1 O haʼérire che peteĩ ángel, ha oñemeʼẽrire chéve che korasõ oipotáva, asẽ ha añeʼẽ hag̃ua Tupã trompéta reheve, peteĩ ñeʼẽ yvy omboryrýiva reheve, ha asapukái pe arrepentimiénto opa tavayguakuérape!

2 Heẽ, che amombeʼuvaʼerã opa ángape, ñeʼẽ arasunumeguáicha reheve, pe arrepentimiénto ha pe plan rredensiõ reheguágui, oñearrepentivaʼerãha hikuái ha ou ñande Tupãme, anive hag̃ua oĩve vyʼaʼỹ opa yvy ape ári.

3 Ha katu péina ápe, che haʼe peteĩ yvypóra, ha ajapo angaipa pe che aipotávape; avyʼavaʼerãmoʼágui umi mbaʼe Ñandejára omeʼẽvaʼekue chéve reheve.

4 Che namyangekoivaʼerãmoʼã che rembipotápe peteĩ Tupã hekojojáva rembiapouka, aikuaágui haʼe omeʼẽha yvyporakuérape haʼekuéra oipotaháicha, tahaʼe ñemano térã jeikoverã; heẽ, che aikuaa haʼe omeʼẽha yvyporakuérape, heẽ, omeʼẽ chupekuéra tembiapouka ndaikatúiva oñemoambue, haʼekuéra oipotaháicha, tahaʼe salvasiõ térã ñehundirã.

5 Heẽ, ha aikuaa iporãva ha ivaíva oĩha opa yvypóra renondépe; ha pe ndohechakuaáiva iporãva ivaívagui oĩ kulpaʼỹre; ha katu pe oikuaáva iporãva ha ivaíva, pévape oñemeʼẽ oipotaháicha, tahaʼe oipotárõ iporã térã ivaíva, jeikove térã ñemano, vyʼa térã pyʼajejopy.

6 Koʼág̃a, che aikuaávo koʼã mbaʼe, mbaʼére piko ajaposevéne ambue mbaʼe ambaʼaporangue tembiapo añehenói haguépe?

7 Mbaʼére piko haʼeséne peteĩ ángel, añeʼẽ hag̃ua opa tetã opaha peve?

8 Péina ápe, Ñandejára ohejágui opa tetãme, hetã ha iñeʼẽgui, tomboʼe iñeʼẽ, heẽ, arandúpe, opa haʼe ohecháva iporãha oguereko hikuái; upévare jahecha Ñandejára oñemoñeʼẽha arandúpe, pe ijoja ha añeteguáva heʼiháicha.

9 Che aikuaa Ñandejára heʼivaʼekue chéve, ha umívape cherory. Ha che ndacherorýi chejehe, ha katu cherory pe Ñandejára heʼivaʼekuépe chéve; heẽ, ha kóva haʼe cherory, ikatu mbaʼéramo che haʼe peteĩ tembiporu Tupã pópe agueru hag̃ua oimeraẽ ángape arrepentimiéntope; ha kóva haʼe che vyʼa.

10 Ha péina ápe, ahechávo heta che joykeʼykuéra oñearrepenti añetéva, ha oúva Ñandejára Itupãme, che ánga henyhẽ vyʼágui; upérõ chemanduʼa Ñandejára ojapovaʼekue cherehe, heẽ, jepe ohenduhague che ñemboʼe; heẽ, upérõ chemanduʼa ijyva poriahuvereko oipysohague chéve.

11 Heẽ, ha chemanduʼa avei che rukuéra ñeñapytĩmbýre; añetehápe che aikuaágui Ñandejára omosãsohague chupekuéra ñeñapytĩmbýgui, ha péicha rupi omoĩkuri itupao; heẽ, Tupã Ñandejára, pe Abraham Tupã, Isaac Tupã, ha Jacob Tupã, omosãsovaʼekue chupekuéra ñeñapytĩmbýgui.

12 Heẽ, che, tapiaite chemanduʼáva che rukuéra ñeñapytĩmbýre; ha pe Tupã omosãsovaʼekue chupekuéra egipcio-kuéra pógui omosãso avei chupekuéra ñeñapytĩmbýgui.

13 Heẽ, ha upéva upe Tupã omoĩkuri itupao ijapytepekuéra; heẽ, ha upéva upe Tupã cherenóikuri peteĩ ñehenói marangatu rupi, amboʼe hag̃ua pe ñeʼẽ ko tavayguakuérape, ha omeʼẽkuri chéve heta poʼa, ha koʼãvape che vyʼa henyhẽ.

14 Ha katu ndavyʼái che poʼa añórente, ha katu che vyʼa henyhẽve che joykeʼykuéra, ojupivaʼekue Nefi retãme poʼáre.

15 Péina ápe, ombaʼapo hetaitereíkuri hikuái, ha ogueru heta yva; ha tuichaitéta piko iñemyengovia!

16 Koʼág̃a, ajepyʼamongetáramo koʼã che joykeʼy poʼa rehe che ánga ojupi, ojeitaramoguáicha che retégui, tuichaite niko che vyʼa.

17 Ha koʼág̃a toheja Tupã koʼã, che joykeʼykuéra, toguapy Tupã rréinope; heẽ, ha avei opavave umi haʼéva hembiapokuéra yva, anivéma hag̃ua osẽ hikuái, ha katu omomorã hag̃ua hikuái chupe tapiaite. Ha toheja Tupã tojejapo che añeʼẽ haguéicha, jepe che haʼe haguéicha. Amén.