1 Koʼág̃a Ammón ha ijoykeʼykuéra ojeívo ojuehegui lamanita-kuéra retã rembeʼýpe, péina ápe Aarón oñepyrũ iguata upe tetã umi lamanita-kuéra ohenóiva Jerusalén gotyo, oñembohérava péicha upe tetãre ituvakuéra heñói haguépe; ha opyta mombyry, Mormón rembeʼýpe.

2 Koʼág̃a lamanita ha amalekita-kuéra ha Amulón tavayguakuéra omopuʼãkuri peteĩ tavaguasu tuicháva, hérava Jerusalén.

3 Koʼág̃a lamanita-kuéra ijeheguintevoi ipyʼahatã, ha katu amalekita ha amulonita-kuéra ipyʼahatãvéntema; upévare haʼekuéra omohatã lamanita-kuéra korasõ, imbareteve hag̃ua hikuái hekoñaña ha hembiapovaípe.

4 Ha ojehu Aarón og̃uahẽ Jerusalén retãme, ha oñepyrũ omboʼe amalekita-kuérape raẽ. Ha oñepyrũ omboʼe chupekuéra isinagógape, omopuʼãgui hikuái sinagogakuéra, Nehor-kuéra atypeguáicha; heta amalekita ha amulonita-kuéra haʼégui Nehor atypegua.

5 Upévare, oikévo Aarón peteĩ isinagogakuérape omboʼe hag̃ua tavayguakuérape, ha oñeʼẽ aja chupekuéra, péina ápe opuʼã peteĩ amalekita ha oñepyrũ oñorairõ hendive, heʼívo: Mbaʼe piko upe retestifikáva? Rehecha piko raʼe nde peteĩ ángel? Mbaʼére piko angelkuéra ndojehechaukái oréve? Péina ápe naiporãi piko koʼã tavayguakuéra nde tavayguakuéraicha avei?

6 Nde ere avei, noroñearrepentíriramo romanotaha. Mbaʼéicha piko nde reikuaa pe ore korasõ jeipyʼamongeta ha temiandu? Mbaʼéicha piko reikuaa roguerekoha mbaʼérepa roñearrepentivaʼerã? Mbaʼéicha piko reikuaa ore ndahaʼeiha peteĩ tavayguakuéra hekojojáva? Péina ápe, romopuʼãkuri santuario-kuéra, ha roñembyaty rotupaitũ hag̃ua Tupãme. Ore roguerovia Tupã osalvataha opa yvypórape.

7 Koʼág̃a Aarón heʼi chupe: Egueroviápa nde Tupã Raʼy outaha orredimi hag̃ua yvyporakuérape iñangaipágui?

8 Ha pe kuimbaʼe heʼi chupe: Ndorogueroviái nde reikuaaha umi mbaʼe. Ore ndorogueroviái umi jepokuaa tavy. Ndorogueroviái nde reikuaaha mbaʼe ouvaʼrãgui, ni ndorogueroviái nde rukuéra ni ore ru oikuaahague umi mbaʼe oñeʼẽvaʼekue hikuái, umi oútavagui.

9 Koʼág̃a Aarón oñepyrũ omyesakã chupekuéra escritura oñeʼẽva Cristo jeju rehe, ha avei omanovaʼekue jeikovejey rehe, ha ndaiporimoʼãiha rredensiõ pe yvyporakuérape g̃uarã ndahaʼéiramo pe Cristo ñemano ha jehasaʼasy, ha huguy expiatório rupive.

10 Ha ojehu oñepyrũvo omyesakã chupekuéra koʼã mbaʼe ipochy hikuái hendive, ha oñepyrũ oñembohory hese; ha nohenduséi hikuái umi ñeʼẽ heʼíva chupekuéra.

11 Upévare, ohechávo nohenduseiha hikuái iñeʼẽ, haʼe osẽ isinagógagui, ha oho peteĩ tapỹi hérava Ani-Anti-pe, ha upépe ojuhu Muloki-re omboʼéva hína chupekuéra pe ñeʼẽ; ha avei Amma ha ijoykeʼykuérape. Ha heta ndive oñorairõ hikuái upe ñeʼẽ rehe.

12 Ha ojehu ohecha hikuái tavayguakuéra omohatãha ikorasõkuéra, upévare osẽ ha oho hikuái Middoni retãme. Ha omboʼe hikuái hetápe upe ñeʼẽ, ha mbovy oguerovia umi ñeʼẽ omboʼevaʼekue hikuái.

13 Upevére, Aarón ha ijoykeʼykuéra oĩva hendive apytégui ojejagarra ha ojeity kaʼirãime, ha hembyrekuéra oñani Middoni retãgui ha oho umi yvy oĩva ijerérepe.

14 Ha umi oñemoĩvaʼekue kaʼirãime ohasa heta mbaʼe, ha oñemosãso Lamoni ha Ammón po rupi, ha oñemongaru ha oñemonde chupekuéra.

15 Ha osẽ jey hikuái omboʼe hag̃ua pe ñeʼẽ, ha péicha oñemosãso peteĩha jave chupekuéra kaʼirãigui, ha péicha ohasaʼasýkuri hikuái.

16 Ha oho hikuái oguerahahápe chupekuéra Ñandejára Espíritu, omboʼévo Tupã ñeʼẽ opa amalekita sinagógape, térã opa lamanita-kuéra atyguasúpe oñemog̃uahẽhápe chupekuéra.

17 Ha ojehu Ñandejára oñepyrũ ohovasa chupekuéra, ha upéicha ogueru hikuái hetápe añetegua jeikuaápe; heẽ, okonvense hikuái hetápe iñangaipágui, ha ituvakuéra jepokuaa oĩ vaiha.

18 Ha ojehu Ammón ha Lamoni oujey Middoni retãgui Ismael retãme, haʼéva ijyvy jehejapyre.

19 Ha rréi Lamoni ndohejaséi Ammón oipytyvõ chupe, térã oiko hembiguáiramo.

20 Ha katu omopuʼãka sinagogakuéra Ismael retãme; ha ojapo itavayguakuéra, térã umi haʼe oisãmbyhýva oñembyaty.

21 Ha ovyʼa hendivekuéra, ha omboʼe chupekuéra heta mbaʼe. Ha avei heʼi chupekuéra haʼeha hikuái tavayguakuéra oĩva ipoguýpe, ha haʼeha hikuái peteĩ tavayguakuéra isãsóva, isãsoha hikuái upe rréi, itúva, jejopýgui; itúva ohejáguikuri chupe oisãmbyhy tavayguakuéra oĩva Ismael retãme ha opa pe tetã jerére.

22 Ha avei heʼi chupekuéra oitupaitũkuaaha hikuái Ñandejára Itupãme haʼekuéra oipotaháicha, opa tenda oĩháme hikuái, oĩramo tetã haʼéva rréi Lamoni oisãmbyhyhápe.

23 Ha Ammón omboʼe rréi Lamoni tavayguakuérape; ha ojehu haʼe omboʼe chupekuéra opa mbaʼe haʼéva tekojoja rehegua. Ha oñemoñeʼẽ porã chupekuéra jesarekópe opa ára; ha haʼekuéra ojapysakaporã iñeʼẽre, ha hakateʼỹ hikuái iñeʼẽrendúvo Tupã rembiapoukapykuérare.