanon te bata ni kaikobwai, bwa e aonga n iai te amwarake ni mwengau; ao kam na kataai ngkai n aei; e taku aia Uea Taanga ni Buaka, bwa tao N na aki kauki wintoon karawa, ma ni kabwaroa te kakabwaia i aomi n te aro are kam na aki kona ni butimaei.

11 Ao N na boaa te tia kangi bwaai ibukimi ao e na aki urui uaan abami; ao e na aki naba kamwaai uaan ami kurebe i mwaain taia n te marae, e taku aia Uea Taanga ni Buaka.

12 Ao a na bane aaba nako n atongingkami bwa kam a kakabwaiaki, bwa kam na riki bwa te aba ae kam tamaroa, e taku aia Uea Taanga ni Buaka.

13 A bon matoatoa ami taeka ni kaitaraai, e taku te Uea. Ao kam kangai: Teraa ae ti a tia n taekinna ni kaaitarako iai?

14 Kam kangai: Akea bongan te beku ibukin te Atua, ao teraa rakara ngkana ti kaawakin ana otenanti nako ao ti a tia n nakonako n nanokawaki imatan aia Uea Taanga ni Buaka?

15 Ao ngkai ti araniia ake a kainikatonga bwa a kukurei; eng, ake a karaoi mwakuri aika a bubuaka a kateaki rake; eng, a kainaomataki ake a kata te Atua.

16 Ao ngkanne ake a maaka te Uea a bati n taetae imarenaia, ao e ongora man ongo te Uea; ao e koreaki te boki n ururing imatana ibukiia ake a maaka te Uea, ao a uringnga ma ni karinea arana.

17 Ao a na riki bwa au bwai, e taku aia Uea Taanga ni Buaka, n te bong are N na rinei au atibu aika a raneanea ao N na kamaiuia n aron te aomata are e kamaiuia natina mwaane ake a beku ibukina.

18 Ao ngkanne kam na oki man rinerine imarenan te raoiroi ao te buakaka, imarenan are e beku ibukin te Atua ao are e aki beku ibukina.