1 Ug nahitabo nga milabay ang ikakatloan ug upat nga tuig, ug ang ikakatloan ug lima, ug tan-awa ang mga disipulo ni Jesus mitukod og simbahan ni Kristo palibot sa tanang yuta. Ug kutob sa miduol kanila, ug matinud-anon nga naghinulsol sa ilang mga sala, nabunyagan pinaagi sa ngalan ni Jesus; ug nakadawat usab sila sa Espiritu Santo.

2 Ug nahitabo nga sa ikakatloan ug unom nga tuig, ang tanang katawhan nakabig ngadto sa Ginoo, sa ibabaw sa tibuok yuta, sa mga Nephita ug mga Lamanita, ug walay mga panagbingkil ug mga panaglalis taliwala kanila, ug matag tawo makiangayon nga nagtinagdanay sa usag usa.

3 Ug mipakig-ambit sila sa tanan nila nga butang para sa tanan; mao nga walay adunahan ug kabos, ulipon ug gawasnon, apan silang tanan gihimo nga mga gawasnon, ug mga tig-ambit sa langitnong gasa.

4 Ug nahitabo nga ang ikakatloan ug pito nga tuig milabay usab, ug sa gihapon nagpadayon ang kalinaw sa yuta.

5 Ug dihay mahinungdanon ug kahibulongan nga mga buhat nga gihimo sa mga disipulo ni Jesus, nga niana sila miayo sa mga masakiton, mibuhi sa mga patay, mipalakaw sa mga bakol, ug ang mga buta nakadawat sa ilang panan-aw ug ang mga bungol nakadungog; ug tanang matang sa mga milagro ilang gibuhat taliwala sa katawhan; ug wala sila magbuhat og mga milagro gawas lamang kon pinaagi kini sa ngalan ni Jesus.

6 Ug sa ingon niana ang ikakatloan ug walo nga tuig milabay, ug usab ang ikakatloan ug siyam, ug ang ikakap-atan ug usa, ug ang ikakap-atan ug duha, oo, gani hangtod ang ikakap-atan ug siyam nga tuig milabay, ug usab ang ikakalim-an ug usa, ug ang ikakalim-an ug duha; oo, hangtod ang ikakalim-an ug siyam nga tuig milabay.

7 Ug ang Ginoo mipauswag kanila sa hilabihan diha sa yuta; oo, nga sa ingon niana nagtukod sila pag-usab og mga siyudad sa dapit nga adunay mga siyudad nga nasunog.

8 Oo, gani kadtong gamhanan nga siyudad nga Zarahemla ilang gitukod pag-usab.

9 Apan dihay daghang siyudad nga naunlod, ug katubigan ang mipuli niini; busa kini nga mga siyudad dili na matukod og balik.

10 Ug karon, tan-awa, nahitabo nga ang katawhan ni Nephi nagkalig-on, ug misanay sa hilabihan ka paspas, ug nahimo nga hilabihan ka madanihon ug makapahimuot nga katawhan.

11 Ug nagminyo sila, ug sinayoran sa kaminyoon, ug gipanalanginan sumala sa gidaghanon sa mga saad nga gihimo sa Ginoo ngadto kanila.

12 Ug wala na sila magsunod sa mga binuhatan ug mga ordinansa sa balaod ni Moises; apan nagsunod sila sa mga sugo nga ilang nadawat gikan sa ilang Ginoo ug ilang Dios, nga nagpadayon sa pagpuasa ug pag-ampo, ug nagtigom kanunay aron mag-ampo ug maminaw sa pulong sa Ginoo.

13 Ug nahitabo nga walay panagbingkil taliwala sa tanang katawhan, sa tibuok yuta; apan dihay katingalahang mga milagro nga gihimo sa mga disipulo ni Jesus.

14 Ug nahitabo nga milabay ang ikakapitoan ug usa nga tuig, ug usab ang ikakapitoan ug duha nga tuig, oo, ug sa kataposan, hangtod nga milabay ang ikakapitoan ug siyam nga tuig; oo, gani milabay ang usa ka gatos ka tuig, ug ang mga disipulo ni Jesus, nga iyang gipili, tanan tua na sa paraiso sa Dios, gawas niadtong tulo nga nagpabilin; ug dihay uban nga mga disipulo nga gi-orden puli kanila; ug usab daghan niana nga kaliwatan ang namatay na.

15 Ug nahitabo nga walay panagbingkil sa yuta, tungod sa gugma sa Dios nga anaa sa mga kasingkasing sa katawhan.

16 Ug walay mga kasina, ni panagbangi, ni kagubot, ni pagbaligya sa dungog, ni mga pagpamakak, ni mga pagpatay, ni bisan unsa nga matang sa pagkamaulagon; ug sa pagkatinuod wala nay mas malipayon pa nga katawhan taliwala sa tanang katawhan nga gilalang sa kamot sa Dios.

17 Walay mga tulisan, ni mga mamumuno, ni adunay mga Lamanita, ni bisan unsa nga matang sa mga -ita; apan nagkahiusa sila, ang mga anak ni Kristo, ug manununod sa gingharian sa Dios.

18 Ug pagkabulahan nila! Kay ang Ginoo mipanalangin kanila sa ilang tanang kalihokan; oo, napanalanginan sila ug miuswag hangtod nga ang usa ka gatos ug napulo nga tuig milabay; ug ang unang kaliwatan gikan kang Kristo namatay na, ug walay panagbingkil sa tibuok yuta.

19 Ug nahitabo nga si Nephi namatay, siya nga misulat niining kataposang talaan, (ug gisulat niya kini diha sa mga palid ni Nephi) ug ang iyang anak nga si Amos mipadayon sa pagsulat niini puli kaniya; ug gisulat niya kini diha usab sa mga palid ni Nephi.

20 Ug gipadayon niya ang pagsulat niini sa ikawaloan ug upat nga tuig, ug diha gihapon ang kalinaw sa yuta, gawas sa ginagmay nga bahin sa katawhan nga mibulag sa simbahan ug midala sa ngalan sa mga Lamanita; mao nga nagsugod na usab nga may mga Lamanita sa yuta.

21 Ug nahitabo nga si Amos namatay usab, (ug usa ka gatos ug kasiyaman ug upat ka tuig kadto sukad sa pag-anhi ni Kristo) ug ang iyang anak nga si Amos mitipig sa talaan puli kaniya; ug gisulat usab niya kini diha sa mga panid ni Nephi; ug gisulat usab kini diha sa basahon ni Nephi nga mao kini nga basahon.

22 Ug nahitabo nga duha ka gatos ka tuig ang milabay; ug ang ikaduha nga kaliwatan nangamatay na gawas sa pipila niini.

23 Ug karon ako, si Mormon, nanghinaot nga kamo masayod nga ang katawhan misanay, nga niana mikatap sila sa ibabaw sa tibuok yuta, ug nahimo silang hilabihan ka adunahan, tungod sa ilang kamauswagon pinaagi kang Kristo.

24 Ug karon, niining ikaduha ka gatos ug usa nga tuig dihay nagsugod taliwala kanila niadtong gibayaw sa garbo, sama sa pagsul-ob og mahalon nga sapot, ug tanang matang sa maanindot nga mga perlas, ug sa maanindot nga mga butang sa kalibotan.

25 Ug sukad niana ang ilang mga kabtangan ug ang ilang kabuhian wala na nila ipakig-ambit para sa tanan.

26 Ug nagsugod sila sa pagkabahin-bahin ngadto sa nagkalain-laing mga pundok; ug nagsugod sila sa pagtukod og mga simbahan alang sa ilang mga kaugalingon aron makaangkon og bahandi, ug misugod sa paglimod sa tinuod nga simbahan ni Kristo.

27 Ug nahitabo nga sa dihang milabay ang ikaduha ka gatos ug napulo nga tuig adunay daghang simbahan dinhi sa yuta; oo, adunay daghang simbahan nga nagpatuo nga nakaila kang Kristo, apan milimod sila sa daghang bahin sa iyang ebanghelyo, nga niana midawat sila sa tanang matang sa pagkadaotan, ug mihatag nianang sagrado nga butang ngadto sa tawo nga gidid-an niini tungod sa pagkadili takos.

28 Ug kini nga simbahan midaghan sa hilabihan tungod sa pagkadaotan, ug tungod sa gahom ni Satanas nga mao ang nagkupot sa ilang mga kasingkasing.

29 Ug usab, dihay laing simbahan nga naglimod kang Kristo; ug gilutos nila ang tinuod nga simbahan ni Kristo, tungod sa ilang pagkamapainubsanon ug sa ilang pagtuo kang Kristo; ug sila mibiaybiay kanila tungod sa daghang mga milagro nga nahimo taliwala kanila.

30 Busa ilang gigamit ang gahom ug katungod batok sa mga disipulo ni Jesus kinsa nagpabilin uban kanila, ug sila mibalhog kanila sa bilanggoan; apan pinaagi sa gahom sa pulong sa Dios nga anaa kanila, ang bilanggoan nangaguba, ug mipadayon sila sa paghimo og dagkong mga milagro taliwala kanila.

31 Bisan pa niana, ug bisan pa niining tanan nga milagro, ang katawhan nagpatig-a sa ilang mga kasingkasing, ug nagtinguha sa pagpatay kanila, sama sa mga Judeo sa Jerusalem nga nagtinguha sa pagpatay kang Jesus, sumala sa iyang pulong.

32 Ug ila silang gitambog ngadto sa mga hudno sa kalayo, ug nakagawas sila nga wala maunsa.

33 Ug ila silang gihulog ngadto sa mga langob sa mabangis nga mga hayop, ug nakigdula sila sa mabangis nga mga hayop sama sa usa ka bata ngadto sa usa ka karnero; ug nakagawas sila gikan niini, nga wala maunsa.

34 Bisan pa niana, ang mga tawo nagpatig-a gihapon sa ilang mga kasingkasing, kay nadala sila sa daghang pari ug dili tinuod nga mga propeta aron magtukod og daghang simbahan, ug maghimo sa tanang matang sa kadaotan. Ug sila mibunal sa katawhan ni Jesus; apan ang katawhan ni Jesus wala mobalos sa pagbunal. Ug sa ingon niana sila mikunhod ngadto sa pagkawalay pagtuo ug sa pagkadaotan, sa matag tuig, hangtod nga milabay ang ikaduha ka gatos ug ikakatloan nga tuig.

35 Ug karon nahitabo, oo, sa ikaduha ka gatos ug ikakatloan ug usa nga tuig, dihay dako nga pagkabahin taliwala sa katawhan.

36 Ug nahitabo nga niining tuiga dihay mitumaw nga katawhan nga gitawag og mga Nephita, ug tinuod silang mga tumutuo ni Kristo; ug taliwala kanila anaa kadtong gitawag nga mga Lamanita—mga Jacobita, ug mga Josephita, ug mga Zoramita;

37 Busa ang tinuod nga mga tumutuo ni Kristo, ug ang tinuod nga mga tigsimba ni Kristo, (uban kanila mao ang tulo ka disipulo ni Jesus nga nagpabilin) gitawag og mga Nephita, ug mga Jacobita, ug mga Josephita ug mga Zoramita.

38 Ug nahitabo nga kadtong misalikway sa ebanghelyo gitawag og mga Lamanita, ug mga Lemuelita ug mga Ismaelita; ug wala sila mokunhod ngadto sa pagkawalay pagtuo, apan sila mituyo sa pagsupil batok sa ebanghelyo ni Kristo; ug gitudloan nila ang ilang mga anak nga dili sila motuo, gani sama sa ilang mga amahan, gikan sa sinugdanan, nga mikunhod.

39 Ug kini tungod sa pagkadaotan ug pagkasalawayon sa ilang mga amahan, gani sukad pa sa sinugdanan. Ug gitudloan sila sa pagdumot sa mga anak sa Dios, gani sama sa mga Lamanita nga gitudloan sa pagdumot sa mga anak ni Nephi gikan pa sa sinugdanan.

40 Ug nahitabo nga milabay ang ikaduha ka gatos ug ikakap-atan ug upat nga tuig, ug ingon niana ang mga kalihokan sa katawhan. Ug ang mas daotan nga bahin sa katawhan nagkaanam og kalig-on, ug nahimong mas hilabihan ka daghan kaysa katawhan sa Dios.

41 Ug sa gihapon mipadayon sila sa pagtukod og mga simbahan alang sa ilang mga kaugalingon, ug nagdayan-dayan niini sa tanang matang sa mahalon nga mga butang. Ug sa ingon niana milabay ang ikaduha ka gatos ug ikakalim-an nga tuig, ug usab ang duha ka gatos ug ikakan-uman nga tuig.

42 Ug nahitabo nga ang daotan nga bahin sa katawhan misugod na usab sa pagtukod sa tinago nga mga panumpa ug mga kalihokan ni Gadianton.

43 Ug usab ang katawhan nga gitawag og katawhan ni Nephi misugod sa pagkamapagarbohon sa ilang mga kasingkasing, tungod sa hilabihan nga kaadunahan, ug nahimong nga mahambogon sama sa ilang kaigsoonan, nga mga Lamanita.

44 Ug sukad niini nga panahon ang mga disipulo nagsugod sa pagsubo tungod sa mga sala sa kalibotan.

45 Ug nahitabo nga sa dihang milabay ang ikatulo ka gatos nga tuig, ang katawhan ni Nephi ug ang mga Lamanita nahimong hilabihan ka daotan ang usa sama sa lain.

46 Ug nahitabo nga ang mga tulisan ni Gadianton mikatap na sa ibabaw sa tibuok yuta; wala nay matarong gawas sa mga disipulo ni Jesus. Ug ang bulawan ug pilak ilang gitipigan sa hilabihan ka daghan ug mipatigayon sa tanang paagi sa patigayon.

47 Ug nahitabo human milabay ang ikatulo ka gatos ug lima nga tuig, (ang katawhan nagpabilin gihapon sa ilang pagkadaotan) namatay si Amos; ug ang iyang igsoong lalaki, si Ammaron, mipadayon sa pagsulat sa talaan puli kaniya.

48 Ug nahitabo nga sa dihang milabay ang ikatulo ka gatos ug kawhaan nga tuig, si Ammaron, nga gipugos sa Espiritu Santo, mitago sa mga talaan nga mga sagrado—oo, gani sa tanang sagrado nga mga talaan nga gihatag gikan sa usa ka kaliwatan ngadto sa laing kaliwatan, nga mga sagrado—gani hangtod sa ikatulo ka gatos ug kawhaan nga tuig sukad sa pag-anhi ni Kristo.

49 Ug gitago niya kini ngadto sa Ginoo, nga kini makaabot pag-usab ngadto sa salin sa balay ni Jacob, sumala sa mga panagna ug sa mga saad sa Ginoo. Ug sa ingon niana natapos ang talaan ni Ammaron.