1 Ha avei, che joykeʼykuéra, che amoĩse pene apytuʼũme umi ára mombyry Tupã Ñandejára omeʼẽramoguare koʼã tembiapoukapy itaʼyrakuérape; ha che aipota penemanduʼa Tupã Ñandejára oʼordenahague sacerdotekuéra, hiʼórden marangatu rupive, haʼéva Itaʼýra orden rupive, omboʼe hag̃ua koʼã mbaʼe tavayguakuérape.

2 Ha umi sacerdote oñeʼordena Itaʼýra órden rupive, oikuaauka hag̃uáicha tavayguakuérape mbaʼéichapa ohaʼarõ mbaretevaʼerã hikuái Itaʼýrape ohupyty hag̃ua hikuái rredensiõ.

3 Ha péicha oñeʼordena chupekuéra—oñehenóivo ha oñembosakoʼívo yvóra ñepyrũmby guive pe Tupã oikuaaháicha, ijerovia mbarete ha hembiapo porãkuéra rupi; ojeheja raẽvo chupekuéra oiporavo hag̃ua iporã térã ivaíva; upévare oiporavóvo hikuái iporãva, ha omombaʼapóvo hikuái tuicha jerovia, oñehenói chupekuéra peteĩ ñehenói marangatúpe, heẽ, peteĩ ñehenói marangatu oñembosakoʼi haguépe hikuái, ha upéva reheguápe, peteĩ rredensiõ ñembosakoʼirã chupekuéra g̃uarã.

4 Ha péicha oñehenói chupekuéra ko ñehenói marangatúpe ijerovia rupi, ha katu ambuekuéra orrechasákuri Tupã Espíritu ikorasõkuéra atãgui ha iñapytuʼũnguéra ndohecháigui, ha katu ndahaʼéirire koʼãvare haʼekuéra oguerekovaʼerãmoʼã tuichaite mbaʼe porã ijoykeʼykuéraicha.

5 Térã ipahápe, iñepyrũmbýpe oĩkuri hikuái ijoykeʼykuéra oĩháme; péicha ko ñehenói marangatu oñembosakoʼíkuri yvóra ñepyrũmby guive umi nomohatãivape g̃uarã ikorasõ, haʼévo pe Taʼýra Unihénito expiasiõ rupive, oñembosakoʼivaʼekue—

6 Ha upéicha oñehenói chupekuéra ko ñehenói marangatu rupive, ha oñeʼordena chupekuéra pe sumo sacerdocio Tupã orden marangatúpe, omboʼe hag̃ua hembiapoukapykuéra yvypóra raʼykuérape, oike hag̃ua avei hikuái ipytuʼúpe.

7 Ko sumo sacerdocio haʼe Itaʼýra ordenpeguáicha, orden oĩvaʼekue yvóra ñepyrũmby guive; térã ambue ñeʼẽme, ndoguerekóiva ára ñepyrũmby ni ary paha, oñembosakoʼíva ára apyraʼỹgui ára apyraʼỹmeve, opa mbaʼe haʼe oikuaaháicha.

8 Koʼág̃a péicha oñeʼordena chupekuéra—Oñehenói chupekuéra peteĩ ñehenói marangatu reheve, ha oñeʼordena peteĩ ordenánsa marangatúpe, ha ojagarra hikuái hiʼári pe sumo sacerdocio pe orden marangatu rehegua; ha kóva ko ñehenói, ordenánsa ha sumo sacerdocio ndoguerekói ñepyrũmby ni ipaha—

9 Upéicha oiko chuguikuéra sumo sacerdote tapiaite g̃uarã, pe Taʼýra órden rupive, pe Túva Unihénito, ndoguerekóiva ára ñepyrũmby ni ary paha, henyhẽva grásia, joja, ha añetégui. Ha upéicha amén.

10 Koʼág̃a, haʼe haguéicha pe órden marangatu rehe, térã ko sumo sacerdocio rehe, oĩkuri heta oñeordenavaʼekue ha oiko chuguikuéra Tupã sumo sacerdote; ha péva haʼe tuicha jerovia ha iñarrepentimiénto rupi, ha hekojoja rupi hikuái Tupã renondépe, oiporavógui hikuái oñearrepenti ha hembiapo joja omanorangue;

11 Upévare oñehenoivaʼekue chupekuéra ko órden marangatu rupive, ha oñemomarangatu chupekuéra, ha ijaokuéra oñemomorotĩ pe Cordero ruguy rupive.

12 Koʼág̃a haʼekuéra, oñemomarangatu rire pe Espíritu Santo rupive, oñemomorotĩvo ijaokuéra, ojejuhúvo hikuái potĩ ha maraʼỹme Tupã renondépe, ndaikatúi ohecha hikuái angaipa ndahaʼéirõ jeguaru reheve; ha oĩ heta, hetaiterei, oñemopotĩva ha oikéva Ñandejára Itupã pytuʼúpe.

13 Ha koʼág̃a, che joykeʼykuéra, che aipota peñemomirĩ Tupã renondépe, ha pemeʼẽ yva joja arrepentimientorã, peike hag̃ua avei peẽ upe pytuʼúpe.

14 Heẽ, peñemomirĩ jepe Melquisedec tavayguakuéra arapeguáicha, haʼevaʼekue avei peteĩ sumo sacerdote, ko orden añeʼẽhague reheguáicha, ojagarravaʼekue avei hiʼári pe sumo sacerdocio tapiaite g̃uarã.

15 Ha kóva haʼe pe Melquisedec Abraham ohepymeʼẽvaʼekuépe diesmokuéra; heẽ, jepe ñande ru Abraham ohepymeʼẽ diésmoramo peteĩ désimo pehẽngue opa mbaʼe oguerekóvagui.

16 Koʼág̃a koʼã ordenánsa oñemeʼẽvaʼekue kóicha, upéicha rupi tavayguakuéra ohaʼarõ hag̃ua kyreʼỹme Tupã Raʼýpe, haʼévo hiʼórden raʼanga, térã haʼe hiʼórden, ha kóva haʼekuéra ohaʼarõ hag̃ua chupe kyreʼỹme iñangaipa jorarã, oike hag̃ua hikuái Ñandejára pytuʼúpe.

17 Koʼág̃a ko Melquisedec haʼevaʼekue rréi Salem retãme; ha itavayguakuéra oñemombaretevaʼekue tembiapovai ha tembiapokyʼápe; heẽ opavave hikuái okañymba; henyhẽ hikuái opáichagua tembiapoñañágui;

18 Ha katu Melquisedec omombaʼapóvo peteĩ jerovia mbarete, ha oñemeʼẽvo chupe pe sumo sacerdocio rembiapo Tupã órden marangatu rupive, omboʼe pe arrepentimiénto itavayguakuérape. Ha péina ápe, haʼekuéra oñearrepenti; ha Melquisedec omoĩ hiʼárape pyʼaguapy upe tétãme; upévare haʼe oñehenói príncipe de paz, haʼégui haʼe pe Salem-rréi; ha orreina itúva poguýpe.

19 Koʼág̃a, oĩkuri heta haʼe mboyve, ha avei oĩkuri heta haʼe rire, ha katu avave ndatuichavéi chugui; upévare, oñeʼẽve hese hikuái.

20 Koʼág̃a che naikotevẽi amombeʼupaite upe mbaʼe; umi haʼevaʼekue iporãma. Péina ápe, peguereko umi escritura penerenondépe; ha pemokarẽséramo haʼéta peneñehundirã.

21 Ha ojehu Alma heʼívo chupekuéra koʼã ñeʼẽ, oipyso ipo chupekuéra gotyo ha osapukái ñeʼẽ mbaretépe, heʼívo: Koʼág̃a haʼe ára peñearrepenti hag̃ua, pe salvasiõ ára hiʼag̃uímagui.

22 Heẽ, ha Ñandejára ñeʼẽ, angelkuéra juru rupi, heʼi opa tetãme; heẽ, heʼi koʼãva, oguereko hag̃ua hikuái mbaʼe porã pyahu tuicha vyʼarã; heẽ, ha heʼi koʼã mbaʼe porã pyahu opa itavayguakuéra apytépe, heẽ, jepe umi oñemosarambívape yvy ape ári; upévare og̃uahẽ ñandéve umíva.

23 Ha ojeikuaauka ñandéve tesakãme, ñaikũmby hag̃ua, ani hag̃ua jajavy; ha ojejapo péicha ñande haʼégui okañýva peteĩ tetã ndahaʼéiva ñane mbaʼépe; upévare, jajehovasaiterei, ojeʼégui ñandéve koʼã mbaʼe porã pyahu opárupi ñane víñápe.

24 Ha péina ápe, angelkuéra omombeʼu hína umíva hetápe ñane retãme ko árape; ha péva ombosakoʼi hag̃ua yvypóra raʼykuéra korasõ ohupyty hag̃ua iñeʼẽ pe ára haʼe ou vove iverapýpe.

25 Ha koʼág̃a ñande niko ñahaʼarõnte ñahendu umi mbaʼe porã pyahu ojeʼéva ñandéve angelkuéra juru rupi ijeju rehe; ára oúgui, ha ndajaikuaái arakaʼetétapa. Toipota Tupã tahaʼe che árape; ha katu tahaʼe voi térã areve, umívape che avyʼáta.

26 Ha ojeikuaaukáta yvypóra ijoja ha imarangatúvape, angelkuéra juru rupi, ára haʼe ou vove, oñekumpli hag̃ua ñande rukuéra ñeʼẽ, umi ñeʼẽme haʼekuéra oñeʼẽvaʼekue hese heʼiháicha, haʼevaʼekue pe espíritu rehegua profesía oĩva ipypekuéra rupive.

27 Ha koʼág̃a, che joykeʼykuéra, che aipota che korasõ mbytete guive, heẽ, tuicha mbaʼepotápe jepe hasy peve chéve, pehendu che ñeʼẽ, ha pemombo pene angaipakuéra, ha ani pemohaʼarõ ára peñearrepenti hag̃ua;

28 Ha katu peñemomirĩ Ñandejára renondépe, ha pehenói héra marangatu, ha pemaña ha peñemboʼe meme, ani hag̃ua pejeipyʼaraʼãve ikatúva pegueropuʼakágui, he péicha pejegueraha hag̃ua pe Espíritu Santo rupive, peñemomirĩvo, penerekomarangatúvo, peneñeʼẽrendúvo, pehaʼarõkuaávo, penerenyhẽvo mborayhu ha pyʼaporãgui;

29 Peguerekóvo jerovia Ñandejárare; peguerekóvo ñehaʼarõ pehupytytaha tekove opaveʼỹva; peguerekóvo tapiaite Tupã mborayhu pene korasõme, ára pahápe peñemopuʼã hag̃ua ha peike hag̃ua ipytuʼúpe.

30 Ha Ñandejára toheja peẽme peñearrepenti, ani hag̃ua pegueru iñekoʼõi pende ári, ani hag̃ua pejejokua añaretã sãme, ani hag̃ua pehasa pe ñemano mokõiha.

31 Ha Alma oñeʼẽ hetave ñeʼẽ tavayguakuérape, ndojehaíriva ko kuatiañeʼẽme.