1 Ao e a koro bukina bwa ni kabanean te ririki ae te katebwi ma waniua ao aia taanga ni buaka taan kamwarua a tia n tauraoi ibukin te buaka, ao a waaki n ruo ma ni waekoa n otinako man taian tabuki, ao man te maunga, ao aia tabo ni katantan, ma aia tabo ni karaba, ao a waaki n tauii taian aba, ake a mena n te aba i maiaki ao ake a mena n te aba i meang, ao a waaki n tauii aaba ni kabane ake a tia ni kitanaki irouia Nibwaite, ao kaawa ake a tiku ni kamaroa.

2 Ma nooria, bon ake maan aika a kaakang ao ake a kona ni kaeaki n aaba ake a bon tia ni kitanaki irouia Nibwaite, ao bon akea maan aika a kona ni kaeaki ibukiia taan kamwarua ma ti n te rereua.

3 Ao taan kamwarua a bon aki kona ni maiu ma ti ngkana a mena i nanon te rereua, ibukin tangiran te amwarake; bwa a bon kitani abaia Nibwaite n akea bwaia, ao a tia n ikotii aia nanai ma aia ikota ni man ao aia bwai ni kabane, ao a bon ikotaki n ti teuana.

4 Ngaia are, bon akea aia anga taan kamwarua ni karaoa mwakuri n iowawa ni karekei kanaia, ma a na ti otinako ni buaka ni kaaitaraia Nibwaite; ao Nibwaite a ikotaki n ti teuana, ao e bon korakora mwaitia, ao a tia ni kaawakin bon ibukiia bwaai ake ana kainnanoi, ma aia aoti ao aia kao, ao aia nanai n aekaia nako, bwa aonga n tiku ni maiu i nanon te maan ae itiua te ririki, are te tai are a kantaningaia bwa a na kamaunaia taan kamwarua mai aon te aba; ao ikai are e a toki iai te katebwi ma waniua n ririki.

5 Ao e a koro bukina bwa n te katebwi ma ruaiwa n ririki ao Kiteaenaai e kunea bwa e bon riai bwa a na waerake ni buaka ni kaaitaraia Nibwaite, bwa bon akea te anga ae a na kona ni maiu iai ma ti ngkana a karaoi mwakuri n iowawa n anaibwai man iraa ao n tiritiri.

6 Ao a bon rawa ni kamaenakoia iaon te aba n te aro are aongkoa a na uniki taian wiita, bwa mwiina ao a roko naba Nibwaite i aoia n tiringia; ngaia are Kiteaenaai e anga te tua nakoia ana taanga ni buaka n te ririki anne bwa a na nako ni buaka ni kaaitaraia Nibwaite.

7 Ao e a koro bukina bwa a bon roko ni buaka; ao bon i nanon te kaonoua n namwakaina; ao nooria, bon te bong ae korakora ma ni kakamaku are a roko iai ni buaka; ao a bon kabaeaki nukaia n aekaia kamwarua; ao bon iai kunin te tiibu te teei are a karabania iai, ao a karanaki n te raraa, ao a kamaraki atuuia, ao bon iai otangan atuuia i aoia; ao e korakora ma ni kakamaku tarakia ana taanga ni buaka Kiteaenaai, ibukin aia kunnikai ni buaka, ao ibukina bwa a karanaki n te raraa.

8 Ao e a koro bukina bwa aia taanga ni buaka Nibwaite, ngke a noora riarian ana taanga ni buaka Kiteaenaai, a bane ni bwaka nako aontano, man tabeka rake tangiia nakon te Uea ae Atuaia, bwa e na kamaiuia mai nanon baia aia kairiribai.

9 Ao e a koro bukina bwa ngke a noora aio ana taanga ni buaka Kiteaenaai a takarua n te bwanaa ae korakora, ibukin kimwareireia, bwa a kataua inanoia bwa a bwaka Nibwaite ibukin maakuia ibukin kakamaakuia aia taanga ni buaka.

10 Ma a bon nanokawaki n aei, bwa Nibwaite a bon aki maakuia; ma a bon maaka Atuaia ao a bubuti nakoina ibukin kawakinakia; ngaia are, ngke ana taanga ni buaka Kiteaenaai a biri nakoia a bon tauraoi ni kaaitaraia; eng, ni korakoran te Uea ao a butimwaia.

11 Ao e waaki te buaka n te kaonoua n namwakaina; ao e bon korakora man ni kakamaku te buaka aio, eng, e korakora ma ni kakamaku te tiriaomata n aki akaaka iai, n te aro are bon akea riki te tiriaomata ae ataaki n ai arona i buakoia ana botanaomata Riaai man te tai are e kitana Ierutarem iai.

12 Ao e ngae ngke iai ana taeka ni kakamaku ma ana berita Kiteaenaai are e a tia ni karaoi, nooria, a bon konaki irouia Nibwaite n te aro are a kerikaaki mai mataia.

13 Ao e a koro bukina bwa Kiteaenaai e anga te tua bwa ana taanga ni buaka a na kakioia ni karokoa tian te rereua, bwa a na aki riai ni kamaiuia ake a reke i nanon baia iaon kawaia; ao ngaia are a bon kakioia nakon tian te rereua man tiringia, ni karokoa ae a kakoroa bukin ana tua Kikitonaai.

14 Ao e a koro bukina bwa Kiteaenaai, are e a tia n tei ma ni buaka ma te ninikoria, e bon kakioaki ngke e birinako; ao kioina ngkai e a kua ibukin korakoran ana buaka e a bon reke man tiringaki. Ao ikai are e a toki iai maiuin Kiteaenaai are te kamwarua.

15 Ao e a koro bukina bwa aia taanga ni buaka Nibwaite a bon okira nneia ni kawakinaki. Ao e a koro bukina bwa e a bane te katebwi ma ruaiwa n ririki, ao a bon aki manga oki ni buaka taan kamwarua; ao aki roko naba n te kauabwi n ririki.

16 Ao n te kauabwi ma teuana n ririki ao a bon aki roko ni buaka ma a bon roko man itera nako bwa a na otabwaninia ma n kainiia ana botanaomata Nibwaai; bwa a taku inanoia bwa a na kamaenakoia ana botanaomata Nibwaai man abaia, ao a na kainiia man iteraia nako, ao ngkana a kamaenakoia ma ni bwaai nako ake a na kona n reke irouia ma itinaniku, ao e na reke te anga are a na anga ngaia n aron are a kantaningaia.

17 Ao ngkai a tia ni manga rinea aia tia kairiri temanna, ae arana Temnaria; ngaia are bon Temnaria ae tua bwa e na karaoaki kainakiia aio.

18 Ma nooria, aio bon te bwai ae raoiroi nakoia Nibwaite; bwa e boni kaangaanga bwa taani kamwarua a na kona ni kainiia n te tai ae tau maanna are e na iai korakoraia iaoiia Nibwaite, ibukin mwaitin bwaai ake a kainnanoi are a bon tia ni kaikoi.

19 Ao ibukin aki taun bwaai ake a kainnanoi taan kamwarua; bwa nooria, bon akea aia bwai ma ti irikon te man ibukin maiuia, are bon irikon te man are a karekea n te rereua.

20 Ao e a koro bukina bwa maan ake a kona ni kaei bwa kanaia a moanna ni karako i nanon te rereua n te aro are a kuri ni mate taan kamwarua n te baki.

21 Ao Nibwaite aki toki ni mwamwananga n otinako n te ngaina ao te tairiki, ma ni kawara aia taanga ni buaka, ao ma n tiringia nga ma nga ao tebwina te nga ma tebwina te nga.

22 Ao ikai are e reke nanoia ana botanaomata Temnaria bwa ana bubai man aia babaire, ibukin korakoran te tiritiri are e karaoaki nakoia n te bong ao n te ngaina.

23 Ao e a koro bukina bwa Temnaria e bon anga te tua nakoia ana botanaomata bwa a na riai ni bubai ma ni kainakiia, ao a na mwananga nako mwakoron te aba ake a raroa i meang.

24 Ao ngkai, Kikitonaai e bon atai aia babaire, ao e ataa naba mamaaraia ibukin tangiran te amwarake, ao te tiriaomata n aki akaaka ae korakora are e a tia ni karaoaki nakoia, ngaia are e kanakoia ana taanga ni buaka n te tairiki bwa a na tuka kawaia ni kerikaaki, ao e bon katikuia ana taanga ni buaka ni kawaia ni kerikaaki.

25 Ao a bon karaoa aio n te tairiki, ao mwananga nako moaia ni kararoaia teutana mai irouia kamwarua, n te aro are ngke e a ingabong, ngke a mwananga kamwarua, ao a bon kaitibo ma aia taanga ni buaka Nibwaite mai moaia ao mai bukiia.

26 Ao taan kamwarua ake a mena i maiaki a bon kamaenakoaki naba man aia tabo ni kamanoia. Ao bwaai aikai a bane ni karaoaki man ana kaetieti Kikitonaai.

27 Ao a boni mwaiti ngaa ma ngaa ake a anga ngaiia bwa bure nakoia Nibwaite, ao nikiraia a bon tiringaki.

28 Ao aia mataniwi, are Temnaria, e anaaki ao e tauraki iaon te kai, eng, iaon te kai ni karokoa matena. Ao ngke a tia n tauria ni karokoa matena ao a korea te kai ni kabwakaa nako aontano, ao a tang n te bwanaa ae takarua ni kangai:

29 Ke e kawakinia ana aomata te Uea i nanon te raoiroi ma te nano ae itiaki, bwa e na karekeaki te anga ae ni kabane ake a ukoukora kan tiringakia a na kabwakaki nako aontano ibukin mwaakaia ma aia botaki ni karaba aika buakaka, n aiaron te aomata aei ae e a tia ni kabwakaki nako aontano.

30 Ao a bon kimwareirei man takarua riki n teuana te bwanaa, ni kangai: Ke Atuan Aberaam, ao Atuan Itaaka, ao Atuan Iakobwa, e kawakinia te botanaomata aio i nanon te raoiroi, ngkana a wetea aran Atuaia ibukin katanakia.

31 Ao e a koro bukina bwa a bon waaki n anene, ni katiteuanaki, n anene, ao n neboneboa Atuaia ibukin te bwai ae kakannato are e a tia ni karaoia i bukiia, ni kawakinia bwa a na aki reke i nanon baia aia kairiribai.

32 Eng, a takaruaa: Otanna nakon te Atua ae Moan te Rietata. Ao a bane n takaruaea: E na kakabwaiaaki aran te Uea ae te Atua ae Moan te Mwaaka, te Atua ae Moan te Rietata.

33 Ao e onrake nanoia n te kimwareirei, n te aro are a bwaro ranin mataia aika a mwaiti, ibukin korakoran raoiroin Atuaia ngke e kamaiuia ma i nanoni baia aia kairiribai; ao a ataia bwa aio bon ibukin aia rairannano ao aia nanorinano are a tia ni kamaiuaki iai man te tiringaki ae aki totoki.