1 Iwe iei non ewe fansoun pwe ekkewe aramasen ekkewe chon Nifai meinisin ra niwin ngeni pwisin fonuer kewe non ewe rue me wonuen ier, emon me emon meinisin, fiti an famini, noun penen man me noun pwin man, noun oris me noun sokopaten man, me mettoch meinisin met chok pisekir.

2 Iwe non ewe fansoun pwe rese enieno meinisin ar kewe pisekin mwongo; iei minne ra uwei ngeni ir meinisin met rese enieno, seni ar kewe grain seni ew me ew sokkun nikinik, me nour gold, me nour silver, me ar kewe auchean mettoch meinisin, iwe ra niwin ngeni pwisin fonuer me nenier, non ennefen me pwan non eor, non ewe fonu ennefen me pwan non ewe fonu eor.

3 Iwe ra ngeni ekkewe chon sona ekkewe ra tonong non ew pwon mi pin pwe repwe aneasochisi kinamwen ewe fonu, ekkewe ra wesen mochen repwe soposopono ar repwe chon Leiman, fonu, anongonong won chochor, pwe epwe tongeni wor rer, ren ar angang, met repwe tongeni manau won; iwe iei ra forata kinamwe non unusen ewe fonu.

4 Iwe ra poputa sefan ne feiochuno me ne pisekisekino; iwe ewe rue me wonuen me fisuen ier ra wesino, iwe a wor ennetin tetten me non ewe fonu; iwe ra fen fori ar kewe annuk anongonong won nonnopok me pungoch.

5 Iwe iei ese wor och mettoch non unusen ewe fonu an epwe eppeti ekkewe aramas seni ar repwe soposopono ne feioch, tiwenon chok ika repwe turunong non atai annuk.

6 Iwe iei Kitkitonai, ewe sou apung, Lakonias, me ekkewe ra fen kefinita pwe sou emmwen, ir ekkewe ra forata ei ennetin kinamwe non ewe fonu.

7 Iwe non ewe fansoun pwe mi wor chommong minafo teninimw ra kauuta, me mi wor chommong teninimwen nom ra kauusefan.

8 Iwe mi wor chommong aanenap ra foruta, me chommong aan ra for, minne ra aaneno seni teninimw ngeni teninimw, me seni fonu ngeni fonu, me seni neni ngeni neni.

9 Iwe iei a wesino ewe rue me wanuen ier, iwe ekkewe aramas ra soposopono non kinamwe.

10 Nge non ewe fansoun non ewe rue me tiuen ier a poputa ne wor ekkoch anini fengen me nein ekkewe aramas; iwe ekkoch ra nuapas ngeni namanam tekia me sikaseni pokiten ar fokkun chommong pisekisek, ewer, pwan mwo ngeni eriaffou;

11 Pun mi chommong chon amömö pisek non ewe fonu, me pwan chommong sou annuk, me chommong sou angei annuk.

12 Iwe ekkewe aramas ra poputa ne sokko fesen ren tettenir, anongonong won ar pisekisek me ar tufichin kaeo; ewer, ekkoch rese mirit pokiten ar woungaw, me ekkoch ra angei ar watten kaeo pokiten ar pisekisek.

13 Ekkoch ra nuapas non namanam tekia, me ekkoch ra fokkun tipetekison; ekkoch ra eniwini kapas pochokun ngeni kapas pochokun, nupwen ekkoch ra engino ngeni kapas pochokun me eriaffou me sokopaten riaffou meinisin, me rese ungeni me kapas mi ngaw sefan, nge ra tipetekison me ennetin aier me mwen Kot.

14 Iwe iei a wor ew ennetin pekin ese wor nonnofengen non unusen ewe fonu, ina popun pwe ewe mwichefen a poputa ne keimufesen; ewer, ina popun pwe non ewe inik ier ewe mwichefen a keimufesen non unusen ewe fonu tiwenon chok me nein ekkoch ekkewe chon Leiman ir ekkewe ra siwin ngeni ewe ennetin nuku; me rese mochen kunnuno seni, pun ir mi pochokun, me tipepos, me nukuchar, tipemecheres ren unusen achocho ne aneasochisi ekkewe annukun ewe Samon.

15 Iei ewe popun ei angangangaw an ekkewe aramas—Setan a wor an watten manaman, ngeni an amwasangata ekkewe aramas ne fori sokopaten angangangaw meinisin, me esikereta ngeni namanam tekia, otupereno pwe repwe kutta pochokun, me nemenem, me pisekisek, me ekkewe namotmwanin mettochun ewe fonufan.

16 Iwe iei Setan a emmwenano netipen ekkewe aramas ne fori sokopaten angangangaw meinisin; iei minne ra chok pwapwaiti kinamwe non ekkoch chok ier.

17 Iwe iei, non nepoputan ewe inik ier—ekkewe aramas ra fen fangeta ren ew ukukun nangatamen fansoun ar repwe emmwenfetan me ren sossotun ewe tefin ian chok a mochen epwe emmwenireno ia, me ne fori met chok sokkun angangangaw a mochen repwe fori—iwe iei non nepoputan ei, ewe inik ier, ra nom non ew nikinikin anoninenin fofforungaw.

18 Iwe iei rese tipis non ar rese weweiti, pun ir mi sinei mochenin Kot usur, pun a fen keit ngeni ir; iei minne ra finata repwe ungeni Kot.

19 Iwe iei a fis non ranin Lakonias kewe, ewe noun Lakonias, pun Lakonias a nenieni nenien seman we me a emmweni ekkewe aramas non ena ier.

20 Iwe a poputa ne wor mwan mi aurour seni nang me titino, ra nonnom nein ekkewe aramas non unusen ewe fonu, ra afanafan me pwaracho ne pwarata usun tipisin me angangangawen ekkewe aramas, me pwarata ngeni ir usun ewe ngaseno minne ewe Samon epwe fori fan iten noun kewe aramas, are non ekkoch kapas, ewe manausefanitan Kraist; iwe ra pwaracho ne pwarata usun an mano me riaffou.

21 Iei mi wor chommong me nein ekkewe aramas ekkewe ra fokkun song pokiten ir ekkewe ra pwarata usun ekkei mettoch; iwe ekkewe ra song napengeni ir ekkewe sou apung mi nap, me ir ekkewe ra fen akkom pris mi nap me sou annuk; ewer, meinisin ekkewe ir sou annuk ra song ren ekkewe ir ra pwarata usun ekkei mettoch.

22 Iei ese wor sou annuk are sou apung are pris mi nap a tongeni wor an nemenem ne apungano emon ngeni mano tiwenon chok ika ar kapung a kapunguno non mak me ren kepinan ewe fonu.

23 Iei mi wor chommong ekkewe ra pwarata usun ekkewe mettoch ren pekin Kraist ekkewe ra pwaracho ne pwarata, ekkewe ra ono me ninnino non monomon me ren ekkewe sou apung, pwe porousen ar mano esap tori ewe kepinan ewe fonu tori mwirin ar mano.

24 Iwe iei, ei mi ungeni ekkewe annukun ewe fonu, pwe emon aramas epwe ninnino tiwenon chok a wor ar mumuta seni ewe kepinan ewe fonu—

25 Iei minne ew anini a feita ngeni ewe fonuen Saraemla, ngeni ewe kepinan ewe fonu, usun ekkewe sou apung ekkewe ra apungano ekkewe soufosun ewe Samon ngeni mano, ese anongonong ngeni ewe annuk.

26 Iei non ewe fansoun pwe ra ono me emmwenino me mwen ewe sou apung, pwe repwe kapung ren ewe attai annuk minne ra fen fori, anongonong won ewe annuk minne a fen kawor me ren ekkewe aramas.

27 Iei non ewe fansoun pwe ekkena sou apung a wor chommong chiechier me aramaser; me ekkewe nussun, ewer, pwan mwo napengeni ekkewe sou annuk meinisin me ekkewe pris mi nap, ra ioifengen, me chungeni aramasen ekkena sou apung ir ekkewe repwe kapung anongonong won ewe annuk.

28 Iwe ra tonong non ew pwon emon ngeni pwan emon, ewer, pwan mwo non ena pwon mi pin minne a kawor me rer chon nom, minne pwon mi pin a kawor me emmwen me ren ewe tefin, pwe repwe chu ne ungeni wenchar meinisin.

29 Iei minne ra chu ne ungeni ekkewe aramasen ewe Samon, me tonong non ew pwon pwe repwe nireno, me repwe angasa ekkewe ir mi tipisin nii manau seni ewe kamwochun pungoch, minne ita epwene fis anongonong won ewe annuk.

30 Iwe ra finata pwe repwe ungeni ewe annuk me ekkewe tufichin fonuer we; iwe ra pwon emon ngeni pwan emon pwe repwe nieno ewe kepina, me ne forata emon king won ewe fonu, pwe ewe fonu esap chiwen ngaseno nge epwe nom fan nemenien king.