1 Ngan ine nahitabo nga an ika 34 katuig in naglabay, ngan sugad man adton ika 35, ngan kamatuoran an mga disipolo ni Jesus in nagtukod han simbahan ni Cristo ha ngatanan nga katunaan ha palibot. Ngan kun ano kadamo an umapi ha ira, nga ungod nga nagbasul hadton ira mga sala, in ginbunyagan ha ngaran ni Jesus; ngan hira liwat in kumarawat han Espiritu Santo.

2 Ngan ine nahitabo nga ha ika 36 katuig, an mga tawo ngatanan in bumalik ha Ginoo, ha ngatanan nga katunaan, an mga Nephite ngan mga Lamanite, ngan waray paglalantugi ngan pagtipa-tipa ha butnga nira, ngan kada tawo in maupay an pagkasarosarabot ha kada tagsa.

3 Ngan hira in nagkamayada han ngatanan nga butang paropareho nga aada ha ira; sanglit waray riko ngan kablas, uripon o libre, kundi hira ngatanan in nagin libre, ngan kasaro hadton langitnon nga hatag.

4 Ngan ine nahitabo nga lumabay adton ika 37 katuig, ngan nagpadayon adton kamurayaw han katunaan.

5 Ngan mayada dako ngan urusahon nga mga buruhaton nga ginhimo han mga disipolo ni Jesus, salit hira in nagpaupay hadton may mga sakit, ngan nagpabuhat hadton mga patay, ngan ginhimo adton mga piay nga makalakat, ngan an mga buta in makakita, ngan an mga bungol in makabati; ngan an ngatanan nga klase hin mga milagro in ira ginbuhat ha anak han katawhan; ngan waray hira ginhimo nga milagro labot la pinaagi han ngaran ni Jesus.

6 Ngan ha sugad nga lumabay an 38 katuig, ngan sugad adton ika 39, ngan ika 41, ngan ika 42, oo, ngan bisan an ika 49 katuig in lumabay, ngan sugad man an ika 51, nga an ika 52; oo, ngan bisan ngada han ika 59 katuig in lumabay.

7 Ngan hira in ginpamainoswagon gud han Ginoo ha katunaan; oo, ngan salit nagtukod na liwat hira hin mga siyudad didto kun diin an mga siyudad in nasunog.

8 Oo, ngan bisan an dako nga siyudad han Zarahemla in ira ginhimo nga matukod ngahaw.

9 Kundi damo nga mga siyudad an nalunod, ngan an tubig an sumaliwan hadto nga mga lugar; sanglit ine nga mga siyudad in waray mahibalik.

10 Ngan yana, kitaa, ine nahitabo nga an mga tawo han Nephi in nagin makusog, nga duro hin kadagmit an pagdamo, ngan nagin duro hin kamaanyag ngan makalilipay nga mga tawo.

11 Ngan hira in nag-asawa, ngan iginhatag ha pag-aasawa, nga ginbendisyonan sugad han kadam-an nga mga saad nga ginhimo han Ginoo ngadto ha ira.

12 Ngan waray na hira lumakat pa ha pagsunod han mga pagtuman ngan mga ordinansa han balaod ni Moises; kundi hira in naglakat subay han mga kasugoanan nga ira kinarawat tikang han ira Ginoo ngan ira Diyos, nagpadayon hin pagpuasa ngan pag-ampo, ngan masukot nga pagka-urosa hin katitirok agud mag-ampo ngan manmati han mensahe han Ginoo.

13 Ngan ine nahitabo nga waray magkaada hin paglantugi han ngatanan nga mga tawo, ha bug-os nga katunaan; kundi mayada makusog nga mga milagro nga ginhimo hadton mga disipolo ni Jesus.

14 Ngan ine nahitabo nga an ika 71 katuig in lumabay, ngan adton ika 72 katuig, oo, ha halipot nga pulong, ngada han ika 79 katuig in lumabay; oo, bisan adton ika 100 katuig in lumabay na, ngan adton mga disipolo ni Jesus, nga iya ginpili, in pumakadto ha paraiso han Diyos, labot hadton tutulo nga magpapabilin; ngan mayada liwat iba nga mga disipolo nga naordinahan saliwan ha ira; ngan damo liwat hadto nga katulinan in nagkamatay na.

15 Ngan ine nahitabo nga waray paglalantugi dida han katunaan, tungod han paghigugma han Diyos nga aada han mga kaburut-on han mga tawo.

16 Ngan waray mga pagkaawa, ngan mga pagkabirubingkil, ngan mga kasamok, ngan mga paglilibog, ngan mga pagbinuwa, ngan mga panmatay, ngan bisan ano nga malaw-ay nga mga binuhatan; ngan segurado nga waray na gud iba pa nga maglipayon nga mga tawo labot han mga tawo nga ginhimo han kamot han Diyos.

17 Ngan waray mga tikasan, ngan bisan mga parapanmatay, nagkamayada hin mga Lamanite, o ano man nga klase hin mga -ites; kundi hira in nagkakaurosa, an mga anak ni Cristo, ngan mga tagasunod han ginhadian han Diyos.

18 Ngan ano nga mga bendisyon an nahingada ha ira! Kay an Ginoo in nagbendisyon han ira ngatanan nga mga binuhatan; oo, bisan hira in ginbendisyonan ngan ginpauswag ngada han ika 110 katuig in naglabay; ngan an una nga katulinan tikang kan Cristo in nagkamatay na, ngan waray liwat naglalantugi ha ngatanan nga katunaan.

19 Ngan ine nahitabo nga hi Nephi, hiya nga naghihimos han katapusan nga mga sinurat, (ngan iya igin-ukit ha mga lamina ni Nephi) namatay, ngan an iya anak nga hi Amos in naghimos nga saliwan ha iya; ngan igin hipos liwat adto dida han mga lamina ni Nephi.

20 Ngan gintipigan niya ine hin 84 katuig, ngan mayada pa kamurayawan ha katunaan, labot la nga adton gutiay nga bahin han tawo in nakiglaris ha simbahan ngan gin-angkon nira adton ngaran han mga Lamanite; sanglit nagtikang liwat hin mga Lamanite han katunaan.

21 Ngan ine nahitabo nga hi Amos in namatay liwat, (ngan ine in 194 katuig tikang han pagabot ni Cristo) ngan an iya anak nga hi Amos in sumaliwan ha iya paghipos han mga sinurat; ngan ginhipos liwat niya adto dida han mga lamina ni Nephi; ngan adto in iginsurat liwat ha libro ni Nephi, nga amo ine nga libro.

22 Ngan ine nahitabo nga 200 katuig in lumabay; ngan adton ikaduha nga mga katulinan in nagkamatay ngatanan labot la han pipira pa.

23 Ngan yana ako, hi Mormon, in naruruyag nga angay niyo mahibaroan nga an mga tawo in nagtikadamo, salit hira in nagsarang ha bawbaw han tuna, ngan hira in nagin duro hin kariko, tungod han ira kauswagan kan Cristo.

24 Ngan yana, dinhe ha ika 201 katuig nagtikang an iba ha ira hin paghataas an mga bout, sugad han pagsusul-ot hin mga marahalon nga mga panapton, ngan ngatanan nga klase hin mahusay nga mga perlas, ngan hadton mga mag-upay nga waray kinabuhi nga mga butang ha kalibutan.

25 Ngan tikang hadto nga panahon an ira mga propyedad ngan mga katigayonan in dire pareho ha tagsa-tagsa ha ira.

26 Ngan hira in nagtikang hin pagkabahin-bahin; ngan nagtikang hin pagtukod hin mga simbahan ha ira mga kalugaringon agud makakuha hin tubo, ngan nagtikang hin igwaray bale adton tinuod nga simbahan ni Cristo.

27 Ngan ine nahitabo nga lumabay adton ika 210 katuig ngan damo adton mga simbahan ha katunaan; oo, damo nga mga simbahan adton nag-aangkon nga maaram hira kan Cristo, kundi iginbabali-waray adton damo nga bahin han iya ebanghelyo, salit nasugad nga ira kinakarawat an ngatanan nga mga binuhatan hin karaotan, ngan nagdudumara hira han mga sagrado nga mga butang ngadto ha iya bisan kun hiya in gindidid-an tungod han iya ka dire angay.

28 Ngan ine nga simbahan in nagtikadamo hin duro tungod han karaotan, ngan tungod han gahum ni Satanas nga nagkakapot han ira mga abilidad.

29 Ngan liwat, mayada iba nga simbahan nga iginbali-waray hi Cristo; nga ginpapakaraot adton tinuod nga simbahan ni Cristo, tungod han ira pagigin mainobsanon ngan pagtuo kan Cristo; hira in gintatamay tungod han damo nga mga milagro nga ginbuhat ha butnga nira.

30 Sanglit hira in gumamit han gahum ngan katungod ha bawbaw hadton mga disipolo ni Jesus nga nagpabilin dida ha ira, ngan hira in iginlabog ngadto ha prisohan; kundi pinaagi han gahum han pulong han Diyos, nga nakada ha ira, an mga prisohan in natunga, ngan hira in nagpadayon pagbuhat hin dagko nga mga milagro ha butnga nira.

31 Masugad man, ngan ha luyo hine han ngatanan nga mga milagro, ginpatig-a han mga tawo an ira mga kasingkasing, ngan karuyag nga hira in patayon, bisan sugad hadton mga Judiyo ha Jerusalem nga nag-ungara hin pagpatay kan Jesus, subay hadton iya tugon.

32 Ngan hira in iginlabog ngadto han hudno han kalayo, ngan hira in gumawas nga waray ul-uli.

33 Ngan hira liwat in iginlabog ngadto han lungib han maisog nga mga hayop, kundi hira in nakigmolay sugad han bata ngan han usa nga nati nga karnero; ngan hira in gumawas tikang ha ira, ngan waray ul-uli.

34 Bisan pa man, adton mga tawo in ginpatig-a an ira mga kasingkasing, kay hira in ginmamangolohan hadton damo nga mga saserdote ngan mga dire tinuod nga mga propeta agud magtukod hin damo nga simbahan, ngan pagbuhaton an ngatanan nga klase hin karaotan. Ngan hira in nagpasakit han mga tawo ni Jesus; kundi adton mga tawo ni Jesus in waray bumulos. Sanglit hira in nagtikainos ngadto ha kawaray hin pagtuo ngan nagin magraot, ha kada tuig bisan ngadto han ika 230 katuig in lumabay.

35 Ngan yana ine nahitabo hine nga tuig, oo, han ika 231 katuig, nagkamayada hin dako nga pagkabahin dida han mga tawo.

36 Ngan ine nahitabo nga hine nga tuig lumutaw in mga tawo nga gintatawag nga mga Nephite, ngan hira in tinuod nga mga natuo kan Cristo; ngan ha hugpo nira mayada gintatawag nga mga Lamanite — mga Jakobite, ngan mga Josephite, ngan mga Zoramite;

37 Sanglit adton tinuod nga nanunuod kan Cristo, ngan an tinuod nga nag-aampo kan Cristo, (kaupod hine adton tulo nga disipolo ni Jesus nga nagpabilin) in gintawag nga mga Nephite, ngan mga Jakobite, ngan mga Josephite, ngan mga Zoramite.

38 Ngan ine nahitabo nga adton waray kumarawat han ebanghelyo in gintatawag nga mga Lamanite, ngan mga Lemuelite, ngan mga Ismaelite; ngan hira waray pagtikainos han ira pagtuo, kundi hira in tinuyo nga nakiglaris kontra han ebanghelyo ni Cristo; ngan ira gintutdoan an ira mga anak nga dire tumuod, sugad han ira mga kaapoy-apoyan, tikang ha tinikangan, in nagtikawaray pagtuo.

39 Ngan ine tungod hadton karaotan ngan kamalaris han ira mga kaapoy-apoyan, bisan sugad han tinikangan. Ngan hira in gintutdoan nga masina ngadto han mga anak han Diyos, bisan sugad han mga Lamanite nga gintutdoan nga masina hadton mga anak ni Nephi tikang ha tinikangan.

40 Ngan ine nahitabo nga 244 katuig an nakalabay, nga amo adton nabuhat han mga tawo. Ngan adton damo nga magraot nga parte han mga tawo in nagtikakusog, ngan nagtikadamo kontra hadton mga tawo han Diyos.

41 Ngan hira in nagpadayon hin pagtukod hin mga simbahan para ha ira kalugaringon, ngan ginbutangan nira adto hin ngatanan nga klase hin marahalon nga waray kinabuhi nga mga butang. Ngan nasugad nga an ika 250 katuig in lumabay, ngan liwat an 260 katuig in lumabay.

42 Ngan ine nahitabo nga adton magraot nga bahin han mga tawo in nagtikang pagtukod hin sekreto nga pagsumpa ngan pagkunsabo sugad han kan Gadianton.

43 Ngan liwat adton mga tinatawag nga mga tawo ni Nephi in nagtikang magin mapinahitas-on ha ira mga abilidad, tungod han ira duro nga karikohan, ngan nagin mapinahitas-on sugad han ira mga kabugtoan, an mga Lamanite.

44 Ngan tikang yana nga takna an mga disipolo nagtikang magmabido para han mga sala han kalibutan.

45 Ngan ine nahitabo nga han paglabay hadton ika 300 katuig, an mga tawo ni Nephi ngan mga Lamanite in nagin duro hin kamagraot sugad han kada tagsa.

46 Ngan ine nahitabo nga an mga tikasan ni Gadianton in nagsarang ha bug-os nga katunaan; ngan waray man usa nga matadong labot la hadton mga disipolo ni Jesus. Ngan hira in naghimos hin damo nga bulawan ngan salapi nagnegosyo hin ngatanan nga klase hin negosyo.

47 Ngan ine nahitabo nga kahuman han ika 305 katuig nga naglabay, (ngan an mga tawo in nagpadayon hin kamagraot) hi Amos namatay; ngan an iya bugto, Ammaron, in sumaliwan hin paghimos han sinurat.

48 Ngan ine nahitabo nga paglabay han ika 320 katuig, hi Ammaron, napirit pinaagi han Espiritu Santo, gintago adton mga mga sinurat nga mga sagrado — Oo, bisan adton ngatanan nga mga sagrado nga sinurat nga ginpanunod tikang han katulintulinan, nga mga sagrado — bisan ngadto han ika 320 katuig tikang han pag-abot ni Cristo.

49 Ngan iya gintago ngadto ha Ginoo, agud mahibalik hira hin otro ngadto han nahisalin han sulod balay ni Jakob, subay han mga panagna ngan mga panaad han Ginoo. Ngan asya ine an katapusan han sinurat ni Ammaron.