1 Pea naʻe hoko ʻo pehē kuo ʻosi atu hono tolungofulu mā fā ʻo e taʻú, kae ʻumaʻā foki mo hono tolungofulu mā nimá, pea vakai kuo fokotuʻu ʻe he kau ākonga ʻa Sīsuú ha siasi ʻo Kalaisi ʻi he ngaahi fonua takatakai kotoa pē. Pea ʻilonga ʻa kinautolu naʻe haʻu kiate kinautolú, pea nau fakatomala moʻoni mei heʻenau ngaahi angahalá, naʻe papitaiso ʻa kinautolu ʻi he huafa ʻo Sīsuú; pea naʻa nau maʻu foki mo e Laumālie Māʻoniʻoní.

2 Pea naʻe hoko ʻo pehē ʻi hono tolungofulu mā ono ʻo e taʻú, kuo fakaului ʻa e kakai kotoa pē ki he ʻEikí, ʻi he funga hono kotoa ʻo e fonuá, ʻa e kau Nīfaí mo e kau Leimaná fakatouʻosi, pea naʻe ʻikai ha ngaahi fekeʻikeʻi pe ngaahi fakakikihi ʻiate kinautolu, pea naʻe fefaitotonuʻaki ʻa e kakai kotoa pē ʻiate kinautolu.

3 Pea naʻa nau meʻa taha ʻaki ʻenau ngaahi meʻa kotoa pē; ko ia naʻe ʻikai ha maʻu meʻa mo e masiva, pe pōpula mo e tauʻatāina, ka naʻe fakatauʻatāinaʻi ʻa kinautolu kotoa pē, ʻo nau ʻinasi ʻi he meʻafoaki fakalangí.

4 Pea naʻe hoko ʻo pehē naʻe ʻosi atu mo hono tolungofulu mā fitu ʻo e taʻú foki, pea naʻe kei hoko atu ai pē ʻa e melinó ʻi he fonuá.

5 Pea naʻe fai ʻa e ngaahi fuʻu ngāue maʻongoʻonga mo fakaofo ʻe he kau ākonga ʻa Sīsuú, ʻo aʻu ki heʻenau fakamoʻui ʻa e mahakí, mo fokotuʻu hake ʻa e maté, mo fekau ke ʻeveʻeva ʻa e pipikí, pea mo e kuí ke nau lava ʻo mamata, mo e tulí ke fanongo; pea nau fai ʻa e ngaahi faʻahinga mana kehekehe kotoa pē ʻi he fānau ʻa e tangatá; pea naʻe ʻikai te nau fai ha ngaahi mana ʻi ha meʻa ka ʻi he huafa pē ʻo Sīsuú.

6 Pea naʻe pehē ʻa e ʻosi atu hono tolungofulu mā valu ʻo e taʻú, pea pehē foki mo hono tolungofulu mā hivá, mo hono fāngofulu mā tahá, mo hono fāngofulu mā uá, ʻio, ʻo aʻu ki he ʻosi atu hono fāngofulu mā hiva ʻo e taʻú, kae ʻumaʻā foki mo hono nimangofulu mā tahá, mo hono nimangofulu mā uá; ʻio, ʻo aʻu ki he ʻosi atu ʻa hono nimangofulu mā hiva ʻo e taʻú.

7 Pea naʻe ngaohi ʻe he ʻEikí ke nau fuʻu tuʻumālie ʻaupito ʻi he fonuá; ʻio, ʻo aʻu ki heʻenau toe langa hake ha ngaahi kolo ʻi he ngaahi potu naʻe ʻi ai ʻa e ngaahi kolo kuo velá.

8 ʻIo, naʻe aʻu ki he fuʻu kolo lahi ko Seilahemalá naʻa nau toe langa hake.

9 Ka naʻe ʻi ai ʻa e ngaahi kolo lahi ʻa ia kuo ngalo hifo, pea ʻoho mai ʻa e vaí ki honau potú; ko ia ko e ngaahi kolo ia naʻe ʻikai lava ke toe langa foʻou.

10 Pea ko ʻeni, vakai, naʻe hoko ʻo pehē naʻe fakaʻau ʻo mālohi ʻa e kau Nīfaí, pea nau fakatokolahi ʻo fuʻu vave ʻaupito, ʻo nau hoko ko e kakai hinehina mo fuʻu fakaʻofoʻofa ʻaupito.

11 Pea naʻa nau femaliʻaki, mo foaki ke mali, pea naʻe tāpuakiʻi ʻa kinautolu ʻo fakatatau mo hono lahi ʻo e ngaahi talaʻofa lahi ʻa ia kuo fai ʻe he ʻEikí kiate kinautolú.

12 Pea naʻe ʻikai te nau toe ʻaʻeva ʻo fakatatau ki he ngaahi tuʻutuʻuni mo e ngaahi ouau ʻo e fono ʻa Mōsesé; ka nau ʻaʻeva ʻo fakatatau ki he ngaahi fekau kuo nau maʻu mei honau ʻEiki mo honau ʻOtuá, ʻo nau fai atu ʻi he ʻaukai mo e lotu, pea ʻi heʻenau faʻa fakataha ke lotu mo fanongo ki he folofola ʻa e ʻEikí.

13 Pea naʻe hoko ʻo pehē naʻe ʻikai ke ʻi ai ha fakakikihi ʻi he kakai kotoa pē, ʻi he fonuá hono kotoa; ka naʻe ʻi ai ha ngaahi fuʻu mana lalahi naʻe fakahoko ʻi he kau ākonga ʻa Sīsuú.

14 Pea naʻe hoko ʻo pehē naʻe ʻosi atu ʻa hono fitungofulu mā taha ʻo e taʻú, kae ʻumaʻā foki mo hono fitungofulu mā ua ʻo e taʻú, ʻio, ko hono fakanounoú, ne aʻu mai ki he ʻosi atu hono fitungofulu mā hiva ʻo e taʻú; ʻio, kuo ʻosi atu foki ʻa e taʻu ʻe teau, pea ko e kau ākonga ʻa Sīsū, ʻa ia kuó ne filí, kuo nau fononga atu ki he palataisi ʻo e ʻOtuá, tuku kehe pē ʻa e toko tolu ʻa ia naʻe pau ke nofó; pea naʻe ʻi ai ha kau ākonga kehe kuo fakanofo ke fetongi ʻa kinautolu; kae ʻumaʻā mo e tokolahi ʻo e toʻu tangata ko iá kuo nau pekia.

15 Pea naʻe hoko ʻo pehē naʻe ʻikai ha fekeʻikeʻi ʻi he fonuá, koeʻuhi ko e ʻofa ʻa e ʻOtuá ʻa ia naʻe ʻi he loto ʻo e kakaí.

16 Pea naʻe ʻikai ha ngaahi femehekaʻaki, pe ngaahi fetēleni, pe ngaahi maveuveu, pe ngaahi feʻauaki, pe ngaahi loi, pe ngaahi fakapō, pe ha faʻahinga holi kovi ʻe taha; pea ko e moʻoni ʻoku ʻikai lava ke ʻi ai ha kakai ʻoku lahi hake ʻenau fiefiá ʻi he kakai kotoa pē kuo fakatupu ʻe he toʻukupu ʻo e ʻOtuá.

17 Naʻe ʻikai ke ʻi ai ha kau kaihaʻa, pe kau fakapō, pea naʻe ʻikai foki ke ʻi ai ha kau Leimana, pe ha faʻahinga kakai kehe ʻe taha; ka naʻa nau taha pē, ko e fānau ʻa Kalaisi, pea ko e kau ʻea hoko ki he puleʻanga ʻo e ʻOtuá.

18 Pea hono ʻikai ke monūʻia ʻa kinautolu! He naʻe tāpuakiʻi ʻa kinautolu ʻe he ʻEikí ʻi heʻenau ngaahi ngāue kotoa pē; ʻio, naʻe tāpuakiʻi mo fakamonūʻiaʻi ʻa kinautolu ʻo aʻu ki he ʻosi atu ʻa e taʻu ʻe teau mā hongofulu; pea kuo pekia ʻa e ʻuluaki toʻu tangata meia Kalaisi, pea naʻe ʻikai ha fekeʻikeʻi ʻi hono kotoa ʻo e fonuá.

19 Pea naʻe hoko ʻo pehē naʻe pekia ʻa Nīfai, ʻa ia naʻá ne hiki ʻa e lekooti fakamuimui ko ʻení, (pea naʻá ne hiki ia ʻi he ngaahi peleti ʻa Nīfaí), pea naʻe hiki ia ʻe hono foha ko ʻĀmosí ʻo fetongi ia; pea naʻá ne hiki ia ʻi he ngaahi peleti ʻa Nīfaí foki.

20 Pea naʻá ne tauhi ia ʻi he taʻu ʻe valungofulu mā fā, pea naʻe kei ʻi ai ʻa e melino ʻi he fonuá, tuku kehe ha tokosiʻi ʻo e kakaí ʻa ia kuo nau tafoki mei he siasí pea ʻai kiate kinautolu ʻa e hingoa ko e kau Leimaná; ko ia naʻe kamata ke toe ʻi ai ʻa e kau Leimana ʻi he fonuá.

21 Pea naʻe hoko ʻo pehē naʻe pekia mo ʻĀmosi foki, (pea ko e taʻu ia hono teau hivangofulu mā fā mei he hāʻele mai ʻa Kalaisí) pea naʻe tauhi ʻe hono foha ko ʻĀmosí ʻa e lekōtí ʻo fetongi ia; pea naʻá ne hiki ia foki ʻi he ngaahi peleti ʻa Nīfaí; pea naʻe tohi ia foki ʻi he tohi ʻa Nīfaí, ʻa ia ko e tohi ko ʻení.

22 Pea naʻe hoko ʻo pehē kuo ʻosi atu ʻa e taʻu ʻe uangeau; pea kuo pekia ʻa e toʻu tangata hono uá tuku kehe ha tokosiʻi pē.

23 Pea ko ʻeni ko au, Molomona, ʻoku ou loto ke mou ʻiloʻi kuo fakatokolahi ʻa e kakaí, pea kuo nau mafola ki hono kotoa ʻo e funga ʻo e fonuá, pea kuo nau fakaʻau ʻo fuʻu koloaʻia ʻaupito, ko e tupu mei heʻenau monūʻia ʻia Kalaisí.

24 Pea ko ʻeni, naʻe kamata ʻi he taʻu hono uangeau mā taha ko iá ke ʻi ai ʻa e niʻihi ʻiate kinautolu ʻa ia naʻa nau fielahi ʻi he hīkisiá, ʻo hangē ko e kofu ʻaki ʻo e ngaahi kofu fakataungataʻa, mo e ngaahi faʻahinga mataʻi tofe lelei kotoa pē, mo e ngaahi meʻa lelei ʻo e māmaní.

25 Pea naʻe fai atu mei he taimi ko iá ʻa e ʻikai te nau toe meʻa taha ʻaki ʻenau ngaahi meʻá mo ʻenau ngaahi koloa ʻiate kinautolú.

26 Pea naʻa nau kamata ke mavahevahe fakafaʻahinga; pea nau kamata ke fokotuʻu ha ngaahi siasi maʻanautolu ke fakatupu ha koloa, pea nau kamata ke fakaʻikaiʻi ʻa e siasi moʻoni ʻo Kalaisí.

27 Pea naʻe hoko ʻo pehē ʻi he ʻosi ʻa e taʻu ʻe uangeau mā hongofulú naʻe ʻi ai ʻa e ngaahi siasi lahi ʻi he fonuá; ʻio, naʻe ʻi ai ʻa e ngaahi siasi lahi ʻa ia naʻa nau pehē ʻoku nau ʻiloʻi ʻa Kalaisi, ka naʻa nau fakaʻikaiʻi ʻa e ngaahi konga lahi ʻo ʻene ongoongoleleí, ʻo tupu ai ʻenau tali ʻa e faʻahinga fai angahala kotoa pē, ʻo nau ʻoatu ʻa e meʻa ʻoku toputapú kiate ia kuo tapui hono ʻoatu ki aí koeʻuhi ko ʻene taʻefeʻungá.

28 Pea naʻe tupu ʻo fuʻu tokolahi ʻaupito ʻa e siasi ko iá ko e tupu mei he angahalá, pea koeʻuhi ko e mālohi ʻo Sētané, ʻa ia naʻá ne maʻu ʻa e mālohi ki honau lotó.

29 Pea ko e tahá, naʻe ʻi ai mo e siasi ʻe taha ʻa ia naʻe fakaʻikaiʻi ʻa e Kalaisí; pea naʻa nau fakatangaʻi ʻa e siasi moʻoni ʻo Kalaisí, koeʻuhi ko ʻenau loto-fakatōkilaló mo ʻenau tui kia Kalaisí; pea naʻa nau fehiʻa kiate kinautolu koeʻuhi ko e ngaahi mana lahi ʻa ia naʻe fai ʻiate kinautolú.

30 Ko ia, naʻa nau pule ʻi he fakamālohi mo e mafai ki he kau ākonga ʻa Sīsū, ʻa ia naʻe nofo ʻiate kinautolú, pea naʻa nau lī ʻa kinautolu ki he fale fakapōpulá; ka koeʻuhi ko e mālohi ʻo e folofola ʻa e ʻOtuá, ʻa ia naʻe ʻiate kinautolú, naʻe mafahi ua ʻa e ngaahi fale fakapōpulá, pea naʻa nau ʻalu atu ʻo fai ʻa e ngaahi mana lalahi ʻiate kinautolu.

31 Kae kehe, neongo ʻa e ngaahi maná ni hono kotoa, naʻe kei fakafefeka pē ʻe he kakaí ʻa honau lotó, pea naʻa nau kumi ke tāmateʻi ʻa kinautolu, ʻo hangē ko e feinga ʻa e kau Siu ʻi Selusalemá ke tāmateʻi ʻa Sīsū, ʻo hangē ko ʻene folofolá.

32 Pea naʻa nau lī ʻa kinautolu ki he ngaahi fuʻu afi kakaha, pea naʻa nau haʻu mei ai taʻehoko ha kovi kiate kinautolu.

33 Pea naʻa nau lī ʻa kinautolu foki ki he ngaahi ʻana ʻo e fanga manu fekai, pea naʻa nau vaʻinga mo e fanga manu fekaí ʻo hangē ko ha vaʻinga ʻa ha tamasiʻi mo e lami; pea naʻa nau haʻu mei ai, taʻehoko ha kovi kiate kinautolu.

34 Ka neongo iá, naʻe kei fakafefeka pē ʻe he kakaí ʻa honau lotó, he naʻe fakalotoʻi ʻa kinautolu ʻe he kau taulaʻeiki tokolahi mo e kau palōfita loi ke langa hake ʻa e ngaahi siasi lahi, pea ke fai ʻa e ngaahi faʻahinga angahala kotoa pē. Pea naʻa nau taaʻi ʻa e kakai ʻo Sīsuú; ka naʻe ʻikai toe taaʻi ʻa kinautolu ʻe he kakai ʻo Sīsuú. Pea naʻe pehē ʻa ʻenau fakaʻauʻauhifo ʻi he taʻetuí mo e fai angahalá, mei he taʻu ki he taʻu, ʻo aʻu ki he ʻosi atu ʻa e taʻu ʻe uangeau mā tolungofulu.

35 Pea ko ʻeni naʻe hoko ʻo pehē ʻi he taʻu ko iá, ʻio, ʻi hono uangeau tolungofulu mā taha ʻo e taʻú, naʻe ʻi ai ʻa e fuʻu mavahevahe lahi ʻi he kakaí.

36 Pea naʻe hoko ʻo pehē ʻi he taʻu ko iá, naʻe tupu hake ha kakai naʻe ui ko e kau Nīfaí, pea ko e kau tui moʻoni ʻa kinautolu kia Kalaisi; pea naʻe ʻiate kinautolu ʻa e niʻihi ʻa ia naʻe ui ʻe he kau Leimaná—ko e kau Sēkopé, mo e kau Siosefá, mo e kau Sōlamí;

37 Ko ia, ko e kau tui moʻoni kia Kalaisí mo e kau lotu moʻoni kia Kalaisí, (ʻa ia naʻe kau ai ʻa e kau ākonga ʻe toko tolu ʻa Sīsū, ʻa ia naʻe pau ke nofó) naʻe ui ko e kau Nīfaí, mo e kau Sēkopé, mo e kau Siosefá, mo e kau Sōlamí.

38 Pea naʻe hoko ʻo pehē ko kinautolu naʻe ʻikai te nau tali ʻa e ongoongoleleí naʻe ui ʻa kinautolu ko e kau Leimaná, mo e kau Lēmiuelá, mo e kau ʻIsimelí; pea naʻe ʻikai te nau fakaʻauʻauhifo ʻi he taʻetuí, ka naʻa nau angatuʻu fakahāhā ki he ongoongolelei ʻa Kalaisí; pea naʻa nau akoʻi ʻa ʻenau fānaú ke ʻoua naʻa nau tui, ʻo hangē foki ko ʻenau ngaahi tamaí, ʻo talu mei he kamataʻangá, mo ʻenau fakaʻauʻau hifo.

39 Pea naʻe tupu ia koeʻuhi ko e fai angahala mo e anga-fakalielia ʻo ʻenau ngaahi tamaí, ʻo hangē ko ia naʻe hoko ʻi he kamataʻangá. Pea naʻe akoʻi ʻa kinautolu ke nau fehiʻa ki he fānau ʻa e ʻOtuá, ʻo hangē foki ko hono akoʻi ʻo e kau Leimaná ke fehiʻa ki he fānau ʻa Nīfaí talu mei he kamataʻangá.

40 Pea naʻe hoko ʻo pehē kuo ʻosi atu ʻa e taʻu ʻe uangeau fāngofulu mā fā, pea naʻe pehē ʻa e anga ʻo e ngaahi meʻa ʻa e kakaí. Pea ko e kakai naʻe angakovi angé naʻe fakaʻau ke nau mālohi ange, pea fakaʻau ke nau fuʻu tokolahi ange ʻaupito ʻi he kakai ʻo e ʻOtuá.

41 Pea naʻa nau kei fai atu pē ʻenau langa hake ha ngaahi siasi moʻonautolu, mo nau teuteuʻi ʻa kinautolu ʻaki ʻa e faʻahinga kotoa pē ʻo e ngaahi meʻa mahuʻingá. Pea naʻe ʻosi pehē atu hono uangeau nimangofulu ʻo e taʻú, mo hono uangeau onongofulu foki ʻo e taʻú.

42 Pea naʻe hoko ʻo pehē naʻe toe kamata ʻe he konga angakovi ange ʻo e kakaí ke fokotuʻu ʻa e ngaahi fuakava mo e ngaahi kautaha fufū ʻa Katianetoní.

43 Pea ko e kakai foki naʻe ui ko e kakai ʻo Nīfaí naʻe kamata ke nau pōlepole ʻi honau lotó, koeʻuhi ko ʻenau ngaahi koloa lahi ʻaupitó, ʻo nau fakaʻau ʻo hīkisia ʻo hangē ko honau kāinga, ko e kau Leimaná.

44 Pea naʻe kamata mei he taimi ko iá mo e kamata ke mamahi ʻa e kau ākongá koeʻuhi ko e ngaahi angahala ʻa māmaní.

45 Pea naʻe hoko ʻo pehē ʻi he ʻosi atu ʻa e taʻu ʻe tolungeaú, kuo fakaʻau ʻa e kakai fakatouʻosi ʻo Nīfaí mo e kau Leimaná ʻo fuʻu fai angahala ʻaupito ʻo ʻikai te nau faikehekehe.

46 Pea naʻe hoko ʻo pehē naʻe mafola atu ʻa e kau kaihaʻa ʻa Katianetoní ʻi he funga hono kotoa ʻo e fonuá; pea naʻe ʻikai ha taha naʻe māʻoniʻoni ka ko e kau ākonga pē ʻa Sīsuú. Pea naʻa nau tokonaki ʻa e koula mo e siliva ʻo lahi ʻaupito, pea nau fefakatauʻaki ʻi he ngaahi faʻahinga koloa kehekehe kotoa pē.

47 Pea naʻe hoko ʻo pehē ʻi he hili ʻa e ʻosi atu ʻa e taʻu ʻe tolungeau mā nima, (pea naʻe kei nofo maʻu pē ʻa e kakaí ʻi he fai angahalá) naʻe pekia ʻa ʻĀmosi; pea naʻe hoko atu ʻe hono tokoua, ko ʻEmaloni, ʻo ne hiki ʻa e lekōtí ʻo fetongi ia.

48 Pea naʻe hoko ʻo pehē ʻi he ʻalu atu ʻa e taʻu ʻe tolungeau mā uofulu, ko ʻEmaloni, ʻi hano ueʻi ia ʻe he Laumālie Māʻoniʻoní, naʻá ne fufuuʻi ʻa e ngaahi lekooti ʻa ia naʻe toputapú—ʻio, ʻa e ngaahi lekooti toputapu kotoa pē ʻa ia kuo tukufakaholo mai mei he toʻu tangata ki he toʻu tangata—ʻo aʻu mai foki ki hono tolungeau mā uofulu ʻo e taʻu hili ʻa e hāʻele mai ʻa Kalaisí.

49 Pea naʻá ne fufuuʻi ia ki he ʻEikí, koeʻuhi ke lava ʻo toe ʻomai ia ki he toenga ʻo e hako ʻo e fale ʻo Sēkopé, ʻo fakatatau ki he ngaahi kikite mo e ngaahi talaʻofa ʻa e ʻEikí. Pea ko e ngataʻanga ia ʻo e lekooti ʻa ʻEmaloní.