Buk Bilong Inos

1 Lukim, em i kamap we mi, Inos, i bin save olsem papa bilong mi i bin wanpela stretpela man—long wanem, em i bin lainim mi long tok ples bilong em, na tu long toktok bilong Bikpela—na mi blesim nem bilong God bilong mi long dispela—

2 Na mi bai tokim yupela long pait mi bin gat insait long mi yet long ai bilong God, pastaim long ol sin bilong mi bin raus.

3 Lukim, mi bin go long bus long painim ol enimol, na ol toktok mi bin harim papa bilong mi toktok planti taim long laip oltaim oltaim, wantaim amamas bilong ol seint, i bin go daun insait long bel bilong mi.

4 Na sol bilong mi i bin hangre, na mi brukim sukuru long pes bilong Papa bilong mi, na mi bin krai long em long strongpela beten na askim em long sol bilong mi, na mi bin krai long em olgeta de long dispela taim, ye, na mi bin singaut long mekim strongpela beten i go inap long tudak i bin kamap na beten bilong mi i bin go antap long heven.

5 Na wanpela nek i bin kam long mi, olsem: Inos, ol sin bilong yu em mi pogivim, na yu bai kisim blesin.

6 Na mi, Inos, i bin save olsem God bai i no inap giaman, olsem na, God i bin rausim rong bilong mi.

7 Na mi askim: Bikpela, dispela i bin kamap olsem wanem?

8 Na em bekim long mi: Bikos long bilip bilong yu long Krais, em yu no bin harim o lukim bipo. Na planti krismas bai go pas na em bai soim em yet long skin, olsem na, go, bilip bilong yu i bin mekim yu kamap wanpela olgeta long bodi na spirit.

9 Nau, em i kamap we taim mi harim ol dispela toktok, mi stat long sore long sindaun bilong ol lain brata bilong mi, ol lain bilong Nifai, olsem na, mi bin kapsaitim olgeta sol bilong mi long God long ol.

10 Na taim mi pait wantaim spirit insait long mi olsem lukim, nek bilong Bikpela i bin kam long ting ting bilong mi gen olsem: Mi bai visitim ol lain brata bilong yu olsem long strong bilong ol long bihainim ol lo bilong mi. Mi bin givim dispela graun long ol, na em i wanpela holi graun, na mi bai i no inap kesim ol sapos ol i no wokim pasin nogut, olsem na, mi bai visitim ol lain brata bilong yu olsem mi toktok, na mi bai bringim sore long het bilong ol i yet sapos ol brukim lo.

11 Na bihain mi, Inos harim ol dispela toktok, bilip bilong mi long Bikpela i stat long kamap strong, na mi beten long em wantaim planti strong na longpela taim tru insait long mi long ol lain brata bilong mi, ol lain bilong Leman.

12 Na em i kamap we bihain mi beten na wok wantaim olgeta strong, Bikpela i bin tokim mi: Mi bai givim long yu wanem yu laikim bikos long bilip bilong yu.

13 Na nau lukim, laik bilong mi, mi bin gat long Bikpela i olsem—sapos ol pipol bilong mi ol lain bilong Nifai, bai ol i brukim lo inap long ol bai kisim bagarap na ol lain bilong Leman bai i no inap kisim bagarap, olsem God bikpela bai lukautim i stap wanpela rekot bilong ol pipol bilong mi, ol lain bilong Nifai tru tumas sapos em i ken wantaim pawa bilong holi han bilong em, inap long dispela rekot bai kamap long ol lain bilong Leman long sampela de long bihain taim, olsem Bikpela bai bringim ol i kam long kisim selvesen—

14 Long wanem, mipela i painim hat tru long bringim ol kam long trupela bilip long nau taim. Na ol i bin tok tru antap long belhat bilong ol olsem sapos ol i ken, ol bai bagarapim ol rekot bilong mipela wantaim mipela, na tu olgeta kastam bilong ol lain tumbuna papa bilong mipela.

15 Olsem na, bikos mi bin save olsem God Bikpela ken lukautim i stap ol rekot bilong mipela, mi bin krai long em olgeta taim, long wanem, em i bin tokim mi: Wanem samting yu bai askim wantaim bilip, na ting olsem yu bai kisim long nem bilong Krais, em yu bai kisim.

16 Na mi bin gat bilip, na mi bin krai long God olsem em bai lukautim i stap ol rekot, na em i bin promis long mi olsem em bai kisim kam ol rekot long ol lain bilong Leman long taim stret bilong em yet.

17 Na mi, Inos, i bin save olsem God Bikpela bai wokim olsem em i bin promis, olsem na, sol bilong mi i bin malolo.

18 Na Bikpela i bin tokim mi: Ol tumbuna papa bilong yu tu i bin laikim mi long wokim wankain samting, olsem na mi bai wokim long bilip bilong ol, long wanem, bilip bilong yu i wankain olsem bilip bilong ol.

19 Na nau em i kamap we, mi, Inos, i bin go namel long ol pipol bilong Nifai, na profesai long ol samting long kam long bihain taim na autim long ol, ol samting mi bin harim na lukim.

20 Na mi witnes olsem ol pipol bilong Nifai i bin traim hat tru long bringim bek ol lain bilong Leman long trupela bilip long God. Tasol ol wok bilong mipela i bin nating, belhat bilong ol long mipela i bin strong yet, na bikos long sindaun nogut bilong ol, ol i bin kamap wail, na kamap lain bilong pait, na kamap wanpela pipol ol i nek drai long blut, kamap ol lain bilong lotuim god-giaman na wokim pasin nogut stret, ol i bin kaikaim ol enimol em ol i save kaikaim narapela enimol, ol i bin i stap long ol haus sel,na raun nabaut long ples we nogat man i stap, pasim as tanget olsem klos na sapim gras long het bilong ol, na save bilong ol i bin i stap long yusim banara, na huknaip na tamiok. Na planti bilong ol i nogat kaikai, tasol ol i bin kaikai abus wantaim blut, na ol i bin traim long bagarapim mipela olgeta taim.

21 Na em i kamap we ol pipol bilong Nifai i bin brukim graun, na planim ol kainkain rais samting, na ol prut, na lukautim ol enimol, na ol kainkain bulmakau, na ol meme, na ol meme bilong bus na tu ol planti hos.

22 Na planti profet i bin kam namel long mipela. Na ol pipol i bin kamapim bikhet long ol, olsem na, ol i bin painim hat long save long ol samting ol profet i bin toktok.

23 Na nogat wanpela samting tasol strongpela toktok long autim toktok bilong God na profesi long ol bikpela pait, na ol tok pait, na ol bagarap, na tokim ol gen olgeta taim long idai, na laip long laip oltaim oltaim, na ol jasmen wantaim pawa bilong God, na olgeta dispela samting i bin tanim bel bilong ol olgeta taim na long ol i mas poret long Bikpela. Mi tok nogat wanpela isi toktok tasol kain strongpela toktok klia tru, olsem bin pasim ol long kisim bagarap hariap tru. Na bihain long dispela mi bai rait olsem long ol lain bilong Nifai.

24 Na mi bin lukim planti bikpela pait i bin kamap namel long ol lain bilong Nifai na ol lain bilong Leman long ol de bilong mi.

25 Na em i kamap we mi bin i stat long kamap lapun, na wan handret na sevenpela ten nain krismas i bin go pas pinis, long taim tumbuna papa bilong mipela Lihai i bin lusim Jerusalem.

26 Na mi bin lukim olsem mi mas klostu idai, bihain long pawa bilong God i bin wok long mi long autim toktok na profesai long dispela pipol, na autim toktok olsem longtok tru, em i stap long Krais. Na mi bin autim dispela toktok long olgeta de bilong mi, na mi bin amamas long em moa long ol samting bilong graun.

27 Na mi bai klostu go long ples bilong malolo bilong mi, we Ridima bilong mi i stap, long wanem, mi save olsem mi bai malolo bikos long em. Na mi amamas long de we bodi bilong mi long skin bai pasim bodi i no inap idai, na sanap long pes bilong em, na bai mi lukim pes bilong em wantaim amamas, na em bai tokim mi: Kam long mi, bles yu, wanpela ples em i redi bilong yu insait long bikpela haus bilong Papa bilong mi. Amen.