1 Koʼág̃a jahajeýta ñande kuatiajehaipyrépe Amalickíah ha umi okañyvaʼekuépe hendive taveʼỹme; ha, péina ápe, haʼe ojagarrákuri umi ohovaʼekue hendivépe, ha oho Nefi retãme lamanita-kuéra apytépe, ha omokyreʼỹ lamanita-kuérape pochyrã nefita-kuéra rehe, upéicha rupi lamanita-kuéra rréi omondo peteĩ momarandu opa hetã tuichakue, opa itavayguakuéra apytépe, oñembyaty jey hag̃ua hikuái oho hag̃ua ñorairõme nefita-kuéra rehe.

2 Ha ojehu pe momarandu oho rire opavave ijapytepekuéra okyhyjeterei hikuái; heẽ, okyhyje hikuái ombopochýramo g̃uarã upe rréipe, ha avei okyhyje hikuái oho hag̃ua ñorairõme nefita-kuéra rehe ani ojeipeʼa chuguikuéra hekove. Ha ojehu ndoipotái hikuái, térã hetave ijapytepekuéra naiñeʼẽrenduséi upe rréi rembiapoukapykuérare.

3 Ha koʼág̃a ojehu pe rréi oñekoʼõi naiñeʼẽrendúi haguére hikuái; upévare omeʼẽ Amalickíah-pe oisãmbyhy hag̃ua umi ijehérsito apytégui iñeʼẽrenduvaʼekue hembiapoukapykuérare, ha heʼi chupe toho ha tojopy chupekuéra ojagarra hag̃ua umi árma.

4 Koʼág̃a péina ápe, kóva haʼe Amalickíah oipotáva; haʼégui peteĩ kuimbaʼe ikatupyrýva mbaʼevairã upévare ojapo ikorasõme peteĩ plan oipeʼa hag̃ua lamanita-kuéra rréipe ijapykajeguágui.

5 Ha koʼág̃a haʼe ohupytýkuri puʼaka oisãmbyhy hag̃ua umi lamanita-kuéra rréi ndive oĩvape; ha oheka oñemoĩporã umi naiñeʼẽrendúiva ndive; upévare oho tenda hérava Onida-pe, upépe okañýgui opa lamanita-kuéra; oikuaágui hikuái oñemoag̃uiha hína pe ehérsito, ha oimoʼãgui hikuái ouha ohundi hag̃ua chupekuéra, upévare okañy hikuái Onida-pe, oĩháme umi árma.

6 Ha ohenóikuri hikuái peteĩ kuimbaʼe haʼe hag̃ua rréi ha mburuvicha hiʼarikuéra, omoĩvo hikuái iñapytuʼũmekuéra peteĩ mbaʼe ñemovãʼỹ ndojejopymoʼãiha chupekuéra oñemoĩ hag̃ua nefita-kuéra rehe.

7 Ha ojehu oñembyatýkuri hikuái peteĩ yvyty hérava Antipas ruʼãme, oñembosakoʼívo ñorairõrã.

8 Koʼág̃a, ndahaʼéi Amalickíah oikeséva ñorairõme hendivekuéra heʼi haguéicha upe rréi; ha katu péina ápe, pe haʼe oipotáva haʼe oñemoĩporã lamanita-kuéra ehérsito ndive, oisãmbyhy hag̃ua chupekuéra ha oipeʼa hag̃ua ijapykajegua upe rréigui ha ojagarra hag̃ua upe rréino.

9 Ha péina ápe, ojehu ojapo ijehérsito omoĩ hogaaokuéra pe yvytypaʼũ oĩva yvyty Antipas ypýpe.

10 Ha ojehu og̃uahẽvo pyhare omondo peteĩ aty ñemi yvyty Antipas-pe, ojerurévo umi oĩva pe yvyty ruʼã ári mburuvichápe, hérava Lehonti, oguejy hag̃ua pe yvyty rembeʼýpe, haʼe oñeʼẽségui hendive.

11 Ha ojehu Lehonti oikuaávo pe momarandu noñanimái oguejývo pe yvyty guýpe. Ha ojehu Amalickíah omondojey chupe mokõiha momarandu, ojerurévo chupe oguejy hag̃ua. Ha ojehu Lehonti ndoguejyséi; ha haʼe omondo mbohapyha jey.

12 Ha ojehu Amalickíah ohechávo ndaikatuiha omboguejy Lehonti-pe pe yvytýgui, haʼe ojupi pe yvyty ruʼãme, haimete Lehonti ñu meve; ha omondo jey irundyha momarandu Lehonti-pe, oipotágui haʼe oguejy, ha togueru hendive iñangarekoharakuéra.

13 Ha ojehu Lehonti oguejývo iñangarekoharakuéra ndive oĩháme Amalickíah, ko Amalickíah heʼi chupe oguejy hag̃ua pyharekue ijehérsito reheve, ha omongora hag̃ua oĩháme umi rréi omeʼẽvaʼekue chupe oisãmbyhy hag̃ua, ha omeʼẽtaha chupekuéra Lehonti pópe, haʼe omoĩramo chupe (Amalickíah) mburuvicha mokõiháramo opa upe ehérsito ári.

14 Ha ojehu Lehonti oguejy ijehersitokuéra ndive ha omongora hikuái Amalickíah ehersitokuérape, ha upéicha opuʼã mboyve hikuái koʼẽtĩvo ojeréma hesekuéra Lehonti ehersitokuéra.

15 Ha ojehu ñemongorápe ojejuhúvo hikuái, ojerureʼasy Amalickíah-pe oheja hag̃ua chupekuéra ojoaju hikuái ijoykeʼykuéra ndive, ani hag̃ua oñehundi chupekuéra. Koʼág̃a péva haʼe pe mbaʼe Amalickíah oipotavaʼekue.

16 Ha ojehu omeʼẽ ijehersitokuérape, oñemoĩvo upe rréi heʼivaʼekuére. Koʼág̃a kóva haʼe Amalickíah oipotavaʼekue, ojapo hag̃ua haʼe ojaposéva oipeʼávo ijapykajeguágui upe rréipe.

17 Koʼág̃a haʼékuri lamanita-kuéra jepokuaa, ojejukáramo huvicha guasukuéra, ohenói hikuái pe mburuvicha mokõihápe hendaguépe mburuvicha guasúramo.

18 Ha ojehu Amalickíah ojapouka peteĩ hembiguáipe tomeʼẽ saʼi saʼi venéno Lehonti-pe, omano meve.

19 Koʼág̃a, Lehonti omano rire, lamanita-kuéra ohenói Amalickíah-pe imburuvicha ha tendota guasúramo.

20 Ha ojehu Amalickíah oho ijehersitokuéra reheve (ohupytýgui oipotavaʼekue) Nefi retãme, Nefi tavaguasúpe, haʼéva hína tavaguasu oñemombaʼeguasuvéva.

21 Ha pe rréi osẽ iñangarekoharakuéra reheve ohug̃uaitĩ hag̃ua chupe, oimoʼãgui haʼe Amalickíah okumplihague hembiapoukapykuéra, ha Amalickíah ombyatyhague tuichaite ehérsito oho hag̃ua hikuái ñorairõme nefita-kuéra rehe.

22 Ha katu péina ápe, osẽvo pe rréi ohug̃uaitĩ hag̃ua chupe Amalickíah ojapouka hembiguaikuéra tosẽ ojotopa hag̃ua pe rréi ndive. Ha oho ha oñesũ hikuái upe rréi renondépe, omomorãramog̃uáicha hikuái chupe tuicha haguére.

23 Ha ojehu upe rréi oipyso ijyva omopuʼã hag̃ua chupekuéra, ojejepokuaaháicha lamanita-kuéra apytépe, ojehechauka hag̃ua pyʼaguapy, jepokuaa ojagarravaʼekue hikuái nefita-kuéragui.

24 Ha ojehu omopuʼã vove yvýgui upe peteĩme, péina ápe haʼe oikutu rréipe ikorasõme; ha haʼe hoʼa yvýpe.

25 Koʼág̃a pe rréi rembiguaikuéra oñani; ha Amalickíah rembiguaikuéra osapukái, heʼívo:

26 Péina ápe, umi rréi rembiguaikuéra oikutu chupe ikorasõme, ha hoʼa ha haʼekuéra oñani; péina ápe, peju ha pehecha.

27 Ha ojehu Amalickíah heʼi ijehersitokuérape oho hag̃ua ha ohecha mbaʼépa ojehu rréipe; ha og̃uahẽvo hikuái upe tendápe, ha ojuhúvo pe rréi huguypaha, Amalickíah ojapo oñekoʼõietereiramoguáicha, ha heʼi: Opavave ohayhuvaʼekue upe rréipe, tosẽ, ha tomuña hembiguaikuérape ojuka hag̃ua chupekuéra.

28 Ha ojehu opavave ohayhuvaʼekue pe rréipe, ohendúvo koʼã ñeʼẽ, osẽ ha omuña umi rréi rembiguáipe.

29 Koʼág̃a, umi rréi rembiguái ohechávo omuñaha chupekuéra peteĩ ehérsito, henyhẽ jey hikuái kyhyjégui, ha okañy taveʼỹme, ha og̃uahẽ hikuái Zarahemla retãme ha ojoaju Ammón tavayguakuéra ndive.

30 Ha pe ehérsito omuñavaʼekue chupekuéra ojevyjey, ohorei rire hapykuerikuéra; ha péicha Amalickíah, ijapu rupi, oñemombaʼe tavayguakuéra korasõre.

31 Ha ojehu upe koʼẽme oike Nefi tavaguasúpe ijehersitokuéra ndive, ha ojagarra upe tavaguasu.

32 Ha koʼág̃a ojehu pe rréina, ohendúvo rréi ojejukahague—Amalickíah omondóguikuri peteĩ aty omombeʼu hag̃ua rréinape ojejukahague rréi hembiguaikuérare, ha haʼe omuñahague chupekuéra ijehérsito reheve, ha katu reihague, okañýgui haʼekuéra—

33 Upévare, pe rréina oikuaávo ko marandu ombohovái Amalickíah-pe, ojerurévo chupe operdona hag̃ua hekove umi yvypóra tavaguasuguápe; ha avei heʼika chupe ou hag̃ua hendápe; ha avei ojerure chupe ogueru hag̃ua testígo hendive pe rréi ñemano rehegua.

34 Ha ojehu Amalickíah ogueraha pe tembiguái ojukavaʼekue upe rréipe, ha opavave oĩvaʼekue hendive, ha oike hikuái rréina oĩháme, pe tenda haʼe oguapyhápe; ha opavave haʼekuéra otestifika chupe hembiguaikuéra ojukahague rréipe; ha haʼekuéra heʼi avei: Oñani hikuái; ndotestifikái piko kóva hesekuéra? Ha péicha omoañete hikuái rréinape upe rréi jejuka reheguáre.

35 Ha ojehu Amalickíah oñehaʼã oñemoĩporã pe rréina ndive, ha ojagarra chupe hembirekorã; ha péicha ijapu rupi, ha hembiguaikuéra katupyry pytyvõ rupi, haʼe ohupyty upe rréino; heẽ, ojeikuaa chupe rréiramo opa upe tetãme, opa lamanita tavayguakuéra apytépe, haʼéva lamanita, ha lemuelita ha ismaelita-kuéra, ha opa nefita-kuéragui osẽvaʼekue, Nefi rreinádo guive ko ára peve.

36 Koʼág̃a koʼã osẽvaʼekue, oguerekóvo nefita-kuéra tekomboʼe ha kuaapy, heẽ, oñehekomboʼégui chupekuéra peteĩcha Ñandejára jeikuaápe, upevére, mbaʼeguasu ñamombeʼu, ndaʼaréi osẽ rire hikuái ipyʼahatãve ha ipireʼatãve hikuái, ha iñarõve, iñañave ha hesaiteve lamanita-kuéragui—oñapymi meve hikuái lamanita-kuéra jepokuaápe; oñemeʼẽvo tekoreípe, ha opáichagua tekotieʼỹme; heẽ, hesaraipaitévo Ñandejára Itupãgui.