1 Ut kik’ulman naq kixtaqlaheb’ naq te’xtz’iib’a li aatin li kixk’e chaq li Yuwa’b’ej re laj Malakias, li tixye reheb’. Ut kik’ulman naq chirix naq kitz’iib’aman kixch’olob’ li aatin. A’in ut li aatin li kixye reheb’; kixye: Jo’ka’in naxye li Yuwa’b’ej re laj Malakias—K’ehomaq reetal, tintaqla lin k’amol esil, ut a’an tixkawresi li b’e chiwu, ut li Qaawa’ li nekesik’ taachalq chi jun xaqaamil sa’ xsantil ochoch, a’an ajwi’ aj k’amol resil li sumwank, li nasaho’ wi’ eech’ool; k’ehomaq reetal, taachalq a’an, chan li Qaawa’ reheb’ li Teepal.

2 A’b’anan ani taaruuq chixkuyb’al xkutankil lix k’ulunik, ut ani taawanq chi xaqxo naq taak’utunq chaq? Xb’aan naq a’an chanchan lix xam laj k’uub’anel ch’iich’, ut chanchan xxab’on laj puch’unel.

3 Ut a’an taak’ojlaaq jo’ aj k’uub’ahom ut aj saqob’resihom ru li plaat; ut tixsaqob’resiheb’ ru li ralal laj Levi, ut taarisi chaq xtz’ajnileb’, chanchan oor ut plaat, re naq taaruuq te’xq’axtesi re li Qaawa’ jun mayej sa’ tiikilal.

4 Toja’ naq lix mayejahom Juda ut Jerusalen taawanq xchaq’al ru chiru li Qaawa’, jo’ sa’ najter kutan, ut jo’ sa’eb’ li chihab’ junxil.

5 Ut laa’in tinnach’oq eerik’in re raqok aatin; ut seeb’aqin chixk’utb’al xyaalal li maak chirixeb’ laj tuul, ut chirixeb’ laj muxul sumsu, ut chirixeb’ laj xaqab’anel aatin sa’ tik’ti’, ut chirixeb’ li neke’rahob’tesink re li moos sa’ xtojb’al, li xmalka’an ut li maak’a’ xyuwa’, ut li neke’tz’eqtaanank re laj jalanil tenamit, ut ink’a’ neke’xxuwa wu, chan li Qaawa’ reheb’ li Teepal.

6 Xb’aan naq laa’in li Qaawa’, ink’a’ ninjal wib’; jo’kan naq laa’ex ralalex laj Jakob moko k’atb’ilex ta.

7 Chalen ajwi’ xkutankileb’ lee yuwa’ elenaqex chaq rik’in ink’ojob’anb’il k’anjel, ut moko xepaab’ ta. Sutq’inqex wik’in, ut laa’in tinsutq’iiq eerik’in, chan li Qaawa’ reheb’ li Teepal. A’b’an laa’ex nekeye: K’a’ put ru toosutq’iiq wi’?

8 Ma taa’elq’aq junaq winq chiru li Dios? A’ut laa’ex kex’elq’ak chiwu. A’b’anan laa’ex nekeye: K’a’ put ru koo’elq’ak wi’ chawu? Rik’in lajetqil ut mayej.

9 Majewanb’ilex rik’in jun majewank, xb’aan naq kex’elq’ak chiwu, chixjunil li tenamit a’in.

10 K’amomaq chaq chixjunil li lajetqil sa’ li k’uuleb’aal kab’l, re taawanq tzakemq sa’ wochoch, ut yalomaq wix anajwan rik’in a’in, chan li Qaawa’ reheb’ li Teepal, ma ink’a’ tinte cheru rilob’aal choxa, ut tinhoy choq’ eere jun osob’tesink toj reetal naq moko tz’aqalaq ta li na’ajej re xk’ulb’al.

11 Ut tinch’iila laj k’uxunel choq’ eere, re naq ink’a’ tixsach ruuchinihom lee ch’och’, chi moko lix toonal eeche’ taat’ane’q li ru chi maji’ nachal xq’ehil sa’ li awimq, chan li Qaawa’ reheb’ li Teepal.

12 Ut chixjunileb’ li tenamit osob’tesinb’il te’xye eere, xb’aan naq laa’aqex jun ch’och’ sa rilb’al, chan li Qaawa’ reheb’ li Teepal.

13 Kaw naq wanjenaq eeraatin chiwix, chan li Qaawa’. A’ut laa’ex nekeye: K’a’ru xqaye chawix?

14 Laa’ex xeye: Maak’a’ xyaalal k’anjelak chiru li Dios, ut k’a’ru naqara wi’ naq xqapaab’ lix k’ojob’anb’il k’anjel ut naq xoob’eek chi ra qach’ool chiru li Qaawa’ reheb’ li Teepal?

15 Ut anajwan saheb’ xch’ool naqaye reheb’ laj q’etq’et; relik chi yaal, eb’ li neke’k’anjelank re maa’usilal neke’waklesiik; relik chi yaal, eb’ li neke’yalok rix li Dios neke’kole’ ajwi’.

16 Toja’ naq eb’ li ke’xuwank re li Dios ke’aatinak chi kok’ aj xsa’ chirib’ileb’ rib’, ut li Qaawa’ kixk’e xxik ut ki’ab’in; ut kitz’iib’aman chiru a’an jun xhuhil li jultikaak choq’ reheb’ li neke’xuwank re li Dios, ut neke’k’oxlank re lix k’ab’a’.

17 Ut wehaqeb’ a’an, chan li Qaawa’ reheb’ li Teepal, sa’ li kutan a’an naq tintusub’eb’ lin q’ol; ut tinkol xyu’ameb’ jo’ chanru naq junaq winq naxkol xyu’am tz’aqal li ralal li nak’anjelak chiru.

18 Toja’ ut naq texsutq’iiq ut teetz’il rix ani tiik xch’ool ut ani aj maak, ani li nak’anjelak chiru li Dios, ut ani li ink’a’ nak’anjelak chiru.