1 Le tún cah dzoʼoc u maʼn u haʼab treintiʼcuatro beyxann treintiʼcinco, heʼel túna le doce maʼcoʼob yéyaʼan tumen Jesuseʼ, dzoʼoc u liksicoʼob u Iglesia Cristo to tiʼ tulácal le luʼumoʼob tu baʼpachoʼoboʼ. Haytúl maʼc cu bin pachoʼoboʼ. Haytúl maʼc cu bin le tuʼux yanoʼoboʼ wá cu kexic u tuculoʼob yétel baʼax cu betiʼcoʼobe ti u kebanoʼob hach tu hahileʼ, cu dzaʼabal u yoc haʼoʼob tu kabaʼ Jesus, yétel cu kamicoʼob xan le Hahil Pixanoʼ.

2 Tiʼ u haʼabil treintiʼseis tulácal maʼcoʼob h creernahoʼob tiʼ Yumtsil, tiʼ tulácal le luʼumoʼ, heʼebix le u palal Nefi beyxann le u palal Laman; minaʼan mix baʼatel ichiloʼob yétel cu betiʼcoʼob baʼaxoʼob u deber yétel toh tu batsilʼob.

3 Tulácal baʼal yaneʼ utiaʼal tulácal maʼc; le betiʼque minaʼan ótsiloʼob mix ayikaloʼob, mix meyhiloʼob maʼc mix halkabiloʼob chén baʼaleʼ tulácal maʼc yan u halkibil yétel cu kamic u bendicionoʼob tiʼ le caʼanil.

4 Tiʼ u haʼabil treintiʼsieteʼ anchah paz tu luʼumil.

5 Le doce maʼcoʼob yeyaʼan tumen Jesuseʼ cu betiʼcoʼob nuctac yétel hach maʼalob meyahoʼob, cu dzaquiʼcoʼob wá kohaʼanoʼob, cu liʼquiʼntiʼcoʼob quiʼmenoʼob, cu betiʼcoʼob u ximbal maʼalob le maʼxoʼob cu quiʼquiʼlanquiʼl cu dzaicoʼob u sásil le chʼopoʼoboʼ, cu betiʼcoʼob u heʼekab u xiquiʼn le cócoʼoboʼ; yétel cu betiʼcoʼob yaʼab u heʼheʼlasil baʼaloʼob ichil u palal maʼcoʼob; yételeʼ maʼ tu betahoʼob baʼaloʼob cu haʼaksicoʼob yól wá maʼ tu kabaʼ Jesusiʼ.

6 Bey tún xan úchic u maʼn u haʼabil treintiʼocho yétel treintiʼnueve, cuarenta, cuarentiʼuno yétel cuarentiʼdos, tac tu haʼabil cuarentiʼnueve, cincuenta, cincuentiʼuno, yétel cincuentiʼdos; bixmaʼiʼ tac cah maʼn u haʼabil cincuentiʼnueve.

7 Yumtsileʼ tu betah u yaʼabtal le baʼal yan tiʼoʼob tiʼ luʼumoʼ; tiʼ beyoʼ ca tu betahoʼob nucuch cahoʼob tu caʼatén, tu cúchil le tuʼux h el le yan caʼachoʼ.

8 Bey ca tu caʼa betahoʼob xan le noh cahil Zaraheʼmla.

9 Baʼaleʼ yan yaʼabcach nucuch cahoʼob h buʼuloʼob, chén haʼ cu yilaʼal tu cúchiloʼob; le betiʼqueʼ, le nucuch cahoʼobaʼ maʼ h pátchah u caʼa betaaloʼobiʼ.

10 Ca tún hach anchah u muktal u cahal Nefi, cah sen yaʼabchah u palaloʼob sebaʼan, hach hadzutschah letiʼoʼob yétel hach cu dzíboltaal.

11 Cu dzoʼocol u beloʼob yétel cu dzaʼabaloʼob utiaʼal dzoʼocol bel, caʼach bendecirtaaboʼob heʼebix u hach prometertahil Yumtsileʼ.

12 Maʼ tu binoʼob tu bel tiʼ u leyil wá ceremoniaoʼob Moiseseʼ, h binoʼob teʼ behoʼob tu maʼndamientoʼob dzoʼoc u kamicoʼob tiʼ u Yumtsil u Diosil, hach chucaʼan u yóloʼob cu suʼukinubaoʼob yétel tun oraroʼob; yaʼab u ténel cu múchʼquiʼntiʼcubaoʼob utiaʼal orar heʼebix utiaʼal u yuʼubiloʼob u tʼan Yumtsiloʼ.

13 Ca tún maʼ tu caxtaal le baʼateloʼob ichil le maʼxoʼob tulácal le luʼumiloʼ; yételeʼ le maʼcoʼob yéyaʼan tumen Jesuseʼ tán u betiʼcoʼob nucuch baʼaloʼob cu haʼaksic yól maʼc.

14 Ca tún h maʼn u haʼabil setentiʼuno yétel setentiʼdos; bixmaʼiʼ, tac u haʼabil setentiʼnueve bey dzoʼoc tac u maʼn cien haʼaboʼob, le maʼcoʼob tu yéyah Jesuseʼ, dzoʼoc u yantaloʼob tu cúchil yétel quiʼmaʼc ólal Hahal Dios; ichiloʼob le heʼeloʼobaʼ maʼ quiʼmiloʼob le óxtúl cun hpʼátaloʼobeʼ; cah tʼaʼan ulak maʼcoʼob igual yétel canibaloʼob, yaʼab xan tiʼ le maʼcoʼob dzoʼoc u químiloʼob.

15 Ca tún h pʼáteʼ minaʼan kuxil teʼ luʼumoʼ, yoʼolal u yacunah Hahal Dios cahaʼan tu pucsiʼkal le kahoʼ.

16 Minaʼan ichiloʼob baʼal cu hach dzíboltiʼcoʼob mix cu tʼan tu contra tu batsiloʼob, maʼ tán u tusoʼob caʼachiʼ, maʼ cu quínsic maʼc xaniʼ, maʼ tun betiʼcoʼob keban yétel u wínclil huntúl maʼc yétel yanal coʼolel, tu hahileʼ minaʼan ulak cahal cu sén quiʼ maʼcchahal u yóloʼob betaan tumen tu kab Hahal Dios.

17 Minaʼan maʼc cu yocoloʼob, mix humpʼél hats ichil, baʼaleʼ humpʼéliloʼob, u palaloʼob Cristo yétel maʼxoʼob tiʼaʼalintiʼc u reinoil Hahal Dios.

18 Bucaʼah úchic u bendecirtaaloʼob. Tumen Yumtsil bendecirtoʼob tiʼ tulácal u meyahoʼob; hah hach bendecirtaaboʼob yétel h betaab u hach yantal u baʼalubaoʼob tac cah maʼn cientodiez haʼaboʼob. Yételeʼ le yáx tataoʼob cuxaʼan le cah tal Cristoeʼ h químoʼob; minaʼan baʼatel tiʼ tulácal le luʼumoʼ.

19 Húch túneʼ Nefieʼ, le dzoc maʼx tu dzibtah tiʼ le laminaoʼobaʼ tu bisah u historiail yókol u u palal Laman Nefi; quiʼmi yétel Amos u paleʼ, h pʼát tu cúchil; yétel tu betah xan yókol u u palal Laman Nefi beyxannoʼ.

20 Ochéntiʼcuatro haʼab tu bisah, yétel lailiʼ yan hi hédzel tiʼ le luʼumoʼ, baʼaleʼ hun hats tiʼ le cah tu xulah u binoʼob teʼ iglesiaoʼ letiʼoʼobeʼ maʼ, yétel tu kabaʼintoʼob u palal Laman; bey tún u cáhal u yantal u palal Laman teʼ luʼum tu caʼaténoʼ.

21 Tiʼ leloʼ ca tún anchah u químil xan Amos (leloʼ tu cientonoventiʼcuatro haʼab desde Cristo). Amos, u paleʼ, letiʼ tu bisah le historia tu cúchiloʼ, láiliʼ tu dzíbtah xan yókol u palal Laman Nefieʼ, hdzíbtaab xan tiʼ u libroil Nefieʼ letiʼ lelaʼ.

22 Dzoʼoc tún u maʼn doscientos haʼabeʼ; tulácal le nohoch maʼcoʼob tiʼ dzocaʼan u químiloʼob, chén dzeʼedzec tiʼ letiʼoʼob h pʼátiʼ.

23 Beʼora, ten, Mormoneneʼ, in kát ca a wohélteʼexeʼ le cahoʼ dzoʼoc u hach yaʼabtal, tiʼ hach yaʼabileʼ, kiʼitpahaʼanoʼob tiʼ tulácal u luʼumil, yétel dzoʼoc u hach ayikalchahaloʼob, yoʼolal u sen maʼalobtal aniloʼob tiʼ Cristo.

24 Baʼalaʼ tiʼ le haʼabaʼ, le doscientos unoaʼ h cáh u yantal ichiloʼobeʼ dzeʼedzec cu yeʼesicoʼob cah liʼsaʼaboʼob tu tuculoʼob cu creertoʼob maʼs maʼalob que ulʼakoʼob. Heʼebix xan le cu búquiʼntiʼcoʼob nokoʼob hach coʼohtacoʼoboʼ, yétel tulácal u heʼheʼlasil perlaoʼob yétel u le baʼax táh hadzutsil yokolcab.

25 Tiʼ tún le kin heʼeloʼ ca tu xulah u yantal u baʼalubaoʼob utiaʼal tulácal.

26 Ca hoʼopʼ u hatsicubaoʼob u heʼheʼlasil clase yétel u betoʼob iglesiaoʼob tu yoʼolal u ayikaltaloʼob; ca hoʼopʼ xan u cáhsic u betiʼcoʼob baʼal tu contra u hahil Iglesia Cristo.

27 Le tún cah dzoʼoc u maʼn doscientos diez haʼaboʼobeʼ, anhi yaʼabcach Iglesiaoʼobeʼ; hah, dzoʼoc u yantal yaʼabcach iglesiaoʼob cu yaʼalicoʼob u kahóloʼob Cristo, chén baʼaleʼ maʼ tu bisicubaoʼob yétel yaʼab baʼaloʼob tiʼ u caʼansahil tiʼ u betiʼcoʼob beyoʼ cu chaʼicoʼob u betaal u heʼheʼlasil baʼaloʼob kastac, cah dzahoʼob u baʼaloʼob Dios tiʼ le maʼxoʼob dzoʼoc u yaʼalaʼal tiʼ maʼ cu yantal tiʼoʼ, tumen maʼ tán u nahmaʼtiʼcoʼob.

28 Le tún le iglesia heʼelaʼ yaʼabchahiʼ, yoʼolal u keban yétel yoʼolal u páhtalil Satanas maʼchic caʼach u pucsiʼkaloʼob.

29 Yan xan caʼach ulak humpʼél iglesia maʼ tu kamic Cristo; lelaʼ cu chʼaʼapachtiʼc le maʼxoʼob oc haʼaʼanoʼob ichil le u hahil iglesia Cristooʼ yoʼolal cu bisicubaoʼob tu bel yétel yoʼolal cu creertiʼcoʼob tiʼ Cristo yételeʼ hach aʼalaʼan kas tu yoʼolal le sénquech baʼal cu haʼaksic yól maʼc cu mentaal ichiloʼoboʼ.

30 Le oʼolaleʼ cu yeʼesic u páhtalil yókol le maʼcoʼob yéyaʼan tumen Jesus, pʼat yételoʼob, le oʼolal túneʼ cu dzaicoʼob ichil tuʼux kalaʼan; baʼaleʼ yoʼolal u páhtal u tʼan Hahal Dios yan yételoʼoboʼ, le tuʼux kalaʼanoʼobeʼ cu hókol caʼa hats tiʼoʼobe cu hókoloʼob tán u mentiʼcoʼob yaʼabach meyah tu yoʼolal u páhtalil Hahal Dios.

31 Chén baʼaleʼ quex tumen yan le yaʼabach baʼaloʼobaʼ bey baʼal cu haʼakal yól le cahoʼ tu cu chichcuntahoʼob kalbil u pucsiʼkaleʼ cah maʼn u quínsicoʼob, heʼex le judioʼob teʼ Jerusalenoʼ tu yóltahoʼob u quínsoʼob Jesuseʼ, tu yoʼolal u tʼanoʼ.

32 Ca tún h puʼuloʼob ichil ornoʼob tʼabaʼantaque ca hókoloʼobeʼ mixbaʼal úch tiʼoʼob.

33 Cu puʼululoʼob xan caʼach ichil dzídzic baʼalcheʼoʼobeʼ cu hoʼopʼoʼl u báxaloʼob yétel le dzídzic baʼalcheʼoʼoboʼ bey heʼebix u báxal huntúl pal yétel huntúl h tamaʼneʼ le quen hókocoʼobeʼ mixbaʼal úch tiʼoʼob.

34 Quex beyoʼ, le cahoʼ tu mentoʼob duro pucsiʼkal, tumen cu binoʼob tu pach yaʼabach sacerdote kastacoʼob yétel profetaoʼob chén tus cu betiʼcoʼob tumenoʼob yétel ca u mentoʼob tulácal u heʼheʼlasil kebanoʼob. Letiʼoʼob túneʼ tán caʼach u mentiʼcoʼob lob tiʼ u cahal Jesus; baʼaleʼu cahal Jesuseʼ maʼ tu sutah tiʼoʼob le baʼaloʼob kastacaʼ. Bey tún úchic u hach kastaloʼob maʼ tu creertoʼob tiʼ humpʼél haʼab tac ulak haʼaboʼ, tac cah maʼn doscientos treinta Haʼaboʼob.

35 Húch tún tiʼ le haʼabaʼ, beyoʼ tu haʼabil doscientos treintiʼunoeʼ h úch humpʼél nohoch hátspahal tiʼ le cahoʼ.

36 H úch tún tiʼ le haʼabaʼ h lík humpʼél cahal ca tu chʼaʼahoʼob u kabaʼoʼobeʼ u palal Nefi le heʼeloʼoboʼ letiʼoʼob le hach tu hahil cu creertiʼcoʼob tiʼ Cristooʼ; le un múchʼaʼ cu xoʼocol maʼxoʼob cu yaʼalaʼal tiʼoʼob u palal Jacob tumen u palal Laman, xan u palal Jose yétel u palal Zoram;

37 Le betiʼc túneʼ le maʼxoʼob hach tu hahil u kubmaʼh u yóloʼob tiʼ Cristooʼ yétel le maʼxoʼob hach tu hahil cu meyahtiʼc Cristooʼ (ichiloʼobeʼ tiʼ yan le óxtúl u maʼc yéyaʼan tumen Jesusiʼ, tán pʼataloʼob caʼacheʼ), cu yaʼalaʼal u palal Nefi, u palal Jacob, u palal Jose yétel u palal Zoram.

38 Úch tún le maʼxoʼob maʼ tu kamoʼob u caʼansahiloʼob Cristoeʼ cu bisicoʼob u kabaʼ yaʼalaʼal tiʼoʼobeʼ u palal Laman, u palal Lemuel yétel u palal Ismaʼel le heʼeloʼoba maʼ kátoʼob u creertoʼob, baʼaleʼ chén h sutnahoʼob tu contra u caʼansahil Cristooʼ; yételeʼ tu caʼansahoʼob tiʼ u palaloʼob maʼ u creertoʼob, heʼebix u tataoʼob tu yáx chuneʼ, pʼatoʼob u creertiʼcoʼob.

39 Tu yoʼolal tún u sen kasaʼaniloʼob yétel u kebanoʼob u tataoʼobeʼ, heʼebix tu yáx kineʼ cah caʼansaʼab tiʼoʼob u pʼectoʼob u palal Hahal Dios. Heʼebix caʼansaʼabilacoʼob u palal Laman u pʼectoʼob u palal Nefi desde tu yáx kineʼ.

40 Úch tún cah maʼn doscientos cuarentiʼcuatro haʼaboʼob; bey tún yaniʼl caʼach u baʼaliloʼob le cahoʼ. Le tún un hats kasaʼanoʼoboʼ hach anchah u mukoʼob cu maʼs hach nohochchah tiʼ u cahal Hahal Dios.

41 Baʼaleʼ lailiʼ h bin u betiʼcoʼob ulak iglesiaoʼobeʼ, cu hadzutsquiʼntiʼcoʼob yétel baʼaloʼob hadzutstac. Bey tún maʼnic doscientos cincuenta haʼaboʼoboʼ beyxann doscientos sesenta haʼaboʼob.

42 Úch un hats tiʼ le cah kasaʼanoʼ ca hoʼopʼ u caʼa betiʼc u xmucul promesaoʼob yétel u baʼaloʼob kastacoʼob Gadianton.

43 Le maʼxoʼob cu kabaʼintoʼob le u palaloʼob Nefieʼ h cáh xan u caʼanaltal u yichoʼob tumen u sén ayikaliloʼobeʼ h pʼátoʼob cu tuclicoʼob cada huntúl maʼc chén tiʼ letiʼ mismo bey heʼebix u palal Laman u sucuʼunoʼoboʼ.

44 Desde tún leloʼ ca hoʼopʼ u yókoloʼob le maʼcoʼob yéyaʼan tumen Cristo yoʼolal u keban le yokolcaboʼ.

45 Le tún cah dzoʼoc u maʼn trescientos haʼab heʼebix le u palal Nefioʼ beyxann u palal Laman h pʼátoʼob hach kasaʼanoʼob, heʼebix un cahaloʼ beyxann ulʼakoʼ.

46 Úch tún le maʼcoʼob ocoloʼob kahólaʼan bey le Gadiantonoʼob h kiʼitpahoʼob tiʼ tulácal le luʼumoʼ, u justoiloʼobeʼ chén le maʼxoʼob binoʼob tu pach Jesus. Le tún le cahoʼ ca tu molah oro yétel plata cu sén yaʼab tal yétel cu conicoʼob tulácal u heʼheʼlásil baʼaloʼob.

47 Cu dzoʼocol tún u maʼn trescientos cinco haʼaboʼobeʼ (le cahoʼ lailiʼ tiʼ u kebanoʼob yaneʼ), h quím Amos, u sucuʼun Ammaʼroneʼ, letiʼ h liʼs le historia tu yoʼolaloʼ.

48 Cu dzoʼocol u maʼn trescientos veinte haʼaboʼobeʼ, Ammaʼrone, aʼalaʼan tiʼ tumen le Pixan cu túxtiʼc Diosoʼ ca u taac le sagrado dzíboʼoboʼ, beyoʼ, tulácal le sagrado dzíboʼob kubaʼan tiʼ humpʼél profeta tac tiʼ ulʼakoʼ, tac tu haʼabil trescientos veinte haʼab dzoʼoc u tal Cristo.

49 Letiʼ túneʼ ca tu taacah utiaʼal Yumtsil yoʼolal huʼ páhtal u caʼa hókol tu caʼaten tiʼ u yalab u yotoch Jacob heʼebix aʼalaʼan yétel dzoʼoc u prometertiʼc Dioseʼ. Dzoʼoquiʼ u tʼanoʼob dzíbtaan tumen Ammaʼron.