1 Ut anajwan kik’ulman naq sa’ li xwaqlaju chihab’ xk’ulunik chaq li Kristo, laj Lajoneus, laj jolominel re li ch’och’, kixk’ul jun li hu taqlanb’il xb’aan laj b’eresinel ut laj jolominel re li ch’uut a’in chi aj elq’, ut a’an a’in li aatin tz’iib’anb’il, kixye:

2 At Lajoneus, q’axal taqenaq aawankil ut xb’eenilat aj jolominel re li ch’och’, k’e reetal, nintz’iib’a li hu a’in aawik’in, ut ninnima aawu chi numtajenaq xb’aan aaxaqxookilal, ut xxaqxookilal aatenamit, sa’ xk’uulankil li k’a’ru nekek’oxla naq eek’ulub’ ut li ach’ab’aak wankex wi’; relik chi yaal, nekexaqab’ eerib’ chi us, chanchan naq tenq’anb’ilex xb’aan ruq’ junaq dios, sa’ xkolb’al rix li ach’ab’aak wankex wi’, ut li k’a’ru eere, ut lee ch’och’, malaj li k’a’ru nekeye re chi jo’kan.

3 Ut a’an jun toq’ob’aal li ru naq nawil, at Lajoneus q’axal taqenaq aawankil, naq k’a’jo’ xmaak’a’il ut xjo’maajo’il eena’leb’ naq nekek’oxla naq texruuq chi xaqliik chiru xk’ihaleb’ li winq kaweb’ xch’ool li taqlanb’ileb’ inb’aan, li wankeb’ anajwan sa’ li kutan a’in chi xaqxo rik’in xk’anjeleb’aal re pleet, ut neke’royb’eni chi anchaleb’ xk’a’uxl rab’inkil li aatin—Kub’enqex sa’ xb’eeneb’ laj Nefita ut sachomaqeb’.

4 Ut laa’in, rik’in naq ninnaw naq ink’a’ naru xkub’sinkileb’ xch’ool, ut ak xinyaleb’ rix sa’ xch’och’il li pleet, ut ninnaw chirix li xik’ nekexrileb’ wi’ chi junajwa xb’aan li k’iila ra keb’aanu reheb’, jo’kan naq wi te’kub’eeq sa’ eeb’een texrula’aniheb’ raj rik’in li sache’k chi junajwa.

5 Jo’kan naq xintz’iib’a li hu a’in, ut nink’e xtz’apb’al rik’in tz’aqal wuq’, xb’aan naq nink’oxla eechaab’ilal, xb’aan eexaqxookilal chirix li k’a’ru nekepaab’ naq chaab’il, ut xb’aan xkawilal eemusiq’ sa’ xch’och’il li pleet.

6 Jo’kan naq nintz’iib’ak aawe, ut nawaj naq teeq’axtesi re lin tenamit a’in, eb’ lee tenamit, ut lee ch’och’, ut li k’a’ru eere, re naq ink’a’ texrula’aniheb’ rik’in li yok’leb’ ch’iich’ ut taachalq li sache’k sa’ eeb’een.

7 Malaj sa’ jalan chik aatin, q’axtesihomaq eerib’ chiqu, ut junajihomaq eerib’ qik’in ut nawomaq li qamuqmuukil k’anjel, ut okanqex choq’ qakomon re naq juntaq’eetaqex qik’in—moko qamoos ta, qakomon b’an ut qech aj eechanihom re chixjunil li k’a’ru qe.

8 Ut k’e reetal, ninxaqab’ li waatin chawu, wi teeb’aanu a’in, rik’in jun xaqab’anb’il aatin, ink’a’ texsache’q; a’b’an wi ink’a’ teeb’aanu a’in, ninye aawe rik’in xaqab’anb’il aatin naq sa’ li po jun chik tintaqla naq lin teep aj pleet te’chalq sa’ eeb’een, ut ink’a’ te’xsutq’isi li ruq’ ut ink’a’ te’xkol li yu’amej, texxkamsiheb’ b’an, ut te’xkanab’ chi t’ane’k li yok’leb’ ch’iich’ sa’ eeb’een toj reetal ajwi’ naq texkanaaq chi oso’jenaq.

9 Ut k’e reetal, laa’in aj Giddianhi, ut laa’in aj jolominel re li muqmuukil molam a’in re laj Gadianton, ut a’ molam ut lix k’anjel ninnaw naq chaab’il, ut najter chaq xyiib’ankil, ut numsinb’il chaq qe laa’o.

10 Ut nintz’iib’a li hu aawik’in laa’at, Lajoneus, ut ninyo’oni naq teeq’axtesi lee ch’och’ ut li k’a’ru eere, chi maak’a’aq hoyok kik’, re naq eb’ lin tenamit a’in te’xk’ul wi’chik li k’a’ru xk’ulub’eb’ ut li jolomink tenamit, a’aneb’ li ke’risi chaq rib’ eerik’in xb’aan eemaa’usilal sa’ xramb’al chiruheb’ li k’a’ru xk’ulub’eb’ raj chirix xjolominkil li tenamit, ut wi ink’a’ nekeb’aanu a’in, laa’in tin’eeqaju li ra ke’xk’ul. Laa’in aj Giddianhi.

11 Ut anajwan, naq kixk’ul laj Lajoneus li hu a’in kik’ulman naq kisach xch’ool chi numtajenaq, xb’aan xkawil xch’ool laj Giddianhi naq kirelaji reechaninkil lix ch’och’eb’ laj Nefita, ut naq kixyeechi’i rahilal re li tenamit ut reeqajunkil lix rahileb’ li ani maajun ra ke’xk’ul, ka’aj b’an wi’ naq ra ke’xb’aanu rib’ naq ke’risi chaq rib’ ut xkoheb’ rik’ineb’ li ink’a’ us ut tz’eqb’eetal aj elq’ a’an.

12 Anajwan k’ehomaq reetal, laj Lajoneus a’in, aj jolominel, a’an jun tiikil winq, ut ink’a’ naru naxeb’esiik xb’aan li k’a’ru elajinb’il ut li rahilal yeechi’inb’il xb’aan jun aj elq’; jo’kan naq ink’a’ ki’ab’in chiru lix hu laj Giddianhi, aj jolominel reheb’ laj elq’; kixtaqla b’an naq eb’ lix tenamit te’elajinq chiru li Qaawa’ re te’k’ehe’q xmetz’ew royb’eninkil li kutan naq te’kub’eeq chaq laj elq’ chixpleetinkileb’.

13 Relik chi yaal, kixtaqla xjek’inkil jun aatin sa’ xyanq chixjunileb’ li tenamit, naq te’xch’utub’ li rixqilaleb’, ut lix kok’aleb’, lix ketomq ut lix teepeb’ chi xul, ut chixjunil li k’a’ru reheb’, ka’ajwi’ lix ch’och’eb’ ink’a’, sa’ junaj chi na’ajej.

14 Ut kixtaqla xkab’lankileb’ li kawresinb’il na’ajej chixsutameb’, ut naq q’axal nimaq xkawilaleb’. Ut kixtaqla naq eb’ li teep aj pleet, reheb’ laj Nefita ut reheb’ ajwi’ laj Lamanita, malaj chixjunileb’ li k’eeb’ileb’ sa’ ajl sa’ xyanqeb’ laj Nefita, te’k’ehe’q choq’ aj k’aak’alenel chixsutam re xk’aak’alenkileb’, ut re xkolb’aleb’ rix chiruheb’ laj elq’ chi kutan ut chi q’eq.

15 Relik chi yaal, kixye reheb’: Jo’ naq yo’yo li Qaawa’, wi ink’a’ nekejal eek’a’uxl chirix chixjunil lee maa’usilal, ut nekex’elajin chiru li Qaawa’, maamin texkole’q chaq sa’ ruq’eb’ laj elq’ a’an re laj Gadianton.

16 Ut k’a’jo’ xnimal ru ut xsachb’a-ch’oolejil li raatin ut lix profeetil yehom laj Lajoneus, jo’kan naq xb’aan a’an kichal li xiw sa’ xb’eeneb’ chixjunil li tenamit, ut ke’xyal xq’e chi anchaleb’ xmetz’ew chixb’aanunkil jo’ chanru li raatin laj Lajoneus.

17 Ut kik’ulman naq laj Lajoneus kixxaqab’eb’ li xb’eenil aj taqlanel sa’ xb’eeneb’ chixjunil li teep aj pleet reheb’ laj Nefita, re xtaqlankileb’ sa’ li kutan naq te’kub’eeq chaq laj elq’ sa’ li yamyookil ch’och’ re xpleetinkileb’.

18 Anajwan li xb’eenil sa’ xyanqeb’ li xb’eenileb’ aj taqlanel, ut li nimla aj taqlahom re chixjunil li teep aj pleet reheb’ laj Nefita kixaqab’aman, ut a’an aj Gidgiddoni xk’ab’a’.

19 Anajwan a’in jun na’leb’ k’aynaqeb’ wi’ chixjunileb’ laj Nefita, naq te’xxaqab’ choq’ xb’eenil aj taqlanel (ka’ajwi’ sa’ xkutankil lix maa’usilaleb’ ink’a’) junaq li ani wan rik’in li musiq’ej re k’utb’esink ut re ajwi’ profeetil aatin, jo’kan naq laj Gidgiddoni a’in, a’an xnimal ru profeet sa’ xyanqeb’, ut jo’kan ajwi’ li xb’eenil aj raqol aatin.

20 Anajwan eb’ li tenamit ke’xye re laj Gidgiddoni: Tijon chiru li Qaawa’, ut yo’qeb’ sa’eb’ li tzuul ut sa’ li yamyookil ch’och’, re toot’ane’q sa’ xb’eeneb’ laj elq’ ut taqasacheb’ sa’ xch’och’eb’ a’an.

21 A’b’an laj Gidgiddoni kixye reheb’: Mixkanab’ li Qaawa’ chi jo’kan, xb’aan naq wi toxootaqe’q chixpleetinkileb’ li Qaawa’ tooxq’axtesi sa’ ruq’eb’; jo’kan naq taqakawresi qib’ sa’ xyi li qach’och’, ut taqach’utub’ chixjunil li qateep aj pleet, ut ink’a’ tooxik chixpleetinkileb’, taqoyb’eni b’an naq te’chalq chiqapleetinkil; jo’kan ut, jo’ naq yo’yo li Qaawa’, wi naqab’aanu a’in, a’an tixq’axtesiheb’ sa’ quq’.

22 Ut kik’ulman sa’ li xwuqlaju chihab’, naq yoo chi nach’ok xraqik li chihab’, ak xikenaq lix jek’inb’il aatin laj Lajoneus chiru chixjunil lix b’een li ch’och’, ut ke’xk’am lix kawaay ut lix kareet, ut lix wakax, ut lix ketomq ut lix teepeb’ chi xul, ut li riyaj nak’uxman, ut chixjunil li k’a’ru reheb’, ut koxe’b’eeq chi mil ut chi lajetq mil, toj reetal naq xikenaqeb’ chixjunil sa’ li na’ajej li xaqab’anb’il b’ar te’xch’utub’ wi’ rib’, choq’ re xkolb’aleb’ rib’ chiruheb’ li xik’ neke’ilok reheb’.

23 Ut li ch’och’ li kixaqab’aman a’an li ch’och’ Tzarahemla, ut li ch’och’ li wan sa’ xyi li ch’och’ Tzarahemla ut li ch’och’ Naab’alil, relik chi yaal, toj sa’ li nub’aal li wan sa’ xyi li ch’och’ Naab’alil ut li ch’och’ Sachenaqil.

24 Ut ke’wan k’iila mil laj Nefita yeeb’ileb’ re, li ke’xch’utub’ rib’ sa’ li ch’och’ a’in. Anajwan laj Lajoneus kixtaqla naq te’xch’utub’ rib’ sa’ li ch’och’ sa’ xjayal lix tz’e li saq’e, xb’aan li nimla majewank li kiwan sa’ xb’een li ch’och’ sa’ xjayal lix nim li saq’e.

25 Ut ke’xkawresi rib’ re xk’ulb’aleb’ li xik’ neke’ilok reheb’, ut ke’wan sa’ junaj chi ch’och’, ut sa’ junaj chi ch’utam, ut ke’xxuwa ru li aatin yeeb’il chaq xb’aan laj Lajoneus, jo’kan naq ke’xjal xk’a’uxl chirix chixjunil lix maakeb’; ut ke’xtaqsi lix tijeb’ chiru li Qaawa’ lix Dios, re naq a’an tixkoleb’ sa’ li kutan naq te’kub’eeq chaq li xik’ neke’ilok reheb’ chixpleetinkileb’.

26 Ut raheb’ xch’ool chi numtajenaq xb’aaneb’ li xik’ neke’ilok reheb’. Ut laj Gidgiddoni kixtaqla naq te’xyiib’ li k’anjeleb’aal re pleet, li jar paay wan, ut naq kawaqeb’ rib’ rik’in kolb’a-ib’ aq’ej, ut rik’in ramleb’, ut rik’in ramok-ib’, jo’ chanru k’eeb’ileb’ xna’leb’ xb’aan a’an.