1 Na nau bihain long sampela krismas i bin go pas, na wanpela man, nem bilong em Serem i bin kamap namel long ol pipol bilong Nifai.

2 Na em i kamap we Serem i stat long autim toktok namel long ol pipol, na em i tokim ol olsem Krais bai i no inap kam. Na planti samting em i bin autim long ol pipol i toktok bilong kirapim bel, na em i bin kirapim bel bilong ol pipol olsem em bai daunim doktrin bilong Krais.

3 Na em i bin wok hat olsem em bai paulim bel bilong ol pipol long winim, na em i bin winim bel bilong planti pipol, na bikos em i bin save olsem mi, Jekop, gat bilip long Krais em bai kam, olsem na, em i bin painim planti rot long kam long mi.

4 Na em man bilong bikpela save, inap long em i bin save gut tru tok ples bilong ol pipol, olsem na, em i bin kirapim bel nogut tru wantaim strongpela toktok olsem long pawa bilong tewel.

5 Na Serem i bin gat bikpela tingting long sakim mi long bilip bilong mi, tasol em i no bin sakim mi, bikos mi bin lukim planti revelesen na planti samting long dispela samting, long wanem, tru tumas mi bin lukim ol ensel, na ol i bin minista long mi. Na tu, mi bin harim nek bilong Bikpela na em i tok long mi wantaim maus bilong em tru, long wanwan taim, olsem na, em bin painim hat long sakim mi.

6 Na em i kamap we em i bin kam long mi na tok olsem: Brata, Jekop, mi bin painim planti rot olsem mi bai toktok long yu, long wanem, mi bin harim na save tu olsem yu save go raun planti taim, na toktok long samting yu kolim gut nius, o doktrin bilong Krais.

7 Na yu bin paulim planti pipol inap long ol kurungutim stretpela rot bilong God, na ol i no bihainim ol lo bilong Moses em i stretpela rot, na tanim lo bilong Moses i go long lotuim wanpela man em yu tok bai kam planti handret krismas long bihain taim. Na nau lukim, mi, Serem tokim yu olsem dispela em yu tok bilas long God, long wanem, nogat wanpela man i save long kain samting olsem, long wanem, nogat wanpela man bai tokaut long kain samting bai kamap long bihain taim. Na bihain Serem i bin tok pait wantaim mi olsem.

8 Tasol lukim, God Bikpela i bin kapsaitim Spirit bilong em long sol bilong mi, inap long mi bin paulim em long olgeta toktok bilong em.

9 Na mi tokim em: Yu tok nogat long Krais em bai kam? Na em i tok: Mi bai i no inap tok nogat, sapos Krais i stap, tasol mi save olsem Krais bai nogat, na tu em i no bin i stap na em bai no inap i stap.

10 Na mi tokim em: Yu save bilip long ol skripsa? Na em tok, ye.

11 Na mi tokim em: Yu tok yu bilip long ol skripsa tasol yu no save long ol, long wanem, tru tumas ol witnes long Krais. Lukim, mi tokim yu olsem olgeta profet i bin raitim na profesai long dispela Krais.

12 Na i no dispela tasol, mi bin lukim, long wanem, mi bin harim na lukim, na tu mi bin lukim wantaim pawa bilong Holi Spirit, olsem na, mi save olgeta manmeri bai lus sapos atonmen i no kamap.

13 Na em i kamap we em i tokim mi: Soim wanpela mak long mi wantaim dispela pawa bilong Holi Spirit, long em yu save gut tru long em.

14 Na mi tokim em: Mi em wanem long mi bai traim God long soim yu wanpela mak long samting yu save pinis i tru? Yu save Krais i stap tasol yu tok nogat bikos yu bihainim tewel. Tasol, i no laik bilong mi na bai kamap, tasol sapos God bai paitim yu, larim dispela em bai kamap mak long yu olsem em gat pawa, long heven na tu long graun, na tu, olsem Krais bai kam. Na laik bilong yu bai kamap, O Bikpela, na i no laik bilong mi.

15 Na em i kamap we taim mi, Jekop, autim ol dispela toktok, pawa bilong Bikpela i bin kamap long em, inap long em i bin pundaun long graun. Na em i kamap we ol man i bin lukautim em long planti de.

16 Na em i kamap we em i bin tokim ol pipol: Bung wantaim tumora, long wanem, mi bai idai, olsem na, mi laik toktok long ol pipol pastaim mi bai idai.

17 Na em i kamap we planti pipol i bin bung wantaim long dispela de, na em i bin mekim klia toktok tru long ol na tok nogat long ol samting i em bin lainim ol, na tok olsem em bilip olsem Krais i stap, na long pawa bilong Holi Spirit, na long ministri bilong ol ensel.

18 Na em i bin tok klia tru long ol olsem pawa bilong tewel i bin paulim em. Na em i bin toktok long hel, na long laip oltaim oltaim wantaim pen oltaim oltaim.

19 Na em i bin tok: Mi poret, bikos mi wokim sin i no bilong pogivim, long wanem, mi bin giaman long God, long wanem, mi bin tok mi no save long Krais, na tok olsem mi bilip long ol skripsa, na tru tumas ol skripsa em i witnes long Krais. Na bikos mi bin giamanim God olsem, mi poret nogut tru na nogut kot bilong mi bai kamap nogut tru, tasol mi konpes long God.

20 Na em i kamap we taim em i autim ol dispela toktok, em i no moa tok tok, na em idai.

21 Na taim planti pipol witnes olsem em i bin autim ol dispela samting na taim em i klostu idai, ol i bin kirap nogut tru; olsem long pawa bilong God i bin kam daun long ol long winim ol olsem na ol i bin pundaun long graun.

22 Na mi Jekop i bin amamas long dispela samting, long wanem, mi bin askim Papa bilong mi em i stap long heven long em, long wanem, em i bin harim krai bilong mi na bekim beten bilong mi.

23 Na em i kamap we bel isi wantaim lav bilong God i bin kamap gen namel long ol pipol, na ol i bin lainim ol skripsa, na ol i no moa harim ol toktok bilong dispela man igat pasin nogut.

24 Na em i kamap we mipela i bin kamapim planti rot long kisim bek na lainim gen ol lain bilong Leman long save long tok tru, tasol olgeta rot i no wok, long wanem, ol lain bilong Leman i bin amamas long pait na kapsaitim blut, na ol i bin gat belhat oltaim oltaim long mipela, ol lain brata bilong ol. Na ol i bin traim long bagarapim mipela wantaim pawa bilong ol samting bilong pait bilong ol long olgeta taim.

25 Olsem na, ol pipol bilong Nifai i bin banisim ol yet long ol lain bilong Leman wantaim ol samting bilong pait bilong ol, na wantaim olgeta strong bilong ol, na long bilip long God na ston bilong selvesen bilong ol, olsem na, ol i bin winim birua bilong ol long olgeta taim.

26 Na em i kamap we mi, Jekop, i stat long kamap lapun, na bikos rekot bilong dispela pipol i stap long ol narapela plet bilong Nifai, olsem na, mi pinisim dispela rekot, na tok olsem mi raitim olsem long save stret bilong mi, na tok olsem taim i pinis hariap tru, na tu laip bilong mipela i bin pinis hariap tru wankain olsem mipela i bin lukim wanpela driman, bikos mipela em ol wanpela lain mipela i bin i stap mipela yet na wanpela pipol bilong sore, na ol pipol bilong raun nabaut, ol i bin rausim mipela long Jerusalem, na bin karim mipela long bikpela pen tru long ples we nogat man i stap, na ol lain brata bilong mipela i bin les long mipela, ol i kirapim bikpela pait na tok pait, olsem na, mipela i bin i stap long sore long ol de bilong mipela.

27 Na mi, Jekop, lukim olsem mi bai klostu idai, olsem na, mi tokim pikinini man bilong mi Inos: Kisim ol dispela plet. Na mi toktok long em long ol samting brata bilong mi Nifai i bin tokim mi, na em i bin promis long bihainim ol toktok. Na mi pinisim long raitin ol dispela plet, na ol toktok mi raitim i liklik, na mi tok gutbai long man em bai ritim, na ting olsem planti lain brata bilong mi bai ritim ol toktok bilong mi. Gutbai, ol lain brata.