1 Ut kik’ulman naq chirix naq li Jesus kixye li aatin a’in, kiraatinaheb’ lix tzolom, chixjunjunqaleb’, ut kixye reheb’; K’a’ru li nekeraj wik’in, chirix naq ak xikenaqin rik’in li Yuwa’b’ej?

2 Ut ke’aatinak chixjunileb’, ka’ajwi’ oxib’ ink’a’, ut ke’xye: Naqaj naq chirix naq wanjenaq qayu’am jo’ xchihab’ li winq, naq li qak’anjel, li koohaab’oq wi’, taaruuq taawanq xraqik, re naq chi seeb’ tooruuq chi chalk aawik’in sa’ laa awa’b’ejihom.

3 Ut a’an kixye reheb’: Osob’tesinb’ilex xb’aan naq xeraj li na’leb’ a’in wik’in; jo’kan ut, chirix naq kab’laju xkaak’al chihab’ eeyu’am texchalq wik’in sa’ lin awa’b’ejihom; ut wik’in teetaw hilob’aal.

4 Ut chirix naq kiraatinaheb’, kixsutq’isi li rilob’aal re li oxib’, ut kixye reheb’: K’a’ru nekeraj laa’ex naq tinb’aanu eere, naq ak xikenaqin rik’in li Yuwa’b’ej?

5 Ut eb’ a’an ke’raho’ xch’ool sa’ raam, xb’aan naq moko ke’chal ta xch’ool xyeeb’al re li k’a’ru neke’raj.

6 Ut a’an kixye reheb’: K’ehomaq reetal, ninnaw eek’oxlahom, ut laa’ex xeraj li k’a’ru kiraj wik’in laj Jwan, li raaro inb’aan, li kiwan wochb’een sa’ ink’anjel, rub’elaj naq kintaqsiik xb’aaneb’ laj Judio.

7 Jo’kan ut, q’axal wi’chik osob’tesinb’ilex, xb’aan naq maajo’q’e teeyal li kamk; texwanq b’an chi yo’yo re rilb’al chixjunil lix b’aanuhom li Yuwa’b’ej reheb’ li ralal xk’ajoleb’ li winq, toj reetal ajwi’ naq taatz’aqloq ru chixjunil li k’a’aq re ru jo’ chanru li rajom li Yuwa’b’ej, naq tink’ulunq sa’ inloq’al rik’in lix wankilal li choxa.

8 Ut maajo’q’e teenumsi xrahil li kamk; a’b’an naq tink’ulunq sa’ inloq’al texjalaaq sa’ jun mutz’uk-u, taa’isiiq chaq li kamk sa’ eeb’een re naq ink’a’ chik texkamq; toja’ ut naq tex’osob’tesiiq sa’ li rawa’b’ejihom lin Yuwa’.

9 Ut jo’kan wi’chik, moko taawanq ta eerahil naq wankex sa’ li tz’ejwalej, chi moko xrahil eech’ool, ka’ajwi’ sa’ xk’ab’a’ lix maak li ruchich’och’; ut chixjunil a’in tinb’aanu xb’aan li k’a’ru keraj wik’in, xb’aan naq keraj naq teek’am chaq li raameb’ li winq wik’in, naq toj xaqxo li ruchich’och’.

10 Ut xb’aan a’in taawanq xtz’aqalil xsahil eech’ool; ut texk’ojlaaq sa’ li rawa’b’ejihom lin Yuwa’; relik chi yaal, tz’aqalaq xsahil eech’ool, jo’ chanru ajwi’ naq li Yuwa’b’ej xk’e xtz’aqalil xsahil inch’ool laa’in; ut texwanq jo’ chanru ajwi’ laa’in, ut laa’in wankin jo’ chanru ajwi’ li Yuwa’b’ej, ut li Yuwa’b’ej ut laa’in junajo;

11 Ut li Santil Musiq’ej naxch’olob’ xyaalal li Yuwa’b’ej ut laa’in; ut li Yuwa’b’ej naxk’e li Santil Musiq’ej reheb’ li ralal xk’ajoleb’ li winq, sa’ ink’ab’a’ laa’in.

12 Ut kik’ulman naq chirix naq li Jesus kixye li aatin a’in, kixch’e’ li junjunq reheb’ rik’in ru’uj ruq’, ka’ajwi’ li oxib’ li toj te’kanaaq ink’a’, toja’ ut naq ki’el chaq.

13 Ut k’ehomaq reetal, kiteeliik li choxa, ut eb’ a’an ke’xoke’ sa’ choxa, ut ke’ril ut ke’rab’i k’a’aq re ru li ink’a’ naru chi yeemank.

14 Ut kiyehe’ reheb’ naq ink’a’ te’xye; chi moko kik’eeman wankilal reheb’ re te’xye li k’a’aq re ru ke’ril ut ke’rab’i;

15 Ut ma wankeb’ ta sa’ li tz’ejwalej malaj elenaqeb’ ta sa’ li tz’ejwalej, ink’a’ ke’ru chixyeeb’al; xb’aan naq sa’ xch’ooleb’ a’an chanchan naq jaltesinb’ileb’ ru, jo’kan naq ke’jale’ chaq sa’ li xaqalil a’in re li tz’ejwalej toj sa’ jun wanjik maak’a’ wi’ li kamk, re naq ke’ru chirilb’al li k’a’aq re ru re li Dios.

16 A’ut kik’ulman naq ke’k’anjelak wi’chik chiru xb’een li ch’och’; a’b’anan ink’a’ ke’xk’ut li k’a’aq re ru ke’rab’i ut ke’ril chaq, xb’aan li taqlahom li kik’eeman chaq reheb’ sa’ choxa.

17 Anajwan ut, ma wan ta li kamk sa’ xb’eeneb’ malaj ink’a’, chirix xkutankil lix jaltesinkileb’ ru, moko ninnaw ta;

18 A’in b’an li ninnaw, jo’ chanru li tz’iib’anb’il esil li k’eeb’il chaq—xkoheb’ chiru xb’een li ch’och’, ut ke’k’anjelak chiru chixjunil li tenamit, ut ke’xjunaji rik’in li iglees jo’ k’ihaleb’ li ke’paab’ank re lix jultikahomeb’; ut ke’xkub’siheb’ xha’, ut jo’ k’ihaleb’ li ke’kub’e xha’ ke’xk’ul li Santil Musiq’ej.

19 Ut ke’tz’ape’ sa’ tz’alam xb’aaneb’ li moko neke’wan ta sa’ li iglees. Ut eb’ li tz’alam ink’a’ ke’ru chixtz’apb’aleb’, xb’aan naq ke’jache’ sa’ xyi.

20 Ut ke’kute’ sa’ rub’el ch’och’; a’b’an ke’xsak’ li ch’och’ rik’in li raatin li Dios, jo’kan naq rik’in lix wankil a’an ke’kole’ chaq sa’ xchamal li ch’och’; ut chi jo’kan ink’a’ ke’ru chixb’ekb’al li jul li taatz’aqloq re xmuqb’aleb’.

21 Ut oxib’ sut ke’kute’ sa’ jun k’atleb’aal ut maajun ra ke’xk’ul.

22 Ut wiib’ sut ke’kute’ sa’ rochoch li k’iche’ xul; ut k’ehomaq reetal, ke’batz’un rik’ineb’ li xul jo’ jun ch’ina al rik’in jun karneer toj natu’uk, ut maajun ra ke’xk’ul.

23 Ut kik’ulman naq chi jo’kan xkoheb’ sa’ xyanqeb’ chixjunil lix tenamit laj Nefi, ut ke’xjultika lix evangelio li Kristo chiru chixjunileb’ li wankeb’ sa’ xb’een li ch’och’; ut eb’ a’an ke’jale’ xch’ool choq’ re li Qaawa’, ut ke’junajiik rik’in lix iglees li Kristo, ut chi jo’kan ke’osob’tesiik li ani wankeb’ sa’ li tasal tenamit a’an, jo’ chanru li raatin li Jesus.

24 Anajwan ut laa’in, aj Mormon, nink’e xraqik aatinak chirix li k’a’aq re ru a’in chiru jun k’amok.

25 K’ehomaq reetal, ok raj we chixtz’iib’ankil xk’ab’a’eb’ li maajo’q’e te’xyal li kamk, a’b’an li Qaawa’ kixye naq ink’a’; jo’kan naq moko nintz’iib’a ta, xb’aan naq muqmu chiru li ruchich’och’.

26 A’b’anan k’ehomaq reetal, wilomeb’ ru, ut eb’ a’an ke’k’anjelak chiwu.

27 Ut k’ehomaq reetal, te’wanq sa’ xyanqeb’ laj Gentil, ut eb’ laj Gentil moko te’xnaweb’ ta ru.

28 Te’wanq ajwi’ sa’ xyanqeb’ laj Judio, ut eb’ laj Judio moko te’xnaweb’ ta ru.

29 Ut naq li Qaawa’ tixk’oxla rik’in xchaab’ilal xna’leb’ naq us, taak’ulmanq naq te’k’anjelaq chiru chixjunileb’ lix teepal laj Israel li jek’inb’ileb’, ut chiru chixjunileb’ li tenamit, junkab’al, aatinob’aal ut teepal, ut sa’eb’ chaq a’an te’xk’am k’iila aamej choq’ re li Jesus, re naq taaruuq taatz’aqloq ru li rajomeb’ a’an, ut jo’kan ajwi’ xb’aan lix wankil li Dios re xq’unb’esinkil ch’oolej li wan rik’ineb’.

30 Ut wankeb’ jo’eb’ lix anjel li Dios, ut wi te’tijoq chiru li Yuwa’b’ej sa’ lix k’ab’a’ li Jesus neke’ru chixk’utb’al rib’ chiru yalaq ani chi winq neke’xk’oxla wi’ naq us.

31 Jo’kan ut, xnimal ru ut sachb’a-ch’oolejil k’anjel taak’anjelamanq sa’ xb’aaneb’, rub’elaj li nimla ut chalel kutan naq chixjunileb’ li tenamit tento te’xaqliiq chi yaal chiru lix raqleb’aal aatin li Kristo;

32 Relik chi yaal, sa’ xyanqeb’ ajwi’ laj Gentil taawanq jun xnimal ru ut sachb’a-ch’oolejil k’anjel li taak’anjelamanq sa’ xb’aaneb’, rub’elaj li kutan a’an re raqb’a-aatin.

33 Ut wi ta wan eerik’in chixjunileb’ li loq’laj hu li wan wi’ resil chixjunil lix sachb’a-ch’oolejil k’anjel li Kristo, teenaw raj, jo’ chanru li raatin li Kristo, naq li k’a’aq re ru a’in tento taachalq chi yaal.

34 Ut rahilal chichalq sa’ xb’een li ani ink’a’ taa’ab’inq chiru li raatin li Jesus, jo’ ajwi’ eb’ li kixsik’eb’ ru ut kixtaqla sa’ xyanqeb’; xb’aan naq yalaq ani ink’a’ nak’uluk re li raatin li Jesus ut li raatineb’ li ani kixtaqla, moko naxk’ul ta a’an; ut chi jo’kan a’an ink’a’ tixk’uleb’ sa’ roso’jik li kutan.

35 Ut us raj wi’chik choq’ reheb’ wi ta ink’a’ raj xe’yo’la. Xb’aan naq ma nekek’oxla tab’i’ naq naru nekesach lix raqb’a-aatin jun Dios rahob’tesinb’il, li yeq’inb’il rub’el roqeb’ li winq, re naq rik’in a’an taachalq li kolb’a-ib’?

36 Ut anajwan k’ehomaq reetal, jo’ kinye chirixeb’ li kixsik’eb’ ru li Qaawa’, relik chi yaal, oxib’ ajwi’ li ke’xoke’ toj sa’ choxa, naq ink’a’ kinnaw ma ch’ajb’il chirixeb’ li kamk wan sa’ xb’eeneb’, re naq ink’a’ te’kamq—

37 A’b’an k’ehomaq reetal, chirix naq kintz’iib’an, kinpatz’ re li Qaawa’, ut a’an xk’utb’esi chiwu naq aajel ru naq kiwan jun jalaak k’anjelanb’il sa’ xtib’eleb’; wi ut ink’a’, tento raj naq te’xyal li kamk;

38 Jo’kan ut, re naq ink’a’ te’xyal li kamk kik’anjelaman jun jalaak sa’ xtib’eleb’, re naq ink’a’ te’xk’ul li rahilal chi moko li rahil ch’oolejil, ka’ajwi’ sa’ xk’ab’a’ lix maak li ruchich’och’.

39 Anajwan li jalaak a’in moko juntaq’eet ta rik’in li taak’ulmanq sa’ roso’jik li kutan, a’b’an kiwan jun jalaak k’anjelanb’il sa’ xb’eeneb’, jo’kan naq laj Satanas ink’a’ kiru chi wank xwankil sa’ xb’eeneb’, re naq ink’a’ kiru chiraalenkileb’; ut ke’santob’resiik sa’ li tz’ejwalej, re naq santeb’, ut re naq eb’ lix wankilal li ruchich’och’ ink’a’ te’ruuq chixchapb’aleb’.

40 Ut sa’ li wanjik a’in tento te’kanaaq toj sa’ xkutankil li raqb’a-aatin re li Kristo; ut sa’ li kutan a’an wan jun jalaak nim wi’chik te’xk’ul, ut te’k’ule’q sa’ li rawa’b’ejihom li Yuwa’b’ej re naq ink’a’ chik te’elq chaq, re b’an te’wanq chi junelik rik’in li Dios sa’ choxa.