1 Ut kik’ulman naq chi jo’kan kinume’ ajwi’ li ro’laju ro’k’aal chihab’, ut eb’ li tenamit ke’ok chi sachk sa’ xch’ooleb’ li eetalil ut li sachb’a-ch’oolej a’an li ke’rab’i chaq, ut timil timil chik ink’a’ neke’sach xch’ool rik’in junaq eetalil malaj sachb’a-ch’oolej li nachal chaq sa’ choxa, jo’kan naq ke’ok chi kawuk sa’ raameb’, ut chi mutz’o’k sa’ xk’a’uxleb’, ut tiik ink’a’ chik neke’xpaab’ chixjunil li k’a’ru ke’rab’i ut ke’ril chaq—

2 Ut ke’xk’oxla junaq jo’maajo’il na’leb’ sa’ xch’ooleb’, naq k’anjelanb’il xb’aaneb’ li winq ut xb’aan xwankil laj tza, re xjalb’ehinkil ut xb’alaq’inkil xch’ooleb’ li tenamit; ut chi jo’kan laj Satanas kireechani wi’chik xch’ooleb’ li tenamit, jo’kan naq kixmutz’ob’resiheb’ li ru ut kixjalb’ehiheb’ re xpaab’ankil naq li tzol’leb’ re li Kristo a’an jun na’leb’ maak’a’ xyaalal ut jo’maajo’.

3 Ut kik’ulman naq eb’ li tenamit ke’ok chi kawuk sa’ li maa’usilal ut li tz’eqb’eetalil, ut ink’a’ neke’xpaab’ naq taawanq chik li eetalil chi moko li sachb’a-ch’oolej k’eeb’il, ut laj Satanas kixb’eeni rib’ chixjalb’ehinkil xch’ooleb’ li tenamit, yoo chiraalenkileb’ ut chixk’eeb’al chixb’aanuheb’ nimla maa’usilal sa’ li ch’och’.

4 Ut chi jo’kan kinume’ li xwaqlaju ro’k’aal chihab’; ut jo’kan ajwi’ li xwuqlaju ro’k’aal chihab’, ut jo’kan ajwi’ li xwaqxaqlaju ro’k’aal chihab’, ut jo’kan ajwi’ li xb’elelaju ro’k’aal chihab’.

5 Ut jo’kan ajwi’ ak numenaq chaq jun cient chihab’ chalen chaq xkutankil laj Mosiah, li kiwan choq’ rey sa’ xb’een lix tenamiteb’ laj Nefita.

6 Ut ak numenaq chaq waqib’ cient rik’in b’eleeb’ chihab’ relik chaq laj Lehi Jerusalen.

7 Ut ak numenaq b’eleeb’ chihab’ xkutankil naq kik’eeman li eetalil, li yeeb’il xb’aaneb’ li profeet, naq taachalq li Kristo sa’ ruchich’och’.

8 Anajwan eb’ laj Nefita ke’ok chirajlankil xkutaneb’ chalen chaq sa’ li kutan naq kik’eeman li eetalil, malaj chalen chaq sa’ xchalik li Kristo; jo’kan ut, ak numenaq chaq b’eleeb’ chihab’.

9 Ut laj Nefi, a’an xyuwa’ laj Nefi, li kiwan xwankil sa’ xb’eeneb’ li tz’iib’anb’il esil, ink’a’ kisutq’i sa’ li ch’och’ Tzarahemla, ut maab’ar kiru chi tawmank sa’ chixjunil li ch’och’.

10 Ut kik’ulman naq eb’ li tenamit toj ke’kana sa’ li maa’usilal, us ta kiwan li jultikanb’il na’leb’ ut profeetil ch’olob’ank li kitaqlaak sa’ xyanqeb’; ut chi jo’kan kinume’ ajwi’ li xlaje chihab’; ut li xjunlaju chihab’ kinume’ ajwi’ sa’ maa’usilal.

11 Ut kik’ulman naq sa’ li roxlaju chihab’ ke’ok chi wank li pleet ut li wech’ok-ib’ chiru chixjunil li ch’och’; xb’aan naq eb’ laj elq’ re laj Gadianton k’a’jo’ naq ke’naab’alo’ chaq, ut k’a’jo’ xk’ihaleb’ li ani ke’xkamsi, ut k’a’jo’ xk’ihaleb’ li tenamit ke’xkanab’ chi sachso, ut k’a’jo’ li kamk ut li kamsink-ib’ ke’xjek’i chiru li ch’och’, jo’kan naq ki’aje’ ru naq chixjunileb’ li tenamit, xkomoneb’ laj Nefita jo’ ajwi’ laj Lamanita, te’xchap li k’anjeleb’aal re pleet chiruheb’.

12 Jo’kan ut, chixjunileb’ laj Lamanita li ke’jale’ chaq xch’ool choq’ re li Qaawa’, ke’xjunaji rib’ rik’ineb’ li ras riitz’in aj Nefita, ut ke’mine’ ru, re xkolb’al rix lix yu’ameb’ ut rixqilaleb’ ut xkok’aleb’, chixchapb’al li k’anjeleb’aal re pleet chiruheb’ laj elq’ a’an re laj Gadianton, relik chi yaal, re ajwi’ xk’uulankil li k’a’ru xk’ulub’eb’, ut li k’a’ru kanab’anb’ileb’ chixb’aanunkil chirix lix igleeseb’ ut li loq’onink neke’xb’aanu, ut li ach’ab’aak ut lix yaalalil li wankeb’ wi’.

13 Ut kik’ulman naq chi maji’aq naraqe’ li roxlaju chihab’ a’in, ak chalk re li sache’k chi junajwa sa’ xb’eeneb’ laj Nefita xb’aan li pleet a’in, li kiniman chaq xrahil chi numtajenaq.

14 Ut kik’ulman naq eb’ laj Lamanita a’an li ke’xjunaji chaq rib’ rik’ineb’ laj Nefita ke’k’ehe’ sa’ ajl sa’ xyanqeb’ laj Nefita;

15 Ut lix majewankileb’ ki’isiik chaq sa’ xb’eeneb’, ut kisaqo’ xtib’eleb’ chanchaneb’ laj Nefita;

16 Ut eb’ lix saaj winq ut lix rab’ineb’ ke’ok chi numtaak xchaq’aleb’ ru, ut ke’k’ehe’ sa’ ajl sa’ xyanqeb’ laj Nefita, ut aj Nefita ke’xk’ab’a’in. Ut chi jo’kan kiraqe’ li roxlaju chihab’.

17 Ut kik’ulman sa’ xtiklajik li xkaalaju chihab’, li pleet ke’wan wi’ lix tenamit laj Nefi rik’ineb’ laj elq’ toj kiwan ut kiniman xrahil chi numtajenaq; a’b’anan eb’ lix tenamit laj Nefi ke’usa ka’ch’in sa’ xb’eeneb’ laj elq’, jo’kan naq ke’ralinasiheb’ chaq sa’ xch’och’eb’ toj sa’eb’ li tzuul ut sa’eb’ lix muqmuukil na’ajeb’.

18 Ut chi jo’kan kiraqe’ li xkaalaju chihab’. Ut sa’ li ro’laju chihab’ ke’chal chixpleetinkil lix tenamit laj Nefi, ut sa’ xk’ab’a’ lix maa’usilal lix tenamit laj Nefi, ut xk’ihal li wech’ok-ib’ ut jachok-ib’ reheb’, eb’ laj elq’ re laj Gadianton ke’ru chixtawb’al k’iila usaak sa’ xb’eeneb’.

19 Ut chi jo’kan kiraqe’ li ro’laju chihab’, ut chi jo’kan k’iila ch’a’ajkilal ke’wan wi’ li tenamit, ut li yok’leb’ ch’iich’ re li sache’k kiwan chi taqsinb’il sa’ xb’eeneb’, jo’kan naq okeb’ raj re chi t’anliik xb’aan, ut a’in xb’aan xmaa’usilaleb’.