1 Ut anajwan k’ehomaq reetal, maajun yo’yookil aamej kiwan sa’ xyanq chixjunil lix tenamiteb’ laj Nefita li nawiib’an xch’ool chi yal ta ka’ch’in chirix li raatineb’ chixjunil li santil profeet li ke’aatinak chaq, xb’aan naq neke’xnaw naq tento taa’uxq naq taatz’aqloq ru chixjunil.

2 Ut neke’xnaw naq tento naq ki’uxman naq chalenaq li Kristo, xb’aan li k’iila eetalil li k’eeb’il chaq, jo’ chanru raatineb’ li profeet; ut rik’in li k’a’aq re ru ak kik’ulman, neke’xnaw naq tento taa’uxq naq chixjunil li k’a’aq re ru taak’ulmanq, jo’ chanru li k’a’ru yeeb’il chaq.

3 Jo’kan naq ke’xkanab’ chixjunil lix maakeb’, ut lix tz’eqb’eetalileb’, ut li yumb’eetak ko’b’eetak ke’xb’aanu, ut ke’k’anjelak chiru li Dios chi yalb’ileb’ anchal xq’e chi kutan ut chi q’eq.

4 Ut anajwan kik’ulman naq chirix naq ke’xchap chixjunileb’ laj elq’ choq’ preex, jo’kan naq maajun ki’eelelik li moko kamsinb’il ta, ke’xtz’ap lix preexeb’ sa’ tz’alam, ut ke’xtaqla xjultikankil li raatin li Dios chiruheb’; ut jo’ k’ihaleb’ ke’raj xjalb’al xk’a’uxl chirix lix maakeb’, ut ok sa’ jun sumwank naq ink’a’ chik te’kamsinq, ke’k’ehe’ chi ach’ab’aak.

5 A’b’an jo’ k’ihaleb’ ink’a’ ke’ok sa’ jun li sumwank, ut li toj ke’wan a’ muqmuukil kamsink a’an sa’ xch’ooleb’, relik chi yaal, jo’ k’ihaleb’ li neke’tawe’ chixyeechi’inkil rahilal sa’ xb’eeneb’ li ras riitz’ineb’, ke’jite’ ut ke’k’ehe’ chixtojb’al xmaak jo’ chanru li chaq’rab’.

6 Ut chi jo’kan ke’xk’e xraqik chixjunil li ink’a’ us, ut li muqmuukil, ut li tz’eqb’eetal molam a’an, sa’ li kiwan wi’ chaq xnimal li maa’usilal, ut xk’ihal li kamsink li kib’aanuman chaq.

7 Ut chi jo’kan kinume’ chaq li xkab’ xka’k’aal chihab’, ut jo’kan ajwi’ li rox xka’k’aal, ut li xkaa xka’k’aal, ut li ro’ xka’k’aal; ut chi jo’kan ak kinume’ chaq oob’ xka’k’aal chihab’.

8 Ut wan k’iila k’a’aq re ru li kik’ulman, li nim ru ut sachol ch’oolej raj sa’ rilob’aal junjunq; a’b’anan, moko naru ta xtz’iib’ankil chixjunil sa’ li hu a’in; relik chi yaal, sa’ li hu a’in moko naru ta na’ok yal ta jun miin raqal li k’a’ru kib’aanuman sa’ xyanq xk’ihal li tenamit a’in chiru xnumik oob’ xka’k’aal chihab’.

9 A’b’an k’ehomaq reetal, wankeb’ li tz’iib’anb’il esil wan wi’ chixjunil lix b’aanuhom li tenamit a’in; ut jun esilal li k’osb’il wi’chik xnimal, a’b’an yaal ajwi’, kik’ehe’ xb’aan laj Nefi.

10 Jo’kan naq intz’iib’ahom resil li k’a’aq re ru a’in, jo’ chanru li esil kixtz’iib’a laj Nefi, li tz’iib’anb’il chiru perel ch’iich’, a’aneb’ lix perel ch’iich’ laj Nefi yeeb’il chaq re.

11 Ut k’ehomaq reetal, nintz’iib’a li esil chiruheb’ perel ch’iich’ li kinyiib’ rik’in tz’aqal wuq’.

12 Ut k’ehomaq reetal, laa’in aj Mormon ink’ab’a’, k’ab’a’inb’ilin jo’ chanru li ch’och’ Mormon, li ch’och’ b’ar wi’ laj Alma kixxaqab’ li iglees sa’ xyanq li tenamit; relik chi yaal, li xb’een li iglees li kixaqab’aman sa’ xyanqeb’ chirix naq ke’q’etok aatin.

13 K’ehomaq reetal, laa’in jun xtzolom li Jesukristo, li Ralal li Dios. B’oqb’ilin xb’aan a’an re xch’olob’ankil li raatin sa’ yanq lix tenamit, re naq taaruuq te’wanq xyu’am li junelik taakanaaq.

14 Ut okenaq chi aajel ru naq laa’in, jo’ chanru li rajom li Dios—re naq lix tijeb’ li ani ak xikenaqeb’ junxil, a’aneb’ santil winqeb’, te’tz’aqloq ru jo’ chanru lix paab’aaleb’—tintz’iib’a jun esil chirix li k’a’aq re ru a’in li xb’aanuman;

15 Relik chi yaal, jun ch’ina tz’iib’anb’il esil chirix li k’a’ru xk’ulman chirix li relik chaq laj Lehi Jerusalen toj reetal li kutan ajwi’ a’in.

16 Jo’kan naq nintz’iib’a lin esil rik’in li esilal k’eeb’il xb’aaneb’ li ke’wan xb’een wa chiwu, toj sa’ xtiklajik inkutan;

17 Ut chirix a’an nintz’iib’a resil li k’a’aq re ru wilom rik’in tz’aqal li wilob’aal.

18 Ut ninnaw naq li esil nintz’iib’a a’an jun tz’iib’anb’il esil li tiik ru ut yaal; a’b’anan wan k’iila k’a’aq re ru li ink’a’ nokoru chixtz’iib’ankil, jo’ chanru li qaatinob’aal.

19 Ut anajwan nink’e xraqik inyehom, li chiwix laa’in, ut nin’ok wi’chik chixk’eeb’al lin esil chirix li k’a’ru wanjenaq chaq junxil chiwu.

20 Laa’in laj Mormon, ut laa’in tz’aqal ralal xk’ajol laj Lehi. Wan rajb’al naq tinwosob’tesi ru lin Dios ut lin Kolonel li Jesukristo, naq a’an kixk’ameb’ chaq li qayuwa’ sa’ li ch’och’ Jerusalen (ut maajun kinawok re, ka’ajwi’ a’an ut eb’ li ani kixk’am chaq sa’ li ch’och’ a’an) ut naq kixk’e we laa’in, ut re intenamit xnimal li na’leb’ choq’ re lix kolb’al li qaam.

21 Relik chi yaal naq a’an kirosob’tesi lix junkab’al laj Jakob, ut kiruxtaana ru li riyajil laj Jose.

22 Ut a’ yaal jo’ chanru naq eb’ li ralal xk’ajol laj Lehi ke’xpaab’ lix taqlahom, a’an kirosob’tesiheb’ ut kixk’eheb’ chi usaak jo’ chanru li raatin.

23 Relik chi yaal, ut ch’olch’o naq a’an tixk’am wi’chik jun rela’ li riyajil laj Jose chixnawb’al chirix li Qaawa’ lix Dios.

24 Ut jo’ chanru naq ch’olch’o ru naq yo’yo li Qaawa’, a’an tixch’utub’eb’ chaq sa’ xkaajachalil li ruchich’och’ chixjunil li rela’ li riyajil laj Jakob, li jek’inb’ileb’ chi najt chiru chixjunil lix b’een li ruchich’och’.

25 Ut jo’ chanru naq a’an ki’ok sa’ sumwank rik’in chixjunil lix junkab’al laj Jakob, chi jo’kan li sumwank li ki’ok wi’ sa’ sumwank rik’in lix junkab’al laj Jakob taatz’aqloq ru sa’ li kutan k’oxlanb’il xb’aan, choq’ re xk’ojob’ankil wi’chik chixjunil lix junkab’al laj Jakob chixnawb’al chirix li sumwank li ki’ok wi’ sa’ sumwank rik’ineb’.

26 Toja’ ut naq te’xnaw ru laj Tojol rixeb’, a’an li Jesukristo, li Ralal li Dios; toja’ ut naq te’ch’utub’aaq chaq sa’ xkaajachalil li ruchich’och’ toj sa’ xch’och’eb’ a’an, li jek’inb’ileb’ wi’ chaq; relik chi yaal, jo’ naq yo’yo li Qaawa’, jo’kan taawanq. Amen.