1 Na em i kamap we tripela ten foa krismas wantaim tripela ten faiv krismas i go pas pinis, na lukim, ol disaipel bilong Jisas i bin kirapim wanpela sios bilong Krais long olgeta graun raunabaut. Na planti pipol ol i kam long ol, na tanim bel trutru long sin bilong ol, ol i bin baptais long nem bilong Jisas, na tu kisim Holi Spirit.

2 Na em i kamap we long tripela ten sikis krismas, olgeta pipol long olgeta pes bilong graun bin tanim bel long Bikpela, ol lain bilong Nifai wantaim ol lain bilong Leman, na nogat tok pait wantaim bruknabaut i bin kamap namel long ol, na wanwan man i bin wokim stretpela pasin namel long ol yet.

3 Na ol skelim olgeta samting namel long ol yet, olsem na nogat moniman na puaman, ol i pas wantaim na fri na ol i bin i stap, tasol olgeta ol i bin kamap fri, na olgeta ol bin skelim presen bilong heven.

4 Na em i kamap we tripela ten seven krismas i go pas tu, na bel isi i stap long graun yet.

5 Na ol disaipel bilong Jisas i bin wokim planti bikpela na naispela wok tru, na ol i hilim sik, kirapim idai man, mekim ol lek krungut long wokabaut, ol ai pas long lukim, iyau pas long harim, na wokim olgeta kainkain mirakel namel long ol lain pikinini bilong ol man, na ol i bin wokim olgeta mirakel long nem bilong Jisas.

6 Na tripela ten eit krismas, tripela ten nain krismas, fopela ten wan krismas, fopela ten tu krismas, ye, i go inap long fopela ten nain krismas, faipela ten wan krismas, faipela ten tu krismas, ye, na i go inap long faipela ten nain krismas i go pas olsem.

7 Na Bikpela i bin mekim sindaun bilong ol kamap gutpela tru long graun, ye, inap long ol wokim ol siti gen we ol siti paia i bin kukim bipo.

8 Ye, tru tumas ol i bin wokim dispela bikpela siti tru Jarahemla gen.

9 Tasol planti siti ol i bin go aninit long wara, na ol wara kamap long ples bilong ol, olsem na ol dispela siti ol i no bin wokim gen.

10 Na nau, lukim, em i kamap we ol pipol bilong Nifai ol i bin kamap strong, na kamap planti tru kwiktaim, na kamap wanpela gutpela pipol tru.

11 Na ol marit na ol i bin givim ol maritim, na Bikpela i bin blesim ol olsem long planti promis we em i bin wokim wantaim ol.

12 Na ol i no moa bihainim kastam na odinens bilong lo bilong Moses, tasol bihainim ol lo em ol i bin kisim long Bikpela God bilong ol, long tambu long kaikai na beten yet, na long kibung long lotu olgeta taim long beten na harim toktok bilong Bikpela.

13 Na em i kamap we nogat tok pait i bin kamap namel long olgeta pipol, long olgeta graun, tasol ol disaipel bilong Jisas ol i bin wokim planti traipela mirakel tru namel long ol.

14 Na em i kamap we sevenpela ten wan krismas, sevenpela ten tu krismas, ye, na long katim sot, i go inap long sevenpela ten nain krismas, ye, i go inap long wan handret krismas i go pas, na olgeta disaipel bilong Jisas, we em i makim ol bin go long paradais bilong God, tasol ol tripela disaipel ol i mas wet long graun ol i bin i stap, na ol narapela disaipel ol i bin oden long ples bilong ol disaipel ol i bin idai, na tu planti pipol long dispela jeneresen ol i bin idai pinis.

15 Na em i kamap we nogat tok pait i bin kamap long graun, bikos long lav bilong God em i bin i stap long bel bilong ol pipol.

16 Na nogat pasin mangal, o pait, o trabel, o pasin pamuk, o pasin giaman, o pasin kilim man, o olgeta kainkain laik bilong wokim pasin nogut i bin kamap, na tru tumas nogat wanpela pipol namel long olgeta pipol God i bin krietim wantaim han bilong em ol i moa amamas olsem ol.

17 Na tu nogat stil lain, o ol lain bilong kilim man, o lain bilong Leman, o wanpela kain ol lain ol i bin i stap, tasol olgeta i kamap wanpela pipol, ol lain pikinini bilong Krais, na ol pipol ol i gat rait long kisim kingdom bilong God.

18 Na ol i bin kisim bikpela blesin tru. Long wanem, Bikpela i bin blesim ol wantaim olgeta samting bilong ol, ye, tru tumas ol i bin blesim na sindaun bilong ol kamap gutpela tru i go inap long wan handret na wanpela ten krismas i go pinis, na nambawan jeneresen long taim bilong Krais idai pinis, na nogat tok pait i bin kamap long olgeta graun.

19 Na em i kamap we Nifai, man em i lukautim dispela laspela rekot, (na em i bin lukautim long ol plet bilong Nifai) idai, na pikinini bilong em Amos i bin lukautim long ples bilong em, na em lukautim dispela rekot long ol plet bilong Nifai tu.

20 Na em lukautim dispela rekot long eitpela ten foa krismas, na bel isi i bin i stap yet long graun, tasol wanpela liklik hap lain long ol pipol ol i bin sakim tok long sios na kolim ol yet ol lain bilong Leman, olsem na ol lain bilong Leman ol i stat long kamap gen long graun.

21 Na em i kamap we Amos idai tu, (na em i wan handret na nainpela ten foa krismas long taim Krais i bin kam) na pikinini bilong em Amos i bin lukautim rekot long ples bilong em, na em tu i bin lukautim rekot long ol plet bilong Nifai, na rekot tu bin raitim long buk bilong Nifai, em i dispela buk.

22 Na em i kamap we tu handret krismas i go pas, na olgeta pipol long namba tu jeneresen ol i bin idai, tasol liklik namba long ol ol i bin i stap.

23 Na nau mi, Momon, laikim olsem yupela mas save olsem ol pipol ol i bin kamap planti, inap long ol karamapim olgeta pes bilong graun, na olsem ol kamap ol pipol bilong planti moni samting, bikos long bilip bilong ol long Krais.

24 Na nau, insait long tu handret na wan krismas, sampela lain namel long ol ol i stat long apim ol yet long hambak, olsem long pasim ol klos i dia tumas, olgeta kainkain naispela kina tru, na ol naispela samting bilong graun.

25 Na ol i no moa skelim ol samting bilong ol namel long ol yet long dispela taim i go yet.

26 Na ol i stat long bruk i go long pasin moniman na puaman, na ol i stat long kirapim ol sios bilong ol yet long kisim samting bilong graun, na ol i stat long tok nogat long trupela sios bilong Krais.

27 Na em i kamap we planti sios i bin kamap long graun taim tu handret na wanpela ten krismas i go pas, ye, planti sios ol i bin tok olsem ol i save long Krais, tasol, ol i tok nogat long bikpela tru hap tok long gutnius bilong em, na ol i larim olgeta kainkain pasin nogut kamap insait long sios bilong ol, na givim samting em i holi long man em i bin tambu long kisim bikos long pasin doti.

28 Na dispela sios i bin kamap bikpela tru long namba bikos long pasin nogut bilong ol pipol, na bikos long pawa bilong Satan long winim bel bilong ol.

29 Na gen, narapela sios i bin tok nogat long Krais, na ol pesekiutim ol memba long trupela sios bilong Krais, bikos long pasin daunim bel bilong ol na bilip bilong ol long Krais, na ol i tok nogut long ol bikos long planti mirakel ol i bin wokim namel long ol.

30 Olsem na, ol memba bilong sios ol i tok nogat long Krais na ol i bin yusim pawa na atoroti long bosim ol disaipel bilong Jisas em i bin i stap wantaim ol, na ol tromoim ol go long kalabus, tasol, pawa long toktok bilong God, em i bin i stap wantaim ol, na i bin brukim haus kalabus long namel, na ol i bin go aut long wokim planti traipela mirakel tru namel long ol.

31 Tasol, inap long olgeta long ol dispela mirakel i bin wokim, tasol ol pipol ol i bin kamapim belhat bilong ol, na ol i bin traim long kilim ol, wankain olsem ol lain bilong Juda ol i bin traim long kilim Jisas, olsem Jisas i bin tok.

32 Na ol i bin tromoi ol i go insait long paia i tuhat, na ol i kamaut, na paia i no kukim ol.

33 Na tu ol i tromoi ol i go insait long ples bilong ol wail animal, na ol pilai wantaim ol wail animal wankain olsem wanpela liklik pikinini i save pilai wantaim pikinini sipsip, na ol i kamaut long ol, na ol wail animal i no bagarapim ol.

34 Tasol, ol pipol ol i bin kamapim belhat bilong ol, long wanem, planti pris na giaman profet ol i bin lidim ol long kirapim planti sios, na wokim olgeta kainkain pasin nogut. Na ol i paitim ol pipol bilong Jisas, tasol ol pipol bilong Jisas ol i no bekim bek. Olsem na, bilip bilong ol i paul isi isi i go olgeta, na ol i wokim pasin nogut, long wanpela krismas i go long narapela krismas, i go inap long tu handret na tripela ten krismas i go pas.

35 Na nau em i kamap we long dispela krismas, ye, long tu handret na tripela ten wan krismas, wanpela bikpela bruk tru i bin kamap namel long ol pipol.

36 Na em i kamap we long dispela Krais, wanpela pipol we ol i kolim ol yet ol lain bilong Nifai ol i bin kamap, na ol lain i bilip trutru long Krais, na namel long ol i bin i stap ol lain we ol lain bilong Leman ol i bin kolim—ol lain bilong Jekop, ol lain bilong Josep na ol lain bilong Joram;

37 Olsem na, trupela bilip lain bilong Krais, na trupela lotu lain bilong Krais, (wantaim ol tripela disaipel bilong Jisas ol i mas weit ol i bin i stap namel long ol) ol i bin kolim ol lain bilong Nifai, ol lain bilong Jekop, ol lain bilong Josep, na ol lain bilong Joram.

38 Na em i kamap we ol lain ol i les long gut nius ol i bin kolim ol lain bilong Leman, ol lain bilong Lemuel, na ol lain bilong Ismael, na bilip bilong ol i no paul isi isi i go olgeta, tasol ol i bin laikim long sakim tok long gutnius bilong Krais, na ol i lainim ol lain pikinini bilong ol olsem ol noken bilip, wankain olsem ol tumbuna papa bilong ol long i stat tru ol i bin les long bilip.

39 Na em i bikos long pasin nogut na pasin les nogut tru bilong ol tumbuna papa bilong ol, wankain olsem long i stat tru. Na lain pikinini bilong ol i bin lain long hetim ol lain pikinini bilong God, wankain olsem ol lain bilong Leman ol i bin lain long hetim ol lain pikinini bilong Nifai long i stat tru.

40 Na em i kamap we tu handret na fopela ten foa krismas i go pas, na sindaun bilong ol pipol i kamap olsem. Na ol pipol ol i kamap lain nogut stret ol i kamap strong, na namba bilong ol i kamap moamoa yet na winim ol pipol bilong God.

41 Na ol i wok yet long kirapim sios bilong ol yet, na bilasim ol wantaim olgeta kainkain samting diatumas. Na tu handret na faipela ten krismas, na tu tu-handet na sikispela ten krismas i pinis olsem.

42 Na em i kamap we ol pasin nogut lain long ol pipol i stat gen long kirapim tok hait pasin tok tru antap na kainkain pasin nogut bilong Gadianton.

43 Na tu ol pipol ol i bin kolim ol pipol bilong Nifai i stap long wokim pasin hambak long bel bilong ol, bikos long planti moni tru samting bilong ol, na ol i kamap samting nating wankain olsem ol lain brata bilong ol, lain bilong Leman.

44 Na ol disaipel ol i stat long sore long dispela taim, bikos long ol sin bilong graun.

45 Na em i kamap we taim tri handret krismas i pinis, ol pipol bilong Nifai wantaim ol pipol bilong Leman ol i kamap wankain long wokim pasin nogut tru.

46 Na em i kamap we ol stil lain bilong Gadianton i karamapim olgeta pes bilong graun, na nogat wanpela bilong ol i bin i stap stret, tasol em ol disaipel bilong Jisas tasol. Na ol i bin bungim planti gol na silva, na salim na baim olgeta kainkain samting.

47 Na em i kamap we bihain long tri handret na faipela krismas i pinis, (na ol pipol i stap yet long wokim pasin nogut) Amos idai, na brata bilong em, Amaron, i lukautim rekot long ples bilong em.

48 Na em i kamap we taim tri handret na tupela ten krismas i pinis, Holi Spirit i bin tokim Amaron long haitim ol holi rekot—ye, tru tumas, olgeta holi rekot em i bin givim i kam daun long wanpela jeneresen i go long narapela jeneresen—i kam daun inap long tri handret na tupela ten krismas long taim Krais i bin kam.

49 Na em i haitim ol bilong Bikpela, olsem ol bai kam gen long wanwan lain long haus bilong Jekop, olsem long ol profesi na promis bilong Bikpela. Na rekot bilong Amaron i pinis olsem.