1 Afei iyi nye nsɛm a Amulek kãa kyerɛɛ dɔm a wɔwɔ Ammonihah asaase do no, ɔse:

2 Emi nye Amulek; meyɛ Giddonah ne babanyin, ɔno nye Ishmael a ɔyɛ Aminadi n’asenyi no ne babanyin no; na dɛm Aminadi yi na ɔkyerɛɛ kyerɛwee no a Nyankopɔn dze ne nsatseaba kyerɛwee wɔ temple n’afasu no ho no ase.

3 Na Aminadi yɛ Nephi n’asenyi, ɔno nye Lehi ne babanyin no a ofii Jerusalem asaase do baa no, ɔno a ɔyɛ Joseph a no nuanom tɔɔn no ma wɔdze no kɔr Egypt no ne babanyin Manasseh n’asenyi.

4 Na hwɛ, meyɛ nyimpa bi so a me dzibew nnyɛ kakraba koraa wɔ nkorɔfo a wonyim me nyinara hɔn mu; nyew, na hwɛ, mowɔ ebusuafo nye anyɛnkofo pii, na me nam mo ndwuma do enya sika pii.

5 Naaso, iyi nyina ekyir no, nna minnyim Ewuradze n’akwan, nye n’esumasɛm nye n’anwanwa tum no. Mese dɛ nna minnyim dɛm ndzɛmba yinom yie; mbom hwɛ, mofom, osiandɛ mehu n’esumasɛm nye n’anwanwa tum no pii; nyew, mpo dɛ ɔakora dɔm yi hɔn nkwa do.

6 Naaso, mipiriim m’akoma, osiandɛ ɔfrɛɛ me mpɛn pii na menntsie, dɛm ntsi minyim dza ɔfa dɛm ndzɛmba yinom ho, naaso mammpɛ dɛ muhu; dɛm ntsi menam m’akoma n’emumuyɛdze do tseew etua wɔ Nyankopɔn do araa dze kesii bosoom a otsĩa esuon yi mu ne da a otsĩa anan no a ɔyɛ afe a otsĩa du no wɔ ber a atsɛmbuafo no dzi adze no.

7 Ber a murutu kwan akɔhwɛ mo busuanyi bi no, hwɛ Ewuradze no bɔfoe yii noho kyerɛɛ me na ɔsee dɛ: Amulek, san w’ekyir kɔ wo fie, na ebɛma Ewuradze ne nkɔnhyɛnyi edziban ma oedzi; nyew, nyimpa ɔhotsewnyi a Nyankopɔn asan mu eyi no; na ɔakye kɔm nda pii osian dɛm nkorɔfo yi hɔn bɔn ntsi, na ɔkɔm dze no, na gye no wɔ wo fie na ma no biribi ma ondzi, na obehyira ɔwo nye wo fifo; na Ewuradze ne nhyira bɛba ɔwo nye wo fifo do.

8 Na ɔbaa dɛ mitsiee ɔbɔfo no ndze, na mesaan m’ekyir dɛ morokɔ me fie. Na aber a morokɔ no muhun ɔbarimba no a ɔbɔfo no kãa kyerɛɛ me dɛ: Memfa no nkɔ me fie no—na hwɛ ɔno nye dɛm ɔbarimba yi a ɔrekã ndzɛmba a ɔfa Nyankopɔn ho kyerɛ hom yi.

9 Na ɔbɔfo no see me dɛ ɔyɛ nyimpa krɔnkrɔn; dɛm ntsi minyim dɛ ɔyɛ nyimpa krɔnkrɔn osiandɛ Nyankopɔn no bɔfoe na ɔkãa kyerɛɛ me.

10 Na minyim bio so dɛ, ndzɛmba a ɔagye ho dase no yɛ nokwar; na hwɛ mese hom dɛ, dɛ Ewuradze tse ase yi, dɛmara so mpo na ɔsomaa no bɔfoe ma ɔabɛda dɛm ndzɛmba yinom edzi akyerɛ me; na ɔyɛɛ iyi wɔ ber a Alma tse me fie no.

11 Na hwɛ, oehyira me fie, oehyira emi, nye me mbasiafo, nye me mba, na m’egya na m’ebusuafo; nyew, oehyira m’ebusuafo nyinara mpo, na Ewuradze ne nhyira egu hɛn do dɛ mbrɛ nsɛm a ɔkãa no tse pɛpɛɛpɛr.

12 Na afei, aber a Amulek kãa dɛm nsɛm yinom no, dɔm no hɔn ho hyɛɛ ase boow hɔn; ber a wohun dɛ dasefo bi so, na ɔregye dase tsia hɔn wɔ dza wɔayɛ ho, nye ndzɛmba so a ɔbɛba ho, dɛ mbrɛ nkɔnhyɛ sunsum a ɔwɔ hɔn mu no kyerɛ.

13 Naaso, nna binom wɔ hɔn mu a wɔdwen dɛ wobebisa hɔn nsɛm, ama woedua hɔn ndzebɔn ndaadaa do hɔn nsa aakã hɔn wɔ hɔn kasaa mu, ama woeenya biribi dze agye dase etsia hɔn, ama woeeyi hɔn dze ama hɔn atsɛmbuafo ma wɔnye hɔn edzi dɛ mbrɛ mbra no se, ama woeeku hɔn anaadɛ wɔdze hɔn ato efiadze, dɛ mbrɛ bɔn a wobotum akã ato hɔn do anaadɛ wɔbɛgye ho dase etsia hɔn no tse.

14 Afei dɛm nkorɔfo no a nna wɔrohwehwɛ asɛɛ hɔn no nye mbranyimfo no a dɔm no abɔ hɔn paa anaa weyiyi hɔn esi hɔ ama hɔn tum dɛ wɔmfa mbra no ndzi nkorɔfo a wɔyɛ bɔn no hɔn nsɛm ansaana wɔdze hɔn akɔ atsɛmbuafo no enyim no.

15 Afei dɛm mbranyimfo yi awea wɔ nkorɔfo no hɔn abrabɔ na ndaadaa nyinara ho; na iyi na ɔbɛma wotum edzi hɔn dwuma no yie.

16 Na ɔbaa dɛ wɔhyɛɛ ase dɛ woribisa Amulek nsɛm, ama woeetum ayɛ ma ɔatõtõ ne nsɛm no anaadɛ ɔadandan ne nsɛm a ɔbɛkã no.

17 Afei nna wonnyim dɛ Amulek botum ehu hɔn nhyehyɛɛ no. Na mbom ɔbaa dɛ ber a wɔhyɛɛ ase dɛ woribisabisa no nsɛm no, ohun hɔn adwen, na ɔsee hɔn dɛ: O hom emumuyɛfo ekyingyefo ebusuasantsen, hom mbranyimfo na enyisomakyerɛfo, hom rotow fapem dze ama abɔnsam no; osiandɛ hom rusua mfir dze apa Nyankopɔn n’ahotsewfo no.

18 Hom reyɛ nhyehyɛɛ dze akontom atseneneefo akwan, na hom dze atwe Nyankopɔn n’ebufuhyew no dze egu hom tsir do, ma ɔsɛɛ kɛse aba dɔm yi do.

19 Nyew, ne yie mu ara na Mosiah a nna ɔyɛ hɛn hen a odzi ekyir no kãe, wɔ ber a nna ɔpɛ dɛ ɔdze ahendzi no ma, na onnhu nyia a ɔmfa mma no no, ɔkyerɛɛ dɛ wɔmma dɔm yi hɔnankasa nyi nyia wɔpɛ dɛ ɔhwɛ hɔn do—nyew, ne yie mu ara na ɔkãa dɛ sɛ mber no ba ma dɔm yi fa emumuyɛ a, ɔno nye dɛ sɛ aber no ba ma dɔm yi hwe mbrato mu a, nna aber no aso dɛ wɔsɛɛ hɔn.

20 Na afei mese hom dɛ Ewuradze ebua hom yie wɔ hom bɔn ho; na oye dɛ ɔmaa n’abɔfoe dze ndze tseaa mu see dɔm yi dɛ: Hom nnu homho, hom nnu homho, na ɔsor ahenman no abɛn.

21 Nyew, na oye dɛ ɔmaa n’abɔfoe dze ndze tseaa mu dɛ: Medze pɛryɛ na pɛrpɛrdzi ribesian mo dɔm mu.

22 Nyew, na mese hom dɛ, sɛ nnyɛ atseneneefo a, wɔwɔ asaase yi do, hɔn mpaabɔ a, nkyɛ obodu aber yi wɔasɛɛ hom korakora mpo; naaso nkyɛ ɔremmfa nsuyirii, dɛ mbrɛ ɔdze yɛɛ Noah n’aber do nkorɔfo no, na mbom ɔdze ɔkɔm, nye ɔyardɔm na afõwa.

23 Mbom ɔnam atseneneefo mpaabɔ do ntsi na wɔdze hom nkwa akyɛ hom; afei dɛm ntsi, sɛ hom bɛpam atseneneefo efi hom mu a nna Ewuradze remmfa ne nsa nnto hɔ; na mbom ɔbɛba hom do wɔ n’ebufuhyew mu; na ɔkɔm, nye ɔyardɔm, na afõwa bɛtsetsew hom; na mber no abɛn gyedɛ hom nu homho.

24 Na afei ɔbaa dɛ dɔm no hɔn bo fuuw Amulek mbordo, na wɔtsẽatsẽaa mu see dɛ: Ɔbarimba yi rekasa tsia hɛn mbra a ɔtsen no, nye hɛn mbranyimfo enyansafo no a yeyiyi hɔn no.

25 Mbom Amulek tseen ne nsa mu, na ɔtseaa mu dzendzenndzen see hɔn dɛ: O hom emumuyɛfo ekyingyefo ebusuasantsen, ebɛnadze ntsi na Satan esuo hom akoma mu dzendzenndzen dɛm yi? Ebɛnadze ntsi na hom egyaa homho ama no ma oenya tum wɔ hom do, dze efura hom enyiwa, amma hom anntse nsɛm a wɔakã yi ase ma hom ehu no nokwar no?

26 Na hwɛ, ana magye dase etsia hom mbra? Hom nntse ase; hom se dɛ makasa etsia hom mbra; mbom mennkasaa nntsiae, na mbom makasa dze ama hom mbra, dze ebu hom fɔ.

27 Na afei hwɛ, mese hom dɛ, hom mbranyimfo nye hom atsɛmbuafo hɔn brakyew na wɔahyɛ ase rotow ɔsɛɛ ne fapem dze ama dɔm yi.

28 Na afei ɔbaa dɛ aber a Amulek kãa dɛm nsɛm yinom wiei no, dɔm no tseatseaa mu guu no do dɛ: Afei yehu dɛ ɔbarimba yi yɛ abɔnsam ne ba, osiandɛ oedzi ator akyerɛ hɛn; na ɔakasa etsia hɛn mbra. Na afei ɔse dɛ ɔannkasa enntsia.

29 Na ɔakasa bio so dze etsia hɛn mbranyimfo, nye hɛn atsɛmbuafo.

30 Na ɔbaa dɛ mbranyimfo no dze too hɔn tsirmu dɛ wɔbɛkaa dɛm nsɛm yi dze etsia no.

31 Na hɔn mu kor bi wɔ mu a ne dzin dze Zeezrom. Afei ɔno na ogyee n’enyim kɛse kasaa tsiaa Amulek na Alma, ɔno na ɔawea kɛse wɔ hɔn mu, ɔno na ɔwɔ dwumadzi kɛse dzi wɔ dɔm no mu.

32 Afei botae a osi mbranyimfo yinom enyi do nye dɛ wobenya hɔnho; na wɔnam hɔn dwumadzi do nya hɔnho.