1 Na ɔbaa dɛ aber a Jesus kãa dɛm nsɛm yi wiei no, ɔkasaa kyerɛɛ n’esuafo no nkorkor, see dɛ: Sɛ mokɔ m’Egya ne nkyɛn a ebɛnadze na hom pɛ dɛ meyɛ ma hom?

2 Na hɔn nyinara kasae, ma ɔkaa baasa, na wɔsee dɛ: Yɛpɛ dɛ sɛ yenyin araa kodu mber a ɔsɛ dɛ nyimpa nyin kodu, na yɛdze somdwuma yi a afrɛ hɛn dɛ yendzi yi ba ewiei a, nkyɛ hɛnho ayɛ ntsɛm aba wo nkyɛn hɔ wɔ w’ahenman mu.

3 Na ɔsee hɔn dɛ: Osiandɛ hom ebisa iyi ntsi nhyira akã hom; dɛm ntsi sɛ hom dzi mfe eduosuon ebien a hom bɛba me nkyɛn wɔ m’ahenman mu; na hom benya ahomgye wɔ me nkyɛn.

4 Na aber a ɔkasaa kyerɛɛ hɔn wiei no, ɔdaan noho wɔ baasa no do na ɔsee hɔn dɛ: Sɛ mokɔ m’Egya ne kyɛn a ebɛnadze na hom pɛ dɛ meyɛ ma hom?

5 Na wodzii yaw wɔ hɔn akoma mu, osiandɛ nna wonntum nnkã dza wɔpɛ.

6 Na ɔsee hɔn dɛ: Hwɛ, minyim hom adwen, na hom pɛ dza John, nyia modɔɔ no no a nkyɛ ɔkã moho wɔ me somdwumadzi no mu, ansaana Jewfo no rema mo do asɛn sor no, pɛɛ dɛ meyɛ ma no no.

7 Dɛm ntsi, nhyira kɛse akã hom, na hom ronnsɔ owu nnhwɛ da; mbom hom bɛtsena nkwa mu na hom ehu dwuma a Egya no bedzi ama adasamba, ekesi dɛ ndzɛmba nyina bɛhyɛ mã dɛ mbrɛ Egya no ne pɛ tse, wɔ ber a medze sor tum nyina bɛba wɔ m’enyimnyam mu.

8 Na hom ronnsɔ owu ne yaayaw nnhwɛ; mbom ber a mebɛba wɔ m’enyimnyam mu no, hom bɛsakyer amon mu hɔ ara efi dza ɔnnkyebo mu akɔ bɛkyebo mu; na wobehyira hom wɔ m’Egya n’ahenman no mu.

9 Na bio, hom renntse honam ne yaw wɔ ber a hom tse honam mu yi, anaadɛ hom rinndzi yaw, gyedɛ dza ɔyɛ bɔn wɔ wiadze mu; na mebɛyɛ iyinom nyina osian dza hom ebisa efi mo hɔ ntsi, osiandɛ hom apen dɛ hom dze adasa hɔn akra bɛbrɛ me, ber a wiadze wɔ hɔ yi.

10 Na iyi ntsi hom benya enyigye ne mãhyɛ; na hom bɛtsena ase wɔ m’Egya n’ahenman no mu; nyew, hom enyigye bɔdɔɔ sõ, mpo dɛ mbrɛ Egya no ama me enyigye mbordo yi; na hom bɛyɛ dɛ emi na mo so mpo mayɛ dɛ Egya no; na Egya no na Emi yɛ kor;

11 Na Sunsum Krɔnkrɔn no gye Egya no nye moho dase; na Egya no dze Sunsum Krɔnkrɔn no ma adasamba, osian emi ntsi.

12 Na ɔbaa dɛ ber a Jesus kãa dɛm nsɛm yi wiei no, ɔdze ne nsatseaba kãa hɔn mu biara ma ɔkaa baasa no a ɔwɔ dɛ wɔtweɔn no, na ofii hɔn nkyɛn kɔree.

13 Na hwɛ, sor buei, na wohwiim hɔn do kɔr sor, na wohunii na wɔtsee ndzɛmba a wonntum nnkã.

14 Na wɔbraa hɔn dɛ mma wɔnnkã; nna wɔamma hɔn tum so a ɔbɛma woetum akã ndzɛmba a wohunii na wɔtsee no;

15 Na dɛ wɔwɔ nyimpadua mu anaa wonnyi nyimpadua mu no, wonntum nnkã; na ɔyɛɛ hɔn dɛ wɔasakyer hɔn, ma woefi honam nyimpadua yi mu akɛhɛn bɛkyebo tsebew mu, ama woeetum ehu Nyame n’edwuma mu.

16 Mbom ɔbaa dɛ wɔbɔsoom bio wɔ asaase yi enyi do; naaso wɔammbɔsom wɔ ndzɛmba a wɔtsee na wohunii ho, osian mbra a wɔdze maa hɔn wɔ sor hɔ no tsi.

17 Na afei, wɔsakyeer hɔn ekyir no, dɛ wɔnnkyebo anaa wɔayɛ bɛkyebo no, minnyim.

18 Mbom iyi dze minyim, ɔnam kyerɛwsɛm a wɔdze ama no ntsi—dɛ wokyimaa asaase yi enyi do, na wɔkyerɛkyerɛɛ nkorɔfo nyinara, dze dodowara a wɔgyee hɔn nkyerɛkyerɛ no dzii no bɛkãa asɔrmba no ho; wonumaa hɔn, na dodowara a wonumaa hɔn no, nyaa Sunsum Krɔnkrɔn no.

19 Na hɔn a wɔannkã asɔr no ho no dze hɔn guu efiadze. Na efiadze no enntum annkora hɔn, osiandɛ no mu paa ebien.

20 Na wɔtoow hɔn guu amona mu; na mbom wɔkãa Nyame n’asɛm no araa ma ɔnam no tum do woyii hɔn fii asaase tsir mu; na dɛm ntsi woenntum enntu amona a no mu dɔ yie ammfa hɔn enngu mu.

21 Na wɔtoow hɔn guu ogyatanaa mu mpɛn ebiasa, na hwee annyɛ hɔn.

22 Na wɔtoow hɔn kyeen mbowa abɔyafo buw mu mpɛn ebien; na hwɛ wɔnye mbowa no dzii agor tse dɛ dza abofraba nye eguambaa a ɔda enumfoano bɛyɛ, na hwee annyɛ hɔn.

23 Na ɔbaa dɛ dɛm na wɔnantsewee wɔ Nephi no nkorɔfo no nyinara mu, na wɔkãa Christ n’asɛmpa kyerɛɛ nkorɔfo a wɔwɔ asaase enyi nyinara do na wɔsakyeer hɔn maa Ewuradze, na wɔdze hɔn baa Christ n’asɔr mu, na dɛm maa wohyiraa nkorɔfo a wɔwɔ dɛm ebusuasantsen no mu no, dɛ mbrɛ Jesus n’asɛm no se.

24 Na afei, emi Mormon, medze dza merekã wɔ dɛm ndzɛmba yi ho no aba ewiei ana.

25 Hwɛ, nkyɛ merebɛkyerɛw hɔn a wɔronnsɔ owu nnhwɛ da no edzin, na mbom Ewuradze braa me wɔ ho; dɛm ntsi merennkyerɛw, na wɔdze esuma wiadze.

26 Mbom hwɛ, mehu hɔn na wɔasom me.

27 Na hwɛ, wɔbɔkɔ Amanamamfo mu, na Amanamamfo no runnhu hɔn.

28 Wɔbɔkɔ Jewfo so mu, na Jewfo no runnhu hɔn.

29 Na ɔbɛba dɛ, sɛ oye wɔ Ewuradze enyi do a wɔbɔsom Israel ebusuakuw nyinara a wɔabɔ hɔn apetse no, nye aman nyinara, nye ebusuafo, nye kasa horow nye nyimpa, na wɔdze akra pii abrɛ Jesus, ama hɔn pɛ nye Nyame no tum a ɔsakyer nyimpa a ɔwɔ hɔn mu no so aahyɛ mã.

30 Na wɔtse dɛ Nyankopɔn n’abɔfoe, na sɛ wɔbɔ mpaa ma Egya no wɔ Jesus ne dzin mu a wobotum eyi hɔnho akyerɛ ɔdasanyi biara a wohu dɛ oye.

31 Dɛm ntsi ndwuma akɛse a ɔyɛ nwanwa na wɔbɛyɛ ansaana da kɛse no a ɔreba no asõ, ber a nyimpa nyina bɛba ebegyina Christ n’atsɛmbu egua no enyim no;

32 Nyew, Amanamamfo mu mpo na wɔbɛyɛ anwanwa dwuma akɛse ansaana atsɛmbu da no edu.

33 Na sɛ hom wɔ kyerɛwsɛm a ɔkã Christ n’anwanwadwuma nyina a nkyɛ hom bohu dɛ Christ ne nsɛm no ma ɔda edzi pefee dɛ dɛm ndzɛmba yi otwar dɛ ɔba mu ampa.

34 Na nyia ɔnnkɛyɛ setsie ama Jesus no ndue, nye hɔn a oyii hɔn na ɔsomaa hɔn wɔ hɔn mu no nsɛm; na obiara a ɔnnkɛgye Jesus ne nsɛm, nye hɔn a ɔasoma hɔn no nsɛm no edzi no; no so renngye hɔn wɔ da a odzi ewiei no mu;

35 Na sɛ wɔannwo hɔn mpo a nkyɛ oye. Ana hom susu dɛ hom botum eyi Nyankopɔn a wɔafom no no ne pɛrpɛryɛ no akwa, ɔno a adasa dze hɔn anan etsiatsia no do, na nkwagye nam no do bɛba no?

36 Na afei hwɛ, dɛm nkorɔfo no a Ewuradze yii hɔn no, nyew, baasa no a wɔfaa hɔn kɔr sor no, sɛ wɔtseew hɔnho fii ɔnnkyebo mu kɔr bɛkyebo mu a minnyim—

37 Mbom hwɛ, ofitsi ber a mekyerɛwee no, mebisa Ewuradze, na ɔada no edzi akyerɛ me dɛ otwar dɛ wɔsakyer hɔn nyimpadua no, osiandɛ sɛ ammba no dɛm a otwar dɛ wɔsɔ owu hwɛ;

38 Dɛm ntsi, ma ɔbɛyɛ a wɔnnkɔsɔ owu ahwɛ no, ɔsɛ dɛ nsakyer bi ba hɔn nyimpadua mu, amma wɔanntse yaw anaadɛ awerɛhow biara kã wɔ wiadze bɔn ho.

39 Afei dɛm nsakyer yi nye dza obesi wɔ da a odzi ewiei no mu no nnyɛ pɛr; na mbom nsakyer bi baa hɔn do, dza ɔbɛma Satan nnkotum enya tum wɔ hɔn do, dɛ orunntum nnsɔ hɔn nnhwɛ; na wɔtseew hɔn honam ho, ma wɔbɛyɛɛ krɔnkrɔn ama asaase no tum mpo enntum ennya tum wɔ hɔn do.

40 Na dɛm tsebew yi mu na wɔbɔwɔ ekesi Christ n’atsɛmbu da no; na dɛm da no wobenya nsakyer kɛse, na wɔagye hɔn akɔ Egya n’ahenman no mu a wɔrennsan mmfi hɔ bio, na wɔnye Nyankopɔn atsena ɔsorsor afebɔɔ.